„SAN unu o du nanga den?”, na so George Naish aksi. A ben e sori go na wan ipi postu. Den ben langa 18 meter èn den ben de na ini wan maksin na ini Saskatoon, Saskatchewan, na Kanada. Den piki en taki den postu disi ben de fu bow toren na a pisi ten fu a Fosi Grontapufeti. Brada Naish taki bakaten: „Di mi si den udu, mi prakseri taki a ben o bun fu meki toren di wi gwenti si na den radio-station. Na so mi kisi a denki fu opo wan radio-station pe sma ben kan arki sani fu na organisâsi fu wi.” Baka wán yari so, a radio-station CHUC bigin drai na ini 1924. A ben de wan fu den fosi radio-station na ini Kanada pe sma ben kan yere sani di abi fu du nanga Bijbel.

Kanada bigi a srefi leki Europa. Na a ten dati a ben makriki gi furu sma fu arki a bun nyunsu na radio. Florence Johnson, di ben e wroko na a radio-station na ini Saskatoon, taki: „Den sani di wi ben e taki na radio gi furu sma di wi no ben man miti na ini a preikiwroko, na okasi fu arki a bun nyunsu. Na a ten dati radio ben de wan nyun sani. Sobun, den sma ben wani arki iniwan sani di ben de na radio.” Na a pisi ten fu 1926, den Bijbel Ondrosukuman (soleki fa den ben e kari Yehovah Kotoigi fosi) ben abi den eigi radio-station na ini fo foto na Kanada. *

Efu yu ben de na Kanada na a ten dati, san yu ben o yere na den radio-station disi? We, yu ben o yere fa wan tu brada nanga sisa fu den gemeente na ini a birti ben e singi èn e prei poku. Son tron den ben e du disi nanga wan moro bigi grupu srefi. A no de fu taki dati brada ben e hori lezing tu, sosrefi takimakandra fu Bijbel tori. Amy Jones di ben de na ini den takimakandra disi, fruteri: „Te mi ben de na ini a preikiwroko èn mi ben taigi den ososma fa mi nen, dan son leisi den ben e taki: ’O ai, mi yere yu na radio.’”

Den Bijbel Ondrosukuman fu Halifax, Nova Scotia, ben du wan tra sani di ben nyun na a ten dati. Den ben abi wan programa pe den arkiman ben kan bèl fu aksi sani fu Bijbel. Wan brada ben skrifi: „Den arkiman ben lobi en srefisrefi taki wi ben  e hori den takimakandra na a fasi disi. So furu sma ben e bèl, taki wi no ben man taki nanga alamala srefi.”

Ma neleki fa a ben de na a ten fu na apostel Paulus, na so yu ben abi sma di ben lobi a sani disi di den Bijbel Ondrosukuman ben e du èn yu ben abi sma di no ben lobi dati (Tori 17:1-5). Fu eksempre, di Hector Marshall yere den Bijbel Ondrosukuman e taki na radio fu den buku di nen Studies in the Scriptures, a seni aksi siksi fu den. „Mi ben prakseri fu gi leri nanga den buku disi na sondeskoro”, na so a skrifi bakaten. Ma di a kaba leisi Pisi 1, a bosroiti fu gowe libi a kerki fu en. A tron wan fayafaya preikiman di tan dini Yehovah teleki a dede na ini 1998. Na a owstusei fu Nova Scotia, den ben drai na radio a lezing di nen ’A Kownukondre, a howpu gi grontapu’. A tra dei Kolonel J. A. MacDonald taigi wan brada fu drape: „Esde den sma fu Cape Breton Island yere a moro bun boskopu di sma yere na a sei disi fu grontapu.”

Ma den kerki fesiman ati bron. Wan tu Lomsusma ben taki dati den ben o sutu a radio-station na ini Halifax panya, fu di den ben e drai den programa fu den Bijbel Ondrosukuman. Den kerki fesiman ben de na lanti baka fu tapu den radio-station disi. Dati meki na ini 1928 lanti taki dati den no ben o gi den Bijbel Ondrosukuman primisi moro fu drai den radio-station fu den. Fu dati ede den brada nanga sisa bigin prati wan papira di ben nen Who Owns the Air? (Suma abi a loktu?) Den ben wani sori sma taki a bosroiti fu lanti no ben de wan reti sani kwetikweti. Ma toku lanti no gi den primisi fu drai den radio-station.

Ma yu denki taki den futuboi fu Yehovah na ini Kanada lasi-ati? Isabel Wainwright taki: „Biginbigin a ben gersi taki den feanti wini trutru. Ma mi ben sabi taki Yehovah ben kan tapu den efu a ben feni taki dati de fanowdu. Sobun, Yehovah meki disi pasa fu di a ben wani wi fu prati a bun nyunsu fu a Kownukondre na wan tra fasi di ben o moro bun.” Na presi fu si radio leki a wan-enkri fasi fu preiki gi sma, den Bijbel Ondrosukuman na ini Kanada bigin poti moro prakseri na a oso-fu-oso wroko. Ma toku radio ben de wan prenspari fasi fa sma fu a ten dati ben kan yere ’a moro bun boskopu’ di de.​—Fu a historia fu wi na ini Kanada.