1, 2. (a) Suma na „den wan di kisi wan kari”, soleki fa Petrus ben taki? (b) Fu san ede a taki dati den na sma „di e libi wan syatu pisi ten nomo na ini a grontapu disi”?

SOWAN 30 yari baka di Yesus go na hemel, na apostel Petrus skrifi wan brifi gi wan grupu sma di ben e libi „na ala sei fu Pontus, Galasia, Kapadosia, Asia nanga Bitinia”. A ben taki dati den sma disi ben „e libi fu wan syatu pisi ten” na ini a grontapu disi. A ben taki tu dati den „kisi wan kari” (1 Petr. 1:1). Den wortu „kisi wan kari” e sori taki Petrus e taki fu den Kresten di ben salfu nanga santa yeye èn di „gebore nyun baka fu kan abi wan howpu di no e lasi gowe”. Den Kresten disi o tiri leki kownu makandra nanga Krestes na hemel. (Leisi 1 Petrus 1:3, 4.) Na ini 1 Petrus 2:11 a kari den, ’trakondre sma di e libi wan fu syatu pisi ten nomo na ini a grontapu disi’. Fu san ede a kari den so? Na ini a ten disi wan tu Kotoigi nomo na heri grontapu de salfuwan, noso sma di kisi wan kari. Sobun, fu san ede den tra Kotoigi musu poti prakseri na a tori disi tu?

² A ben fiti taki Petrus kari den salfuwan fu a fosi yarihondro, sma di „e libi wan syatu pisi ten nomo na ini a grontapu disi”. Den salfuwan no o libi na grontapu fu têgo. Na apostel Paulus di ben de wan memre fu a „pikin ipi” salfu Kresten, ben taki: „A presi pe wi o tan, de na hemel. Wi e wakti fayafaya fu wan frulusuman, Masra Yesus Krestes, di o komoto fu a presi dati” (Luk. 12:32; Fil. 3:20). Paulus ben taki dati ’a presi pe den o tan, de na hemel’. Disi e sori taki te den salfuwan dede, den o gowe libi a grontapu disi èn den o go na hemel pe den no o man dede moro. (Leisi Filipisma 1:21-23.) Sobun, a de so trutru taki den na sma „di e libi wan syatu pisi ten nomo na ini a grontapu disi” di Satan e tiri.

3. Sortu aksi di abi fu du nanga den „tra skapu” wi o luku now?

 ³ Ma fa a de nanga den „tra skapu”? (Yoh. 10:16) Bijbel e taki dati den na den sma di o tan fu têgo na grontapu. Toku wi kan taki dati srefi den sma disi e libi fu wan syatu pisi ten nomo na ini a grontapu disi. Fa so?

4. San den tiriman fu grontapu no man du?

⁴ Solanga Gado e gi pasi taki na ogri grontapu fu Satan de ete, ala sma, sosrefi tru Kresten, o tan pina fu di Satan ben opo ensrefi teige Yehovah. Romesma 8:22 e taki: „Wi sabi taki ala den sani di Gado meki, e geme doronomo èn den alamala abi pen te now ete.” Son tiriman, sabiman, nanga sma di lobi yepi trawan di de na nowtu e du ala muiti fu lusu den problema di libisma abi, ma den no man.

5. San milyunmilyun sma bosroiti fu du sensi 1914 èn fu san ede?

⁵ Sensi 1914, milyunmilyun sma bosroiti fu saka densrefi na ondro a tiri fu Yesus Krestes, a sma di Gado poti leki Kownu. Den no wani de wan pisi fu Satan en grontapu èn den no wani horibaka gi en kwetikweti. Na presi fu dati, den e gebroiki den libi nanga den sani di den abi fu horibaka gi Gado Kownukondre.​—Rom. 14:7, 8.

6. Fu san ede wi kan taki dati Yehovah Kotoigi na sma di e libi wan syatu pisi ten nomo na ini a grontapu disi?

⁶ Yehovah Kotoigi de na ini moro leki 200 kondre na heri grontapu èn den e gi yesi na den wèt fu a kondre fu den. Ma awinsi pe den e libi, den e tyari densrefi leki sma di e tan fu wan syatu pisi ten nomo na ini a grontapu disi. Den no e bumui nanga politiek èn den no e suku fu lusu den problema di libisma abi. Nownow kaba den e si densrefi leki borgu fu a nyun grontapu di Gado o tyari kon. Den breiti taki na ogri grontapu disi pe den e libi fu wan syatu pisi ten, o kon na wan kaba heri esi.

7. Fa futuboi fu Gado o tron sma di e libi na grontapu fu ala ten?

⁷ Heri esi Krestes o pori na ogri grontapu  fu Satan. Krestes en tirimakti di bun dorodoro o tyari wan kaba kon na sondu èn a o puru ala pina na grontapu. A o puru ala sma di e opo densrefi teige Yehovah di abi a reti fu tiri hemel nanga grontapu. Den sma di e tan gi yesi na Gado o kisi na okasi fu libi fu ala ten na ini a paradijs na grontapu. (Leisi Openbaring 21:1-5.) Dan fosi wi kan taki dati ala den sani di Gado meki o „kon fri fu wan skin di e dede. Na so den o kon fri na wan tumusi moi fasi leki pikin fu Gado.”​—Rom. 8:21.

8, 9. Tyari kon na krin san Petrus ben wani taki nanga den wortu „kakafutu gi den takru lostu fu a skin”.

⁸ Petrus tyari kon na krin san Gado e fruwakti fu Kresten. A taki: „Un lobiwan, unu di de trakondre sma èn di e libi wan syatu pisi ten nomo na ini a grontapu disi, mi e gi unu deki-ati fu tan kakafutu gi den takru lostu fu a sondu skin di e tan feti nanga unu” (1 Petr. 2:11). Na a fosi presi, a rai disi ben de gi salfu Kresten. Ma den tra skapu fu Yesus musu gi yesi na a rai disi tu.

⁹ Son lostu di wi abi no fowtu, fu di na Gado srefi meki wi so. Den sani disi e gi wi prisiri. Fu eksempre, a no fowtu fu lostu wan switi nyanyan noso fu dringi wan switi sani. A no fowtu fu du sani di bun gi a skin noso fu prisiri nanga bun mati. Srefi te wan sma e angri fu abi seks nanga en trowpatna, dan dati no fowtu fu di a trow nanga a sma dati (1 Kor. 7:3-5). Ma Petrus ben taki fu den ’takru lostu fu a sondu skin di e tan feti nanga wi’. Disi na iniwan lostu di no e kruderi nanga a fasi fa Yehovah wani wi fu libi èn di ben o meki taki wi no de mati fu Yehovah moro. Efu wi e meki den lostu disi basi wi, wi kan lasi a grani fu libi fu têgo.

10. Nanga sortu triki Satan e pruberi fu kori Kresten fu tron wan pisi fu a grontapu fu en?

¹⁰ Satan no wani taki tru Kresten si densrefi moro leki „sma di e libi wan syatu pisi ten nomo na ini a grontapu disi”. A wani kori wi nanga gudu èn nanga hurudu. A wani tu taki wi musu feti fu kisi biginen, taki wi musu denki wisrefi nomo èn taki wi musu lobi wi kondre moro iniwan sani. Te wi e du ala san wi man fu no meki a kori wi nanga den sani disi, dan wi e sori taki wi no wani de wan pisi fu na ogri grontapu fu Satan. Na so wi e sori taki na fu wan syatu pisi ten nomo wi e libi na ini a grontapu disi. San wi wani trutru, na fu libi fu ala ten na ini a nyun grontapu fu Gado pe retidu o de. Na fu a sani dati wi e meki muiti.

11, 12. (a) Fa sma e denki son leisi fu trakondre sma? (b) Fa son sma e denki fu Yehovah Kotoigi?

¹¹ Na ini vers 12, Petrus sori sortu tra sani Gado e fruwakti fu „sma di e libi wan syatu pisi ten nomo na ini a grontapu disi”. A taki: „Tan tyari unsrefi na wan bun fasi na mindri den grontapusma, so taki te den e kosi unu taki unu na ogriman, den o si den bun sani di unu e du. Dati o meki den gi Gado glori na a ten te a o kon ondrosuku san wi e du.” Son leisi te sma froisi go na wan tra kondre, dan den sma fu a kondre e taki takru fu den èn son sma e si den leki ogrisma srefi. Kande a fasi fa den e taki, den sani di den e du èn den krosi di den e weri de tra fasi. Kande de no gersi furu fu den sma na ini a kondre srefi. Ma te den e tyari densrefi na wan bun fasi, dan trawan kan si taki den a no ogrisma.

¹² Na so a de tu taki na ini furu sani, tru Kresten no de leki tra sma. Fu eksempre, den lobi taki fu tra sani noso den e meki  prisiri na tra fasi. Nofo tron den krosi di tru Kresten e weri èn a fasi fa den e meki modo e sori taki den de tra fasi tu. Dati meki son leisi sma di no sabi fa den de trutru, e taki takru fu den. Ma a kan taki tra sma e prèise den fu a fasi fa den e tyari densrefi.

13, 14. Fa „den bun sani di wan sma e du, e sori taki a koni”? Gi wan tu eksempre.

¹³ A bun fasi fa wi e libi kan yepi trawan fu si taki den no abi leti fu taki takru fu wi. Yesus ben de a wan-enkri sma na grontapu di du ala san Gado ben aksi fu en. Toku sma ben e taki takru fu en. Son sma ben e kari en wan gridi man di ben lobi dringi furu win, wan mati fu den sma di e teki belasting-moni gi lanti èn wan mati fu den sondari. Ma fu di Yesus ben e tyari ensrefi soleki fa Gado wani, meki sma no ben abi leti fu taki takru fu en. Yesus ben taki: „Na den bun sani di wan sma e du, e sori taki a koni” (Mat. 11:19). Na so a de tu na ini a ten disi. Fu eksempre, son sma di e libi krosibei fu a bijkantoro na Selters na ini Doisrikondre, feni taki den no man frustan fa a Betelfamiri e libi so. Ma a komsarsi fu drape ben taki bun fu a Betelfamiri. A taki: „Den Kotoigi di e wroko drape abi den eigi fasi fu libi, ma den no de wan problema gi a birti.”

¹⁴ Sma ben taki a srefi sortu sani fu Yehovah Kotoigi di e libi na ini a foto Moskow, na Rosiakondre. Den ben taki dati den Kotoigi na ini a kondre dati du wan lo ogri. Son sma taki dati den Kotoigi e pori osofamiri, den e gi sma deki-ati fu kiri densrefi èn den no wani teki datrayepi. Ma na ini yuni 2010 a Krutubangi fu Europa di e feti gi den reti fu libisma èn di de na Straatsburg, Fransikondre, bosroiti taki Moskow no ben abi leti fu tapu a wroko fu Yehovah Kotoigi drape èn den no ben abi leti fu tapu den fu hori konmakandra. A Krutubangi fu Europa taki dati den krutubangi fu Rosiakondre no ben man buweisi taki den Kotoigi du sani di no bun. A taki dati den krutubangi fu Rosiakondre gebroiki den hebi wèt fu Moskow fu krutu Yehovah Kotoigi na wan fasi di no reti kwetikweti.

15. Na sortu Bijbel rai tru Kresten na heri grontapu e gi yesi?

¹⁵ Yehovah Kotoigi na Moskow èn na heri grontapu e gi yesi na ete wan rai di Petrus gi Kresten. Petrus skrifi: „Saka unsrefi na ondro den wan di e tiri unu. Du dati fu Masra ede: awinsi na ondro wan kownu, fu di en na a moro hei sma, noso na ondro granman” (1 Petr. 2:13, 14). Aladi tru Kresten no de wan pisi fu na ogri grontapu disi, toku den de klariklari fu saka densrefi na ondro den tiriman, bika Paulus taki dati „na Gado gi den na okasi  fu tiri na difrenti fasi”.​—Leisi Romesma 13:1, 5-7.

16, 17. (a) San e sori taki wi no e suku fu gens den tiriman? (b) San son tiriman taki fu Yehovah Kotoigi?

¹⁶ Yehovah Kotoigi e tyari densrefi leki sma „di e libi wan syatu pisi ten nomo na ini a grontapu disi”, ma den no e du dati fu gens den tiriman. Den no e krutu sma di e bumui nanga politiek noso di wani lusu den problema fu libisma èn den no e tapu den. Yehovah Kotoigi no de leki tra kerkigrupu di e bumui nanga politiek. Noiti den e pruberi fu meki den tiriman kenki a fasi fa den e tiri a pipel. Noiti sma o abi fu frede taki den o opo densrefi teige den tiriman èn den no o gi trawan deki-ati fu du dati.

¹⁷ Petrus ben taki dati wi musu „gi a kownu grani”. Sobun, Kresten e gi yesi na den tiriman fu sori taki den e lespeki den èn taki den e gi den grani (1 Petr. 2:17). Son tron tiriman taki krin dati den no denki taki Yehovah Kotoigi na wan problema na ini a libimakandra. Fu eksempre, yu ben abi wan man di ben de minister fosi fu Brandenburg, wan distrikt fu Doisrikondre. Bakaten a ben de wan memre fu na asamblei fu Doisrikondre. A man disi taki dati di den Yehovah Kotoigi ben de na ini den strafuman-kampu nanga strafu-oso, den Kotoigi ben e tyari densrefi na wan heri bun fasi. Den Kotoigi no drai baka gi a bribi fu den, awinsi den Nazi-srudati ben e frufolgu den èn den ben e sori sari-ati gi tra strafuman. A taki dati a ben o bun te ala sma fu Doisrikondre sori den srefi moi fasi disi, spesrutu fu di son sma no wani sori switifasi moro gi sma fu tra kondre, gi sma di abi wan tra bribi èn gi sma di abi tra politiek denki.

18. (a) Fu san ede wi kan frustan taki wi lobi den brada nanga sisa na heri grontapu? (b) San son sma di no de Kotoigi taki?

¹⁸ Na apostel Petrus ben skrifi: „Lobi ala brada, lespeki Gado” (1 Petr. 2:17). Yehovah Kotoigi e lespeki Gado èn dati meki den no wani du nowan sani di Gado no lobi. Den breiti taki den kan dini Yehovah makandra nanga tra brada nanga sisa na heri grontapu di e angri fu du dati tu. Dati meki wi kan frustan taki den ’lobi ala brada nanga sisa na heri grontapu’. Na ini a grontapu disi sma e denki densrefi nomo. Sobun, sma di no de Kotoigi e fruwondru son leisi fu si fa Kotoigi e sori lobi gi den brada nanga sisa fu den. Fu eksempre, di Kotoigi hori wan internationaal kongres na Doisrikondre na ini 2009, wan uma di e wroko nanga wan Amerkan reisburo fruwondru fu si fa den Doisri Kotoigi ben e sori switifasi gi den brada nanga sisa di ben komoto na tra kondre èn fa den ben e yepi den. Na uma taki dati a du a wroko disi furu yari langa, ma noiti ete a si so wan sani. Bakaten wan Kotoigi taki: „Ala ten te na uma ben e taki fu wi, a ben de krin taki a ben e fruwondru èn a ben e prisiri.” Yu yere sma taki wan srefi sortu sani fu Yehovah Kotoigi di yu go na wan kongres?

19. San wi musu tan du èn fu san ede?

¹⁹ Soleki fa wi si, dan Yehovah Kotoigi e sori na difrenti fasi taki den wani libi trutru leki sma „di e libi wan syatu pisi ten nomo na ini a grontapu disi”. Den breiti fu libi na so wan fasi èn den no wani kenki a fasi disi fa den e libi. Den abi a tranga howpu taki heri esi den o man libi fu ala ten na ini a nyun grontapu fu Gado pe retidu o de èn den de seiker taki disi o pasa. Yu no e angri fu a ten dati?