1, 2. Fu san ede wi musu poti prakseri na den fisyun fu Yehovah organisâsi na hemel nanga grontapu?

A DE wan moi sani fu si taki wi de na ini wan organisâsi di de na hemel nanga grontapu. Den fisyun di skrifi na ini Esekièl kapitel 1 nanga Danièl kapitel 7 e sori wi krin san Yehovah e du fu meki en wani pasa. Yesus e tiri a pisi fu Yehovah organisâsi di de na grontapu. Dati meki na organisâsi disi man du a preikiwroko, a e gi leri nanga deki-ati na den sma di e du a wroko disi, èn a e yepi trawan fu tron anbegiman fu Yehovah. Disi e meki taki wi e frutrow trutru na tapu Yehovah en organisâsi!—Mat. 24:45.

² A de so taki yu e wroko skinskin nanga na organisâsi disi? Yu e du yu diniwroko fayafaya ete? Te yu e prakseri fu den aksi disi, dan kande yu o si taki yu no abi a srefi faya di yu ben abi fosi. Na disi pasa nanga son Kresten fu a fosi yarihondro. Na apostel Paulus ben gi den a deki-ati fu de fayafaya neleki Yesus. A taki dati na so fasi den no ben o ’kon weri èn den no ben o lasi-ati’ (Hebr. 12:3). Na ini na artikel fosi a wan disi wi ben taki fu a prenspari wroko di Yehovah organisâsi e du na ini a ten disi. Den Kresten fu a fosi yarihondro kisi furu deki-ati di den teki na eksempre fu Krestes. Na so wi kan kisi deki-ati tu te wi e luku a fasi fa Yehovah organisâsi e wroko. Te wi e du disi dan wi o tan du a wroko fu Gado fayafaya.

3. (a) San wi musu du fu man tan fayafaya? (b) San wi o luku na ini na artikel disi?

³ Ma fu man tan fayafaya, wi no musu poti prakseri nomo na a fasi fa Yehovah organisâsi e wroko. Paulus ben taki dati wi ’no musu tapu tu fu du san bun’ (Gal. 6:9). Meki wi luku feifi sani di wi musu du, so taki wi kan tan fayafaya èn wroko skinskin nanga Yehovah organisâsi. Dan wi musu luku efu wi  noso wi osofamiri musu tyari wan tu kenki kon.

4. Fu san ede wi kan taki dati ala ten konmakandra ben de wan prenspari sani na ini a tru anbegi?

⁴ Ala ten konmakandra ben de wan prenspari sani gi den futuboi fu Yehovah. Na ini hemel Yehovah e kon makandra nanga den engel fu en (1 Kow. 22:19; Yob 1:6; 2:1; Dan. 7:10). Na ini owruten Gado ben taigi den Israelsma taki den ben musu kon makandra fu arki èn fu teki leri (Deut. 31:10-12). Na ini a fosi yarihondro den Dyu ben abi a gwenti fu kon makandra na ini den snoga fu leisi Gado Wortu (Luk. 4:16; Tori 15:21). Konmakandra ben prenspari tu na a ten di a Kresten gemeente ben seti èn te now ete dati de so. Kresten e ’poti prakseri na makandra, so taki den kan gi makandra deki-ati fu abi lobi èn fu du bun wroko’. Wi musu „gi makandra deki-ati o moro [wi] e si a dei [fu Yehovah] e kon krosibei”.—Hebr. 10:24, 25.

5. Fa wi kan gi makandra deki-ati na den konmakandra?

⁵ Wan prenspari fasi fa wi kan gi makandra deki-ati, na fu teki prati na den konmakandra. Fu eksempre, wi kan gi piki tapu na aksi fu wan paragraaf, wi kan taki fu wan tekst di skrifi, noso wi kan fruteri wan syatu ondrofenitori di e sori fa Bijbel rai e yepi wi (Ps. 22:22; 40:9). Ala den piki di yonguwan nanga owruwan e gi na den konmakandra e gi wi furu deki-ati, awinsi o langa wi e dini Yehovah kaba.

6. Fa den konmakandra e tranga a bribi fu wi?

⁶ Den alawiki konmakandra, den kongres nanga den tra bigi konmakandra e yepi wi na tra fasi tu. Fu eksempre, den e yepi wi fu abi deki-ati fu preiki, awinsi den sma e gens wi noso no wani arki wi (Tori 4:23, 31). Den lezing nanga den tra pisi fu den konmakandra abi fu du nanga Bijbel èn dati e tranga a bribi fu wi (Tori 15:32; Rom. 1:11, 12). Te wi de nanga den brada nanga sisa fu wi, dan wi e firi prisiri èn wi ’no e bruya te ogri ten miti wi’ (Ps. 94:12, 13). A Leri Komte fu a Tiri Skin e bosroiti sortu leri o gi na den konmakandra fu a pipel fu Yehovah na heri grontapu. Wi de nanga tangi trutru taki wi e kisi den moi leri disi na den konmakandra ibri wiki fu a yari!

7, 8. (a) San na a moro prenspari sani fu san ede wi e go na den konmakandra? (b) Fa den konmakandra e yepi yu?

⁷ Ma wi no e go na den konmakandra, soso fu di wi e kisi wini fu den. A moro prenspari sani fu san ede wi e go na den konmakandra, na fu anbegi Yehovah. (Leisi Psalm 95:6.) A de wan bigi grani fu dini so wan bun Gado! (Kol. 3:16) Wan fasi fa wi kan prèise Gado, na te wi e gi piki na den konmakandra. A no de fu taki dati Yehovah warti fu sma prèise en na den fasi disi (Openb. 4:11). Fu dati ede wi kan frustan fu san ede wi e kisi a deki-ati fu „no misi konmakandra, soleki fa son sma gwenti du”!—Hebr. 10:25.

⁸ Den konmakandra na wan fasi fa Yehovah e yepi wi fu horidoro teleki a pori na ogri grontapu disi. Na so yu e si en tu? Efu disi de so, dan den konmakandra o de wan fu „den moro prenspari sani” na ini yu libi, awinsi yu abi furu fu du (Fil. 1:10). Noiti wi musu meki wan sani di no prenspari tapu wi fu go na wan konmakandra.

9. Fa wi du sabi taki a preikiwroko prenspari?

⁹ Wan tra fasi fa wi kan wroko skin skin nanga na organisâsi fu Yehovah, na fu du a preikiwroko fayafaya. Yesus ben bigin nanga a wroko disi di a ben de na grontapu (Mat. 28:19, 20). Sensi a ten dati, wan fu den moro prenspari wroko fu a heri organisâsi fu Yehovah, na fu preiki fu a Kownukondre èn fu meki disipel. Furu ondrofenitori na ini a ten disi e sori taki den engel e horibaka gi a wroko fu wi èn den e tyari wi go na ’den wan di abi a yoisti denki fu man kisi têgo libi’ (Tori 13:48; Openb. 14:6, 7). A pisi fu Yehovah organisâsi di de na grontapu, seti fu orga èn fu horibaka gi a wroko disi di prenspari srefisrefi. Fa yu e si a preikiwroko? A de wan fu den moro prenspari sani na ini yu libi tu?

10. (a) Fruteri san wan brada e du fu man abi wan tranga bribi. (b) Fa a preikiwroko yepi yu fu tan abi wan tranga bribi?

¹⁰ Te wi e du wi preikiwroko fayafaya, dan dati o yepi wi fu abi wan tranga bribi. Mitchel na wan lepi owruman di de wan gewoon pionier. A taki: „Mi lobi fruteri sma den tru tori fu Bijbel. Te mi leisi wan nyun artikel na ini wan Waktitoren noso wan Ontwaakt!, dan mi e fruwondru srefisrefi fu a koni rai di skrifi na ini. Mi lobi fa den brada e hori difrenti sma na prakseri na ini ibriwan fu den buku disi. Mi wani go na ini a preikiwroko fu si fa sma o feni den artikel èn fa mi kan hari den prakseri. A preikiwroko e yepi mi fu abi wan tranga bribi. Mi no  e meki nowan tra sani kon na ini a ten di mi poti fu du a preikiwroko.” Na so a musu de nanga wi tu. Te wi e tan du wi preikiwroko fayafaya, dan dati o yepi wi fu tan abi wan tranga bribi na ini den lasti dei disi.—Leisi 1 Korentesma 15:58.

11. Fu san ede wi musu leisi den buku fu na organisâsi èn fu san ede wi musu teki ten fu prakseri fu den?

¹¹ Yehovah e tranga wi bribi tu nanga yepi fu den furu buku di na organisâsi e tyari kon na doro. Kande yu e memre wan leisi taki yu ben leisi wan sani na ini wan fu den buku, dan yu taki: ’Disi na soifri san mi abi fanowdu! A gersi leki Yehovah skrifi en gi mi!’ Yu sabi fu san ede disi de so? Nanga yepi fu den buku disi Yehovah e gi wi leri èn a e sori wi san fu du. A taki: „Mi o gi yu koni èn mi o sori yu a pasi di yu musu waka” (Ps. 32:8). Wi e du muiti fu leisi ala den buku di wi e kisi? Wi e teki ten fu prakseri san wi kan leri fu den sani di wi leisi? Te wi e du disi, dan dati o yepi wi fu horidoro èn fu du wi wroko gi Gado fayafaya na ini den muilek lasti dei disi.—Leisi Psalm 1:1-3; 35:28; 119:97.

12. San kan yepi wi fu abi warderi gi den buku fu wi?

¹² Wi o abi moro warderi gi den buku fu wi te wi prakseri ala den sani di musu du fu man meki den. Fosi den o meki wan buku, den musu ondrosuku son sani fosi, dan den o skrifi den artikel, den o poti fowtow gi den èn den o vertaal den. Baka dati den o meki den buku èn den o poti den na a Website fu wi na tapu Internet. A Skrifi Komte fu a Tiri Skin abi a frantwortu fu tiri a wroko disi. Den bijkantoro di e meki den buku e seni den go na difrenti gemeente. Fu san ede den e du ala den sani disi? Na so a pipel fu Yehovah kan kisi a leri di den abi fanowdu fu man tan dini en (Yes. 65:13). Meki wi du muiti fu leri wan sani fu den buku di wi e kisi fu Yehovah en organisâsi.—Ps. 119:27.

13, 14. (a) Suma na hemel e horibaka gi Yehovah organisâsi? (b) Fa wi kan sori taki wi e horibaka gi Yehovah organisâsi?

¹³ Na ini wan fisyun di na apostel Yohanes kisi, a si Yesus e rèi na tapu wan weti asi èn a e go fu wini den sma di trangayesi Yehovah (Openb. 19:11-15). Boiti dati, Yohanes si den salfuwan di kisi wan opobaka na hemel èn den engel di e gi yesi na Gado. Den alamala e rèi baka Yesus na tapu asi. Disi e sori taki den e si Yesus leki a Fesiman fu den (Openb. 2:26, 27). A moi eksempre fu den e leri wi taki wi musu horibaka gi den wan di e teki fesi na ini Yehovah en organisâsi.

¹⁴ A bigi ipi e horibaka dorodoro gi den salfu brada fu Krestes di de na grontapu ete èn den e yepi den fu du a wroko fu den. (Leisi Sakaria 8:23.) Fa yu kan sori taki yu e horibaka gi na organisâsi fu Yehovah? Wan fasi fu du disi, na fu gi yesi na den wan di e teki fesi (Hebr. 13:7, 17). Aksi yusrefi den sani disi: Den sani di mi e taki fu den owruman e gi trawan deki-ati fu abi lespeki gi den èn gi a wroko di den e du? Mi e leri den pikin fu mi fu abi lespeki gi den brada disi èn fu teki rai fu den? Mi e taki nanga mi osofamiri fa wi kan poti moni na wan sei fu horibaka gi a wroko di na organisâsi e du na heri grontapu? (Odo 3:9; 1 Kor. 16:2; 2 Kor. 8:12) Mi e si en leki wan bigi grani fu yepi krin a Kownukondre zaal? Te Yehovah e si taki wi e horibaka gi na organisâsi  fu en na den fasi disi, dan a o gi wi en santa yeye. Na a santa yeye disi wi abi fanowdu fu man horidoro na ini den lasti dei disi.— Yes. 40:29-31.

15. Fu san ede wi musu tan meki muiti fu du san bun?

¹⁵ Efu wi wani horidoro èn wroko skinskin nanga Yehovah organisâsi, dan wi musu libi na wan fasi di Yehovah feni bun (Ef. 5:10, 11). Ma a no makriki fu du san bun, fu di wi na sondusma èn fu di Satan nanga a grontapu fu en wani kori wi. Son brada nanga sisa fu wi musu feti ibri dei fu man tan wan mati fu Yehovah. Yehovah e warderi disi trutru. Fu dati ede yu no musu gi abra noiti! Te wi e libi soleki fa Yehovah wani, wi o abi wan bun èn koloku libi. Wi kan de seiker tu taki Yehovah o feni wi bun.—1 Kor. 9:24-27.

16, 17. (a) San wi musu du te wi du wan seryusu sondu? (b) San wi kan leri fu a tori fu Anne?

¹⁶ Ma san wi musu du te wi du wan seryusu sondu? Suku yepi wantewante. Sani o kon moro ogri efu yu e kibri a tori. Memre fa David ben e firi di a ben wani kibri den sondu fu en. A taki: „Mi ben e geme heri dei, teleki mi no ben abi krakti moro” (Ps. 32:3). Iya, te yu e kibri wan seryusu sondu, dan disi o moro yu so te, taki yu no o abi prisiri na ini a libi. Kande yu nanga Yehovah no o de bun mati moro. Ma te yu e taki krin sortu sondu yu du, dan „sma o sori sari-ati” gi yu.—Odo 28:13.

¹⁷ Luku san pasa nanga Anne. * Di Anne ben de moro yongu a ben de wan gewoon pionier. Ma kibrikibri a bigin du sani di no bun. Ne en konsensi bigin fon en. A taki: „Ala ten mi ben e firi brokosaka èn mi ben e sari.” Wan leisi di a ben de na konmakandra, wan brada taki fu Yakobus 5:14, 15. Anne kon frustan taki a ben abi yepi fanowdu. San a du? A go taki nanga den owruman soleki fa a tekst e sori, aladi disi no ben makriki fu du. A taki: „Den tekst ben de leki wan dresi di Yehovah gi mi fu kon betre baka. A no ben makriki fu swari en, ma a yepi mi trutru.” Now Anne e dini Yehovah fayafaya baka èn a abi wan krin konsensi.

18. Sortu sani wi musu meki muiti fu du?

¹⁸ A de wan bigi grani fu de na ini Yehovah en organisâsi na ini a ten disi! Noiti wi musu si disi leki wan lawlaw sani. Na presi fu dati, wi nanga wi osofamiri musu du ala muiti fu go na den konmakandra doronomo èn fu preiki fayafaya na ini a kontren fu wi. Wi musu du muiti tu fu leisi ala den buku fu na organisâsi èn fu leri wan sani fu den. Meki wi horibaka tu gi den wan di e teki fesi èn meki wi libi soleki fa Yehovah wani. Te wi e du den sani disi, dan wi e wroko skinskin nanga Yehovah organisâsi èn wi o man horidoro.