1, 2. Suma Yesus e gebroiki fu gi wi nyanyan na ini a ten disi èn fu san ede a prenspari fu sabi suma na dati?

„BRADA, mi no man teri omeni leisi unu skrifi artikel di ben abi soifri san mi ben abi fanowdu.” Na dati wan sisa taki di a skrifi wan brifi fu sori den brada fa a e warderi a wroko di den e du na a edekantoro fu wi. Yu kan frustan fa a sisa e firi? Furu fu wi man frustan dati. A sani dati musu fruwondru wi? Kwetikweti.

² Wi e kisi nyanyan noso leri fu Gado Wortu na a ten di wi abi dati fanowdu. A sani dati e sori taki Yesus, na Edeman fu a gemeente, e sorgu taki wi kisi nyanyan soleki fa a pramisi. Suma Yesus e gebroiki fu gi wi a nyanyan dati? Di a taigi den apostel san ben o de a marki di ben o sori den taki a kon, a taigi den taki a ben o meki „a koni srafu di de fu frutrow” gi den tra futuboi fu en „nyanyan na a reti ten”. (Leisi Mateyus 24:45-47.) A srafu di de fu frutrow na a grupu di Yesus e gebroiki fu gi den tru bakaman fu en nyanyan na ini a ten disi fu a kaba. A prenspari fu sabi suma na a srafu disi di de fu frutrow. Efu wi wani tan abi wan bun matifasi nanga Gado, dan wi abi a srafu disi fanowdu fu gi wi nyanyan.—Mat. 4:4; Yoh. 17:3.

3. Fa den buku fu wi ben fruklari na agersitori fu a srafu di de fu frutrow?

³ Ma fa wi musu frustan na agersitori fu Yesus di e taki fu a srafu di de fu frutrow? Na ini a ten di pasa den buku fu wi taki dati na a Pinksterfesa fu a yari 33, Yesus poti a srafu di de fu frutrow fu luku den tra futuboi fu en. Wi ben taki tu dati a srafu na ala salfu Kresten di oiti libi na grontapu sensi a yari 33 teleki now èn taki den tra futuboi na den srefi salfu Kresten disi. Wi taki sosrefi dati na ini 1919, Yesus gi a frantwortu a srafu di de fu frutrow „fu luku ala den sani di a abi”, dati na ala den Kownukondre afersi fu en na grontapu. Ma wi go luku a tori disi moro fini, wi begi fu en èn wi denki dipi  fu en. Dan wi kon frustan taki wi musu kenki a fasi fa wi ben e si Yesus wortu di e taki fu a koni srafu di de fu frutrow (Odo 4:18). Meki wi go luku na agersitori disi moro fini. Wi o si san a abi fu du nanga wi, awansi wi abi a howpu fu go na hemel noso fu libi na grontapu.

4-6. Fu san ede wi kan taki dati na agersitori fu Yesus di e taki fu a srafu di de fu frutrow bigin kon tru baka 1914?

⁴ Tra vers na ini Mateyus kapitel 24 e sori taki na agersitori fu a koni srafu di de fu frutrow no kon tru na a Pinksterfesa fu a yari 33, ma a bigin kon tru na a ten fu a kaba. Meki wi go luku fa Bijbel e yepi wi frustan a sani disi.

⁵ Na agersitori fu a srafu di de fu frutrow na wan pisi fu Yesus profeititori di e taki fu ’a marki di e sori taki a kon èn taki a kaba fu a grontapu disi de krosibei’ (Mat. 24:3). A fosi pisi fu a profeititori di skrifi na ini Mateyus 24:4-22 kon tru tu leisi. A fosi leisi a kon tru na mindri a yari 33 nanga a yari 70. Ma a o kon tru ete wan leisi èn na wan moro bigi fasi na ini a ten fu wi. Disi wani taki dati den sani di Yesus taki fu a srafu di de fu frutrow o kon tru tu leisi sosrefi? Nôno.

⁶ Te wi e bigin luku den wortu di skrifi na ini Mateyus 24:29, dan wi e si taki Yesus e poti prakseri moro furu na sani di ben o pasa na ini a ten fu wi. (Leisi Mateyus 24:30, 42, 44.) Te Yesus e taki san o pasa na a ten fu a bigi banawtu, dan a e sori taki sma „o si a Manpikin fu libisma e kon na tapu den wolku fu hemel”. Baka dati, a e gi den sma di e libi na ini a ten fu den lasti dei a warskow disi: „Unu no sabi sortu dei un Masra o kon.” A e taki tu: „A Manpikin fu libisma o kon na wan yuru di unu no ben prakseri.” * Yesus fruteri na agersitori fu a srafu di de fu frutrow, baka di a taki san ben o pasa na ini den lasti dei. Fu dati ede wi kan taki dati a pisi di e taki fu a srafu dati bigin kon tru, baka di den lasti dei bigin na ini 1914. Fu san ede wi kan taki dati na so a musu de?

7. Sortu prenspari aksi opo kon di a kotiten bigin èn fu san ede?

⁷ Prakseri na aksi disi: „Suma na trutru a koni srafu di de fu frutrow?” Na ini a fosi yarihondro a no ben de fanowdu fu poti so wan aksi. Soleki fa wi si na ini na artikel na fesi, den apostel ben man du wondru èn den ben sorgu srefi taki tra sma ben man du wondru. Na so sma ben man si krin taki Gado ben horibaka gi den apostel (Tori 5:12). Sobun, na a ten dati sma no ben abi fu aksi densrefi suma na den sma di Krestes poti fu teki fesi na ini a wroko. Ma na ini 1914 sani ben de tra fasi. A kotiten bigin na ini a yari dati. A ten ben doro te fu kaba fu prati a takru wiwiri fu na aleisi (Mat. 13:36-43). Di a kotiten bigin, furu sma ben taki dati den na den tru bakaman fu Yesus, aladi den ben de falsi Kresten. Sobun, a prenspari aksi ben de: Fa sma ben o sabi suma na a aleisi, noso den salfu Kresten? Na agersitori fu a srafu di de fu frutrow ben gi a piki. Na den salfu bakaman fu Krestes na den sma di ben o kisi a nyanyan di den ben abi fanowdu.

8. Fu san ede a fiti taki a srafu di de fu frutrow na wan grupu salfu Kresten?

⁸ A srafu di de fu frutrow musu de wan grupu salfu Kresten na grontapu. Bijbel e taki dati den na „wan grupu priester di o tiri leki kownu” èn taki den kisi a wroko fu „’fruteri na ala sei fu den kefalek moi fasi’ fu a sma di kari [den] komoto na ini a dungru fu kon na ini en tumusi moi leti” (1 Petr. 2:9). A fiti taki den sma di de fu a „grupu priester di o tiri leki kownu” abi a  frantwortu fu leri den Kresten brada nanga sisa den tru tori na ini Gado Wortu.—Mal. 2:7; Openb. 12:17.

9. A de so taki ala salfu Kresten na grontapu na a srafu di de fu frutrow? Fruklari dati.

⁹ A de so taki ala salfuwan na grontapu na a srafu di de fu frutrow? Nôno. A no ala salfuwan abi a frantwortu fu gi nyanyan na den Kresten brada nanga sisa na heri grontapu. A tru taki son salfu brada na dinari ini a diniwroko noso owruman na ini a gemeente fu den. Den e gi leri te den e preiki oso fu oso èn te den de na ini a gemeente. Den e tan du san na edekantoro e taki. Ma den no abi a frantwortu fu gi nyanyan na den brada nanga sisa na heri grontapu. Na ini a grupu fu salfuwan yu abi sisa tu. Fu di den sisa disi abi sakafasi, meki noiti den o pruberi fu de leriman na ini a gemeente.—1 Kor. 11:3; 14:34.

10. Suma na a koni srafu di de fu frutrow?

¹⁰ We, suma na a koni srafu di de fu frutrow? Neleki fa Yesus ben meki wan pikin grupu gi nyanyan na furu sma, na so a srafu na wan pikin grupu salfu brada di abi a frantwortu fu sreka nyanyan (leri fu Gado) èn fu prati dati gi sma. Disi e pasa sensi a ten di Krestes kon. Na ini den lasti dei, den salfu brada di de a srafu di de fu frutrow e wroko makandra na a edekantoro. A srafu disi na a Tiri Skin fu Yehovah Kotoigi. Luku sosrefi taki na ini na agersitori Yesus ben taki dati wán „srafu” ben o de. Sobun, a Tiri Skin e teki bosroiti leki grupu.

11, 12. (a) San na tu frantwortu di a koni srafu di de fu frutrow kisi? (b) O ten Yesus gi a srafu di de fu frutrow a frantwortu fu luku den tra futuboi fu en èn suma a teki fu du dati?

¹¹ Luku taki Yesus e sori na ini na agersitori taki a koni srafu di de fu frutrow e kisi tu sortu frantwortu. A fosi frantwortu na taki a musu luku den tra futuboi fu en Masra èn a di fu tu na taki a musu luku ala den sani di en Masra abi. Fu di na agersitori disi kon tru soso na ini a ten disi fu a kaba, meki a srafu kisi den tu frantwortu disi baka 1914, di Yesus kon fu tiri leki Kownu.

¹² O ten Yesus gi a srafu di de fu frutrow a frantwortu fu luku den tra futuboi fu en? Fu piki na aksi dati, wi musu go baka na 1914, na a bigin fu a kotiten. Soleki fa wi ben si kaba, dan na a ten dati furu kerkigrupu ben taki dati den na Kresten. Sortuwan fu den grupu disi Yesus ben o teki fu  poti leki a srafu di de fu frutrow? Na aksi dati kisi piki baka di Yesus nanga en Tata kon fu 1914 te go miti a bigin fu 1919 fu ondrosuku na agersi tempel (Mal. 3:1). * Yesus nanga en Tata ben breiti fu si taki wan pikin grupu Bijbel Ondrosukuman di ben hori densrefi na den tru leri, ben sori taki den lobi Yehovah nanga en Wortu trutru. A no de fu taki dati den ben musu kon krin. Ma fu di den ben abi sakafasi, meki den tyari kenki kon di Yesus nanga en Tata kon ondrosuku den (Mal. 3:2-4). Den Bijbel Ondrosukuman dati ben de den tru Kresten di de leki na aleisi. Na ini 1919 Yesus teki wan tu lepi salfu brada na mindri den tru Kresten disi èn a poti den leki a koni srafu di de fu frutrow. Na a ten dati a srafu disi kisi a frantwortu fu luku den tra futuboi fu en.

13. Suma na den futuboi na ini na agersitori èn fu san ede wi kan taki dati?

¹³ We, dan suma na den futuboi dati? Den na den sma di e kisi a nyanyan. Na a bigin fu den lasti dei, den alamala ben de salfu Kresten. Bakaten, den futuboi dati no ben de den salfuwan nomo, ma sosrefi a bigi ipi fu tra skapu. Aladi den salfuwan nanga den tra skapu na „wán ipi” di Krestes e tiri, toku wi e si now taki den tra skapu na a moro bigi grupu (Yoh. 10:16). Den tu grupu disi e kisi wini fu a srefi nyanyan di a srafu di de fu frutrow e gi na a reti ten. Fa a de nanga den memre fu a Tiri Skin di de a koni srafu di de fu frutrow? Den brada dati musu kisi a nyanyan tu. Sobun, na wan sakafasi den e frustan taki ibriwan fu den aparti na den tra futuboi na ini Yesus agersitori, neleki ala den tra bakaman fu Yesus.

14. (a) Sortu tra frantwortu a srafu di de fu frutrow abi èn san den musu luku? (b) Sortu warskow Yesus gi a koni srafu di de fu frutrow? (Luku a faki di nen „Efu a srafu ogri . . . ”)

¹⁴ Yesus gi a koni srafu di de fu frutrow wan bigi frantwortu. Na ini Bijbel ten, wan srafu di en masra ben kan frutrow, ben e kisi a frantwortu fu luku ala sani di en masra abi (Luk. 12:42). Na so a de tu nanga a koni srafu di de fu frutrow. A kisi a frantwortu fu luku ala sani di Krestes abi dyaso na grontapu. Dati wani taki dati a srafu e luku den moni tori nanga den tra sani fu na organisâsi, soleki den gebow. Boiti dati, den e sorgu taki a preikiwroko e du, taki den bigi konmakandra e hori, taki buku e meki di wi kan gebroiki na ini a preikiwroko, na ini a gemeente noso te wi e studeri.  Ala den futuboi sabi taki den abi ala a nyanyan fanowdu di a srafu e gi den.

15, 16. O ten Yesus o gi a srafu di de fu frutrow a frantwortu fu luku ala den sani di a abi?

¹⁵ O ten Yesus gi a srafu a di fu tu frantwortu, dati na a frantwortu „fu luku ala den sani di a abi”? Yesus ben taki: „Koloku fu a srafu te en masra doro èn a si taki a srafu e du dati! Fu tru mi e taigi unu: A o poti a srafu fu luku ala den sani di a abi” (Mat. 24:46, 47). Luku taki Yesus e gi a srafu a di fu tu frantwortu, baka te a doro èn te a si taki a srafu „e du dati”. San na a sani di a srafu e du? A e prati nyanyan gi den bakaman fu Yesus. Sobun, wan pisi ten ben o pasa fosi a srafu ben o kisi a tra frantwortu. Fu man frustan fa èn o ten Yesus e poti a srafu fu luku ala den sani di a abi, wi musu kon sabi tu sani fosi: O ten Yesus o doro èn san na den sani di a abi.

¹⁶ O ten Yesus o doro? Wi kan feni a piki na ini vers 30, 42 nanga 44 fu Mateyus kapitel 24. Hori na prakseri taki te den vers disi e taki dati Yesus „o kon”, dan dati abi fu du nanga a ten te a o kon fu koti krutu èn fu pori den ogrisma na a kaba fu a grontapu disi. * Sobun, te Yesus o „doro” noso „kon” soleki fa a taki na ini na agersitori fu a srafu di de fu frutrow, dan dati o pasa na a ten fu a bigi banawtu.

17. San na den sani di Yesus abi?

¹⁷ San na „ala den sani di [Yesus] abi”? Yesus no taki dati den sani di a abi ben o de na grontapu wawan, ma den ben o de na hemel tu. Yesus srefi taki: „Mi kisi ala makti na ini hemel èn na grontapu” (Mat. 28:18; Ef. 1:20-23). Wi kon si taki den sani di a abi tu na a Mesias Kownukondre di de fu en  sensi 1914. Yesus o tiri a Kownukondre disi makandra nanga den salfu bakaman fu en.—Openb. 11:15.

18. Fu san ede Yesus ben breiti fu gi a srafu a frantwortu fu luku ala den sani di a abi?

¹⁸ Sobun, san wi kon si te nanga now? Te Yesus o kon fu krutu den ogrisma na ini a bigi banawtu, dan a o si taki a srafu di de fu frutrow tan gi den tra futuboi fu en nyanyan na a reti ten. Na a ten dati Yesus o prisiri fu gi a srafu disi a tra frantwortu èn dati na fu luku ala den sani di a abi. Den wan di de a srafu di de fu frutrow o kisi a frantwortu disi te den kisi libi na hemel èn te den o tiri makandra nanga Krestes.

19. A de so taki a srafu di de fu frutrow e kisi wan moro bigi grani na ini hemel leki den tra salfuwan? Fruklari dati.

¹⁹ A de so taki a srafu di de fu frutrow e kisi wan moro bigi grani na ini hemel leki den tra salfuwan? Nôno. Son leisi wan sma kan pramisi wan pikin grupu wan sani, ma bakaten tra sma kan kisi wini fu a pramisi dati tu. Fu eksempre, a neti fosi Yesus dede a taigi den 11 apostel di tan horibaka gi en, wan prenspari sani. Luku san a taigi den na Lukas 22:28-30. (Leisi en.) Yesus pramisi a pikin grupu disi taki den ben o kisi bigi grani fu di den ben tan horibaka gi en. Den ben o tiri makandra nanga en leki kownu na hemel. Ma wan tu yari baka dati, Yesus sori taki ala den 144.000 sma o sidon na tapu kownusturu èn den o tiri makandra nanga en (Openb. 1:1; 3:21). Na so a de tu taki na ini Mateyus 24:47 Yesus pramisi wan pikin grupu man taki a o poti den fu luku ala den sani di a abi. A pikin grupu disi na den salfu brada di de a srafu di de fu frutrow. Ma fu taki en leti, na ala den 144.000 sma o wroko makandra nanga Krestes fu luku den sani di a abi.—Openb. 20:4, 6.

20. (a) Fu san ede Yesus poti a srafu di de fu frutrow? (b) San wi wani du ala ten?

²⁰ Neleki fa Yesus ben meki wan pikin grupu gi furu sma nyanyan, na so a poti a koni srafu di de fu frutrow fu gi nyanyan na furu sma na ini a ten disi so taki den kan kon sabi den tru tori fu Bijbel. Yesus gi a srafu di de fu frutrow a frantwortu fu sorgu taki den tru bakaman fu en, awansi den na salfuwan noso tra skapu, kan tan kisi nyanyan na a reti ten na ini den lasti dei disi. Meki wi sori warderi gi a seti disi fu di wi e horibaka ala ten gi a grupu salfu brada di de a koni srafu di de fu frutrow.—Hebr. 13:7, 17.