Di mi gebore na ini 1956, mi ben abi wan siki na den senwetitei fu mi bakabonyo. Dati meki mi no ben man waka bun èn mi ben kisi tra siki tu.

Wan pisi ten fosi mi gebore, wan trowpaar di ben de zendeling fu Yehovah Kotoigi bigin studeri Bijbel nanga mi papa nanga mi mama. Di mi ben pikin wi ben e libi na ini a foto Usakos na Namibia. Na a ten dati wan tu preikiman nomo ben de drape èn den ben e tan farawe. Wan gemeente no ben de na ini a birti, ma toku na osofamiri fu wi ben gwenti luku den sani gi den gemeente konmakandra. Di mi ben abi seibi yari mi ben musu du wan oparâsi. Datra ben musu meki wan olo na mi skin so taki mi ben kan pisi. Di mi ben abi 14 yari mi kisi fadonsiki. Mi no ben man teki furu skoroleri fu di heiskoro ben de farawe èn mi papa nanga mi mama ben musu de nanga mi ala ten fu di mi ben e siki.

Aladi mi ben abi someni problema, toku mi bosroiti fu tron wan moro bun mati fu Yehovah. Furu fu den buku fu na organisâsi fu wi no ben de na ini Afrikaans, a tongo di mi ben gwenti taki. Dati meki mi leri Ingrisitongo so taki mi ben kan studeri moro fu den buku fu wi. Bakaten mi tron wan Kownukondre preikiman èn mi dopu di mi ben abi 19 yari. Na ini den fo yari baka dati mi ben e siki furu èn mi ben e firi brokosaka furu tron. Na ini a foto pe mi ben e tan ala sma ben sabi makandra. Dati meki mi ben e frede fu du a preikiwroko fayafaya.

Di mi ben abi sowan 20 yari wi froisi fu Namibia go na Zuid-Afrika. Now fosi mi ben man go na wan gemeente. Mi ben prisiri trutru! Ma mi ben musu du wan oparâsi baka. Disi leisi datra ben musu meki wan olo na mi skin so taki mi ben kan pupe.

Wan leisi di a kring-opziener kon a ben taki fu a pionierwroko. Den sani di a taki naki mi ati trutru. Mi sabi taki a ben o muilek gi mi fu pionier fu di mi ben e siki. Ma mi si fa Yehovah yepi mi nanga ala den furu problema di mi ben abi. Sobun, mi gi mi nen fu tron wan gewoon pionier. Ma fu di mi ben e siki so furu, meki den owruman ben e tweifri efu mi ben o man du dati.

Toku mi bosroiti fu du ala san mi man na ini a preikiwroko. Fu di mi mama nanga tra sma yepi mi, meki siksi mun langa mi ben man doro den yuru fu wan gewoon pionier. Na so mi sori krin taki mi ben wani pionier trutru èn taki mi ben kan du dati aladi mi e siki. Di mi aksi baka fu tron wan pionier, den owruman agri èn na so mi tron gewoon pionier na tapu 1 september 1988.

Leki pionier mi si fa Yehovah horibaka gi mi ala ten. Na presi fu poti tumusi furu prakseri na a situwâsi fu mi, mi e yepi sma kon sabi den tru leri fu Bijbel. Disi yepi mi fu no firi brokosaka so furu moro èn mi kon tron wan moro bun mati fu Yehovah tu. Mi breiti taki mi ben man yepi wan tu sma fu gi densrefi abra na Yehovah èn fu teki dopu.

Mi no sabi fa sani o go nanga mi na ini a ten di e kon. Ma Yehovah ’e tyari a lai fu mi ala dei’ (Ps. 68:19). A no e yepi mi nomo nanga a siki fu mi, ma a e yepi mi tu fu abi prisiri na ini a libi!