1. (a) Fa sma e firi te den e kisi rai èn fu san ede? (b) San wan sma di abi heimemre e du te a e kisi rai?

ALA sma e teki rai na wan tra fasi. Fu eksempre, son sma de klariklari fu teki rai fu wan sma di abi wan hei posisi, ma den no wani teki rai fu wan speri noso fu wan sma di no abi wan hei posisi. Tra sma baka di e kisi piri-ai noso rai, e sari, den e lasi-ati noso den e syen. Ma dan yu abi trawan tu di e kisi deki-ati, di e firi bun èn di e du san den man fu tyari kenki kon. Fu san ede sma e difrenti so fu makandra? Wán sani di e meki taki disi de so na bigimemre. Iya, wan sma di abi heimemre no e si sani krin èn kande a no wani arki srefi te a e kisi a rai di a abi fanowdu.—Odo 16:18.

2. Fu san ede tru Kresten e warderi den rai fu Gado Wortu?

² Ma tru Kresten e warderi en te den e kisi rai, spesrutu efu na sani di skrifi na ini Gado Wortu. Den rai fu Yehovah e yepi wi fu si san kan pasa te sma no e tyari densrefi bun. Fu eksempre, den rai fu en e yepi wi fu no feti na baka gudu, fu no du hurudu, fu no gebroiki drugs èn fu no dringi sopi pasa marki fu di den sani disi o abi takru bakapisi gi wi (Odo 20:1; 2 Kor. 7:1; 1 Tes. 4:3-5; 1 Tim. 6:6-11). Boiti dati, te wi e gi yesi na den rai fu Gado, dan dati e meki wi firi prisiri fu di wi „abi wan bun ati”.—Yes. 65:14.

3. Sortu denki fu a psalm skrifiman wi musu abi tu?

³ Fu tan abi wan bun matifasi nanga wi hemel Tata Yehovah, wi musu tan teki den koni rai fu en. A moi fu abi a srefi denki leki a psalm skrifiman di ben taki: „Den wèt di yu e memre mi fu hori, mi e si leki wan gudu fu ala ten. Den e meki mi ati prisiri” (Ps. 119:111). Wi e prisiri tu nanga den wèt fu Yehovah, noso wi e si den leki wan hebi son leisi? Srefi efu a hebi gi wi son leisi fu teki rai, wi no abi fu lasi-ati. Wi  kan leri fu frutrow dorodoro na tapu a bigi koni fu Gado. Meki wi go luku dri fasi fa wi kan du dati.

4. San na wán sani di noiti no kenki na ini David en libi?

⁴ Kownu David ben abi furu problema na ini en libi, ma a ben abi prisiri momenti tu. Toku wán sani noiti no kenki: A ben e frutrow dorodoro na tapu en Mekiman. A taki: „Ke Yehovah, na yu mi kon fu begi yu nanga mi heri ati. Mi Gado, na yu mi e frutrow” (Ps. 25:1, 2). San yepi David fu poti ala en frutrow na tapu en hemel Tata?

5, 6. San Gado Wortu e taigi wi fu a matifasi di David ben abi nanga Yehovah?

⁵ Furu sma e begi Gado soso te den abi bigi problema. Fa yu ben o feni en efu yu abi wan mati noso wan famiriman di e taki nanga yu soso te a abi moni fanowdu noso te yu musu du wan sani gi en? Baka wan pisi ten yu o bigin aksi yusrefi efu a mati disi lobi yu trutru. Ma a matifasi di David ben abi nanga Yehovah ben de tra fasi. En heri libi langa, David sori taki a ben abi bribi na ini Gado èn taki a ben lobi en trutru, na ini bun ten èn na ini takru ten.—Ps. 40:8.

⁶ Luku san David taki fu prèise Yehovah èn fu taki en tangi: „Yehovah wi Masra, yu nen bigi trutru na grontapu! Te na ini hemel den e taki fu a glori fu yu ibri leisi baka” (Ps. 8:1). Yu si fa David ben e denki fu en hemel Tata? A ben e si en leki wan bun mati, a no so? David ben abi someni warderi gi a makti nanga a glori fu Gado, taki a ben e prèise Yehovah „heri dei”.—Ps. 35:28.

7. Fa wi e kisi wini te wi e kon krosibei na Gado na ini begi?

⁷ Neleki David wi musu abi a gwenti fu taki nanga Yehovah so taki wi kan frutrow moro na en tapu. Bijbel e taki: „Kon krosibei na Gado èn a o kon krosibei na unu” (Yak. 4:8). Wan prenspari fasi fa wi kan kisi santa yeye na te wi e kon krosibei na Gado na ini begi.—Leisi 1 Yohanes 3:22.

8. Fu san ede wi musu luku bun taki wi no taki densrefi sani ibri tron baka te wi e begi?

⁸ Yu abi a gwenti fu taki den srefi sani ibri tron baka te yu e begi? Efu dati de so, dan fosi yu begi, prakseri san yu o taki. Efu wi ben o taigi wan mati noso wan famiriman a srefi sani ibri tron baka, dan fa a ben o feni en? A ben o lobi en? Baka wan pisi ten a no ben o wani arki yu moro. A no de fu taki dati Yehovah noiti e tapu en yesi te wan futuboi fu en e begi nanga en heri ati. Ma wi musu luku bun fu no taki densrefi sani ibri tron baka te wi e begi Gado.

9, 10. (a) San wi kan taki na ini den begi fu wi? (b) San kan yepi wi fu begi nanga wi heri ati?

⁹ A de krin taki wi no musu begi frafra efu wi wani kon krosibei na Gado. O moro wi e fruteri Yehovah san de na tapu wi ati, o moro wi o kon krosibei na en èn o moro wi o frutrow na en tapu. Ma san wi musu taki te wi e begi? Gado Wortu e taki: „Begi Gado ala ten, begi en fayafaya èn taki en tangi tu. Na so a o kon sabi san unu wani aksi en” (Fil. 4:6). Te yu luku en bun, dan wi kan begi fu iniwan sani di kan abi krakti na tapu a matifasi di wi abi nanga Gado noso na tapu wi libi.

¹⁰ Wi kan leri furu fu den begi fu man nanga uma na ini Bijbel ten di ben libi leki fa Gado wani (1 Sam. 1:10, 11; Tori 4:24-31). Den Psalm abi wan lo eksempre fu sma di begi Yehovah fayafaya èn di singi gi en nanga den heri ati. Den begi nanga den singi disi e sori difrenti fasi fa wan sma kan firi, awinsi na bigi prisiri noso bigi sari. Te wi e ondrosuku den sani di den futuboi fu Gado ben taki, dan dati kan yepi wi fu begi Yehovah komopo fu wi ati.

11. Fu san ede wi musu denki dipi fu den rai na ini Gado Wortu?

¹¹ David ben taki: „Den warskow fu Yehovah na sani di yu kan frutrow. Den e meki a sma sondro ondrofeni kisi koni” (Ps. 19:7). Iya, srefi efu wi no abi ondrofeni, wi kan kisi koni te wi e gi yesi na den wèt fu Gado. Ma son leisi a de fanowdu fu denki dipi fu den rai na ini Bijbel efu wi wani kisi wini fu den trutru. Fu eksempre, te yu e denki dipi fu Bijbel gronprakseri, dan dati kan yepi yu fu du san Gado wani efu sma e pruberi fu meki yu du wan ogri na skoro noso na wroko. A kan yepi yu fu gi yesi na den wèt fu Gado di e taki dati wi musu tan fara fu brudu èn taki wi no musu teki sei na ini politiek. A kan yepi yu tu fu luku sortu krosi yu o weri. Te wi e denki dipi fu den rai fu Gado, dan dati o yepi wi fu sabi san wi musu du èn fu bigin teki wan bosroiti na ini wi ati, fosi wi kon de na ini den sortu situwâsi disi. Na so fasi wi no o du sani di o hati wi bakaten.—Odo 15:28.

12. Fu sortu aksi wi musu denki dipi efu wi wani tan gi yesi na den wèt fu Gado?

¹² Wi e wakti fu si fa den pramisi fu Gado o kon tru. Ma a fasi fa wi e libi now e sori taki a wani fu Gado na a moro prenspari sani gi wi? Fu eksempre, wi e bribi trutru taki Babilon a Bigiwan o kisi pori heri esi? Di wi ben leri taki na ini a ten di e kon Gado o blesi wi nanga sani soleki libi na ini wan paradijs na grontapu, dan wi ben bribi disi fayafaya. Ma wi e bribi den sani disi fayafaya ete? Wi e du furu na ini a diniwroko ete noso wi e poti wi eigi sani na a fosi presi? Fa wi e si na opobaka howpu? Wi feni ete taki Yehovah nen musu kon santa èn taki ala sma musu sabi taki a abi a reti fu de a Moro Hei Tiriman? Den sani dati prenspari gi wi ete? Te wi e denki dipi fu den aksi disi, dan dati o yepi wi fu gi yesi na den wèt di Gado e memre wi fu hori èn fu si den leki wan gudu fu ala ten.—Ps. 119:111.

13. Fu san ede den Kresten fu a fosi yarihondro no ben frustan son sani bun ete? Gi wan eksempre.

¹³ Kande Bijbel e taki son sani di wi no e frustan so bun nownow fu di a ten no doro gi Yehovah ete fu tyari den kon na krin. Yesus ben taigi den disipel fu en furu leisi taki a ben o abi fu pina èn taki sma ben o kiri en. (Leisi Mateyus 12:40; 16:21.) Ma den apostel no frustan san Yesus ben wani taigi den. Na baka di Yesus kon na libi, di a sori ensrefi na den disipel fu en èn di a yepi den fu kon frustan den profeititori di e taki fu a Krestes, dan fosi den kon frustan den tori dati (Luk. 24:44-46; Tori 1:3). Na so a de tu taki den bakaman fu Krestes no kon frustan taki Gado Kownukondre ben o de na ini hemel, teleki a santa yeye kon na den tapu na a Pinksterfesa na ini a yari 33.—Tori 1:6-8.

14. Sortu bun eksempre furu brada nanga sisa gi na ini a ten fu wi, aladi den no ben frustan son sani bun di abi fu du nanga „den lasti dei”?

¹⁴ Na ini a ten fu wi a de so tu, taki tru Kresten no ben frustan son sani bun di abi fu du nanga „den lasti dei” (2 Tim. 3:1). Fu eksempre, na ini 1914 son sma ben denki taki a ten ben doro taki den ben o go na hemel. Di sani no pasa soleki fa den denki èn di den go ondrosuku Bijbel baka, dan den kon si taki wan bigi preikiwroko ben musu du ete (Mark. 13:10). Sobun, na ini 1922, J. F. Rutherford, di ben teki fesi na ini a preikiwroko na a ten dati, taigi den sma di ben kon makandra na a internationaal kongres na Cedar Point, Ohio, Amerkankondre: „Luku, a Kownu e tiri! Unu na den sma di e fruteri fu en. Fu dati ede, preiki, preiki, preiki fu a Kownu nanga en kownukondre.” Sensi a ten dati ala sma sabi den futuboi fu Yehovah leki sma di e  preiki „a bun nyunsu fu a Kownukondre”.—Mat. 4:23; 24:14.

15. Te wi e denki dipi fu den moi sani di Yehovah du gi en pipel, dan fa wi kan kisi wini fu dati?

¹⁵ Te wi e denki dipi fu den moi sani di Yehovah du gi en pipel na ini a ten di pasa èn na ini a ten fu wi, dan dati o meki wi de seiker taki na ini a ten di e kon a o du san a abi na prakseri. Den rai fu Gado e yepi wi tu fu no frigiti den profeititori fu en di musu kon tru ete. Wi kan de seiker taki disi o yepi wi fu kisi moro frutrow na ini den pramisi fu en.

16. Sortu blesi wi e kisi te wi e tan wroko tranga na ini a diniwroko?

¹⁶ Wi Gado Yehovah, na wan Gado di e tan wroko tranga. A psalm skrifiman ben aksi: „Suma tranga leki yu, Yah?” A ben taki tu: „Yu tranga srefisrefi. Yu opo yu reti-anu hei” (Ps. 89:8, 13). Sobun, Yehovah e warderi a muiti di wi e du fu horibaka gi a Kownukondre èn a e blesi wi fu dati. A e si taki den futuboi fu en, awinsi den na mansma noso umasma, awinsi den owru noso den yongu, no e sidon nomo e du noti èn den „no lesi kwetikweti” (Odo 31:27). Wi e teki na eksempre fu wi Mekiman te wi e tan wroko tranga na ini a diniwroko. Efu wi e dini Gado nanga wi heri ati, dan dati o meki wi firi koloku èn Yehovah o prisiri fu blesi wi gi a diniwroko di wi e du gi en.—Leisi Psalm 62:12.

17, 18. Fu san ede a de so taki den sani di wi e du fu sori taki wi abi bribi, kan yepi wi fu kisi moro frutrow na ini den rai fu Yehovah? Gi wan eksempre.

¹⁷ Te wi e du sani fu sori taki wi abi bribi, dan dati e yepi wi fu kisi moro frutrow na ini Yehovah. Fa so? Luku san pasa di  den Israelsma ben de fu go na ini a Pramisi Kondre. Yehovah taigi den priester di ben e tyari a santa kisi fu a frubontu taki den ben musu waka go langalanga na ini Yordan-liba. Ma di a pipel doro na a liba, den si taki hebi alen ben meki a watra fu a liba kon hei srefisrefi. San den Israelsma ben o du? Den ben o seti kampu na a libakanti èn wakti omeni wiki noso moro langa srefi fu a fruduwatra saka? Nôno. Den ben poti ala den frutrow na ini Yehovah èn den du san a taigi den. San ben de a bakapisi? A tori e taki: „Fa den futu fu den priester kisi a watra fu a liba, a watra di ben e komoto na oposei fu a liba tapu fu lon. . . . A pipel ben man koti a liba abra, leti na fesi Yerikow. A heri pisi ten dati den priester di ben e tyari a santa kisi fu a frubontu fu Yehovah, tan tanapu na tapu drei gron na mindrisei fu a liba, sondro fu buweigi” (Yos. 3:12-17). Wi kan frustan taki den Israelsma kisi furu deki-ati di den si nanga den eigi ai taki a krasi watra dati tapu fu lon. Iya, a bribi fu den Israelsma kon moro tranga fu di den poti frutrow na ini san Yehovah taigi den.

¹⁸ A tru taki Yehovah no e du den sortu wondru disi gi en pipel na ini a ten disi, ma a e blesi den te den e sori taki den e poti bribi na ini en. A santa yeye fu Gado e gi den a krakti fu preiki a Kownukondre boskopu na heri grontapu. Krestes Yesus, a moro prenspari Kotoigi fu Yehovah, gi den disipel fu en a dyaranti taki a ben o horibaka gi den te den ben o du a prenspari wroko disi. A taki: „Fu dati ede, go na sma fu ala kondre èn meki den tron disipel. . . . Mi o de nanga unu ala dei te na a kaba fu grontapu” (Mat. 28:19, 20). Furu Kotoigi di ben e syen kande noso di ben e frede fu taki nanga sma, sabi taki a santa yeye fu Gado gi den a deki-ati fu taki nanga trawan na ini a preikiwroko, aladi den no ben sabi den.—Leisi Psalm 119:46; 2 Korentesma 4:7.

19. Sortu sani wi sabi seiker, srefi efu wi no man du so furu leki san wi wani na ini a diniwroko?

¹⁹ Son brada nanga sisa no man du furu fu di den siki noso fu di den kon owru. Toku den kan de seiker taki „a Tata di abi furu sari-ati, a Gado fu ala trowstu” sabi a situwâsi fu ibri tru Kresten (2 Kor. 1:3). A e warderi ala san wi e du fu horibaka gi a Kownukondre. Wi alamala musu hori na prakseri taki a moro prenspari sani di e meki taki wi kan kisi libi na te wi e bribi na ini a lusu-paiman fu Krestes, aladi wi e du ala san wi man na ini a diniwroko.—Hebr. 10:39.

20, 21. Na sortu fasi wi kan sori taki wi e frutrow na ini Yehovah?

²⁰ Te wi e anbegi Gado, dan wi e du ala san wi man fu gi wi ten, wi krakti, nanga den sani di wi abi fu du a diniwroko fu en. Nanga wi heri ati wi wani „du a wroko fu wan preikiman fu a bun nyunsu” (2 Tim. 4:5). Wi breiti fu du disi fu di dati e yepi trawan fu „kon sabi a tru leri finifini” (1 Tim. 2:4). Te wi e gi Yehovah grani èn te wi e prèise en, dan wi e kisi furu blesi (Odo 10:22). A e yepi wi tu fu frutrow dorodoro na tapu wi Mekiman, awinsi san e pasa.—Rom. 8:35-39.

²¹ Soleki fa wi si, dan a no e kon fu ensrefi taki wi e frutrow na tapu taki Yehovah o gi wi koni rai. Ma wi musu du tranga muiti fu kisi a frutrow dati. Sobun, awinsi san e pasa, tan begi fu di dati o meki yu kisi moro frutrow na ini Yehovah. Denki dipi fu den sani di Yehovah du fu meki den pramisi fu en kon tru na ini a ten di pasa èn fu san a o du na ini a ten di e kon. Boiti dati, tan du muiti fu kisi moro frutrow na ini Gado fu di yu e du sani fu sori taki yu abi bribi. Iya, den rai fu Yehovah o tan fu ala ten. Efu yu poti prakseri na den rai disi, dan yu srefi o tan libi fu ala ten.