Di tu pionier na Kenia kisi a kari fu go na ini wan oso, den ben fruwondru fu si wan pikin syatu man e didon na tapu wan bedi. A skin fu a man disi ben kruwa. Di den pionier fruteri a man taki Gado pramisi taki den „lan sma o kren leki dia na tapu den bergi”, a ben breiti fu yere dati.—Yes. 35:6.

Den pionier kon sabi taki Onesmus, di no doro 40 yari ete, gebore nanga wan siki di meki taki den bonyo fu en swaki so te taki efu wan sma ben o seki en anu, a ben kan broko en bonyo. Fu di dresi no de gi a siki disi èn datra no man yepi Onesmus, meki a sabi taki en heri libi langa a o abi furu skin-ati èn a o abi fu sidon na ini wan rolsturu.

Onesmus bigin studeri Bijbel. Ma fu di Onesmus mama ben feni taki a ben kan kisi mankeri makriki èn taki a ben o abi moro skin-ati, meki a no ben wani taki a go na den Kresten konmakandra. Fu dati ede den brada poti den konmakandra na tapu cassette-lolo gi en so taki a ben kan arki den na oso. Baka di Onesmus studeri Bijbel feifi mun langa a bosroiti fu go na den konmakandra, awinsi a ben kan kisi mankeri makriki.

Ma a de so trutru taki Onesmus kisi moro skin-ati di a go na den Kresten konmakandra? Nôno, dati no ben de so. Onesmus e taki: „A gersi leki a skin-ati di mi ben abi heri dei ben e saka te mi ben de na den konmakandra.” A ben feni taki a moi howpu di a abi now, meki taki a firi moro bun. Onesmus mama kon si taki a ben de nanga moro prisiri èn a sani disi ben meki a breiti so te taki ensrefi bigin studeri Bijbel. A ben gwenti taki: „Fu dini Gado de leki dresi gi a boi fu mi.”

Fosi yu denki, Onesmus tron wan preikiman di no dopu ete. Baka wan pisi ten a teki dopu èn now a de wan dinari ini a diniwroko. Aladi a no man gebroiki en futu nanga en anu, toku a ben wani du ala san a man na ini a diniwroko fu Yehovah. A ben wani tron wan yepipionier, ma a ben frede fu gi en nen. Fu san ede? Fu di a ben sabi taki wan sma ben o abi fu pusu a rolsturu gi en. Di a taki fu a tori disi nanga den brada nanga sisa na ini a gemeente, den pramisi en taki den ben o yepi en. Na dati den du tu èn na so Onesmus ben man tron wan yepipionier.

Onesmus ben abi a srefi broko-ede di a ben wani tron wan gewoon pionier. Ma wan dei a deitekst gi en a deki-ati di a ben abi fanowdu. A tekst ben teki puru fu Psalm 34:8, di e taki: „Tesi èn si taki Yehovah bun.” Baka di Onesmus denki dipi fu a tekst dati, a bosroiti fu tron wan gewoon pionier. Now a e preiki fo dei na ini a wiki èn a abi wan tu Bijbelstudie di e go na fesi. Na ini 2010 a go na a Pionierskoro. Onesmus ben breiti srefisrefi di a si taki a leriman fu a skoro ben de wan fu den pionier di preiki gi en a fosi leisi.

Now Onesmus en papa nanga mama dede kaba, ma den brada nanga sisa na ini a gemeente e yepi en ala dei nanga den sani di a abi fanowdu. A breiti nanga ala den blesi di a kisi èn a no man wakti a dei te „nowan sma di e tan na ini a kondre o taki: ’Mi siki.’”—Yes. 33:24.