Yu man memre san yu leisi na ini den Waktitoren di kon na doro no so langa pasa? Luku efu yu kan piki den aksi disi:

O ten fu 14 Nisan den Israelsma ben musu srakti a pikin skapu fu a Paskafesa?

Son Bijbel e taki dati den Israelsma ben musu srakti a pikin skapu „na mofoneti”, baka te son dongo, ma a no ben musu dungru ete (Eks. 12:6).—15/12, bladzijde 18, 19.

Sortu Bijbel rai kan yepi yonguwan fu teki koni bosroiti?

Dri sani de: (1) Suku fosi a Kownukondre nanga Gado en retidu (Mat. 6:19-34). (2) Yu o de koloku te yu e du sani gi trawan (Tori 20:35). (3) Prisiri fu dini Yehovah te yu yongu (Preik. 12:1).—15/1, bladzijde 19, 20.

Sortu fo asiman e rèi sensi 1914?

Yesus, di e rèi wan weti asi, puru Satan nanga den ogri yeye fu en na hemel. A sma di e rèi na asi di redi leki faya e prenki den feti di sma e feti na heri grontapu. A sma di e rèi a blaka asi e prenki angriten. A sma di e rèi na asi di abi wan sikisma kloru e tyari takru siki kon di e kiri milyunmilyun sma (Openb. 6:2-8).—1/2, bladzijde 6, 7.

O ten „a trowdei fu a Pikin Skapu” o de? (Openb. 19:7)

„A trowdei fu a Pikin Skapu” o de baka te Kownu Yesus Krestes wini ala den feanti fu en. Sobun, disi o de baka te a pori Babilon a Bigiwan èn baka te a feti fu Armagedon pasa.—15/2, bladzijde 10.

Fu san ede den Dyu na ini a ten fu Yesus „ben fruwakti” taki a Mesias ben o kon? (Luk. 3:15)

Wi no sabi seiker efu den Dyu fu a fosi yarihondro ben frustan Danièl en profeititori di e taki fu a Mesias, soleki fa wi e frustan en (Dan. 9:24-27). Ma kande den yere fu a nyunsu di na engel ben fruteri wan tu skapuman, noso den yere san na umaprofeiti Ana taki di a si Yesus leki beibi na ini a tempel. Boiti dati, lukuman ben kon suku ’a sma di ben gebore fu tron kownu fu den Dyu’ (Mat. 2:1, 2). Bakaten, Yohanes a Dopuman taki dati a ten ben doro taki Krestes ben o kon.—15/2, bladzijde 26, 27.

San wi kan du fu no taki Iya fosi èn Nôno baka dati? (2 Kor. 1:18)

A kan pasa son leisi taki wi no man hori wisrefi na wan mofo di wi ben meki fu di wan sani pasa di wi no man kenki. Ma efu wi pramisi trawan wan sani noso wi meki wan mofo, dan wi musu du ala san wi man fu hori wisrefi na a mofo dati.—15/3, bladzijde 32.

San wi kan du te wi e kisi a firi fu luku porno?

Dri sani kan yepi wi: (1) Efu wi ai e fadon tapu wan sani di abi fu du nanga seks, dan wi musu drai wi fesi puru wantewante. (2) Wi musu basi a denki fu wi fu di wi e prakseri fu sani di fiti èn wi musu begi Gado. (3) Wi no musu luku felem noso sani tapu Internet di abi porno.—1/4, bladzijde 10-12.

Efu wan Kresten e libi en osofamiri fu go wroko na wan tra kondre, dan sortu sani kan pasa di a no fruwakti?

Te papa, mama nanga pikin no e libi nanga makandra, dan dati kan abi krakti na tapu den firi fu den pikin. Den ati kan bron nanga den papa nanga mama. Boiti dati, te masra nanga wefi no e libi nanga makandra, dan den kan fadon makriki na ini hurudu.—15/4, bladzijde 19, 20.

Fu san ede sma ben e broko den futu fu ogriman di ben e anga na wan postu?

Wan fasi fa den Romesma ben e kiri ogriman na taki den ben e anga den na wan postu. Den Dyu ben aksi fu sma broko den futu fu den ogriman di ben e anga na sei Yesus. Disi ben o meki taki den ogriman no ben o man hari bro so makriki èn den ben o dede moro gaw. Na so fasi den no ben abi fu anga na a postu heri neti (Deut. 21:22, 23).—1/5, bladzijde 11.

Sortu fo aksi wi musu hori na prakseri te wi e taki nanga sma na ini a preikiwroko?

Suma na den sma di mi e miti? Pe mi e taki nanga den? O ten na a moro bun ten fu taki nanga den? Fa mi musu taki nanga den?—15/5, bladzijde 12-15.

Omeni sma e dede fu di den smoko?

Na ini den wán hondro yari di pasa 100.000.000 sma dede fu di den ben e smoko. Na ini a ten disi sowan 6.000.000 sma e dede na ini wán yari.—1/6, bladzijde 3.