1, 2. Fa a libi ben de gi Adam nanga Eva na a bigin èn na sortu aksi wi o poti prakseri?

DI GADO meki Adam nanga Eva den no ben abi nowan feanti. Den no ben abi sondu èn den ben e libi na ini wan paradijs. Den ben de a manpikin nanga na umapikin fu a Mekiman (Gen. 2:7-9; Luk. 3:38). Gado ben gi den wan prenspari wroko fu du. (Leisi Genesis 1:28.) O langa den ben o abi fu libi fu kan klari a wroko disi? Den no ben o abi fu libi fu têgo fu man ’meki pikin èn kon furu, teleki den kon lai na grontapu èn basi en’. Ma fu man sorgu gi „ibri meti di e kroipi na gron” den ben o abi fu libi fu têgo. Den ben kan du a wroko disi fu ala ten.

² Ma fu san ede sani de tra fasi now? Fu san ede so furu sani de di e meki taki libisma no de koloku? Fu san ede den e dede? Fa Gado o tyari wan kaba kon na ala den sani disi? Bijbel e gi piki tapu den aksi disi èn wi o poti prakseri na den aksi disi now.

3, 4. (a) Sortu wet Gado ben gi Adam nanga Eva? (b) O prenspari a ben de fu gi yesi na a wet dati?

³ Aladi Adam nanga Eva ben abi a howpu fu libi fu têgo, toku den ben musu du son sani fu man tan na libi. Fu man tan na libi den ben musu hari bro, den ben musu dringi, nyan, èn sribi. San moro prenspari, na taki den ben musu tan bun mati fu Yehovah, a sma di gi den libi (Deut. 8:3). Den ben musu gi yesi na Gado fu man tan na libi èn fu de koloku. Bifo Yehovah ben meki Eva, a ben taigi Adam kaba: „Fu ibri bon na ini a dyari yu kan nyan teleki yu bere furu. Ma fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede.”—Gen. 2:16, 17.

⁴ „A bon di nen ’Sabi san bun èn san ogri’” ben sori taki na Gado ben abi a reti fu taki san bun èn san ogri. Adam ben sabi san bun èn san ogri fu di a ben abi wan konsensi èn fu di Gado ben meki en nanga den fasi di En srefi abi. A bon ben e memre Adam nanga Eva taki ala ten den ben o abi Yehovah fanowdu fu tiri den. Efu den ben o nyan fu a bon, dan a ben o de neleki den taigi Gado: ’Wi no abi yu fanowdu fu tiri wi.’ A bakapisi no ben o bun. Den nanga ala den pikin fu den ben o dede, soleki fa Gado ben warskow den.

5. Fu san ede Adam nanga Eva trangayesi Yehovah?

⁵ Baka di Gado meki Eva, Adam taigi en san Gado ben taki fu a bon. Bakaten Eva ben sabi a wet disi so bun, taki a ben kan fruteri en na a sneki di Satan gebroiki fu taki nanga en (Gen. 3:1-3). Satan Didibri di ben de wan yeye manpikin fu Gado ben wani abi makti èn a no ben wani taki Gado tiri en. Fu di a tan denki a sani disi, meki a sondu te fu kaba (Luku Yakobus 1:14, 15). Dati meki a taki sani di ben meki a gersi leki Gado na wan leiman. A taigi Eva dati a no ben o dede efu a ben o libi sondro a tiri fu Gado. Na presi fu dati a ben o tron leki Gado (Gen. 3:4, 5). Eva ben bribi en èn di a nyan fu a froktu a sori taki a no ben wani saka ensrefi na ondro a tiri fu Gado. Bakaten a meki Adam nyan fu a froktu tu (Gen. 3:6, 17). Ma Didibri ben lei. (Leisi 1 Timoteyus 2:14.) Adam ben sabi taki a no ben musu nyan fu a froktu, ma toku a „arki a sten fu [en] wefi”. Kande a ben gersi leki a sneki ben de wan mati fu den. Ma Satan Didibri, a sma di meki a sneki taki, ben de wan ogri-ati feanti di ben sabi san ben o pasa te Eva ben o arki en.

6, 7. Fa Yehovah krutu Adam nanga Eva?

⁶ Adam nanga Eva ben trangayesi a sma di ben gi den libi èn di ben gi den ala tra sani di den ben abi. A no de fu taki dati Yehovah ben sabi san ben pasa (1 Kron. 28:9; leisi Odo 15:3.) Ma a gi Satan, Adam nanga Eva na okasi fu sori fa den ben e denki fu en. A no de fu taki dati a sani disi ben hati Yehovah, a Papa fu den (Luku Genesis 6:6). Ma leki Krutuman a ben abi fu strafu den now.

⁷ Gado ben taigi Adam: „Na a dei di yu o nyan fu [a bon di nen ’Sabi san bun èn san ogri’], na dede yu o dede.” A kan taki Adam ben denki taki a ben o dede a srefi dei dati, fosi son dongo. Ma bakaten  na a srefi dei dati Yehovah ben taki nanga Adam nanga Eva (Gen. 3:8). Leki wan Krutuman di lobi retidu, a arki fosi san den ben abi fu taki (Gen. 3:9-13). Baka dati a koti krutu èn Adam nanga Eva kisi dedestrafu (Gen. 3:14-19). Ma efu a ben kiri den wantewante, dan den sani di a ben abi na prakseri gi libisma no ben o kon tru (Yes. 55:11). Aladi Adam nanga Eva bigin si den bakapisi fu a sondu fu den wantewante, toku Yehovah meki den libi langa nofo fu kan meki pikin di ben kan kisi den sani di Yehovah ben pramisi libisma. Ma gi en, Adam nanga Eva ben dede sensi a dei di den sondu. Den dede na a srefi dei dati fu di wán „dei” gi Yehovah de leki 1000 yari.—2 Petr. 3:8.

8, 9. San sondu du nanga den bakapikin fu Adam? (Luku a prenki na a bigin fu na artikel.)

⁸ A de so taki den pikin fu Adam nanga Eva ben o kisi den srefi bakapisi leki den? Iya. Romesma 5:12 taki: „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu.” A fosi sma di dede ben de Abel di ben e dini Gado nanga en heri ati (Gen. 4:8). Bakaten den tra pikin nanga bakapikin fu Adam kon owru èn den dede tu. Ala libisma kisi sondu nanga dede fu Adam. Na apostel Paulus taki: „Furu sma tron sondari fu di a wán man dati trangayesi Gado” (Rom. 5:19). Sobun, a sondu nanga a dede di Adam tyari kon gi den bakapikin fu en de leki tu ogri feanti fu libisma di den no man wini. Wi no sabi soifri fa sondu nanga dede panya go na ala den bakapikin fu Adam, ma san wi sabi na taki ala libisma e ondrofeni den bakapisi fu sondu èn den alamala e dede te fu kaba.

⁹ Bijbel e kari sondu nanga dede „a duku di tapu ala den pipel èn a krosi di brei lontu ala den pipel” (Yes. 25:7). Nowan sma no man komoto na ini a „duku” fu sondu nanga dede. Dati meki Bijbel e taki dati ’ala sma e dede fu Adam ede’ (1 Kor. 15:22). Fu dati ede Paulus ben aksi: „Suma sa frulusu mi fu a skin disi di e tyari mi go dede?” (Rom. 7:24) Iya, suma man tyari frulusu kon? *

10. (a) San na wan tu Bijbeltekst di e sori taki Yehovah o puru dede na pasi? (b) San den tekst disi e sori fu Yehovah nanga en Manpikin?

¹⁰ Yehovah na a sma di ben kan frulusu Paulus. Wantewante baka di Yesaya taki fu a „duku di tapu ala den pipel”, a taki: „A Moro Hei Masra Yehovah o swari dede fu têgo èn a o figi den watra-ai fu ala sma puru na den fesi” (Yes. 25:8). Yehovah de leki wan papa di e sorgu taki en pikin no e pina moro èn di e drei den watra-ai fu den. A e angri fu puru a dede di Adam tyari kon gi libisma! Wan tra sma de tu di e wroko makandra nanga en fu meki disi pasa. Na ini 1 Korentesma 15:22 wi e leisi: „Neleki fa ala sma dede fu Adam ede, na so ala sma sa kon na libi baka tu fu Krestes ede.” Fu dati ede, di Paulus aksi „Suma  sa frulusu mi?”, a taki: „Mi e taki Gado tangi taki a frulusu mi nanga yepi fu wi Masra Yesus Krestes!” (Rom. 7:25) A de krin taki Yehovah tan lobi libisma baka di Adam nanga Eva sondu. Èn Yesus, a sma di wroko makandra nanga Yehovah fu meki den fosi libisma, lobi libisma te now ete (Odo 8:30, 31). Fa den ben o frulusu libisma?

11. San Yehovah du fu yepi libisma?

¹¹ Di Adam sondu Yehovah taki dati a ben o dede. A bakapisi ben de taki ala libisma kisi sondu èn den alamala e dede (Rom. 5:12, 16). Romesma 5:18 e taki: „Wán sondu nomo meki taki ala sortu sma kisi strafu.” San Yehovah ben kan du fu puru sondu nanga dede sondro fu pasa den wet fu en? Yesus ben gi a piki di a taki: „A Manpikin fu libisma . . . kon . . . fu gi en libi leki wan lusu-paiman fu frulusu furu sma” (Mat. 20:28). Fu di Yesus tron wan libisma di no abi sondu, a ben kan gi en libi leki lusu-paiman. Fa disi ben kruderi nanga den wet fu Yehovah?—1 Tim. 2:5, 6.

12. Tyari kon na krin fa a lusu-paiman e kruderi nanga den wet fu Yehovah.

¹² Fu di Yesus no ben abi sondu, meki a ben kan libi fu têgo. Na dati Yehovah ben wani gi Adam. A ben wani taki heri grontapu ben o kon furu nanga den bakapikin fu Adam di no ben o abi sondu tu. Yesus ben abi a srefi sortu libi di Adam lasi. Fu di Yesus lobi en Papa nanga den bakapikin fu Adam trutru, meki a dede fu gi a libi dati leki ofrandi. Bakaten Yehovah gi en Manpikin libi baka leki wan yeye (1 Petr. 3:18). Fu di Yesus no ben abi sondu, meki Yehovah ben kan gebroiki a libisma libi fu Yesus leki ofrandi noso lusu-paiman fu bai den bakapikin fu Adam baka èn fu man gi den a libi di Adam ben lasi. Sobun, yu kan taki dati Yesus ben teki a presi fu Adam. Paulus taki: „Gado Buku taki tu: ’A fosi man, Adam, tron wan libisma.’ A lasti Adam tron wan yeye di e gi libi.”—1 Kor. 15:45.

13. San „a lasti Adam” o du gi den sma di dede?

¹³ Heri esi Yesus, „a lasti Adam”, o gi têgo libi na den bakapikin fu Adam. Furu fu den na sma di dede na ini a ten di pasa. Den musu kisi wan opobaka fu man libi na grontapu baka.—Yoh. 5:28, 29.

14. San Yehovah seti fu puru sondu gi den bakapikin fu Adam?

¹⁴ Fa libisma o kon fri fu sondu? Yehovah seti wan Kownukondre pe „a lasti Adam” e tiri makandra nanga 144.000 sma di A teki puru fu grontapu. (Leisi Openbaring 5:9, 10.) Den sma disi sabi san a wani taki fu de wan sondu sma. Dusun yari langa Yesus nanga den 144.000 sma di o tiri makandra nanga en, o yepi libisma fu tron sma di no abi sondu.—Openb. 20:6.

15, 16. (a) O ten dede no o de moro? (b) San Yesus o du soleki fa 1 Korentesma 15:28 e sori?

¹⁵ Na a kaba fu den 1000 yari te a Kownukondre o tiri, den libisma di e gi yesi o de fri fu sondu nanga dede. Bijbel e taki: „Neleki fa ala sma dede fu Adam ede, na so ala sma sa kon na libi baka tu fu Krestes ede. Ma ibri sma o kisi wan opobaka te en ten doro. Krestes kisi wan opobaka leki fosiwan, èn bakaten den wan di de fu Krestes [èn di o tiri makandra nanga en] o kisi wan opobaka te a kon baka. Baka dati, na a kaba, a  o gi a Kownukondre abra na en Gado èn Tata. Ma fosi dati pasa a o tyari wan kaba kon na ala tirimakti, na ala makti, èn na ala krakti. Bika a musu tiri leki Kownu teleki Gado poti ala den feanti fu en na ondro en futu. Dede na a lasti feanti di a o puru na pasi” (1 Kor. 15:22-26). Iya, a dede di Adam tyari kon gi wi no o de moro. „A duku” di e tapu ala libisma no o de noiti moro.—Yes. 25:7, 8.

¹⁶ Paulus e taki moro fara: „Te ala sani de na a Manpikin ondro kaba, dan a o saka ensrefi na ondro Gado di ben poti ala sani na en ondro. Na so Gado kan de ala sani gi ala sma” (1 Kor. 15:28). Na a ten dati a Manpikin o kaba nanga a wroko di en leki Tiriman ben musu du. Baka dati a o breiti fu gi Yehovah en tirimakti baka, so taki A kan tiri libisma di no abi sondu moro.

17. San o pasa nanga Satan te fu kaba?

¹⁷ San o pasa nanga Satan, a sma di tyari soso pina kon gi libisma? Openbaring 20:7-15 e gi piki tapu na aksi disi. Na a kaba fu den 1000 yari, Satan o kisi pasi fu tesi libisma wan lasti leisi. Dan en nanga iniwan sma di e horibaka gi en o kisi pori fu têgo. Bijbel e kari disi „a di fu tu dede” (Openb. 21:8). Den sma di e dede „a di fu tu dede” no o kisi libi noiti moro. Sobun, „a di fu tu dede” o tan. Efu wi e tan dini Yehovah nanga wi heri ati, wi no abi fu broko wi ede nanga „a di fu tu dede”.

18. Suma o klari a wroko di Adam ben kisi fu du?

¹⁸ Baka dati Yehovah o feni en bun fu gi têgo libi na libisma di no o abi sondu moro. Nowan sani no o de moro di kan meki taki libisma no de koloku. Den sani di Gado ben wani gi libisma o kon tru sondro Adam. Grontapu o lai nanga den bakapikin fu en di o prisiri fu sorgu gi grontapu nanga ala den meti. Wi de nanga tangi trutru taki heri esi Yehovah o puru dede, a lasti feanti, na pasi!