A MORO prenspari wroko di e du na grontapu na ini a ten disi, na taki wi e preiki a bun nyunsu. Na wan grani taki wi leki futuboi fu Yehovah mag du a wroko disi fu gi sma leri. Ma son leisi a no makriki gi pionier nanga preikiman fu tan du a preikiwroko fayafaya. Fu san ede?

Son preikiman no e kisi furu okasi fu taki nanga sma te den e preiki oso fu oso, fu di furu fu den sma disi no de. Èn srefi te sma de na oso, den no wani arki a Kownukondre boskopu noso den ati e bron srefi nanga wi. Tra preikiman e preiki na ini wan bigi kontren pe furu sma wani arki, ma den preikiman disi abi a firi taki noiti den o kisi na okasi fu preiki gi ala den sma disi. Dan yu abi tra brada nanga sisa di e preiki furu yari langa, ma fu di a kaba no kon ete, meki den lasi-ati.

Te wi de na ini a preikiwroko, dan sani kan pasa di kan meki taki wi no de nanga so furu faya moro. Wi e libi na ini wan grontapu pe Satan Didibri, „na ogriwan”, na a tiriman. Sobun, wi kan fruwakti taki a o muilek gi wi fu preiki a bun nyunsu.—1 Yoh. 5:19.

Awinsi sortu problema e miti yu te yu e preiki a bun nyunsu, yu kan de seiker taki Yehovah o yepi yu fu lusu a problema. Ma san yu kan du fu preiki nanga moro faya? Meki wi luku wan tu sani di kan yepi yu.

Ibri yari, dusundusun sma e teki dopu leki Kotoigi fu Yehovah. Efu yu na wan sma di no dopu so langa ete, dan yu kan leri furu fu brada nanga sisa di e preiki furu yari kaba. Efu yu na wan Kownukondre preikiman langa ten kaba, dan fu san ede yu no e yepi nyun brada nanga sisa? A sani disi kan gi yu furu prisiri.

Yesus ben sabi taki den bakaman fu en ben abi yepi fanowdu fu kan tron bun preikiman.  Dati meki a sori den fa fu preiki (Luk. 8:1). Na ini a ten disi brada nanga sisa de fanowdu tu di kan yepi trawan fu tron bun preikiman.

Wi no musu denki taki nyun preikiman sabi kaba fa fu gi trawan leri, soso fu di den e go na ini a preikiwroko. Den abi brada noso sisa fanowdu di abi a pasensi fu yepi den na wan switifasi. Den sma disi musu leri a nyun preikiman (1) fa fu sreka wan takimakandra èn fa fu oefen en, (2) fa fu meki na ososma noso wan sma di e waka pasa taki fa a e denki, (3) fa fu gi na ososma wan sani fu leisi, (4) fa fu go baka na den sma di ben arki èn (5) fa fu bigin wan Bijbelstudie. Efu a nyun preikiman e luku bun fa a tra preikiman e gi leri èn a e pruberi fu du en na a srefi fasi tu, dan a o abi bun bakapisi (Luk. 6:40). A nyun preikiman o breiti taki wan sma de nanga en fu arki san a e taki èn fu yepi en te dati de fanowdu. A o de wan bigi yepi te a preikiman di abi moro ondrofeni e prèise a nyun preikiman èn e gi en bun rai.—Preik. 4:9, 10.

Son leisi a e pasa taki wi e du omeni muiti fu taki nanga sma, ma den no wani arki. Kande a wan-enkri sma di taki nanga yu a dei dati na a brada noso sisa di e wroko nanga yu. No frigiti taki di Yesus seni den bakaman fu en go preiki, a meki den wroko „tu na tu” (Luk. 10:1). Te den ben o wroko nanga makandra, dan den ben o gi makandra deki-ati. Wi srefi abi moi okasi tu fu „gi makandra deki-ati” te wi e wroko nanga den brada nanga sisa fu wi.—Rom. 1:12.

Fu sortu sani yu kan taki? Wan fu unu abi wan moi ondrofenitori? Yu leisi wan moi tori di yu ben studeri Bijbel noso di yu hori na Osofamiri Anbegi? Yu kisi deki-ati fu wan sani di yu yere na wan fu den konmakandra? Son leisi yu musu wroko nanga wan preikiman di yu no sabi so bun. Yu sabi fa a kon na ini a tru anbegi? San yepi en fu si taki disi na Yehovah organisâsi trutru? Sortu grani noso ondrofenitori a abi? Kande yu kan fruteri en yu eigi ondrofenitori tu. Awinsi san sma na ini a preikiwroko e du, te wi e wroko nanga makandra, dan wi abi moi okasi fu ’tan gi makandra deki-ati èn fu tan yepi makandra’.—1 Tes. 5:11.

Efu yu wani tan du a preikiwroko fayafaya, dan yu no musu lasi a gwenti fu studeri bun. „A koni srafu di de fu frutrow” e tyari furu sani  kon na doro di e taki fu ala sortu tori (Mat. 24:45). Meki wi go luku wan fu den tori di yu kan studeri. Kande yu kan luku na aksi disi: Fu san ede a Kownukondre preikiwroko de so prenspari? A faki di nen „Fu san ede yu musu tan du a preikiwroko fayafaya?” e kari wan tu sani.

Te yu luku den sani di kari na ini a faki disi, dan dati kan yepi yu fu tan preiki fayafaya. Fu san ede yu no e studeri a tori disi fu kon si efu moro sani de di kan yepi yu? Denki dipi fu den sani dati èn fu den tekst di e horibaka gi den. Disi o yepi yu fu de nanga moro faya na ini a preikiwroko.

Nofo tron Yehovah organisâsi e gi wi rai di musu yepi wi fu du wi diniwroko moro bun. Fu eksempre, boiti taki wi kan preiki oso fu oso, wi kan skrifi brifi tu, bel sma, du stratiwroko noso preiki na tra presi pe furu sma de. Wi kan preiki tu te wi feni wan okasi noso te wi de na ini bisnis kontren. Kande wi kan seti sani tu fu go preiki na kontren pe wi no e preiki so furu.

Yu de klariklari fu gebroiki den rai disi? Yu pruberi fu du wan tu fu den kaba? Furu sma du en èn a gi den prisiri trutru di den si den bun bakapisi. Luku dri eksempre.

Wan sisa di nen April ben wani pruberi wan fu den rai na ini Wi Kownukondre diniwroko di ben sori fa fu bigin wan Bijbelstudie. A aksi dri sma na en wrokope efu den wani studeri Bijbel. A sisa disi fruwondru taki ala den dri sma disi bigin studeri èn bigin go na den konmakandra. Dati meki a ben breiti srefisrefi.

 Wi kisi deki-ati tu fu suku sma di ben sa wani leisi spesrutu artikel na ini den tijdschrift fu wi. Wan kring-opziener fu Amerkankondre fruteri taki a gi den basi fu ala den wenkri na ini a kontren fu en di e seri banti, wan Ontwaakt! di e taki fu banti. Wan tra Ontwaakt! ben kon di e taki fu san ede a bun fu hori den datra na prakseri (A ben nen „Heb begrip voor uw arts”). A brada disi nanga en wefi tyari na Ontwaakt! go na moro leki 100 datra-poli na ini a kring fu den. A taki dati na so den sma na den presi disi ben kon sabi a wroko di wi e du èn den buku fu wi. Baka di en nanga en wefi kon sabi den sma disi moro bun, den ben man tyari moro gobaka.

Wan sisa di nen Judy skrifi wan brifi gi na edekantoro fu taigi den taki a breiti nanga a deki-ati di wi ben kisi fu bel sma fu preiki gi den. A skrifi taki en mama abi 86 yari èn taki a abi furu problema nanga en gosontu. Furu tron en mama ben e bel sma fu preiki gi den èn a bakapisi ben de taki a ben man bigin studeri Bijbel na telefon nanga wan uma fu 92 yari.

Den rai na ini den buku fu wi di e sori fa fu preiki, na wan bigi yepi. Gebroiki den rai disi! Den kan yepi yu fu tan abi prisiri èn fu tan preiki fayafaya.

O ten wi kan taki dati wi e du wi preikiwroko bun? A no te wi e prati furu buku, te wi abi furu Bijbelstudie noso te wi e yepi furu sma fu tron futuboi fu Yehovah. Prakseri a tori fu Noa. Omeni sma boiti en eigi osofamiri a ben man yepi fu tron anbegiman fu Yehovah? Toku a ben du en preikiwroko bun. San prenspari na taki wi e tan dini Yehovah nanga wi heri ati.—1 Kor. 4:2.

Furu Kownukondre preikiman kon si taki efu den wani tan du a preikiwroko fayafaya, dan den musu luku san den kan du ete fu du en moro bun. San na wan tu fu den sani disi? A faki di nen „San yu kan du?” e taki fu a tori disi.

Meki Yehovah yepi yu fu suku fasi fu de nanga prisiri te yu e preiki èn fu du en moro bun. Te yu man du san yu ben abi na prakseri, dan yu o firi bun èn yu o sabi taki yu du ala san yu man fu preiki a bun nyunsu.

A tru taki son leisi a preikiwroko no makriki. Ma sani de di yu kan du fu tan de wan fayafaya Kownukondre preikiman. Taki nanga a preikiman di e wroko nanga yu so taki unu kan gi makandra deki-ati. No lasi a gwenti fu studeri bun èn de klariklari fu gebroiki den rai di a srafu di de frutrow e gi wi. Boiti dati, yu musu luku san yu kan du ete fu du yu preikiwroko moro bun. Hori na prakseri tu taki Gado gi yu a bigi grani fu preiki a bun nyunsu leki wan fu en Kotoigi (Yes. 43:10). Yu o abi furu prisiri te yu e tan du a preikiwroko fayafaya!