1, 2. Soleki fa na apostel Yohanes taki, dan fa Gado sori san lobi wani taki?

FURU sma sabi taki a moro bun fasi fa wan papa kan kweki den pikin fu en, na te a de wan eksempre gi den. Na apostel Yohanes ben skrifi taki wi man sori lobi, „fu di na Gado fosi ben lobi wi” (1 Yoh. 4:19). Sobun, a de krin taki Yehovah na a moro moi eksempre fu wan papa di e sori lobi. Na so wi kan leri fu lobi en tu.

² Na sortu fasi Gado „fosi ben lobi wi”? Na apostel Paulus taki: „Gado sori wi taki a lobi wi fu di a meki Krestes dede gi wi, aladi wi ben de sondari ete” (Rom. 5:8). Fu gi en eigi Manpikin leki wan lusu-paiman gi libisma di ben o poti bribi na ini en, ben de wan bigi sani gi Yehovah. Na so a sori san lobi wani taki trutru. Wi kan sori a lobi disi te wi no gridi fu gi sma sani èn te wi e du sani gi trawan sondro fu prakseri wisrefi nomo. A bigi sani di Gado du meki taki wi kan kon krosibei na en. Na so wi kan kisi wini fu a lobi fu en èn wi srefi kan sori taki wi lobi en tu.—1 Yoh. 4:10.

3, 4. Fa wi musu sori taki wi lobi Gado?

³ Lobi na a moro prenspari fasi fu Yehovah. Sobun, wi kan frustan fu san ede Yesus taki dati a moro prenspari komando na: „Un musu lobi Yehovah un Gado nanga un heri ati, nanga un  heri libi, nanga un heri frustan, èn nanga ala un krakti” (Mark. 12:30). Yesus sori wi dyaso taki te wi lobi Gado, a prenspari taki wi ati de na ini a tori. Wi musu lobi Gado nanga wi heri ati. Te wi no du dati, dan Yehovah no o feni dati bun. Ma Bijbel e taki tu dati wi musu lobi Gado nanga wi heri libi, nanga wi heri frustan èn nanga ala wi krakti. Disi wani taki dati trutru lobi gi Gado na moro leki wan firi nomo di wi abi na ini wi ati. Trutru lobi gi Gado wani taki tu dati wi e frustan den tru tori fu Bijbel moro krin èn taki wi e anbegi Gado nanga ala wi krakti. Soleki fa a profeiti Mika taki, dan disi na san Yehovah wani fu wi.—Leisi Mika 6:8.

⁴ Fa wi kan sori taki wi lobi wi hemel Papa trutru? Wi kan du dati te wi e poti en na a fosi presi na ini wi libi. Soleki fa Yesus sori, dan wi musu dini en nanga ala wi krakti, nanga ala sani wi abi, nanga wi heri ati èn nanga wi heri frustan. Na ini a tra artikel wi ben luku fo fasi fa Yehovah sori taki a lobi den pikin fu en trutru. Meki wi go luku now fa wi kan meki taki a lobi di wi abi gi Yehovah e kon moro tranga èn fa wi kan sori a lobi disi na fasi di a feni bun.

5. San wi wani du fu sori Yehovah taki wi breiti nanga ala san a du gi wi?

⁵ Te yu e kisi wan kado, dan san yu e du? Yu o sori a sma taki yu breiti, a no so? Yu o gebroiki a kado, fu di yu e si en leki wan warti sani. A disipel Yakobus skrifi: „Ibri bun presenti nanga ibri kado di bun dorodoro e kon fu tapusei, bika a e saka kon fu a Tata fu den leti na hemel. A Tata e tan wán fasi nomo. A no e kenki soleki fa skaduw e kenki” (Yak. 1:17). Ala ten baka Yehovah e gi wi san wi abi fanowdu fu tan na libi èn fu firi koloku. A sani disi no e meki taki wi wani sori en taki wi lobi en tu?

6. San den Israelsma ben musu du fu tan kisi blesi fu Yehovah?

⁶ Hondrohondro yari langa, den Israelsma firi fa Yehovah lobi den èn fa a sorgu gi den. A ben e blesi den bogobogo, fu di a ben e gi den ala san den ben abi fanowdu èn a ben e leri den ala den wet fu en (Deut. 4:7, 8). Ma efu den ben wani taki Yehovah tan blesi den, dan den ben musu gi yesi na Gado Wet. Fu eksempre, Yehovah ben taigi den taki den ben musu gi en den „moro bunwan fu den fosi lepi froktu” fu den gron fu den (Eks. 23:19). Na so den Israelsma ben kan sori taki den ben e warderi den blesi fu Yehovah èn taki den ben e warderi a lobi di a ben e sori gi den.—Leisi Deuteronomium 8:7-11.

7. Fa wi kan gebroiki „den gudu” di wi abi fu sori Yehovah taki wi lobi en?

⁷ Fa a de nanga wi? Aladi wi no abi fu tyari ofrandi leki fa den Israelsma ben e du dati fosi, toku a fiti taki wi e sori lobi gi Gado fu di wi e gi en grani nanga „den gudu” di wi abi (Odo 3:9). San na wan tu fasi fa wi kan du dati? Soleki fa a sori, dan wi kan gebroiki den gudu fu wi fu horibaka gi a Kownukondre wroko na ini a kondre fu wi èn na heri grontapu. Disi na wan moi fasi fu sori Yehovah taki wi lobi en, awinsi wi abi furu noso pikinso nomo (2 Kor. 8:12). Ma moro fasi de fa wi kan sori Yehovah taki wi lobi en.

8, 9. Te wi e frutrow na tapu Yehovah taki a o du san a pramisi, dan fa dati e sori taki wi lobi en? Gi wan eksempre.

⁸ Prakseri san Yesus taigi den bakaman fu en. A ben taki dati den no ben musu broko den ede nanga nyanyan èn nanga san den ben o weri, ma taki den ben musu tan poti a Kownukondre na a fosi presi. A taigi den  taki wi hemel Papa sabi heri bun san wi abi fanowdu trutru (Mat. 6:31-33). Wi e frutrow na tapu Yehovah èn wi sabi taki a o du san a pramisi. Efu wi lobi wan sma trutru, dan wi musu frutrow en tu. Iya, o moro wi e frutrow na tapu Yehovah, o moro wi e sori taki wi lobi en (Ps. 143:8). Sobun, wi kan aksi wisrefi: ’Den sani di mi wani du na ini mi libi èn a fasi fa mi e libi nownow, e sori taki mi lobi Yehovah trutru? Den sani di mi e du ibri dei e sori taki mi no e tweifri taki a man gi mi san mi abi fanowdu?’

⁹ Wan brada di nen Mike sori taki a lobi Yehovah èn taki a e frutrow na en tapu. Sensi di Mike ben yongu, a ben wani go preiki na ini wan tra kondre. Srefi di a trow èn a kisi tu pikin, a ben wani du a sani disi ete. Den furu artikel nanga den ondrofenitori fu sma di go dini pe moro yepi de fanowdu, gi Mike nanga en osofamiri deki-ati fu kenki a libi fu den. Den seri na oso fu den èn den froisi go na wan moro pikin oso. Mike ben abi wan bisnis di ben e krin oso nanga kantoro. Ma a bosroiti fu no teki so furu wroko moro. A leri tu fa a ben kan gebroiki Internet fu sorgu gi a bisnis fu en te a ben o froisi go na wan tra kondre. Baka dati en nanga en osofamiri froisi. Now di den e dini tu yari kaba na ini wan tra kondre, Mike e taki: „Wi si taki a sani di Yesus taki na ini Mateyus 6:33 de so trutru.”

10. Fu san ede a bun fu denki dipi fu san wi e leri fu Yehovah, neleki fa Kownu David ben e du dati?

¹⁰ Sowan 3000 yari pasa, Kownu David luku go na loktu. Den sani di a si naki en ati so te taki a skrifi: „Hemel e taki fu a glori fu Gado. A loktu e fruteri fu ala den sani di en anu meki.” Di David kon si a koni fu Gado Wet, a taki: „A wèt fu Yehovah bun dorodoro, a e gi sma krakti baka. Den warskow fu Yehovah na sani di yu kan frutrow. Den e meki a sma sondro ondrofeni kisi koni.” San ben de a bakapisi di David prakseri den sani disi? A taki go moro fara: „Meki den sani di mi e taki nanga mi mofo nanga den sani di mi e prakseri dipi na ini mi ati, kon de sani di yu feni bun. Yehovah, yu na mi Stonbergi. Yu na mi Frulusuman.” A de krin taki a matifasi di David ben abi nanga a Gado fu en ben tranga.—Ps. 19:1, 7, 14.

11. Fa wi kan gebroiki den sani di Yehovah leri wi fu sori taki wi lobi en? (Luku a prenki na a bigin fu na artikel.)

¹¹ Na ini a ten disi, Yehovah e leri wi furu sani fu ensrefi èn fu san a abi na prakseri. A e leri wi tu fu den sani di a meki èn fu a Wortu fu en. A grontapu fu Satan e gi sma deki-ati fu teki hei skoroleri èn fu go na universiteit. Ma nofo tron sma e lasi bribi te den e du disi èn den no e sori lobi gi Gado moro. Na a tra sei, Bijbel no e gi wi deki-ati nomo fu teki leri, ma fu kon abi koni tu èn fu kisi frustan. Disi wani taki dati wi musu leri fa fu gebroiki den sani di Gado leri wi fu kan kisi wini gi wisrefi èn gi tra sma (Odo 4:5-7). Gado „wani taki ala sortu sma musu kisi frulusu èn taki den musu kon sabi a tru leri finifini” (1 Tim. 2:4). Wi e sori taki wi lobi Yehovah te wi e du ala san wi man fu fruteri ala sma a bun nyunsu fu a Kownukondre èn te wi e yepi den fu kon frustan sortu moi sani Gado abi na prakseri gi libisma.—Leisi Psalm 66:16, 17.

12. Fa wan yongu sisa sori warderi gi a kado di Yehovah gi en?

¹² Srefi yongusma kan sori taki den lobi Yehovah fu di den e sori warderi gi den sani di a leri den. Shannon e fruteri taki di a ben abi 11 yari, en nanga en pikin sisa fu 10 yari go na a „Gi di sma e gi densrefi na ini a dini fu Gado” Distrikt Kongres, makandra  nanga a papa nanga mama fu den. Na wan fu den lezing di ben e hori, a brada aksi den yonguwan fu go sidon na den presi di ben seti spesrutu gi den. Aladi Shannon ben e senwesenwe pikinso, toku a du en. Ma di ala den yonguwan kisi wan moi buku leki kado, a ben breiti. A buku ben nen Wat jonge mensen vragen — Praktische antwoorden. San a buku disi leri Shannon fu Yehovah Gado? A e taki: „Dan fosi mi kon frustan taki Yehovah na wan trutru sma èn taki trutru a lobi mi. Wi breiti taki wi bigi Gado Yehovah wani gi wi den sortu moi kado disi.”

13, 14. San wi musu du te Yehovah e piri-ai gi wi èn fu san ede?

¹³ Bijbel e taki: „Yehovah e piri-ai gi a sma di a lobi, neleki fa wan papa e du nanga wan manpikin di e gi en prisiri” (Odo 3:12). Ma san wi musu du te Yehovah e piri-ai gi wi? Na apostel Paulus taki krin: „A tru taki te sma e kisi strafu, dan a no de wan prisiri sani na a momenti dati, ma a e hati.” Nanga den wortu disi, Paulus no ben wani sori wi taki a no prenspari fu kisi piri-ai. Dati meki a taki moro fara: „Ma bakaten den wan di e leri wan sani fu a strafu disi, e kisi blesi di e tyari freide kon èn den e du san reti” (Hebr. 12:11). Efu wi lobi Yehovah, dan wi musu luku bun taki wi no e mandi te a e gi wi rai. Kande a sani disi muilek gi son sma. Ma te wi lobi Gado, dan dati kan yepi wi furu.

¹⁴ Na ini a ten fu Maleaki, furu Dyu no ben e gi yesi na den rai fu Gado. Den ben sabi san a Wet ben taki fu den ofrandi di den ben musu tyari, ma den no ben e span nanga dati. Dati meki Yehovah ben musu piri-ai gi den. (Leisi Maleaki 1:12, 13.) O seryusu a situwâsi ben de? Luku san Yehovah taigi den: „Mi o meki fluku kon na un tapu èn mi o meki den blesi fu unu tron fluku. Iya, mi meki ibriwan fu den blesi fu unu tron fluku, fu di unu no e du san mi taki” (Mal. 2:1, 2). A de krin taki te wi abi a gwenti fu no arki a rai fu Yehovah, noso te wi no e si a rai fu en leki wan prenspari sani, dan sani no o waka bun gi wi.

15. Nanga sortu denki fu grontapu wi musu luku bun?

 ¹⁵ Na ini a ten disi, furu sma e denki densrefi nomo èn den no lobi te sma e gi den rai noso e taigi den san fu du. Son sma e teki a rai, ma den no e du disi nanga den heri ati. Ma Kresten e kisi a rai fu „no libi moro leki den sma fu a grontapu disi”. Wi musu du „a wani fu Gado di bun” èn wi musu sabi tu san na a wani disi (Rom. 12:2). Yehovah e gebroiki en organisâsi fu gi wi rai na a yoisti ten. A rai disi abi fu du nanga difrenti sani na ini a libi, soleki den mati fu wi, a fasi fa wi e meki prisiri, nanga a fasi fa mansma nanga umasma musu tyari densrefi te den de nanga makandra. Te wi de klariklari fu teki a rai disi, dan wi e sori taki wi e warderi en èn taki wi lobi Yehovah trutru.—Yoh. 14:31; Rom. 6:17.

16, 17. (a) Fu san ede wi musu hori a wani fu Yehovah na prakseri te wi e teki bosroiti? (b) San den Israelsma du, na presi fu frutrow na tapu Yehovah?

¹⁶ Te pikin-nengre frede, dan den e lon go na den papa nanga mama wantewante. Te den e gro kon bigi, dan safrisafri den e leri fu gebroiki den eigi frustan èn den e teki den eigi bosroiti. Na so den e tron bigisma. Ma te pikin abi wan bun matifasi nanga den papa nanga mama, dan ala ten den e aksi den fu yepi den èn den e suku rai na den, fosi den teki wan bosroiti. Na so a de tu nanga wi. Wi hemel Papa Yehovah e gi wi na okasi fu teki wi eigi bosroiti. Ma fu di wi e frutrow na en tapu èn wi lobi en trutru, meki ala ten baka wi e aksi en fu yepi wi. Fosi wi teki wan bosroiti, wi e du ala san wi man fu sabi fa a e denki fu a tori. Te wi e frutrow na tapu Yehovah, dan a o gi wi en santa yeye fu yepi wi fu du san reti.—Fil. 2:13.

¹⁷ Na ini a ten fu Samuel, a pasa wan leisi taki di Israel go feti nanga den Filisteasma, den Israelsma lasi a strei. A pipel fu Gado ben abi yepi fanowdu. San den du? Na presi fu suku yepi na Gado, den teki den eigi bosroiti. Den taki: „Meki wi seni sma go na Silo fu teki a santa kisi fu a frubontu fu Yehovah. Te a santa kisi de na wi mindri, dan a kan frulusu wi fu den feanti fu wi.” San ben de a bakapisi? „Ala nanga ala, den [Filisteasma] kiri dritenti dusun srudati fu Israel di ben e waka nanga futu. Ne den Filisteasma teki a santa kisi fu Gado” (1 Sam. 4:2-4, 10, 11). Di den Israelsma teki a santa kisi, dan kande a ben gersi leki den suku yepi na Yehovah. Ma te yu luku en bun, dan den no suku rai na Yehovah trutru. Na presi fu dati, den du san den ben wani èn disi ben abi takru bakapisi.—Leisi Odo 14:12.

18. Fa wi kan sori taki wi e suku yepi na Yehovah?

¹⁸ A psalm skrifiman ben lobi Yehovah trutru èn a ben e frutrow na en tapu. Dati meki a skrifi: „Wakti Gado, bika mi sabi taki wan ten o kon taki mi o prèise mi bigi frulusuman baka. Ke mi Gado, mi ati e firi so brokosaka. Dati meki mi e prakseri yu” (Ps. 42:5, 6). Na so yu e denki tu fu Yehovah? Yu e firi taki yu de krosibei fu en èn taki yu e frutrow na en tapu? Kande yu kan leri fu frutrow na en tapu moro. Bijbel e taki: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.”—Odo 3:5, 6.

19. Fa yu o sori Yehovah taki yu lobi en?

¹⁹ Soleki fa wi si, dan na Yehovah fosi lobi wi. Na a fasi dati a leri wi fa fu lobi en. Meki wi hori na prakseri ala ten o furu Yehovah du gi wi èn o furu a lobi wi. Meki wi tan sori taki wi lobi en ’nanga wi heri ati, nanga wi heri libi, nanga wi heri frustan, èn nanga ala wi krakti’.—Mark. 12:30.