1, 2. Fa Bijbel e sori taki lobi prenspari?

LOBI na a moro prenspari fasi fu Yehovah Gado (1 Yoh. 4:16). A fosi sani di a meki, ben de Yesus di libi makandra nanga en na ini hemel omeni milyard yari. Na a ten dati Yesus kon si taki Yehovah abi furu lobi gi trawan (Kol. 1:15). A fasi fa Yesus libi na ini hemel èn na grontapu sori taki a frustan taki Yehovah na wan Gado fu lobi èn a e sori a srefi lobi dati tu. Dati meki wi kan de seiker taki te Yehovah nanga Yesus o tiri fu têgo den o tiri nanga furu lobi.

² Di sma aksi Yesus san na a moro bigi komando na ini a wet fu Gado, a taki: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi èn dati na: ’Yu musu lobi tra sma leki fa yu lobi yusrefi.’”—Mat. 22:37-39.

3. Suma na den „tra sma” di wi musu lobi?

³ A prenspari fu sori lobi gi ala sma. Yesus ben taki dati na a fosi presi wi musu lobi Yehovah. Baka dati a taki dati wi musu lobi tra sma tu. Ma suma na den „tra sma” di wi musu lobi leki wisrefi? Efu yu trow, dan yu trowpatna na a moro prenspari  sma di yu musu lobi. Wi musu lobi wi brada nanga sisa na ini a gemeente tu, di e anbegi Yehovah makandra nanga wi. Boiti dati, wi musu lobi den sma di wi e miti na ini a preikiwroko. Fa den wan di e anbegi Yehovah èn di e du san en Manpikin leri den, kan sori taki den lobi tra sma?

4. Fa wi kan abi wan bun trowlibi awinsi wi na sondusma?

⁴ Baka di Yehovah meki Adam nanga Eva, a tyari den kon na wan èn a trow den. Dati ben de a fosi trow. A ben wani taki den abi wan koloku libi. Den ben musu tan na makandra èn furu grontapu nanga den pikin fu den (Gen. 1:27, 28). Ma di den trangayesi Yehovah leki a Moro Hei Tiriman, den bigin kisi problema na ini den trowlibi èn den tyari sondu nanga dede kon gi ala libisma (Rom. 5:12). Toku Bijbel e sori wi fa wi kan abi wan bun trowlibi. Na Yehovah seti a trowlibi èn dati meki a Wortu fu en e gi wi a moro bun rai fu kan abi wan bun trowlibi.—Leisi 2 Timoteyus 3:16, 17.

5. O prenspari a de fu sori lobi na ini a trowlibi?

⁵ Gado Wortu e sori taki lobi de tranga fanowdu efu libisma wani libi bun nanga trawan èn efu den wani de koloku. Disi de so tu na ini a trowlibi. Di na apostel Paulus ben skrifi a gemeente Korente a taki: „Lobi abi pasensi èn a abi switifasi. Lobi no e dyarusu, a no e meki bigi èn a no abi heimemre, a no e tyari ensrefi na wan fasi di no fiti, a no e suku en eigi bun èn a no e mandi esi. A no e tan memre na ogri di trawan du. A no e prisiri nanga sani di no bun, ma a e prisiri nanga sani di tru. A e frudrage ala sani, a e bribi ala sani, a e howpu ala sani, èn a e horidoro awansi san e pasa. Lobi no e kaba noiti” (1 Kor. 13:4-8). Te yu e teki ten fu denki fu san Paulus taki èn te yu e du san yu leri, dan dati o meki yu abi moro prisiri na ini yu trowlibi.

6, 7. (a) San Yehovah seti soleki fa 1 Korentesma 11:3 e sori? (b) Fa wan Kresten masra musu libi nanga en wefi?

⁶ Yehovah bosroiti suma musu de na edeman fu na osofamiri. Paulus e taki: „Mi wani fu unu sabi taki Krestes na a ede fu ibri man. A man na a ede fu na uma, èn Gado na a ede fu Krestes” (1 Kor. 11:3). Ma wan man musu tyari a frantwortu disi nanga furu lobi. A no  musu prei basi gi en wefi. Fu eksempre, Yehovah de na edeman fu Krestes. Ma a e tyari en frantwortu na wan switi fasi èn a no e prakseri ensrefi nomo. Fu dati ede, Yesus abi lespeki gi Gado leki edeman. Yesus srefi ben taki: „Mi lobi a Tata” (Yoh. 14:31). A no de fu taki dati Yesus no ben o firi so efu Yehovah ben taki grofu nanga en, noso efu a ben e prei basi gi en.

⁷ Aladi wan masra na a edeman fu en wefi, toku Bijbel e taigi en taki a musu ’gi en wefi grani’ (1 Petr. 3:7). Wan fasi fa wan masra kan du dati na te a e hori na prakseri san a wefi fu en abi fanowdu. A kan taki na ini son sani a e gi na uma na okasi fu taki san en wani èn dan a e du dati tu. Bijbel e taki: „Un masra, tan lobi un wefi, neleki fa Krestes lobi a gemeente. A gi en libi gi a gemeente” (Ef. 5:25). Iya, Yesus gi en libi srefi gi den bakaman fu en. Te wan masra e tyari en frantwortu leki edeman nanga furu lobi neleki fa Yesus ben du dati, dan a moro makriki gi a wefi fu en fu lobi en masra, fu lespeki en èn fu saka ensrefi na en ondro.—Leisi Titus 2:3-5.

8. Fa anbegiman fu Yehovah musu si den Kresten brada nanga sisa fu den?

⁸ Milyunmilyun sma na heri grontapu e anbegi Yehovah èn den e preiki fu en nen èn fu den sani di a abi na prakseri fu du. Fa ibri anbegiman fu Yehovah musu si en Kresten brada nanga sisa? Gado Wortu e piki: „Meki wi du bun gi ala sma, ma spesrutu gi den wan di abi a srefi bribi leki wi” (Gal. 6:10; leisi Romesma 12:10). Na apostel Petrus ben taki: „Fu di unu e gi yesi na a tru leri, meki un musu lobi un brada sondro fu hoigri èn un musu lobi makandra nanga un heri ati.” Petrus ben taigi den Kresten brada nanga sisa fu en tu: „A moro prenspari sani, na taki un musu lobi makandra nanga un heri ati.”—1 Petr. 1:22; 4:8.

9, 10. Fa a du kon taki Gado pipel e libi na ini wánfasi?

⁹ A bigi lobi di wi abi gi den wan di e anbegi Yehovah makandra nanga wi na heri grontapu e meki taki wi de na ini wan aparti organisâsi. Ma san moro prenspari na taki a lobi di wi abi gi Yehovah èn a fasi fa wi e gi yesi na den wet fu en e meki taki a e gi wi a santa yeye fu en di de a moro bigi krakti na ini hemel nanga grontapu. Disi e meki taki wi e libi na ini wánfasi nanga den brada nanga sisa fu wi na heri grontapu.—Leisi 1 Yohanes 4:20, 21.

¹⁰ Paulus ben sori fu san ede a prenspari gi Kresten fu sori lobi gi makandra. A ben skrifi: „Un musu abi trutru sari-ati, bun-ati, sakafasi, safri-ati, nanga pasensi. Den fasi disi musu de leki wan krosi na un skin. Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu. Ma boiti den sani disi, un musu meki lobi kon de leki wan krosi na un skin, bika lobi e meki sma kon de wán trutru” (Kol. 3:12-14). Wi breiti taki wi abi lobi gi makandra awinsi pe wi e libi, fu di „lobi e meki sma kon de wán trutru”!

11. Fa lobi nanga wánfasi e meki sma kon sabi na organisâsi fu Yehovah?

¹¹ A trutru lobi nanga a wánfasi di den futuboi fu Yehovah abi e sori taki den abi a tru anbegi. Yesus ben taki: „Na a fasi disi ala sma o sabi taki unu na mi disipel, te unu lobi makandra” (Yoh. 13:34, 35). Na apostel Yohanes ben skrifi: „Disi na fa sma  kan sabi suma na den pikin fu Gado èn suma na den pikin fu Didibri: Efu wan sma no abi a gwenti fu du bun sani, dan a sma dati no de fu Gado. Na so a de tu nanga a sma di no lobi en brada. Memre a boskopu di unu yere sensi a bigin, taki wi musu lobi makandra” (1 Yoh. 3:10, 11). A de krin taki Yehovah Kotoigi na trutru bakaman fu Yesus fu di a lobi di den abi e meki den libi na ini wánfasi. Den na den sma di Gado e gebroiki fu preiki a bun nyunsu fu a Kownukondre na ala sei fu grontapu.—Mat. 24:14.

12, 13. (a) San a „bigi ipi” e du now? (b) San den sma fu a grupu disi o ondrofeni heri esi?

¹² Furu fu den futuboi fu Yehovah de na ini a „bigi ipi sma di . . . komoto na ala kondre, lo, pipel, nanga tongo”. Den e „tanapu na fesi a kownusturu [fu Gado] èn na fesi a Pikin Skapu [Yesus Krestes]”. Suma na den sma disi? „Den wan disi na den sma di komoto na ini a bigi banawtu. Den wasi den langa krosi fu den èn den meki den kon weti na ini a brudu fu a Pikin Skapu.” Den sma fu a „bigi ipi” di lobi Yehovah nanga en Manpikin, „e du santa wroko gi [Gado] dei nanga neti”.—Openb. 7:9, 14, 15.

¹³ Heri esi Gado o pori ala den ogrisma fu grontapu na a ten fu a „bigi banawtu” (Mat. 24:21; leisi Yeremia 25:32, 33). Ma fu di Yehovah lobi den futuboi fu en meki a o kibri den leki grupu èn a o tyari den go na ini a nyun grontapu fu en. Moro leki 2000 yari pasa Bijbel taki dati Gado „o figi ala watra puru na den ai èn dede no o de moro. Nowan sari, noso krei, noso pen no o de moro”. Yu e angri fu libi na ini Paradijs na a ten te „den fositen sani pasa kaba”?—Openb. 21:4.

14. Omeni sma de na ini a „bigi ipi” now?

¹⁴ Di den lasti dei bigin na ini 1914, sowan 5000 futuboi fu Yehovah ben de nomo na heri grontapu. Lobi gi tra sma èn a yepi fu Gado santa yeye ben meki taki a pikin grupu salfu Kresten dati tan du a Kownukondre preikiwroko go doro. A bakapisi fu dati na taki na ini a ten disi Gado e tyari wan bigi ipi sma kon na wan di abi a howpu fu libi na grontapu. Now a grupu disi pasa 8.000.000 Kotoigi di de na ini moro leki 115.400 gemeente na heri grontapu. Dei fu dei wi e kon moro furu. Fu eksempre, moro leki 275.500 nyun Kotoigi teki dopu na ini a dienstyari 2014. Dati wani taki dati sowan 5300 sma teki dopu ibri wiki.

15. Fa a du kon taki furu sma na ini a ten disi man yere a bun nyunsu?

¹⁵ Bun furu sma na grontapu yere a bun nyunsu fu a Kownukondre. Na a momenti disi den buku fu wi di e taki fu Bijbel de fu feni na ini moro leki 700 tongo. A Waktitoren fu wi na a tijdschrift di prati moro iniwan tra tijdschrift na grontapu. Ala mun moro leki 52.000.000 fu a tijdschrift disi e meki na ini 247 tongo. A buku San Bijbel e leri wi trutru?, di wi e gebroiki fu studeri nanga sma, de fu feni na ini 250 tongo. Moro leki 200.000.000 fu a buku disi meki kaba.

16. Fa a du kon taki na organisâsi fu Yehovah e tan go na fesi?

¹⁶ A wroko di wi e du na ini a ten disi e gro srefisrefi fu di wi e poti bribi na ini Gado èn fu di wi sabi taki Bijbel na a Wortu fu en di sma skrifi nanga yepi fu en santa yeye (1 Tes. 2:13). San moi tu na taki Yehovah pipel e tan go na fesi aladi sma e  gens den èn Didibri di de „a gado fu a grontapu disi” abi bita-ati gi den.—2 Kor. 4:4.

17, 18. Fa futuboi fu Gado musu si sma di no e anbegi a tru Gado?

¹⁷ Fa den futuboi fu Yehovah musu si sma di no e anbegi a tru Gado? Na ini a preikiwroko wi e miti ala sortu sma. Son wan fu den e arki, trawan no wani yere noti. Ma awinsi fa sma e tyari densrefi te wi e taki nanga den, wi e du san Gado Wortu e leri wi. A e taki: „Taki na wan switi fasi ala ten. Den wortu fu unu musu abi sowtu. Te unu e taki na so wan fasi, dan unu o sabi fa fu piki ibriwan sma” (Kol. 4:6). Te wi e opo taki gi a bribi fu wi, dan wi wani du dati „na wan safri fasi èn nanga bigi lespeki” fu di wi lobi tra sma.—1 Petr. 3:15.

¹⁸ Awinsi sma e atibron èn e kosi wi fu di den no wani arki a boskopu fu wi, toku wi e sori taki wi lobi den, neleki fa Yesus ben lobi sma. Bijbel e taki fu en: „Te sma ben e kosi en fu gi en syen, dan a no ben e kosi den baka. Te sma ben e pina en, dan a no ben e taigi den taki a o du den ogri baka, ma a ben tan saka ensrefi na ondro a sma [Yehovah] di e krutu sani na wan reti fasi” (1 Petr. 2:23). Wi e sori ala ten taki wi abi sakafasi, awinsi wi de nanga wi Kresten brada nanga sisa, noso nanga tra sma. Wi e teki a rai fu Petrus tu di ben taki: „No pai ogri nanga ogri, noso no kosi sma te den e kosi unu. Na presi fu dati un musu taki nanga den na wan switi fasi.”—1 Petr. 3:8, 9.

19. Fa wi musu tyari wisrefi te sma e gens wi?

¹⁹ A pipel fu Yehovah e tan sori sakafasi. Na a fasi dati den e gi yesi na wan prenspari sani di Yesus leri wi. Na ini a Bergitaki fu en Yesus ben taigi den sma: „Un yere taki den taki: ’Un musu lobi tra sma, ma un no musu lobi un feanti kwetikweti.’ Ma mi e taigi unu: Tan lobi un feanti èn tan begi gi den sma di e frufolgu unu. Dan sma kan si taki unu na pikin fu un Tata di de na hemel. Bika a e meki a son fu en opo gi ogri sma èn gi bun sma. A e meki alen fadon gi sma di e du san reti èn gi sma di no e du san reti” (Mat. 5:43-45). Iya, leki futuboi fu Gado wi musu leri fu ’lobi wi feanti’ awinsi fa den e libi nanga wi.

20. Fa wi du sabi taki lobi gi Gado èn lobi gi tra sma o lai na ini a nyun grontapu? (Luku a prenki na a bigin fu na artikel.)

²⁰ Ala ten wi musu sori taki wi lobi Yehovah èn tra sma tu. Dati meki awinsi sma e kosi wi te wi e tyari a Kownukondre boskopu gi den, wi e sori den taki wi lobi den fu di wi e yepi den te den de na nowtu. Na apostel Paulus ben skrifi: „Un no musu abi nowan paiman na nowan sma, boiti a lobi di unu musu sori gi makandra. A sma di lobi trawan e du san a Wèt taki. Den komando ’un no musu du sutadu, un no musu kiri sma, un no musu fufuru, un no musu abi bigi-ai’, èn ala tra komando di de, unu kan feni na ini a wán komando disi: ’Un musu lobi tra sma leki fa unu lobi unsrefi.’ Efu unu abi lobi, dan unu no o du tra sma ogri. Fu dati ede, te unu abi lobi, dan unu man du san a Wèt e taki” (Rom. 13:8-10). Leki Yehovah Kotoigi wi e tan sori trutru lobi, aladi wi e libi na ini wan grontapu di lai pratifasi nanga ogridu èn di de na ini a makti fu Satan (1 Yoh. 5:19). A no de fu taki dati ala sani o kenki te Satan, den ogri yeye fu en, nanga den libisma di opo densrefi teige Gado no de moro. Na a ten dati lobi o de na ala sei fu grontapu. A o de wan bigi blesi te ala sma di o libi na grontapu o de sma di lobi Gado èn di lobi tra sma tu!