Fu di a preikiwroko ben e go na fesi, meki moro buku nanga tijdschrift ben de fanowdu. Den brada na Brooklyn Betel ben e druk tijdschrift, ma na wan tra bedrijf ben e druk buku gi den. Fu di a bedrijf no ben man druk nofo buku, meki den brada no ben abi buku wan tu mun langa. A sani disi ben meki en muilek fu du a preikiwroko. Dati meki Brada Rutherford aksi Brada Robert Martin, edeman fu a drukkerij, efu a denki taki den ben o man druk den eigi buku.

Brada Martin taki: „Dati ben de wan kefalek moi idee, fu di dati wani taki dati wi ben o druk ala den buku fu wi wisrefi.” Den brada yuru wan presi na Concord strati nr. 18 ini Brooklyn èn den bai ala den masyin di ben de fanowdu fu du a wroko.

A no ala sma ben breiti taki den brada ben o druk den eigi buku. A fesiman fu a bedrijf di ben e druk den buku fu wi, kon na a nyun drukkerij fu wi. A taki: „ Unu abi ala den moro nyun masyin fu druk buku, ma nowan sma dyaso sabi fa fu wroko nanga den masyin disi. Na ini siksi mun nomo, unu o broko ala den masyin disi.”

„A ben gersi leki a ben abi leti”, Brada Martin e fruteri, „ma wi ben sabi taki Yehovah ben o yepi wi èn a yepi wi tu.” Brada Martin ben abi leti. A no teki langa, dan a drukkerij ben man druk sowan 2000 buku ibri dei.

Boiti taki a pipel fu Yehovah bigin druk den eigi buku, den ben bigin gebroiki wan nyun fasi fu prati a bun nyunsu. Den ben e preiki nanga yepi fu radio. Na tapu sonde bakadina, 26 februari 1922, Brada Rutherford ben taki na radio fu a fosi leisi. A hori a  lezing di ben nen „Milyunmilyun sma di e libi now, noiti no sa dede”, na a radio station KOG ini Los Angeles Kalifornia na Amerkankondre.

Sowan 25.000 sma arki a lezing. Sonwan fu den seni brifi fu fruteri fa den ben lobi a lezing tapu radio. Wan fu den brifi ben de fu wan man di nen Willard Ashford, di ben tan na Santa Anana ini Kalifornia. A ben prèise Brada Rutherford taki a lezing fu en ben moi kefalek èn taki a leri furu fu en. A ben taki moro fara: „Fu di wi de nanga dri siki sma na ini oso, meki wi no ben o man yere a lezing disi efu a no ben de tapu radio, awinsi yu ben hori en krosibei fu pe wi e tan.

Na ini den wiki baka dati moro lezing ben hori na a fasi disi. Na a kaba fu 1922 The Watch Tower kon si taki sowan 300.000 sma ben yere a bun nyunsu nanga yepi fu radio.

Fu di so furu sma ben e arki den lezing, meki den Bijbel Ondrosukuman bosroiti fu bow wan radio station na Staten Eiland, di de krosibei fu Brooklyn Betel. Na ini den yari baka dati den Bijbel Ondrosukuman ben o gebroiki a station WBBR fu prati a Kownukondre boskopu na furu presi.

Na ini a The Watch Tower fu 15 yuni 1922 den ben meki bekènti taki wan kongres ben o hori fu 5 te go miti 13 september 1922 na Cedar Point, Ohio. Nanga bigi prisiri den Bijbel Ondrosukuman ben go na Cedar Point.

Brada Rutherford gi ala sma di ben de drape wan switikon èn a taigi den: „Mi de seiker taki Masra o blesi a kongres disi èn taki moro nanga moro sma o yere a bun nyunsu.” Den takiman na a kongres dati ben gi den arkiman a deki-ati ibri tron baka fu du a preikiwroko.

Na tapu freida 8 september sowan 8000 sma ben de ini a hal èn den no ben man wakti fu arki wan lezing fu brada Rutherford. Den ben howpu taki a ben o fruteri den san „ADV”, di ben skrifi tapu a kari fu den, ben wani taki. Sonwan fu den di ben teki den sidonpresi ben si wan bigi pisi krosi anga loktusei fu a podium. Arthur Claus di ben tan na  Tulsa, Oklahoma na Amerkankondre ben kon na a kongres. A ben feni wani sidonpresi pe a ben kan yere ala sani bun. A ben breiti fu di na a ten dati mikrofon nanga boksu no ben de fu meki a geluid kon moro tranga so taki ala sma ben kan yere bun.

Fu sorgu taki nowan sani noso sma stoor a kongres, a fesiman meki bekènti taki nowan sma di doro lati ben mag kon ini a hal te brada Rutherford o hori en lezing. Na wan ten fu 9.30 mamanten, brada Rutherford taki den wortu disi fu Yesus di skrifi ini Mateyus 4:17: „A Kownukondre fu hemel kon krosibei.” Di a ben fruteri fa sma ben o yere a Kownukondre boskopu disi, a taki: „Yesus srefi ben taki dati te a ben kon a ben o tyari den getrow wan kon na wán nanga yepi fu a kotiwroko.”

Brada Claus di ben de ini a hal e fruteri: „Wi ben e arki nanga ala wi prakseri.” Ma wantronso a no ben firi bun, dati meki a ben abi fu komoto ini a hal. Brada Arthur ben e draidrai fu komoto ini a hal fu di a ben sabi taki a no ben mag kon na inisei moro.

Baka wan tu miniti a bigin firi bun baka. A fruteri taki di a ben waka go baka na ini a hal a ben yere fa ala sma ben naki anu. A sani dati meki a breiti srefisrefi! A taki dati srefi efu a ben o musu kren go tapu a daki, a ben o du dati soso fu man yere a tra pisi fu a moi lezing disi. Brada Claus, wan yonguman di ben abi 23 yari na a ten dati, feni wan fasi fu kren go tapu a daki. Den fensre tapu a daki ben opo, èn di a doro na den fensre a kon si taki a ben man yere moro krin.

Ma Arthur no ben de en wawan tapu a daki. Sonwan fu den mati fu en ben de drape tu. Wan fu den, Frank Johnson, lon kon na en èn a aksi en efu a abi wan pikin srapu nefi.

„Iya mi abi wan”, Arthur taki.

 Frank taki: „Moi man. Wi ben begi taki wi feni wan sma di abi wan nefi.” „Yu si a sani di de dya? Na wan bigi pisi krosi di den lolo èn den tai en fasi na den spikri disi. Arki bun san a Krutuman * e taki. Te a taki: ’Yu musu preiki, preiki,’ dan koti den fo titei disi.”

Nanga a nefi ini en anu Arthur ben wakti makandra nanga den trawan fu sabi o ten a ben kan koti den titei. Di Brada Rutherford doro na a kaba fu a lezing, dan nanga faya a taki: „De wan trutru èn getrow kotoigi fu Masra. Tan feti teleki Babilon pori krinkrin. Prati a boskopu te na den moro farawe presi. Grontapu musu sabi taki Yehovah na Gado èn taki Yesus Krestes na Kownu fu den kownu èn Masra fu den masra. Disi na a dei. Luku, a Kownu e tiri kaba! Yu na a sma di musu fruteri tra sma fu en. Dati meki, preiki, preiki, preiki, a Kownu nanga en Kownukondre!”

Arthur e fruteri taki en nanga den tra brada koti den titei so taki a bigi pisi krosi ben kan lolo go na ondro. Tapu a bigi pisi krosi disi den wortu disi ben skrifi: „Preiki a Kownu nanga en Kownukondre.” Dati na san den letter „ADV” ben wani taki.

A kongres di ben hori na Cedar Point ben yepi den brada fu si a preikiwroko fu a Kownukondre leki a moro prenspari sani èn den wan di ben angri fu du a wroko dati ben du dati nanga prisiri. Wan kolporteur (di wi sabi now leki wan pionier) fu Oklahoma ini Amerkankondre, ben skrifi: „Wi ben wroko na ini wan kontren pe den ben e meki krofaya èn furu pôtisma ben libi drape.” A ben taki tu dati furu leisi te sma ben yere a boskopu di ben de fu feni ini a Golden Age tijdschrift „den ben e bari krei”. A e taki moro fara: „Wi ben e prisiri trutru, fu di wi ben man trowstu den.

Den Bijbel Ondrosukuman ben kon si o prenspari den wortu fu Yesus de di skrifi ini Lukas 10:2: „A kotiwroko bigi, ma furu wrokoman no de.” Na a kaba fu a yari den ben de nanga moro faya leki oiti bifo fu preiki a Kownukondre boskopu na den moro farawe presi.