1-2. (a) San lanti na ini son kondre du fu gens a pipel fu Yehovah, ma san a pipel fu Yehovah du? (b) Fa wi kan de koloku aladi wi e kisi frufolgu? (Yu kan taki tu fu a prenki na tapu a kafti.)

 NOWNOWDE a wroko fu wi tapu na ini moro leki 30 kondre na heri grontapu. Na ini sonwan fu den kondre dati, lanti poti den brada nanga sisa fu wi na strafu-oso. Sortu ogri den du? Ini Yehovah ai den no du nowan ogri. Den leisi èn studeri Bijbel, den fruteri trawan san den e bribi, èn den go na den konmakandra nanga tra brada nanga sisa. Dati na ala san den du. Den ben weigri tu fu teki sei na ini politiek afersi. Awinsi den kisi hebi frufolgu, toku den getrow dinari disi fu Gado tan du san reti. Den tai hori na Yehovah èn den no meki nowan sani tapu den fu tan dini en. Disi e meki den firi koloku srefisrefi!

² Kande yu luku wan tu fowtow fu den Kotoigi disi di sori deki-ati èn yu si taki den e lafu. Den e prisiri fu di den sabi taki Yehovah o gi grani na den fu di den tai hori na en (Ps. 4:3). Yesus ben taki: „Koloku fu den sma di kisi frufolgu fu di den e du san reti . . . Un musu breiti èn prisiri pasa marki, fu di unu o kisi wan bigi pai.”​—Mat. 5:10-12.

3. Soleki fa Tori fu den apostel 4:19, 20 e fruteri, san den apostel du di den kisi frufolgu na ini a fosi yarihondro, èn fu san ede den du dati?

³ Den brada nanga sisa fu wi e ondrofeni den srefi sani di den apostel ben ondrofeni na ini a fosi yarihondro. Den ben kisi frufolgu fu di den ben e preiki fu Yesus. Ibri tron baka, den krutuman fu a Dyu Grankrutu „komanderi den  taki na nowan presi den ben musu taki noso preiki na ini a nen fu Yesus” (Tori 4:18; 5:27, 28, 40). San den apostel du? (Leisi Tori fu den apostel 4:19, 20.) Den ben sabi taki wan sma nanga moro bigi makti ben ’taigi den fu preiki gi a pipel èn fu fruteri den finifini’ fu Krestes (Tori 10:42). Dati meki den takiman Petrus nanga Yohanes ben taki nanga deki-ati taki den ben o gi yesi na Gado na presi fu den krutuman, èn na fesi den alamala den taki dati den no ben o tapu fu taki fu Yesus. Te yu luku en bun, den taigi den tiriman: ’Yu e prefuru fu taki dati den wet fu yu hei moro di fu Gado?’

4. Soleki fa Tori fu den apostel 5:27-29 e sori, sortu eksempre den apostel seti gi ala tru Kresten, èn fa wi kan teki na eksempre fu den?

⁴ Den apostel seti wan moi eksempre gi ala tru Kresten di kon baka dati, namku fu „gi yesi na [Gado] moro leki na libisma” (Leisi Tori fu den apostel 5:27-29.) Baka di den apostel kisi fonfon fu di den tan getrow, dan den gowe libi a Grankrutu fu den Dyu „nanga bigi prisiri, fu di Gado ben feni taki den warti fu kisi syen fu Yesus nen ede” èn den tan go doro nanga a preikiwroko!​—Tori 5:40-42.

5. Sortu aksi musu kisi piki?

⁵ Na eksempre fu den apostel e meki wan tu aksi opo kon. Den ben bosroiti fu gi yesi na Gado moro leki na libisma, ma na a srefi ten Bijbel e taki dati „ibri sma musu saka ensrefi na ondro den tiriman”. Fa dati kan? (Rom. 13:1) Na apostel Paulus ben taki dati wi musu ’gi yesi na gran lanti èn na den wan di abi makti’. Fa wi kan du dati na ini a ten disi aladi wi musu tai hori na Gado, a moro prenspari Tiriman fu wi?​—Tit. 3:1.

6. (a) San wi de fruplekti fu du soleki fa Romesma 13:1 e sori? (b) San wi musu frustan krin fu ala libisma tiriman?

⁶ Leisi Romesma 13:1. Den vers disi e sori taki Kresten musu saka densrefi na ondro „den tiriman”, sobun den musu gi yesi na lanti. Den tiriman e meki  sani waka bun na ini a libimakandra, den e sorgu taki sma hori densrefi na den wet fu a kondre, èn son leisi den e kibri a pipel fu Yehovah (Openb. 12:16). Fu dati ede wi musu pai belasting-moni noso lantimoni èn wi musu gi den a lespeki nanga a grani di den e aksi (Rom. 13:7). Ma den grontapu tiriman disi abi makti soso fu di Yehovah gi den primisi fu abi a makti dati. Yesus ben meki sma frustan disi krin di a ben tanapu na fesi Pontius Pilatus, a Granman fu Rome. Di Pilatus taki dati a ben abi a makti fu hori Yesus na libi noso fu kiri en, dan Yesus piki en: „Yu no ben o abi nowan makti na mi tapu, efu Gado no ben gi yu primisi” (Yoh. 19:11). Neleki Pilatus, ala libisma tiriman nanga politiekman abi makti, ma den no abi ala makti.

7. Na ini sortu situwâsi wi musu gi yesi na libisma tiriman, ma san den musu hori na prakseri?

⁷ Wi leki Kresten e gi yesi na libisma tiriman solanga den wet fu den no e meki wi trangayesi den wet fu Gado. Wi no kan gi yesi na libisma te den e aksi wi fu du wan sani di Gado no feni bun, noso te den e tapu wi fu du wan sani di Gado taigi wi fu du. Fu eksempre, kande den wani taki den yongu man musu go na ini a legre fu feti gi a kondre. * Noso kande den e taki dati wi no mag gebroiki wi Bijbel noso den Bijbel publikâsi fu wi, èn den e tapu wi fu preiki èn fu anbegi nanga makandra. Te tiriman e gebroiki a makti fu den na wan fowtu fasi soleki fu frufolgu den disipel fu Krestes, dan den musu gi frantwortu na Gado. Yehovah e si san e pasa!​—Preik. 5:8.

8. San na a difrenti na mindri Yehovah nanga den libisma tiriman, èn fu san ede a prenspari fu sabi dati?

⁸ Den tiriman hei fu di den abi makti. Ma den no abi ala makti, dati meki den no de a moro hei makti. Wán sma nomo na a moro heiwan, dati na Yehovah. Bijbel e taki furu leisi dati Yehovah na „a Moro Hei Gado”.​—Dan. 7:18, 22, 25, 27.

9. San a profeiti Danièl si na ini den fisyun?

⁹ A profeiti Danièl ben si fisyun di e sori krin taki Yehovah bigi moro ala tra tiriman. Danièl ben si fo bigi meti di ben agersi grontapu tirimakti fu owruten èn fu a ten disi, soleki Babilon, Media nanga Persia, Grikikondre, Rome, èn Ingrisikondre nanga Amerkankondre di e tiri now (Dan. 7:1-3, 17). Baka dati, Danièl ben si Yehovah Gado e sidon na tapu en kownusturu na a Grankrutu na ini hemel (Dan. 7:9, 10). Den sani di a getrow profeiti ben si baka dati na wan warskow gi tiriman na ini a ten disi.

10. Soleki fa Danièl 7:13, 14, 27 e sori, dan na suma Yehovah e gi a makti fu tiri grontapu, èn san disi e buweisi fu En?

¹⁰ Leisi Danièl 7:13, 14, 27. Gado e teki ala makti puru fu libisma tiriman èn a e gi a makti dati na den wan di e frudini dati èn di abi moro krakti. Na suma a e gi dati? A e gi dati na a wan di „gersi wan manpikin fu libisma”, dati na Yesus Krestes, èn na „a pipel di de den santawan fu a Moro Hei Gado”, dati na den 144.000 di o tiri „fu têgo, iya, fu ala ten” (Dan. 7:18). A de krin taki Yehovah na „a Moro Hei Gado” fu di en wawan abi a makti fu du ala den sani disi.

11. Sortu tra sani Danièl ben skrifi di e sori taki Yehovah bigi moro den tirimakti?

 ¹¹ A sani di Danièl ben si na ini wan fisyun e kruderi nanga wan sani di a ben taki na fesi. „A Gado fu hemel”, na so Danièl ben taki, „na en e poti kownu èn na en e puru den baka.” A ben skrifi tu: „A Moro Heiwan na Tiriman na ini a kownukondre fu libisma èn . . .  a e gi a kownukondre na suma a wani” (Dan. 2:19-21; 4:17). Oiti a pasa taki Yehovah poti noso puru tiriman na den presi? Iya!

12. Gi wan eksempre fa Yehovah puru kownu fu den kownusturu na ini owruten. (Luku a prenki.)

¹² Yehovah sori krin taki a abi a moro bigi makti abra „den tiriman”. Luku dri eksempre. Farao fu Egepte ben meki a pipel fu Yehovah tron srafu èn a ben weigri fu lusu den. Ma Gado meki den kon fri èn a meki Farao sungu na ini a Redi Se (Eks. 14:26-28; Ps. 136:15). Kownu Belsasar fu Babilon ben hori wan bigi fesa èn a „opo [ensrefi] teige a Masra fu hemel” èn a „prèise gado di meki fu solfru nomo èn fu gowtu” na presi fu Yehovah (Dan. 5:22, 23). Ma Gado lagi a man dati di ben abi heimemre. „A srefi neti dati” den kiri Belsasar èn Gado gi a kownukondre fu en na den Mediasma nanga den Persiasma (Dan. 5:28, 30, 31). Kownu Herodes Agrepa a Fosiwan fu Palestina meki sma kiri na apostel Yakobus èn den ben poti na apostel Petrus na strafu-oso fu kiri en tu. Ma Yehovah tapu Herodes fu du san a ben abi na prakseri. „Na engel fu Yehovah naki en” dan a dede.​—Tori 12:1-5, 21-23.

13. Gi wan eksempre fa Yehovah wini den tiriman di bondru kon na wán.

¹³ Yehovah sori tu taki awinsi tiriman e bondru kon na wán, toku a bigi moro den alamala. Na so 31 kownu fu Kanan ben e wroko makandra, ma Yehovah feti gi Israel èn a yepi den fu wini den kownu dati èn fu teki bigi pisi kontren fu a Pramisi Kondre abra (Yos. 11:4-6, 20; 12:1, 7, 24). Yehovah sorgu tu taki Kownu Ben-hadad nanga 32 tra tiriman fu Siria lasi bun furu na ini a feti teige Israel.​—1 Kow. 20:1, 26-29.

14-15. (a) San Kownu Nebukadnesar nanga Darius taki fu a reti di Yehovah abi fu tiri? (b) San a psalm skrifiman taki fu Yehovah nanga En pipel?

 ¹⁴ Ibri tron baka Yehovah sori taki en na a Moro Hei Gado! Di Kownu Nebukadnesar fu Babilon ben e meki bigi fu ’en eigi krakti nanga glori nanga bigi grani’ na presi fu prèise Yehovah leki a Wan di warti fu kisi grani, dan Gado meki a lasi en frustan. Baka di a kon betre baka, Nebukadnesar „prèise a Moro Heiwan” èn a ben taki dati „[Yehovah] e tiri fu ala ten”. A ben taki tu: „Nowan sma kan tapu en fu du wan sani” (Dan. 4:30, 33-35). Di Danièl kisi tesi, a tai hori na Gado èn Yehovah frulusu en fu den lew. Baka dati Kownu Darius meki wan wet, taki: „Sma musu beifi gi a Gado fu Danièl. Den musu frede en, bika en na a libilibi Gado èn a e libi fu ala ten. Nowan sma man puru a kownukondre fu en na pasi èn a e tiri fu têgo.”​—Dan. 6:7-10, 19-22, 26, 27.

¹⁵ A psalm skrifiman ben taki: „Yehovah tapu den sma fu grontapu fu du san den abi na prakseri. A gens den pipel, so taki den no ben man du san den ben e denki fu du.” A ben taki moro fara: „Koloku fu den sma di abi Yehovah leki Gado. Iya, koloku fu a pipel di a teki leki a gudu fu en” (Ps. 33:10, 12). Disi na wan bun reide trutru fu tan du san reti èn fu tai hori na Yehovah!

16. Fu san wi kan de seiker te a „bigi banawtu” doro, èn fu san ede? (Luku a prenki.)

¹⁶ Wi leisi san Yehovah du na ini owruten. Sobun, san wi kan fruwakti o pasa na ini a ten di e kon? Wi kan de seiker taki Yehovah o frulusu den getrow dinari fu en na ini a „bigi banawtu” (Mat. 24:21; Dan. 12:1). A o du disi te wan grupu fu kondre, di Bijbel e kari Gok fu Magok, o hari go feti na wan ogri-ati fasi nanga den getrow dinari fu Yehovah na  heri grontapu. Awinsi a grupu fu kondre dati o de ala den 193 memre fu den Verenigde Naties, toku den no o man wini a Moro Hei Gado nanga en hemel legre kwetikweti! Yehovah e pramisi: „Mi o gi misrefi glori èn mi o meki misrefi kon santa. Mi o meki furu pipel kon sabi suma na mi. Den sa musu fu sabi taki mi na Yehovah.”​—Esek. 38:14-16, 23; Ps. 46:10.

17. San Bijbel e taki o pasa nanga den kownu fu grontapu, èn san o pasa nanga den wan di e tan du bun èn e tai hori na Yehovah?

¹⁷ A feti fu Gok o meki Yehovah bigin a lasti feti na Armagedon te a o kiri „den kownu na heri grontapu” (Openb. 16:14, 16; 19:19-21). Ma na a tra sei, Yehovah o „kibri a libi fu den wan di e tai hori na en” èn den o libi fu têgo na grontapu.​—Ps. 97:10.

18. San furu tru Kresten de klariklari fu du, èn fu san ede? (Danièl 3:28)

¹⁸ Na ini den hondrohondro yari di pasa teleki now, furu tru Kresten de klariklari fu go na strafu-oso noso fu dede gi Yehovah, a Moro Hei Tiriman fu den, fu di den lobi En. Den abi a fasti bosroiti fu tai hori na Yehovah. Den de leki den dri Hebrew man di tan na libi na ini a faya onfu fu di den tan getrow na a Moro Hei Gado.​—Leisi Danièl 3:28.

19. San Yehovah o luku te a o krutu sma, èn san wi musu du now fu dati ede?

¹⁹ A psalm skrifiman ben skrifi o prenspari a de fu tai hori na Gado di a ben taki: „A e bari kari hemel na tapu nanga grontapu, so taki a kan krutu a pipel fu en. A e taki: ’Tyari den wan di tai hori na mi, kon makandra gi mi’” (Ps. 50:4, 5). Na ini wan tra Psalm, David ben skrifi: „Yehovah na wan sma di lobi retidu. Dati meki a no o gowe libi den sma di e tai hori na en. A o kibri den fu ala ten” (Ps. 37:28). Fu tru, Yehovah e poti prakseri na den sma di e tai hori na en èn a o kibri den. Heri esi na ini a ten di e kon te Yehovah o krutu en pipel, dan a o luku efu wi ben e tai hori na en. Sobun, meki wi teki a bosroiti fu tan gi yesi na Yehovah èn meki wi tai hori na en awinsi san wi e miti! Efu wi e du dati, dan wi o taki neleki a psalm skrifiman di ben skrifi: „Meki den wan di tai hori na yu, bari fu prisiri.”​—Ps. 132:9.