Na ini den artikel disi wi leri difrenti sani di e yepi wi fu piki na aksi: „Suma na Gado?” Wi si na ini Bijbel taki en nen na Yehovah èn taki a moro prenspari fasi fu en na lobi. Wi kon sabi tu san a du èn san a o du gi libisma ete. Ma moro sani de di wi musu kon sabi fu Gado, èn kande yu e aksi yusrefi sortu wini dati o abi gi yu.

Yehovah e pramisi taki „efu yu suku en, a o meki yu feni en” (1 Kroniki 28:9). Prakseri a moi kado di yu o kisi te yu e suku Gado èn te yu e kon sabi en. Yu o tron wan „bun mati” fu Yehovah! (Psalm 25:14) Sortu wini dati o abi gi yu?

Yu o de koloku trutru. Bijbel e kari Yehovah „a koloku Gado” (1 Timoteyus 1:11). Te yu e tron wan mati fu en èn te yu e sori den fasi fu en, dan yu o de koloku trutru. Disi o meki taki yu o firi bun, yu no o broko yu ede so furu, èn yu no o siki makriki tu (Psalm 33:12). Yu no o du sani di kan pori yu libi, yu o kon abi bun gwenti, èn yu o libi bun nanga trawan. Den sani disi e yepi tu fu abi wan koloku libi. Yu o agri nanga san a psalm skrifiman ben taki: „A bun gi mi fu kon krosibei na Gado.”​—Psalm 73:28.

A o sorgu yu èn a o poti prakseri na yu. Yehovah pramisi den futuboi fu en: „Mi o gi yu rai èn mi o luku yu” (Psalm 32:8). Dati wani taki dati Yehovah e broko en ede nanga den futuboi fu en èn a e gi ibriwan fu den san den abi fanowdu (Psalm 139:1, 2). Te yu tron wan mati fu Yehovah, dan yu o si taki a o de klariklari fu yepi yu ala ten.

Wan moi tamara. Boiti taki Yehovah e yepi yu fu abi wan koloku libi now, a e gi yu okasi tu fu abi wan moi tamara (Yesaya 48:17, 18). Bijbel e taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Na ini den muilek ten disi, a howpu di Gado e gi kan de leki wan ankra gi wi libi. „A tranga èn a e hori wi tanapu.”​—Hebrewsma 6:19.

Disi na wan tu reide di wi abi fu kon sabi Gado moro bun èn fu tron wan mati fu en. Ma moro reide de ete. Efu yu wani sabi moro, dan grantangi taki nanga wan Yehovah Kotoigi noso go na jw.org/srn.