Efu yu wani leri sabi wan sma, dan a bun te yu e kon sabi sortu sani a du èn sortu problema a pasa. Na so a de tu taki te yu wani leri sabi Gado bun, dan yu musu kon sabi san a du. Nownow kaba wi e kisi furu wini fu den sani di a du èn den o tyari wini gi wi tu na ini a ten di e kon.

Yehovah Gado na a Gran Mekiman, èn „sensi grontapu meki, sma man si krin sortu fasi Gado abi, aladi den no man si en. Te den e luku den sani di a meki, den kan frustan taki a abi têgo krakti èn taki en na Gado trutru” (Romesma 1:20). „En na a Mekiman di gebroiki en krakti fu meki grontapu. En na a sma di gebroiki en koni fu seti grontapu steifi na en presi. En na a sma di gebroiki en sabi fu bradi hemel leki wan krosi” (Yeremia 10:12). Den moi sani di Gado meki e sori tu taki Gado e broko en ede nanga wi.

Yehovah meki libisma „leki fa ensrefi de” èn dati e gi wi libi prisiri (Genesis 1:27). Dati wani taki dati a meki wi na so wan fasi taki wi man sori den fasi fu en, awinsi na pikinso nomo. Te wi e meki muiti fu hori wisrefi na den sani disi, dan wi o de moro koloku èn wi o abi wan moro bun libi. Ma san moro prenspari, na taki wi o man abi wan bun matifasi nanga Gado.

Te wi e luku den sani di Gado meki na grontapu, dan dati e sori taki Gado e broko en ede nanga wi. Na apostel Paulus ben taki dati „Gado meki unu kon sabi en fu di a du bun sani gi unu. A e gi unu alen komoto fu hemel èn bun ten di e meki taki unu abi bun furu nyanyan èn taki unu e firi prisiri” (Tori fu den apostel 14:17). Gado gi wi moro leki san wi abi fanowdu fu man tan na libi. A gi wi someni difrenti sani so taki wi kan nyan bun fu a libi. Ma furu sani de ete di Gado wani gi wi.

 Yehovah meki grontapu na so wan fasi taki libisma man libi fu têgo na en tapu. Bijbel e taki dati „grontapu a gi na libisma” èn taki „a no meki en fu soso, ma a seti en fu sma libi na tapu” (Psalm 115:16; Yesaya 45:18). Suma o tan na grontapu èn o langa? „Na den reti-ati sma o kisi grontapu èn fu têgo den o tan libi drape.”​—Psalm 37:29.

Dati meki Yehovah meki a fosi man nanga uma, Adam nanga Eva, èn a poti den na ini wan paradijs na grontapu „fu wroko a gron èn fu sorgu a dyari” (Genesis 2:8, 15). Gado gi den tu moi wroko fu du. A taigi den: „Meki pikin èn kon furu, teleki unu kon lai na grontapu èn basi ala sani na grontapu” (Genesis 1:28). Sobun, Adam nanga Eva ben abi a howpu fu libi fu têgo na grontapu. A de wan sari sani taki den lasi a howpu fu de wan fu „den reti-atisma” di „o kisi grontapu” fu di den trangayesi Gado. Ma soleki fa wi o si, a sani disi no kenki a prakseri di Yehovah ben abi gi grontapu. Ma meki wi poti prakseri fosi na wan tra sani di Gado du.

Sma sabi Bijbel tu leki a Wortu fu Gado. Fu san ede Yehovah gi wi a Bijbel? So taki wi kan leri sabi en (Odo 2:1-5). A tru taki Bijbel no o man piki ibri aksi di wi abi fu Gado. Nowan enkri buku ben o man du dati (Preikiman 3:11). Ma ala sani na ini Bijbel e yepi wi fu kon sabi Gado. Wi e si suma na en èn fa a e libi nanga sma. Wi e si sortu sma a lobi èn sortu sma a no lobi (Psalm 15:1-5). Wi e kon sabi fa a wani taki wi anbegi en, fa a wani taki wi e tyari wisrefi, èn fa a e denki fu gudu. Wi e kon sabi Yehovah moro bun tu te wi e leisi den sani di Bijbel e fruteri fu en Manpikin, Yesus Krestes.​—Yohanes 14:9.

Boiti dati Yehovah gi wi en Wortu Bijbel fu sori wi fa wi kan de koloku èn fa fu libi wan bun libi. Na ini Bijbel Yehovah e sori wi fa fu abi wan koloku osofamiri-libi, fa fu de tevrede èn san fu du te wi abi broko-ede. Èn soleki fa wi o si tu na ini a tijdschrift disi, Bijbel e piki prenspari aksi fu a libi, soleki: Fu san ede pina lai na grontapu? San o pasa na ini a ten di e kon? Bijbel e sori tu san Gado du fu sorgu taki den sani di a ben abi na prakseri biginbigin o kon tru.

Furu tra sani de di e sori taki Bijbel na wan tumusi prenspari buku, èn taki na Gado skrifi en. A skrifi na ini wan pisi ten fu 1600 yari. Aladi 40 man skrifi Bijbel, toku a abi wán boskopu, fu di den sani di skrifi na ini komoto fu Gado (2 Timoteyus 3:16). Tra fasi leki tra owruten buku, a boskopu fu Bijbel no lasi gowe na ini den hondrohondro yari di pasa, èn dusundusun owruten Bijbel dokumenti e sori dati. San moro prenspari, na taki Bijbel de te now ete aladi sma pruberi fu tapu trawan fu vertaal en, fu prati en, èn fu leisi en. Na ini a ten disi Bijbel de fu feni na heri grontapu èn a vertaal moro leki iniwan tra buku. A sani disi e sori taki „den sani di Gado taki e tan fu ala ten”.​—Yesaya 40:8.

Wan tra sani di Gado du, na taki a seti sani fu sorgu taki a pramisi fu en kon tru. Soleki fa wi ben taki na fesi, Gado ben wani taki libisma libi fu têgo na grontapu. Ma di Adam trangayesi Gado èn a sondu, a lasi na okasi di en nanga den bakapikin fu en ben abi fu libi fu têgo. „Wán man meki sondu kon na grontapu èn sondu tyari dede kon. Dati meki ala sma e dede, bika den alamala sondu” (Romesma 5:12). Fu di Adam sondu, meki a ben gersi leki den sani di Gado ben abi na prakseri gi grontapu no ben o pasa. San Yehovah du?

Den sani di Yehovah du e sori krin sortu fasi a abi. A meki Adam nanga Eva tyari a frantwortu fu san den du, ma na wan lobi-ati fasi a gi den bakapikin fu den san den ben abi fanowdu. Fu di Yehovah abi koni, meki wantewante a kon nanga wan lusu gi den problema di ben opo kon (Genesis 3:15). Yesus Krestes, a manpikin fu Gado, ben de a wan-enkri sma di ben o man frulusu libisma fu sondu nanga dede. Fa a ben o du dati?

 Fu frulusu libisma fu a sondu di Adam tyari kon na den tapu, dan Yehovah seni Yesus kon na grontapu fu leri sma fa den kan kisi têgo libi èn fu „gi en libi leki wan lusu-paiman fu frulusu furu sma” a (Mateyus 20:28; Yohanes 14:6). Yesus ben man pai a lusu-paiman fu di neleki Adam a no ben abi sondu. Ma tra fasi leki Adam, Yesus tan gi yesi na Gado na ini ala sani, srefi te na dede. Fu di Yesus no ben frudini en fu dede, meki Yehovah gi en wan opobaka fu go libi baka na hemel. Na so Yesus ben man du san Adam no ben du. A gi libisma di e gi yesi a howpu fu libi fu têgo. „Neleki fa furu sma tron sondari fu di a wán man dati trangayesi Gado, na so furu sma o tron reti-ati sma fu di wán sma gi yesi na Gado” (Romesma 5:19). Nanga yepi fu a frulusu-ofrandi fu Yesus, Gado o meki libisma libi fu têgo na grontapu, soleki fa a pramisi.

Wi kan leri furu fu Yehovah te wi e luku fa a du nanga den problema di opo kon baka di Adam trangayesi en. Wi e si taki noti kan tapu Yehovah fu klari san a bigin. A wortu fu en o abi „bun bakapisi” (Yesaya 55:11). Wi e kon sabi tu o furu Yehovah lobi wi. „Disi na a fasi fa Gado sori taki a lobi wi: Gado ben seni en wan-enkri Manpikin kon na grontapu, so taki a kan yepi wi fu kisi libi. A lobi disi no wani taki dati na wi ben lobi Gado, ma taki en ben lobi wi èn a seni en Manpikin kon leki wan ofrandi di e tapu den sondu fu wi èn di e meki wi kon bun baka nanga Gado.”​—1 Yohanes 4:9, 10.

Bijbel e taki fu Gado: „En eigi Manpikin srefi a no kibri, ma a libi en meki a dede gi wi alamala.” Dati meki wi kan de seiker taki Gado o „gi wi ala tra sani tu” di a pramisi wi (Romesma 8:32). San Gado o du gi wi? Grantangi, leisi moro fara.