Te yu e pruberi fu kon sabi wan sma, dan a fosi sani di yu o aksi en na: „Fa yu nen?” Efu yu ben o aksi Gado dati, dan san a ben o taki?

„Mi na Yehovah. Dati na mi nen.”​—Yesaya 42:8.

A nen prenspari gi Gado. Nowan sma no gi Gado en nen. Na en srefi teki a nen dati. Yehovah ben taki: „Disi na mi nen fu ala ten, èn disi na fa sma o memre mi fu têgo” (Eksodes 3:15). Na ini Bijbel, Gado nen de fu feni omeni tron moro iniwan fu den titel di a abi soleki Almaktiwan, Tata, Masra, noso Gado. A de fu feni omeni tron moro iniwan tra nen fu sma, soleki Abraham, Moses, David, noso Yesus. Ma san moro prenspari, na taki Yehovah wani taki sma kon sabi en nen. Bijbel e taki: „Na so sma o sabi taki yu di nen Yehovah, yu wawan na a Moro Heiwan fu heri grontapu.”​—Psalm 83:18.

A nen prenspari gi Yesus. Na ini a begi di sma sabi leki a Wi Tata Begi, Yesus ben leri den bakaman fu en fu begi Gado nanga den wortu disi: „Meki yu nen de santa” (Mateyus 6:9). Yesus srefi ben begi Gado: „Mi Tata, gi yu nen glori” (Yohanes 12:28). Yesus ben si en leki wan prenspari sani fu gi Gado nen glori èn dati meki a ben man begi: „Mi meki den kon sabi yu nen èn mi o tan fruteri den fu yu nen.”​—Yohanes 17:26.

A nen prenspari gi den sma di sabi Gado. A pipel fu Gado na ini owruten ben e frustan taki te den  ben sabi Gado nen èn te den ben e gi grani na a nen dati, dan den ben o kisi kibri nanga frulusu. „A nen fu Yehovah na wan bun kibripresi. Den reti-ati sma e lon go na ini èn den e kisi kibri” (Odo 18:10). „Ibri sma di e kari a nen fu Yehovah o kisi frulusu” (Yoèl 2:32). Bijbel e sori taki den sma di e dini Gado ben o tyari en nen. „Bika ibri pipel o tyari a nen fu en gado, èn den o du san a gado fu den wani. Ma fu ala ten wi o tyari a nen fu Yehovah wi Gado èn wi o du san a wani. Iya, fu têgo wi o du dati.”​—Mika 4:5; Tori fu den apostel 15:14.

A nen e sori suma na a tru Gado. Furu sabiman e taki dati a nen Yehovah wani taki „A e meki kon tron”. Yehovah Gado meki wi kon frustan san en nen wani taki di a taigi Moses suma na en. A ben taki: „Mi sa tron san mi wani tron” (Eksodes 3:14). Sobun, Gado nen no e sori wi nomo taki en na a Mekiman fu ala sani. A nen fu en e sori taki a kan meki ensrefi noso den sani di a meki, tron iniwan sani di de fanowdu fu meki a wani fu en kon tru. Aladi son titel e sori sortu posisi noso makti Gado abi, toku na a nen fu en wawan, Yehovah, e sori krin suma na en èn san a man tron.

A nen fu Yehovah e sori taki a e broko en ede nanga wi. A nen fu Gado e sori taki a e tan sori lobi gi den sani di a meki, sosrefi gi wi leki libisma. Boiti dati, fu di Gado meki wi kon sabi en nen, meki wi e frustan taki a wani taki wi kon sabi en. Te yu luku en bun, dan na en srefi bosroiti fu taigi wi fa a nen, fosi wi ben prakseri srefi fu aksi en. A de krin taki Gado no wani taki wi si en leki wan gado di de farawe èn di wi no man kon sabi. Ma a wani taki wi si en leki wan trutru sma di kan tron wi mati.​—Psalm 73:28.

Te wi e gebroiki Gado nen, dan dati e sori taki wi wani tron mati fu en. Fu eksempre, efu yu wani tron mati fu wan sma, dan yu o aksi en fu kari yu na yu nen. Ma fa yu ben o firi efu a sma dati e weigri fu gebroiki yu nen? Te fu kaba yu ben o aksi yusrefi efu a sma dati wani de yu mati trutru. Na so a de tu nanga Gado. Yehovah fruteri libisma fa a nen èn a e gi wi deki-ati fu gebroiki a nen dati. Te wi e du dati, dan wi e sori Yehovah taki wi wani tron mati fu en. Iya, a e si srefi den wan „di e hori en nen na prakseri”!​—Maleaki 3:16.

A fosi sani di wi musu du fu kon sabi Gado, na taki wi musu kon sabi a nen fu en. Ma dati a no ala. Wi musu kon sabi suma na a sma di abi a nen èn sortu fasi a abi.