A de so taki man di e teki fesi na ini a Kresten gemeente no mag trow?
KERKI na heri grontapu soleki Lomsu Kerki, na Orthodox Kerki, a Buda bribi nanga tra bribi e leri taki den fesiman fu den no mag trow. Na a tra sei furu sma feni taki a gwenti disi meki taki so furu kerki fesiman ben abi seks nanga sma èn now den syentori disi kon na doro.
Dati meki sma e aksi densrefi efu Bijbel e taki dati man di e teki fesi na ini a Kresten gemeente no mag trow. Fu piki na aksi dati, dan meki wi luku pe a gwenti disi komoto. Wi o luku tu fa Gado e denki fu a tori disi.
PE A GWENTI DISI KOMOTO?
Na wan konmakandra fu kerki fesiman fu a Lomsu Kerki di hori na ini 2006 (Romeinse Curie), Paus Benedictus XVI sori o ten a kerki kon nanga a wet taki sma di wani tron kerki fesiman no mag trow. A taki dati a kerki kon nanga „a gwenti disi, syatu baka a ten fu den Apostel”.
Ma den fosi Kresten no ben abi a gwenti disi. Na apostel Paulus di ben libi na a ten dati, ben warskow tra Kresten fu luku bun nanga man di ben e ’fruteri boskopu di gersi leki den komoto fu Gado’. Den man disi ben e „tapu sma fu trow”.
Den kerki di tron a Lomsu Kerki bakaten, bigin nanga a gwenti fu no trow. A sani disi bigin baka a yari 100. Soleki fa wan buku e sori, dan na a ten dati „furu sma na ini a Gran Kownukondre Rome ben kon nanga wan nyun gwenti taki sma no mag abi seks” èn na a denki disi a kerki teki abra (Celibacy and Religious Traditions).
Na den kerki konmakandra di hori na ini den hondrohondro yari baka dati, a Kerki bosroiti taki den fesiman no mag trow. Den man di sma e kari Kerki Tata ben horibaka gi a gwenti disi tu. Den ben denki taki seks ben meki taki wan sma no krin èn taki so wan sma no ben man tron wan fesiman fu kerki. Ma soleki fa wan buku e sori, dan „na a pisi ten fu a yari 900 furu priester èn srefi wan tu beskopu ben trow” (Encyclopædia Britannica).
Na den konmakandra di a Lateraans Concilie (wan grupu fu feifi kerki komte) hori na Rome na ini den yari 1123 nanga 1139, den ben taki dati wan fesiman fu kerki no mag trow. Teleki now dati na wan fu den leri fu Lomsu Kerki. Nanga a wet disi a kerki no ben o lasi a makti nanga den gudu di a ben abi, fu di te wan priester ben trow dan, a ben e libi den gudu fu en na baka gi den pikin fu en na presi fu libi den gi a kerki.
FA GADO E DENKI FU A GWENTI DISI?
Na ini Bijbel skrifi krin fa Gado e denki fu sma di no trow. Drape wi e leisi san Yesus ben taki fu den sma di no ben trow neleki en, „fu di den wani du moro gi a Kownukondre fu hemel” (Mateyus 19:12.). Na apostel Paulus ben taki tu fu Kresten di ben teki na eksempre fu en èn di no ben trow „fu a bun nyunsu ede”.
Toku Yesus nanga Paulus no ben taki dati wan Kresten no mag trow. Yesus ben taki dati a no ala den bakaman fu en ben kan tan sondro fu trow. Aladi Paulus taki dati a bun efu wan sma no trow, a taki krin: ’Mi no abi wan komando fu Masra, ma mi e taki san mi e denki.’
Boiti dati, Bijbel e sori taki na a ten fu den apostel furu fu den Kresten di ben e teki fesi na ini a gemeente ben trow. Fu eksempre, Bijbel e sori taki na apostel Petrus ben trow (Mateyus 8:14; Markus 1:29-31; 1 Korentesma 9:5). Fu di hurudu ben lai na ini Rome na a ten dati, meki Paulus ben skrifi taki efu wan Kresten man di ben e teki fesi na ini a gemeente ben trow, dan a musu de „a masra fu wán wefi nomo” èn a musu „abi pikin di e gi yesi”.
A no ben de so taki den man disi ben trow, ma den no ben abi seks. Bijbel e sori krin taki „a masra [musu] gi en wefi san a abi reti na tapu” èn taki trowpaar ’no musu weigri fu gi makandra san den abi reti na tapu’ (1 Korentesma 7:3-5). A de krin taki Gado no taki dati wan Kresten no mag trow. Bijbel no e leri tu taki Kresten di e teki fesi na ini a gemeente no mag trow.
FU A BUN NYUNSU EDE
Efu Bijbel no e tapu sma fu trow, dan fu san ede Yesus nanga Paulus ben e sori taki a bun fu tan sondro fu trow? Te wan sma no trow, dan a abi moro okasi fu prati a bun nyunsu nanga trawan. A abi moro ten fu yepi trawan fu di a no abi den broko-ede fu wan sma di trow.
Luku na eksempre fu David. A ben abi wan wroko na ini Meksikow City di ben pai bun. Toku a bosroiti fu gowe libi a wroko èn fu froisi go na wan boitipresi na ini Kosta Rika fu leri sma san Bijbel e taki. Na fu di David no trow meki a ben man du a sani disi? A taki: „Iya, seiker.” A taki tu: „A no ben makriki fu gwenti wan nyun kulturu nanga wan tra fasi fu libi. Ma fu di na mi wawan ben de, meki a no ben muilek so.”
Claudia, wan Kresten sisa di no trow èn di ben go yepi na difrenti presi pe moro preikiman de fanowdu, taki: „Mi e prisiri fu wroko gi Gado. A bribi fu mi nanga a matifasi di mi abi nanga Gado e kon moro tranga te mi e si fa a e sorgu gi mi.”
„A no abi trobi efu yu trow noso efu yu no trow. Solanga yu e gi Yehovah Gado a moro bun sani di yu abi, yu o de koloku.”
Te wan sma no trow, dan dati no abi fu de wan hebi gi en. Claudia taki: „A no abi trobi efu yu trow noso efu yu no trow. Solanga yu e gi Yehovah Gado a moro bun sani di yu abi, yu o de koloku.”
