LIBISMA

San Bijbel e taki: Gado „no meki [grontapu] fu soso, ma a seti en fu sma libi na tapu.”​—YESAYA 45:18.

GRONTAPU

San Bijbel e taki: „Libisma e dede èn tra libisma e kon, ma grontapu e tan fu ala ten.”​—PREIKIMAN 1:4.

SAN A WANI TAKI: Bijbel e sori taki grontapu o tan fu ala ten èn taki libisma o tan libi na en tapu. Sobun, san Bijbel e bedoel te a e taki fu a kaba fu grontapu?

LUKU A TORI DISI: Bijbel e taki dati a kaba fu a grontapu disi o de leki a ten fu Noa. Na a ten dati „grontapu ben kon lai nanga ogridu” (Genesis 6:13). Ma Noa ben de wan reti-ati man. Dati meki Gado ben kibri en nanga en osofamiri, ma a kiri den ogrisma na ini a frudu. Bijbel e taki fu san ben pasa na a ten dati: „A grontapu fu a ten dati kisi pori fu di watra sungu en” (2 Petrus 3:6). Dati ben de a kaba fu a grontapu fu a ten dati. Ma san ben kisi pori? A no a grontapu srefi, ma na den ogrisma fu a ten dati. Sobun, te Bijbel e taki fu a kaba fu a grontapu, dan a no e bedoel a gron pe wi e libi na tapu. Ma a e sori go na den ogrisma nanga den sani di den seti na ini a grontapu disi.

PROBLEMA NANGA OGRIDU

San Bijbel e taki: „Ete wan syatu pisi ten èn den ogriwan no sa de moro. Yu o luku pe den ben de fosi, ma den no sa de moro. Ma den safri-ati sma o kisi grontapu, èn den o prisiri srefisrefi, fu di freide o de pasa marki.”​—PSALM 37:10, 11.

SAN A WANI TAKI: A frudu na ini a ten fu Noa no ben puru ogridu na grontapu fu ala ten. Baka a frudu ogri sma ben kon de baka di ben e meki a libi muilek gi tra sma. Ma heri esi, Gado o puru ala ogridu. Na leki san a psalm skrifiman ben taki: „Den ogriwan no sa de moro.” Gado o gebroiki en Kownukondre fu puru ala ogridu. A Kownukondre disi na wan regering di de na ini hemel èn di o tiri ala reti-ati sma na grontapu.

LUKU A TORI DISI: Den tiriman na grontapu o horibaka gi a tiri fu Gado? Bijbel e sori taki den no o du dati. Na presi fu dati, den o opo densrefi teige Gado Kownukondre (Psalm 2:2). San o de a bakapisi? A Kownukondre fu Gado o puru ala libisma regering, èn „en wawan o tan fu têgo” (Danièl 2:44). Ma fu san ede den regering fu libisma musu kon na wan kaba?

San Bijbel e taki: „A no de na wan libisma di e waka fu taki srefi pe a o poti en futu.”​—YEREMIA 10:23.

SAN A WANI TAKI: Libisma no ben meki fu tiri densrefi. Den no man tiri tra sma èn den no man lusu den problema fu den.

LUKU A TORI DISI: Libisma regering no man „puru problema soleki pôtifasi, angri, siki, rampu, bigi feti nanga tra ogri di sma e du. Son sma taki dati na wan regering nomo musu tiri heri grontapu fu man puru den problema disi” (Britannica Academic). Ma awinsi ala libisma regering ben o bondru kon na wan fu tiri grontapu, toku a ben o de so taki na libisma e tiri ete èn den no man lusu den problema disi. A Kownukondre fu Gado na a wan enkri regering di man lusu den problema na grontapu fu ala ten.

Sobun, soleki fa Bijbel e taki dan a kaba fu na ogri grontapu, noso na ogri sistema disi, no de wan sani di bun sma musu frede. Na presi fu dati a de wan bun nyunsu, fu di Gado o sorgu gi wan nyun grontapu.

O ten ala den sani disi o pasa? A tra artikel o piki na aksi disi.