Heri esi, a Kownukondre fu Gado o tiri heri grontapu. Na a ten dati sma o libi na ini freide èn den o du wroko di e gi den prisiri. Gado poti Yesus Krestes fu tiri grontapu. Na ini a ten disi furu tiriman no e broko den ede nanga den borgu fu den. Ma Yesus no de so fu di ala ten a e prakseri a bun fu trawan. A e firi gi sma, a abi switifasi, a o krutu sani na wan reti fasi èn a abi lobi.​—Yesaya 11:4.

Den sma na grontapu no o prati na ini difrenti pipel noso nâsi. Den o de wan bigi famiri (Openbaring 7:9, 10). Ala sma na grontapu o lobi Gado, den o lobi tra sma èn den o wroko makandra na ini freide fu sorgu gi grontapu, a moi tanpresi di Gado meki gi wi.​—Psalm 115:16.

Te Gado Kownukondre o tiri grontapu, a o sorgu taki rampu no de moro (Psalm 24:1, 2). Di Yesus ben de na grontapu a sori taki Gado gi en a makti fu basi bigi winti (Markus 4:39, 41). Te a o tiri, nowan sma o abi fu frede taki rampu o miti wi. Wi o libi na ini freide nanga den meti èn sma no o pori a grontapu moro.​—Hosea 2:18.

Ala sma o abi wan bun gosontu. Nowan sma o kon owru, siki noso dede (Yesaya 35:5, 6). Sma o prisiri fu tan na ini wan moi èn krin grontapu leki fa a ben de na ini a dyari fu Eden. Neleki a ten dati, a gron o gi furu nyanyan èn ala sma na grontapu o abi nofo (Genesis 2:9). Neleki den sma na ini Israel fu owruten, ala sma na ini a paradijs o „nyan teleki den bere furu.”​—Lefitikus 26:4, 5.

Te a regering fu Gado o tiri ala sma o prisiri fu libi na ini freide. Nowan feti o de. Sma no o pina trawan èn ala sma o kisi san den abi fanowdu. Bijbel e pramisi: „Ibriwan sma o sidon na ondro en eigi droifibon nanga en eigi figabon. Nowan sma o meki den frede”.​—Mika 4:3, 4.

Ibri osofamiri o abi wan tanpresi, èn den no o frede taki sma o puru den drape. Wi o kisi wini fu ala den wroko di wi o du. Neleki fa Bijbel e taki, dan den wan di o libi na ini a nyun grontapu „no o wroko tranga fu soso.”​—Yesaya 65:21-23.

Bijbel e pramisi: „Heri grontapu o furu nanga a sabi fu Yehovah” (Yesaya 11:9). Den sma di o libi na a ten dati o leri furu fu Yehovah èn fu den moi sani di a meki. Den no o gebroiki a koni fu den fu meki fetisani noso tra sani fu du ogri nanga libisma (Yesaya 2:4). Na presi fu dati, den o leri fa fu libi na ini freide èn fa fu sorgu gi grontapu.​—Psalm 37:11.

Gado teki en ten fu meki grontapu so taki wi kan prisiri fu a libi ibri dei. A wani taki wi libi fu ala ten na grontapu (Psalm 37:29; Yesaya 45:18). Fu meki a sani disi pasa, Gado „o swari dede fu têgo” (Yesaya 25:8). Bijbel e pramisi: „Dede no o de moro, nowan sari, noso krei, noso pen no o de moro” (Openbaring 21:4). Gado o gi sma na okasi fu libi fu têgo. Den sma disi na den wan di pasa libilibi go na ini a nyun grontapu, ma sosrefi den wan di ben dede.​—Yohanes 5:28, 29; Tori 24:15.

 Nownow kaba, milyunmilyun sma na heri grontapu e sreka densrefi fu libi na ondro a tiri fu Gado Kownukondre. Aladi den de sondu sma toku den e du muiti fu tyari kenki kon fu man libi na ini a nyun grontapu. Fa den e du dati? Den e leri sabi Yehovah Gado nanga a sma di a seni kon, Yesus Krestes.​—Yohanes 17:3.

Kon sabi moro fa yu kan tan na libi te a grontapu disi o kisi pori èn san yu musu du fu libi fu têgo. Aksi wan Yehovah Kotoigi fu studeri Bijbel nanga yu sondro fu pai, noso yu kan go luku tra sani na tapu a website jw.org.