Wan sma di e firi gi trawan, man poti ensrefi na ini a situwâsi fu wan trawan èn na so a kan frustan fa wan sma e denki èn fa a e firi. Wan psycholoog, Datra Rick Hanson, e taki dati „ala sma man firi gi trawan”.

PRAKSERI A SANI DISI: Fu san ede wi leki libisma man firi gi trawan, moro leki fa iniwan tra libisani na grontapu man du dati? Bijbel e taki dati Gado ben meki wi fu gersi en (Genesis 1:26). Dati wani taki dati wi kan sori den fasi fu Gado aladi wi na sondusma. Sobun, te sma e yepi trawan fu di den e firi gi den, dan den e teki na eksempre fu Yehovah Gado, a lobi-ati Mekiman fu den.​—Odo 14:31.

Gado e firi gi wi èn a no lobi te wi e pina. Na ini owruten, a pipel fu Israel ben e pina leki srafu na ini Egepte èn baka dati den pina ete 40 yari na ini a gran sabana. Bijbel e taki fu den: „Te den ben de na ini banawtu, ensrefi ben de na ini banawtu tu” (Yesaya 63:9). Boiti taki Gado ben sabi taki a pipel fu en ben de na ini banawtu, a ben e firi tu gi den. A ben taki: „Mi sabi heri bun fa den e pina” (Eksodes 3:7). Gado e taki tu: „A sma di e fasi unu e fasi a popki fu mi ai” (Sakaria 2:8). Te trawan e du hati sani nanga wi, dan a e firi gi wi.

Bijbel e sori taki awinsi wi e krutu wisrefi èn wi feni taki Gado no e broko en ede nanga wi, toku wi musu hori na prakseri taki ’Gado bigi moro wi ati èn a sabi ala sani’ (1 Yohanes 3:19, 20). Gado sabi wi moro bun leki fa wi sabi wisrefi. A sabi heri bun na ini sortu situwâsi wi de, fa wi e denki, èn fa wi e firi. Boiti dati, a e firi gi wi.

 Gado Wortu e taigi wi:

• „Yehovah srefi o piki unu te unu e kari en. Efu unu bari suku yepi na en, a o taki: ’Dya mi de!’”​—YESAYA 58:9.

• „Yehovah taki: ’Mi sabi heri bun fa mi e prakseri fu unu. Mi no wani taki rampu miti unu, ma mi wani taki un musu abi wan bun libi. Mi wani taki sani waka bun gi unu na ini a ten di e kon èn mi wani taki un musu abi howpu. Un musu kari mi, un musu kon na mi, èn un musu begi mi, dan mi o arki unu.’”​—YEREMIA 29:11, 12.

• „Mi e begi yu, poti mi watra-ai na ini yu lerisaka. Yu teri den fu luku omeni den de èn yu skrifi dati na ini a buku fu yu.”​—PSALM 56:8.

Te wi sabi taki Gado e firi gi wi, dan fa dati kan yepi wi fu pasa problema? Luku na ondrofenitori fu Maria:

„Mi ben feni taki a libi ben tranga èn taki grontapu no ben prati nanga leti. Mi ben e sari srefisrefi fu di a boi fu mi di ben abi 18 yari kon dede, baka di a ben feti nanga kanker tu yari langa. Mi ben mandi nanga Yehovah fu di a no ben du noti fu dresi en!

Siksi yari baka dati, wan lobi sisa na ini a gemeente di ben e firi gi mi, arki mi di mi fruteri en taki mi ben firi leki Yehovah no lobi mi. A arki mi wan heri pisi ten sondro fu koti mi mofo. Ne a kari wan tekst di naki mi ati. A ben de 1 Yohanes 3:19, 20, pe skrifi taki ’Gado bigi moro wi ati èn a sabi ala sani’. A sori mi taki Yehovah e frustan sortu problema e miti wi.

Aladi a sisa sori mi a tekst disi, toku a ben muilek gi mi fu no mandi moro! Ne mi leisi Psalm 94:19, pe skrifi: ’Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka.’ Mi ben e firi neleki den tekst disi ben skrifi gi mi! Te fu kaba mi ben e feni trowstu te mi ben e taki nanga Yehovah fu den broko-ede fu mi, fu di mi ben sabi taki a ben e arki mi èn taki a ben e frustan mi.”

A e gi deki-ati trutru fu sabi taki Gado e frustan wi èn taki a e firi gi wi! Ma fu san ede so furu pina de dan? Na fu di Gado e strafu wi fu den ogri di wi du? Gado o tyari wan kaba kon na pina? Wi o taki fu den tori dati na ini den tra artikel.