Den fosi 60 miniti baka te wan beibi komoto na ini en mama bere, prenspari srefisrefi gi a libi fu a beibi dati. Fu san ede? Fu di te wan mama e sori lobi gi a beibi fu en syatu baka te a meki en, dan a sani disi kan meki a pikin gro moro bun. *

San e meki taki wan mama e sori lobi gi a nyunyun beibi fu en? Professor Jeannette Crenshaw e taki na ini wan buku, dati na a ten te wan mama e meki wan pikin, a skin fu en e meki furu fu a hormoon di nen oxytocine. A hormoon disi „e meki taki a mama e firi fu fasi en beibi, fu luku en, èn fu gi en bobi”. Wan tra hormoon di a skin e meki na a ten disi, „e yepi a mama fu sori lobi gi a beibi” èn a e meki tu taki a e kisi prisiri fu dati (The Journal of Perinatal Education). Fu san ede a sani disi prenspari?

Na wi lobi-ati Mekiman, Yehovah Gado, * meki mama na so wan fasi taki den man sori lobi gi a beibi fu den. Kownu David ben taki dati na Gado puru en ’na ini en mama bere’ èn taki na en ben e meki a firi taki noti no ben o man pasa nanga en te a ben de na ini en mama anu. A ben begi: „Na yu e sorgu mi, sensi di mi mama meki mi. Sensi di mi ben de na ini mi mama bere, na yu na mi Gado.”​—Psalm 22:9, 10.

PRAKSERI A SANI DISI: Soleki fa wi si, dan na Gado e meki den hormoon wroko na so wan fasi taki wan mama e luku en beibi èn e du ala san a man fu sorgu bun gi en. Efu Gado meki mama na so wan moi fasi, dan yu no denki taki a e broko en ede tu nanga wi di na „pikin” fu en?​—Tori fu den apostel 17:29.

Yesus Krestes di sabi a Mekiman bun moro leki iniwan tra sma, ben leri wi: „Sma e seri tu pikin fowru gi wan sensi di no warti furu, a no so? Ma toku nowan fu den fowru o fadon na gron sondro fu un Tata sabi. A Tata teri srefi ala den wiwiri na tapu un ede. Fu dati ede no frede, bika unu warti moro leki wan heri ipi pikin fowru.”​—Mateyus 10:29-31.

Furu sma no e poti prakseri na ibri fowru di den e si. Den no e si srefi te wan fu den fadon na gron. Ma wi hemel Tata e si ibriwan fu den! Toku libisma warti moro gi Gado leki fowru, awinsi na wan lo fowru. Sobun, san disi e leri yu? A e sori taki Gado e broko en ede nanga yu trutru. Yu no abi fu „frede” taki a no e si yu!

 Gado Wortu e taigi wi:

• „Den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati.”​—2 KRONIKI 16:9.

• „Den ai fu Yehovah e si den reti-ati sma, èn den yesi fu en e yere te den e bari suku yepi na en.”​—PSALM 34:15.

• „Mi o breiti èn mi o prisiri, fu di yu sori mi bun-ati, fu di yu si a banawtu fu mi. Yu sabi heri bun fa mi e pina.”​—PSALM 31:7.

Yu denki taki a kan yepi wi te wi sabi taki Gado lobi wi èn taki a e broko en ede nanga wi? Iya, a sani disi kan de wan yepi trutru. Hannah * fu Ingrisikondre e taki:

„Furu leisi mi ben e firi leki Yehovah no lobi mi èn taki a no ben e piki den begi fu mi. Mi ben denki taki a no ben e du dati fu di a bribi fu mi no ben tranga nofo. Mi ben feni taki a ben e strafu mi, noso taki a no ben e si mi, fu di mi no ben prenspari gi en. Mi ben e firi leki Gado no ben e broko en ede nanga mi.”

Ma now Hannah no e tweifri moro, fu di a sabi taki Yehovah e poti prakseri na en èn taki a lobi en. Fa a du kon taki a e firi so now? A e taki: „Safrisafri a denki fu mi bigin kenki. Mi sabi ete taki furu yari pasa mi arki wan Bijbel-lezing di ben e taki fu a lusu-paiman fu Yesus. A lezing dati ben naki mi ati èn a yepi mi fu bribi taki Yehovah lobi mi. Èn te Gado piki den begi fu mi, dan nofo tron mi e krei fu di mi e si taki Yehovah lobi mi trutru. Mi e studeri Bijbel tu èn mi e go na den Kresten konmakandra. Den sani disi leri mi moro fu Yehovah, fu den fasi fu en, èn fu a fasi fa a e si wi leki libisma. Now mi e si krin taki Yehovah e horibaka gi wi alamala, taki a lobi wi, èn taki a de klariklari fu luku ibriwan fu wi.”

A sani di Hannah taki e gi deki-ati. Ma fa yu kan de seiker taki Gado e frustan yu èn taki a sabi fa yu e firi? Wi o luku na aksi disi na ini a tra artikel.