PRAKSERI taki yu e luku wan felem fu wan pôpi sma di man singi bun. Kande yu lobi den poku fu a sma disi. Na a bigin fu a felem yu e si fa a e kisi les èn fa a e oefen ibri dei. Dan yu e si fa a e hori bigi show, fa a e go na difrenti kondre, èn fa sma na heri grontapu e kon sabi en. Ma fosi yu denki a e kon owru èn na a kaba fu a felem a e dede.

San yu e si na ini a felem disi na wan tru tori. A no abi trobi suma na en, efu na wan pokuman, wan sabiman, wan sportman, noso wan tra pôpi sma, toku sani ben o waka a srefi gi en. A tru taki a sma du furu bun sani, ma prakseri omeni tra sani a ben o man du efu a no ben kon owru èn dede.

A sari taki a sani disi o miti wi alamala te fu kaba (Preikiman 9:5). Awinsi fa wi e meki muiti, toku wi e kon owru èn e dede. Boiti dati, te wan sma kon siki noso te wan sani pasa nanga en, a kan dede fruku. Soleki fa Bijbel e sori, wi de leki „dow di e kon de fu si fu wan syatu pisi ten nomo èn baka dati a no de fu si moro”.​—Yakobus 4:14.

Fu di wi kan dede na iniwan momenti, meki son sma e denki: „Meki wi nyan èn dringi, bika tamara wi o dede” (1 Korentesma 15:32). Sma e libi na a fasi disi fu di den no abi nowan howpu gi a ten di e kon. Ma spesrutu te hebi tesi e miti wan sma, dan a kan aksi ensrefi: ’A libi disi na ala san de?’ Pe yu kan feni piki tapu na aksi disi?

Na ini a ten disi, furu sma e luku san sabiman e taki. Sabiman nanga datra feni sani di e meki taki sma e libi langa. Èn son sabiman e suku fu feni wan fasi fu meki sma libi moro langa leki dati srefi. Ma awinsi den abi bun bakapisi, toku wi de ete nanga den aksi disi: Fu san ede wi e kon owru èn e dede? Oiti wan dei o kon taki wi feanti, dede no o de moro? Den artikel di o kon o taki fu den tori disi èn den o piki na aksi: A libi disi na ala san de?