1-3. (a) Na ini sortu situwâsi ala yonguwan de èn nanga san wi kan agersi disi? (Luku a prenki na a bigin fu na artikel.) (b) San kan yepi yonguwan fu teki bun bosroiti?

KON MEKI WI TAKI dati yu wani go na wan bigi konmakandra na wan farawe foto. Yu musu teki wan bus fu man doro drape. Te yu doro na a presi pe yu musu teki a bus, dan yu e bruya pikinso fu di yu e si furu sma nanga furu bus. Ma koloku taki yu sabi pe yu e go èn yu sabi sortu bus yu musu teki. Yu no o teki wan bus di o tyari yu go na wan heri tra presi.

² A libi de leki wan langa pasi di yu e teki go na wan farawe presi èn unu yonguwan de leki den sma di de na a presi pe den e teki bus. Son leisi so furu sani de di yu kan du nanga yu libi, taki yu e bruya pikinso. Ma efu yu sabi san yu wani du, dan a o moro makelek gi yu fu teki a yoisti bosroiti. San na a moro bun sani di yu kan du nanga yu libi?

³ Na artikel disi o piki na aksi dati èn a o gi yu deki-ati fu gebroiki yu libi fu du san Yehovah feni bun. Efu yu wani du sani  Yehovah feni bun, dan ala ten yu musu suku rai na en te yu musu teki bosroiti na ini yu libi. Teki a rai fu Yehovah te yu musu bosroiti sortu skoro yu o go, sortu wroko yu o teki, efu yu o trow noso efu yu o meki pikin. A prenspari tu fu poti marki na ini na anbegi. Yonguwan di e poti a wani fu Yehovah na a fosi presi, o kisi furu blesi èn den o abi wan koloku libi.​—Leisi Odo 16:3.

4. San wi o luku na ini na artikel disi?

⁴ A bun fu prakseri san yu wani du gi Yehovah. Fu san ede? Wi o poti prakseri na dri reide. A fosi reide nanga a di fu tu reide o sori taki te yu e suku fu du moro gi Yehovah, dan yu nanga en o tron moro bun mati. A di fu dri reide o sori sortu wini yu o kisi te yu e poti marki gi yusrefi te yu yongu ete.

5. San na a moro prenspari reide fu san ede wi musu du moro gi Yehovah?

⁵ A moro prenspari reide fu san ede wi musu meki muiti fu du moro gi Yehovah na fu di wi wani sori en taki wi de nanga tangi gi a lobi di a sori gi wi èn gi den sani di a du gi wi. A psalm skrifiman ben taki: „A bun fu taki Yehovah tangi . . . , bika den sani di yu e du, Yehovah, e meki mi breiti. Mi e bari fu prisiri te mi e si den sani di yu meki” (Ps. 92:1, 4). Unu yonguwan, prakseri ala den sani di Yehovah gi unu. A gi yu libi, a meki yu kon sabi en, a gi yu Bijbel, a gi yu a gemeente èn a gi yu a howpu fu libi fu têgo na ini Paradijs. Te yu e poti na anbegi na a fosi presi, dan yu e sori Yehovah taki yu de nanga tangi gi ala den sani disi. Dati o yepi yu fu kon moro krosibei na en.

6. (a) Te yu e poti marki na ini na anbegi, dan fa dati kan yepi yu fu tron wan moro bun mati fu Yehovah? (b) San na wan tu marki di yu kan poti gi yusrefi te yu yongu ete?

⁶ A di fu tu reide fu san ede yu musu poti marki na ini na anbegi, na fu di dati o gi yu na okasi fu wroko gi Yehovah. Disi o meki taki yu o tron wan moro bun mati fu en. Na apostel Paulus pramisi: „Gado no e du sani di no reti. Dati meki a no o frigiti a wroko di unu du nanga a lobi di unu sori gi a nen fu en” (Hebr. 6:10). Noiti yu yongu tumusi fu poti marki gi yusrefi. Fu eksempre, Christine ben abi 10 yari di a bosroiti fu leisi den ondrofenitori fu brada nanga sisa di dini Yehovah nanga den heri ati. Di Toby ben abi 12 yari, a poti en leki marki fu leisi a heri Bijbel fosi a teki dopu. Maxim ben abi 11 yari èn en sisa Noemi ben abi 10 yari di den ala tu teki dopu. Den ala tu ben poti en leki marki fu go dini na Betel. Fu no frigiti a marki di den poti, den plak wan Betel formulier na wan muur na ini na oso. Yu srefi kan luku san yu wani du èn meki muiti fu doro a marki dati.​—Leisi Filipisma 1:10, 11.

7, 8. (a) Te yu sabi san yu wani du gi Yehovah, dan fa dati o meki en makriki gi yu fu teki bosroiti? (b) Fu san ede wan yonguwan bosroiti fu no go na universiteit?

⁷ A di fu dri reide fu san ede a bun fu poti marki gi yusrefi te yu yongu ete, na fu di a o yepi yu fu teki bun bosroiti. Fu eksempre, yonguwan musu bosroiti sortu skoro den o go èn sortu wroko den o du. Te yu musu teki den sortu bosroiti disi, dan a de neleki yu musu bosroiti sortu pasi yu musu teki. Efu yu sabi pe yu e go, dan a no muilek fu sabi sortu pasi yu musu teki. Na so a de tu taki te yu sabi sortu marki yu wani doro, dan a moro makelek fu teki bun bosroiti. Odo 21:5 e taki: „Te wan sma e wroko tranga, dan den sani di  a abi na prakseri fu du o tyari wini kon gi en.” Te yu e poti marki gi yusrefi te yu yongu ete, dan frukufruku kaba dati o tyari wini kon gi yu. Na dati Damaris ondrofeni di a ben musu teki wan prenspari bosroiti di a ben yongu ete.

⁸ Damaris ben abi soso hei cijfer di a klari middelbaar skoro. Dati meki a ben kan go na universiteit sondro taki a ben o abi fu pai. Ma a no du dati. A bosroiti fu teki wan wroko pe a no abi fu wroko heri wiki. Fu san ede a du dati? A taki: „Frukufruku kaba mi bosroiti taki mi wani pionier. Fu man du dati, mi ben o abi fu teki wan wroko pe mi no abi fu wroko heri wiki. Efu mi ben go na universiteit fu tron afkati, mi ben o meki furu moni, ma mi no ben o man feni so wan wroko.” Now Damaris e pionier 20 yari kaba. A feni taki a bosroiti di a teki di a ben yongu ben bun? A taki: „Na a presi pe mi e wroko now mi e miti nanga furu afkati. Den e du a wroko di mi ben o du efu mi ben go na universiteit. Ma furu fu den no de koloku aladi den e du a wroko dati. A bosroiti di mi teki fu pionier meki taki mi no teki wan wroko di ben o gi mi furu stress. Ma a gi mi na okasi fu wroko gi Yehovah ala den yari di pasa èn dati gi mi furu prisiri.”

9. Fu san ede wi musu prèise den yonguwan?

⁹ Wi wani prèise den dusundusun yonguwan na ini den gemeente na heri grontapu. Den e poti Yehovah nanga na anbegi fu en na a fosi presi na ini den libi. Den yonguwan disi e prisiri nanga a libi fu den èn na a srefi ten den e leri fu teki a tiri fu Yehovah na ini ala san den e du. Sobun, den e suku rai na Yehovah te den musu bosroiti sortu skoro den o go, sortu wroko den o du èn efu den o trow. Salomo taki: „Frutrow na tapu Yehovah nanga yu heri ati.” A taki tu: „Poti prakseri na en, awinsi sortu pasi yu e waka, dan na en o meki yu pasi kon reti” (Odo 3:5, 6). Yonguwan, Yehovah lobi unu trutru! A o kibri unu, a o tiri unu èn a o blesi unu.

10. (a) Fu san ede a preikiwroko musu de wan fu den moro prenspari sani gi wi? (b) Fa yu kan preiki moro bun gi sma?

¹⁰ Te wan yonguwan wani prisiri Yehovah ati, dan a o wani fruteri trawan fu en. Yesus Krestes taki dati „a bun nyunsu musu preiki fosi na ala kondre” (Mark. 13:10). Fu di furu ten no de moro fu du a preikiwroko, meki a musu de wan fu den moro prenspari sani gi wi. Yu kan poti en leki marki fu preiki moro furu? Yu kan tron wan pionier? Ma san yu kan du efu yu no lobi du a preikiwroko? Fa yu kan preiki moro bun gi sma? Tu sani kan yepi yu: Sreka yusrefi bun èn no tapu fu fruteri tra sma fu Yehovah. Yu o si taki a preikiwroko o gi yu moro prisiri leki san yu ben denki.

11, 12. (a) Fa yonguwan kan sreka densrefi fu taki nanga trawan fu Yehovah? (b) Fa wan yongu brada ben kan taki fu Yehovah na skoro?

¹¹ Yu kan sreka na fesi fa yu o piki son aksi di den pikin na skoro ben kan poti gi yu. Wi website jw.org nanga den buku fu wi abi artikel na ini di kan yepi yonguwan fu sreka wan piki tapu aksi di furu sma lobi poti, soleki na aksi: „Fu san ede yu no e hori friyari-oso?” Kapitel 13 fu a buku Meki Gado tan lobi yu kan yepi yu fu sreka wan piki tapu na aksi disi.​—Leisi 1 Petrus 3:15.

¹² Efu yu kisi na okasi, dan taigi den pikin na skoro taki den srefi kan go suku sani na jw.org. Na dati Luca du. A klas fu en ben taki fu difrenti bribi èn Luca si taki a skorobuku e taki sani fu Yehovah Kotoigi di no  tru. Aladi a ben e senwe, a aksi efu a kan fruteri a klas fa sani de trutru. A skoro jufrow ben feni dati bun. Luca ben kan fruteri den fu a bribi fu en èn a ben kan sori a heri klas a website fu wi. A skoro jufrow taigi a klas taki te den go na oso, den musu luku a felem Yu no abi fu feti te trawan e suku trobi nanga yu. Luca ben breiti taki a ben kan taki fu Yehovah na skoro.

13. Fu san ede wi no musu meki noti tapu wi fu doro den marki di wi poti?

¹³ No lasi-ati te sani no e go leki fa yu fruwakti, ma tan meki muiti fu doro den marki di yu poti (2 Tim. 4:2). Na dati Katharina du. Di a ben abi 17 yari, a poti en leki marki fu preiki gi ibri sma na en wrokope. Wan fu den sma dati ben lobi gi en syen, ma a no meki dati tapu en. Di Hans, wan fu den sma na wrokope, ben si a fasi fa Katharina ben e tyari ensrefi, a bosroiti fu leisi den buku fu wi, a bigin studeri Bijbel èn te fu kaba a dopu. Katharina no ben sabi disi fu di a ben froisi go tan na wan tra presi. Ma 13 yari baka dati, en nanga en osofamiri ben de na wan konmakandra. A no ben man bribi di a si taki a brada di kon hori a lezing ben de Hans! Katharina ben breiti taki a no meki noti tapu en fu preiki gi den sma na wrokope.

14, 15. (a) San yu musu hori na prakseri te tra sma wani dwengi yu fu du san den e du? (b) San yu kan du fu no meki trawan dwengi yu fu du san den wani?

¹⁴ Te nanga now na artikel disi gi yu a deki-ati fu libi na wan fasi di e gi Yehovah prisiri èn fu poti marki na ini na anbegi. Ma furu yonguwan di abi a srefi yari leki yu wani meki soso prisiri. Èn kande den o gi yu deki-ati fu du a srefi sani. Te fu kaba yu o abi fu meki den si o prenspari a de gi yu fu doro den marki di yu poti. No meki tra yonguwan dwengi yu fu du tra sani. Prakseri na agersitori fu a bus. Efu yu ben musu teki wan bus fu go na wan presi, yu ben o go na ini wan bus soso fu di den sma na ini a bus dati e meki prisiri? Nôno, yu no ben o du dati.

¹⁵ San yu kan du fu no meki trawan  dwengi yu fu du san den wani? A fosi sani na taki yu no musu go na ini situwâsi pe sma o dwengi yu fu du sani di yu no wani (Odo 22:3). Prakseri den takru bakapisi di yu o kisi te yu e du sani di no bun (Gal. 6:7). Wan tra sani di kan yepi yu na fu abi sakafasi èn fu suku rai. Sakafasi o yepi yu fu teki a rai fu yu papa, yu mama nanga tra lepi brada nanga sisa na ini a gemeente.​—Leisi 1 Petrus 5:5, 6.

16. Fruteri wan ondrofenitori di e sori o prenspari a de fu abi sakafasi.

¹⁶ Sakafasi yepi Christoph fu teki bun rai. Syatu baka di a dopu, a bigin go na wan gym doronomo. Drape tra yonguwan gi en deki-ati fu go na ini wan sport club. A taki fu a tori nanga wan owruman. Na owruman taigi Christoph fu prakseri sortu takru bakapisi a kan tyari kon. Fu eksempre, a ben kan tron leki den sma di e du iniwan sani soso fu wini. Toku Christoph bosroiti fu go na ini a sport club. Ma baka wan pisi ten a kon si taki a sport di a ben e du ben kan meki a kisi mankeri. A go taki baka nanga den owruman èn den gi en rai fu Bijbel. Christoph e taki: „Yehovah seni sma kon di gi mi bun rai. Aladi mi no arki wantewante, toku baka wan pisi ten mi teki a rai fu En.” Yu abi sakafasi èn yu e teki a bun rai di sma e gi yu?

17, 18. (a) San Yehovah wani taki yonguwan musu du na ini a ten disi? (b) Fa yu kan sorgu taki te yu kon bigi, yu no o sari fu den bosroiti di yu teki? Fruteri wan ondrofenitori.

¹⁷ Bijbel e taki: „Yonkuman [noso yongu uma], prisiri nanga den yongu yari fu yu èn meki yu ati firi bun te yu yongu ete” (Preik. 11:9). Yehovah wani taki yu leki yonguwan musu de koloku. Na ini na artikel disi yu leri taki wan sani di yu kan du fu de koloku, na fu tan meki muiti fu doro den marki di yu poti. Yu kisi a deki-ati tu fu teki a rai fu Yehovah te yu musu teki bosroiti. Te yu e bigin du den sani disi te yu yongu, dan frukufruku kaba yu o si fa Yehovah e tiri yu, fa a e kibri yu èn fa a e blesi yu. Prakseri ala den bun rai di a e gi yu na ini en Wortu èn teki a rai disi: „Memre yu Gran Mekiman na ini yu yongu yari.”​—Preik. 12:1.

¹⁸ Nowan sma e tan yongu fu ala ten. Fosi yu denki wan yonguwan tron wan bigisma. Furu bigisma e sari taki den no poti yoisti marki di den ben yongu èn trawan no ben abi marki srefisrefi na ini den libi. Ma efu yu tan meki muiti fu doro den marki di yu poti, dan te yu kon bigi, yu o breiti nanga den bosroiti di yu teki. Na so Mirjana e firi. Di a ben yongu a ben sabi du sport bun. Dati meki sma ben aksi en fu teki prati na den Winter Olympis Prei. Ma a bosroiti fu du a furuten diniwroko. Moro leki 30 yari baka dati, Mirjana de na ini a furuten diniwroko ete makandra nanga en masra. A e taki dati sma di wani kon pôpi, di wani kisi biginen, makti nanga gudu noiti no de koloku trutru. A taki tu dati a moro bun sani di wi kan du na ini wi libi na fu dini Gado èn fu yepi sma fu kon sabi en.

19. Fu san ede a bun fu poti marki gi yusrefi te yu yongu ete?

¹⁹ Wi musu prèise den yonguwan na ini a gemeente fu di den e tan meki muiti fu dini Yehovah awinsi a no makelek. Unu e poti marki gi unsrefi na ini na anbegi èn unu e si a preikiwroko leki wan fu den moro prenspari sani. Boiti dati, unu no e meki grontapu tapu unu fu doro den marki di unu poti. Unu kan de seiker taki a muiti di unu e du no de fu soso. Unu abi brada nanga sisa di lobi unu èn di e horibaka gi unu. Sobun, te unu e poti un libi na ini Yehovah anu, dan den sani di unu wani du o waka bun.