1-2. Fu san ede Yesus taki den wortu na Yohanes 4:35, 36?

DI Yesus ben go na Galilea a ben waka na ini wan tu gron pe a nyanyan no ben lepi ete (Yoh. 4:3-6). Baka fo mun a nyanyan disi ben o lepi. Dati meki den disipel no ben man frustan fu san ede Yesus taki a sani disi: „Opo un ai luku den gron, dan unu o si taki a nyanyan lepi kaba fu koti.” (Leisi Yohanes 4:35, 36.) San Yesus ben wani taki?

² Yesus no ben taki fu wan trutru kotiwroko, ma a ben taki fu a wroko fu meki sma tron disipel. Prakseri san ben pasa syatu na fesi. Aladi den Dyu no ben bumui nanga den Samariasma, Yesus ben preiki gi wan Samaria uma èn na uma ben arki en. Fu taki en leti, di Yesus ben taki fu nyanyan di „lepi kaba fu koti”, dan wan grupu fu Samariasma ben kon na en fu leri moro sani fu en, fu di na uma ben fruteri den fu Yesus (Yoh. 4:9, 39-42). Wan Bijbel sabiman ben taki fu a tori disi: ’Den sma disi di meki muiti fu kon wantewante na Yesus sori taki den ben wani tron disipel fu Krestes. Na wan agersifasi den sma disi ben de leki nyanyan di ben lepi kaba fu koti.’

3. Efu yu e si sma neleki fa Yesus e si den, dan fa dati o yepi yu fu tron wan moro bun preikiman?

³ Fa yu e denki fu den sma di yu e preiki a bun nyunsu gi? Yu e si den leki nyanyan di lepi kaba fu koti? Efu dati de so, dan dati o de fu si na den dri sani disi: (1) Yu o preiki nanga moro faya. Furu ten no de fu du a kotiwroko. Dati meki wi no musu lasi ten. (2) Yu o prisiri te yu e si taki sma e gi yesi na a bun nyunsu. Bijbel e taki dati sma ’e prisiri te den e koti nyanyan na den gron’ (Yes. 9:3). (3) Yu o si ibri sma leki wan sma di kan tron wan disipel fu Yesus. Disi o yepi yu fu taki fu tori di o hari den prakseri.

4. San wi o leri fu na apostel Paulus na ini na artikel disi?

 ⁴ Kande son bakaman fu Yesus ben denki taki den Samariasma no ben o tron disipel fu en, ma Yesus no ben denki so. Wi srefi musu si den sma na ini a kontren pe wi e preiki, leki sma di kan tron disipel fu Krestes. Na apostel Paulus na wan moi eksempre gi wi. San wi kan leri fu en? Na ini na artikel disi wi o taki fu dri sani di a ben e du. (1) A ben meki muiti fu kon sabi san den sma ben e bribi. (2) A ben luku san ben o hari den prakseri. (3) A ben si den leki sma di ben kan tron disipel fu Yesus.

5. Fu san ede a ben makelek gi Paulus fu preiki gi den sma na ini den snoga?

⁵ Paulus ben preiki furu na ini den snoga fu den Dyu. Fu eksempre, „dri Sabat-dei a taki-go-taki-kon nanga den [Dyu] fu Gado Buku” na ini a snoga fu Tesalonika (Tori 17:1, 2). A ben makelek gi Paulus fu preiki gi sma na ini den snoga. A ben de wan Dyu (Tori 26:4, 5). Sobun, Paulus ben sabi den gwenti fu den Dyu, èn dati meki a ben sabi fa a ben musu preiki gi den.​—Fil. 3:4, 5.

6. Fa den sma na ini a wowoyo fu Ateine ben de tra fasi leki den sma di Paulus ben miti na ini a snoga?

⁶ Bakaten Paulus ben musu lowe komoto na ini Tesalonika fu di sma ben frufolgu en. A ben musu lowe komoto tu na ini Berea èn te fu kaba a doro na ini Ateine. Drape „a bigin taki nanga den Dyu na ini a snoga èn nanga den tra sma di ben e anbegi Gado” (Tori 17:17). Ma di Paulus ben go na a wowoyo, a ben e preiki gi sma di ben abi wan tra bribi. Wan tu fu den sma disi ben de filosofiaman nanga trakondre sma di ben si a boskopu fu Paulus leki „nyun sani”. Den taigi en: „Yu e leri wi sani di wi no sabi.”​—Tori 17:18-20.

7. Soleki fa Tori fu den apostel 17:22, 23 e sori, dan fa Paulus preiki gi den sma fu Ateine?

⁷ Leisi Tori fu den apostel 17:22, 23. Paulus no preiki gi den trakondre sma na ini Ateine, na a srefi fasi leki fa a ben preiki gi den Dyu na ini a snoga. A kan taki Paulus ben aksi ensrefi: ’San den sma na ini Ateine e bribi?’ A ben luku fa sma ben libi èn fa den ben anbegi den gado fu den. Èn te Paulus ben preiki gi den sma disi, a ben e taki fu sani di den e bribi kaba èn di e kruderi nanga Gado  Wortu. Wan Bijbel sabiman taki: „Fu di Paulus ben de wan Dyu di ben tron wan Kresten, meki a ben sabi taki den Grikisma no ben e anbegi a Gado di den Dyu nanga den Kresten ben e si leki a tru Gado. Ma a ben pruberi fu sori den sma fu Ateine taki den ben sabi taki a Gado disi de.” Dati meki Paulus ben kenki a fasi fa a ben preiki. A taigi den sma fu Ateine taki a boskopu fu en ben kon fu a ’gado di den no sabi’ èn di den ben pruberi fu anbegi. Aladi den sma disi no ben sabi Gado Buku, toku Paulus no ben denki taki den no ben o man tron Kresten. Na presi fu dati, a ben si den leki nyanyan di lepi kaba fu koti èn a ben kenki a fasi fa a ben preiki a bun nyunsu.

8. (a) Fa yu kan kon sabi san den sma na ini a kontren e bribi? (b) San yu kan taki te wan sma taki dati a e go na wan kerki kaba?

⁸ Neleki Paulus wi musu gebroiki wi ai. Luku sortu sani e sori san den sma na ini a kontren e bribi. San wi e si na den oso èn na tapu den dyari? A nen fu den, den krosi di den weri noso den wortu di den sma e gebroiki e sori fu sortu bribi den de? Kande den taigi yu taki den e go na wan kerki kaba. Te dati e pasa, dan wan sisa di de spesrutu pionier e taki: „Mi no kon dya fu dwengi yu fu bribi san mi e bribi, ma mi ben wani taki fu a tori disi . . . ”

9. Fu sortu sani yu kan taki nanga wan sma di e go na wan kerki kaba?

⁹ Fu sortu sani yu kan taki nanga wan sma di e go na wan kerki kaba? Taki fu wan fu den leri na ini Bijbel di a e bribi kaba. Kande a e anbegi wán Gado, kande a e si Yesus leki a Frulusuman fu libisma, noso kande a e bribi taki heri esi Gado o pori ogrisma. Taki fu sani di unu e agri fu den èn fruteri en a boskopu fu Bijbel na wan fasi di o hari en prakseri.

10. San wi musu pruberi fu du èn fu san ede?

¹⁰ Hori na prakseri taki son sma no e bribi ala sani di den kerki e leri den. Sobun, awinsi yu sabi kaba fu sortu kerki a sma de, pruberi fu kon sabi san a e bribi. David, wan spesrutu pionier fu Australia e taki: „Furu sma e moksi a bribi fu den nanga leri fu filosofiaman.” Donalta, wan sisa fu Albania, e taki: „Son sma di wi e miti e taki dati den e go na wan kerki kaba, ma bakaten den e taki dati den no e bribi na ini Gado trutru.” Wan brada di e dini leki zendeling na ini Argentinia taki dati son sma e taki dati den e bribi taki Gado na dri sma na ini wán. Toku den no e bribi trutru taki a Papa, a Manpikin nanga a santa yeye na  wán Gado. A zendeling e taki: „Fu di mi sabi dati, dan a moro makelek fu taki fu sani di mi nanga den e agri fu den.” Sobun, pruberi fu kon sabi san den sma e bribi trutru. Dan neleki Paulus yu kan „tron ala sani gi ala sortu sma”.​—1 Kor. 9:19-23.

11. Soleki fa skrifi na Tori fu den apostel 14:14-17, dan fa Paulus ben preiki gi den sma fu Listra?

¹¹ Leisi Tori fu den apostel 14:14-17. Paulus ben luku san ben o hari sma prakseri èn a ben kenki a fasi fa a ben e preiki gi den. Fu eksempre, den sma na ini Listra no ben sabi den Buku fu Bijbel. Dati meki Paulus ben e taki fu sani di den ben sabi. A ben e taki fu gron di ben e gi furu nyanyan èn fu sani di ben kan gi den prisiri. A gebroiki wortu nanga eksempre di den sma ben frustan.

12. Fa yu kan sabi san o hari sma prakseri èn fa yu kan kenki a fasi fa yu e preiki?

¹² Pruberi fu kon sabi san o hari a prakseri fu den sma na ini a kontren èn kenki a fasi fa yu e preiki. Te yu e waka go miti a sma noso te yu e tanapu na fesi en oso, dan fa yu kan kon sabi san o hari en prakseri? Luku san a sma e du. Kande a sma e krin en dyari, kande a e leisi wan buku, kande a e meki en wagi noso kande a e du wan tra sani. Efu a fiti, yu kan bigin taki fu a sani di a sma e du (Yoh. 4:7). Srefi den krosi di wan sma weri kan yepi yu fu kon sabi moro fu en. A kan sori yu fu sortu kondre a de, sortu wroko a e du noso sortu sport a lobi. Gustavo e taki: „Mi bigin taki nanga wan yonguman fu 19 yari di ben weri wan bosroko di ben abi wan fowtow fu wan pôpi singiman na en tapu. Mi taki wan sani fu a fowtow, dan a yonguman taigi mi fu san ede a lobi a singiman. A takimakandra disi meki taki a man bigin studeri Bijbel èn now a de wan brada fu wi.”

13. San yu kan taigi wan sma so taki a kisi na angri fu studeri Bijbel?

¹³ Te yu e aksi wan sma efu a wani  studeri Bijbel, dan sori en fa a studie o yepi en na ini en libi (Yoh. 4:13-15). Wan leisi wan uma di ben wani sabi moro, ben kari wan sisa kon na inisei. A sisa si wan diploma na a muur di ben sori taki a frow ben go na universiteit fu studeri fa fu gi sma leri. Dati meki a taigi na uma taki wi srefi e gi sma leri fu Bijbel na den oso èn na den konmakandra fu wi. Na uma bigin studeri Bijbel, a go na a konmakandra a tra dei èn syatu baka dati a go na wan kring konmakandra. Wán yari baka dati, na uma dopu. Aksi yusrefi: ’San o hari a prakseri fu den gobaka fu mi? San mi kan taigi den so taki den kisi na angri fu studeri Bijbel?’

14. Fa yu musu sreka yusrefi gi ibri Bijbelstudie?

¹⁴ Te yu bigin studeri Bijbel nanga wan sma, dan sreka yusrefi ibri leisi te yu o go studeri nanga en. Hori na prakseri fa a sma kweki, sortu skoro a go èn sortu sani e hari en prakseri. Te yu e sreka yusrefi, luku sortu tekst yu o leisi, sortu felem yu o sori en èn sortu agersitori yu o gebroiki fu yepi en fu frustan san Bijbel e leri. Aksi yusrefi: ’San o naki a sma ati?’ (Odo 16:23) Flora, wan pionier sisa fu Albania, ben studeri nanga wan uma di ben taki: „Mi no e bribi taki sma o kisi wan opobaka.” Flora no dwengi na uma fu bribi a leri disi. Flora e taki: „Mi ben frustan taki na uma disi ben musu kon sabi a Gado di pramisi a sani disi, fosi a o man bribi a leri disi.” Dati meki ibri leisi te a ben e studeri nanga na uma, a ben poti prakseri na a lobi fu Yehovah, a koni fu en nanga a makti fu en. Bakaten na uma disi bigin bribi na ini na opobaka. Now na uma na wan fayafaya Kotoigi fu Yehovah.

15. Soleki fa Tori fu den apostel 17:16-18 e sori, dan sortu sani di den sma fu Ateine ben e du Paulus no ben lobi, ma fu san ede dati no tapu en fu preiki gi den?

¹⁵ Leisi Tori fu den apostel 17:16-18. Furu sma na ini Ateine ben e dini falsi gado, den ben e libi wan morsu libi èn den ben e bribi den leri fu den filosofiaman. Toku Paulus no ben denki taki den no ben o man tron bakaman fu Krestes. A ben tan preiki gi den aladi den ben spotu en. Paulus srefi ben tron wan Kresten, aladi a ben de „wan sma di ben e taki ogri fu Gado, di ben e frufolgu sma èn di no ben abi syen” (1 Tim. 1:13). Neleki fa Yesus ben bribi taki Paulus ben kan tron wan disipel, na so Paulus ben bribi tu taki den sma fu Ateine ben kan tron disipel. Èn na dati pasa tu.​—Tori 9:13-15; 17:34.

16-17. San e sori taki ala sortu sma kan tron disipel fu Krestes? Gi wan eksempre.

¹⁶ Na a ten fu den apostel, ala sortu sma tron disipel fu Yesus. Di Paulus ben skrifi wan brifi gi den Kresten di ben e libi na ini a Griki foto Korente, a taki dati fosi sonwan fu den ben de ogriman noso den ben e libi wan morsu libi. Baka dati a taki: „Ma Gado wasi unu kon krin” (1 Kor. 6:9-11). Efu yu ben de drape, yu ben o denki taki den sma dati ben o kenki èn taki den ben o tron disipel fu Yesus?

¹⁷ Na ini a ten disi furu sma e tyari kenki kon fu tron disipel fu Yesus. Fu eksempre, na ini Australia, wan spesrutu pionier di nen Yukina, leri taki ala sortu sma kan gi yesi na a boskopu fu Bijbel. Wan leisi di a ben de na wan kantoro, a si wan uma di ben abi omeni tatoeage na en  skin èn a ben weri bigibigi krosi. Yukina e taki: „Na ini a bigin mi no ben wani taki nanga en. Ma di mi bigin taki nanga en, mi si taki a ben lobi Bijbel trutru. Sonwan fu den tatoeage fu en ben de tekst fu a Bijbel buku Psalm!” Na uma bigin studeri Bijbel èn a bigin go na den konmakandra. *

18. Fu san ede wi no musu krutu sma?

¹⁸ A de so taki Yesus ben e taki dati a nyanyan na den gron ben lepi fu koti, fu di a ben fruwakti taki furu sma ben o tron disipel fu en? Nôno. Bijbel ben taki dati furu sma no ben o bribi na ini Yesus (Yoh. 12:37, 38). Èn Yesus ben man si san de na ini sma ati, sobun a ben sabi taki furu sma no ben o bribi den sani di a ben leri den (Mat. 9:4). Toku a ben e poti prakseri na den sma di ben o bribi na ini en, awinsi den no ben furu èn a ben e preiki fayafaya gi ala sma. Fu di wi no man si san de na ini sma ati, meki a moro prenspari taki wi no krutu den sma na ini a kontren fu wi! Na presi fu dati, wi musu si den leki sma di kan tron disipel fu Yesus. Marc, wan zendeling na ini Burkina Faso, taki: „Den sma di mi e denki taki den o go na fesi, na den e stop studeri Bijbel. Ma den sma di mi ben denki taki den no ben o go doro, na den e go na fesi. Sobun, mi leri taki a moro bun fu meki a santa yeye fu Yehovah yepi wi fu feni den sma di wani kon sabi a tru bribi.”

19. Fa wi musu si den sma na ini a kontren fu wi?

¹⁹ Kande a gersi leki furu sma na ini a kontren fu yu no o tron disipel fu Yesus. Ma memre san Yesus taigi den disipel fu en. A taki dati a nyanyan na den gron lepi kaba fu koti. Sma kan kenki èn den kan tron disipel fu Krestes. Yehovah e si den sma disi leki „gudu” (Hag. 2:7). Efu wi e si sma leki fa Yehovah nanga Yesus e si den, dan wi o pruberi fu kon sabi san den e bribi èn san o hari den prakseri. Wi o si den leki sma di kan tron wi brada nanga sisa.