1-2. San na a lusu-paiman èn fu san ede wi abi en fanowdu?

DI ADAM sondu, dan a lasi a grani fu libi fu têgo èn den pikin fu en no ben o libi fu têgo moro tu. Adam no ben abi fu sondu. A sondu fu espresi. Ma fa a de nanga den pikin fu en? Den no ben du nowan ogri èn a no den ben meki taki Adam sondu (Rom. 5:12, 14). Ma wan sani de di Yehovah ben kan du so taki den pikin fu Adam ben kan libi fu têgo? Iya! Syatu baka di Adam sondu, dan safrisafri Yehovah tyari kon na krin fa a ben o frulusu milyunmilyun fu den bakapikin fu Adam fu a fluku fu sondu nanga dede (Gen. 3:15). Na wan ten di a ben feni bun, Yehovah ben o seni en Manpikin komoto fu hemel „fu gi en libi leki wan lusu-paiman fu frulusu furu sma”.​—Mark. 10:45; Yoh. 6:51.

² San na a lusu-paiman? Te den Kresten Griki Buku fu Bijbel e taki fu a lusu-paiman, dan dati abi fu du nanga a prijs di Yesus pai fu bai baka san Adam ben lasi (1 Kor. 15:22). Fu san ede wi abi a lusu-paiman fanowdu? Fu di den wet fu Yehovah di reti trutru e sori taki sma musu pai libi nanga libi (Eks. 21:23, 24). Di Adam sondu a lasi a libi di Gado ben gi en. Dati meki Yesus di no ben abi sondu pai nanga en eigi libi fu bai a libi baka di Adam ben lasi. Na so sani waka na wan fasi di e kruderi nanga den wet fu Gado (Rom. 5:17). Na so Yesus tron a „Têgo Papa” fu ala den sma di e bribi a ini a lusu-paiman.​—Yes. 9:6; Rom. 3:23, 24.

3. Soleki fa Yohanes 14:31 nanga 15:13 e sori, dan fu san ede Yesus ben de klariklari fu gi en libi leki ofrandi?

³ Yesus ben de klariklari fu gi en libi leki ofrandi fu di a ben lobi en hemel Tata èn fu di a lobi wi. (Leisi Yohanes  14:31; 15:13.) A lobi dati meki taki a ben wani tan gi yesi na en Papa te na dede. Na so a sani di Yehovah ben abi na prakseri biginbigin gi libisma èn gi grontapu, o kon tru. Na ini a artikel disi, wi o luku fu san ede Yehovah gi pasi taki Yesus pina so hebi fosi a dede. Wi o taki syatu tu fu wan Bijbel skrifiman di ben abi furu warderi gi a lusu-paiman. Èn leki lasti wi o luku fa wi kan sori taki wi de nanga tangi gi a lusu-paiman èn fa wi kan abi moro warderi gi a prenspari sani disi di Yehovah du gi wi.

4. Fruteri fa Yesus dede.

⁴ Prakseri fa a lasti dei fu Yesus na grontapu ben de. A ben kan aksi en Papa fu meki omeni bigi legre engel kon yepi en. Ma a gi pasi taki den srudati fu Rome grabu en èn fon en na wan ogri-ati fasi (Mat. 26:52-54; Yoh. 18:3; 19:1). Den fon en nanga wan wipi teleki en heri baka bigin brudu, dan den meki a syow wan hebi postu. Yesus bigin srepi a postu go na a presi pe den ben o anga en. Ma te fu kaba, a no ben man moro. Dati meki den meki wan sma di ben e tanapu na sei pasi syow a postu gi en (Mat. 27:32). Di Yesus doro na a presi pe a ben o dede, dan den srudati spikri en anu nanga en futu na a postu. Fu di Yesus en heri skin ben e anga na a spikri, meki a ben abi furu skin-ati èn a ben kon moro muilek gi en fu bro. A pina omeni yuru langa. Den mati fu en ben e sari srefisrefi èn en mama ben e krei. Ma den Dyu tiriman ben e spotu en (Luk. 23:32-38; Yoh. 19:25). Yesus ben sabi taki a ben du ala san en Papa ben aksi fu en èn fosi a dede a begi Yehovah wan lasti leisi. Dan a anga en ede èn a dede (Mark. 15:37; Luk. 23:46; Yoh. 10:17, 18; 19:30). A no de fu taki dati Yesus nyan furu pina fosi a dede na so wan ogri-ati fasi.

5. San ben hati Yesus moro leki a fasi fa den kiri en?

⁵ A sani di ben hati Yesus trutru, a no a fasi fa den ben o kiri en, ma na a lei di den ben lei gi en taki a ben taki ogri fu Gado. Te yu luku en bun, den ben taki dati a no ben abi lespeki gi Gado noso gi a nen fu Gado (Mat. 26:64-66). A sani disi wawan ben hati Yesus so te, taki a ben e howpu taki en papa ben o du wan sani fu no meki a kisi a syen disi (Mat. 26:38, 39, 42). Fu san ede Yehovah gi pasi taki en lobi Manpikin pina èn dede? Meki wi go luku dri sani.

6. Fu san ede Yesus ben musu anga na wan postu?

⁶ A fosi sani, na taki Yesus ben musu anga na wan postu fu puru wan fluku na tapu den Dyu (Gal. 3:10, 13). Den Dyu ben pramisi taki den ben o gi yesi na a Wet fu Gado, ma den no du dati. Leki bakapikin fu Adam den ben abi sondu kaba. Ma now a fluku disi ben kon na den tapu tu (Rom. 5:12). A wet di Gado ben gi Israel ben taki dati efu wan sma ben kisi dedestrafu fu wan sondu di a du, dan den ben musu kiri en. Son leisi den ben e anga a dedeskin fu a sma dati na wan postu tu (Deut. 21:22, 23; 27:26). * Sobun, di den anga Yesus na a postu, dan a teki a fluku fu den Dyu na en tapu so taki den Dyu ben kan kon fri. Na so na ofrandi fu en ben kan yepi den, aladi den no ben e bribi na ini en na a ten dati.

7. San na a di fu tu sani fu san ede Gado gi pasi taki en Manpikin pina?

 ⁷ A di fu tu sani fu san ede Gado gi pasi taki en Manpikin Yesus pina, na taki a ben e sreka en gi a wroko di a ben o du leki Granpriester. Yesus srefi kon si fa a muilek fu gi yesi na Gado te hebi tesi e miti yu. A ben hebi gi en so te, taki a begi Gado fu yepi en. „A ben e bari tranga èn a ben krei watra-ai”. Fu di den sani disi miti Yesus, meki a man frustan wi moro bun èn ’a man kon yepi wi te wi e kisi tesi’. Wi de nanga tangi trutru taki a sma di Yehovah poti leki Granpriester gi wi, na wan sma di abi sari-ati èn di „man frustan den swakifasi fu wi”.​—Hebr. 2:17, 18; 4:14-16; 5:7-10.

8. San na a di fu dri sani di meki taki Gado gi pasi taki Yesus kisi hebi tesi?

⁸ A di fu dri sani fu san ede Yehovah gi pasi taki Yesus pina so hebi, na fu di wan prenspari aksi ben musu kisi piki: A tru taki libisma man tan gi yesi na Yehovah, srefi te den e kisi hebi tesi? Satan e taki: ’Nôno, libisma no man!’ A e taki dati libisma e dini Gado soso fu di den wani taki a du sani gi den. Èn a e bribi tu taki den no lobi Yehovah, neleki fa Adam no ben lobi Yehovah (Yob 1:9-11; 2:4, 5). Fu di Yehovah ben de seiker taki en Manpikin ben o tan gi yesi na en, meki a gi pasi taki Yesus kisi hebi tesi. Yesus tan gi yesi na Gado èn a sori taki Satan na wan leiman.

9. San wi kan leri fu na apostel Yohanes?

⁹ Furu Kresten kisi gens nanga ala sortu tesi. Toku den tan preiki èn den horidoro te na ini den owrudei, fu di a lusu-paiman tranga a bribi fu den. Luku na eksempre fu na apostel Yohanes. A tan preiki fu Krestes èn fu a lusu-paiman. A kan taki a du dati moro leki 60 yari. Di a ben abi pikinmoro 100 yari, den tiriman fu Rome ben feni taki a ben kan tyari problema kon gi den. Dati meki den seni en go leki strafuman na a èilanti Patmos, soso fu di a ’ben taki fu Gado èn fu di a ben fruteri sma fu Yesus’ (Openb. 1:9). Wi kan leri furu fu a fasi fa Yohanes sori bribi èn fa a horidoro.

10. Fa den buku fu Yohanes e sori taki a ben abi warderi gi a lusu-paiman?

¹⁰ Na ini den Bijbel buku di Yohanes skrifi, a e fruteri fa a lobi Yesus èn fa a de nanga tangi gi na ofrandi fu en. Den buku fu en e taki moro leki 100 leisi fu a lusu-paiman noso fu den bun sani di a lusu-paiman du. Fu eksempre, Yohanes ben skrifi: „Efu wan sma du wan sondu, dan wi abi wan yepiman na a Tata, dati na Yesus Krestes, wan reti-ati sma” (1 Yoh. 2:1, 2). Den buku fu Yohanes e sori krin tu o prenspari a de „fu preiki fu Yesus” (Openb. 19:10). A de krin taki Yohanes ben abi furu warderi gi a lusu-paiman. Fa wi kan sori taki wi e warderi en tu?

11. San kan yepi wi fu kakafutu gi sondu?

¹¹ Kakafutu gi sondu. Efu wi abi warderi gi a lusu-paiman trutru, dan wi no o taki: ’Fu san ede mi musu kakafutu gi sondu? Mi kan du wan sondu èn baka dati mi e aksi Gado fu gi mi pardon.’ Na presi fu dati wi o taki: ’No! Fa mi kan go du so wan sani. Luku ala den bun sani di Yehovah du gi mi.’ Dati meki wi musu aksi Yehovah fu gi wi krakti. Wi kan begi en: ’No meki mi kisi tesi.’​—Mat. 6:13.

12. Fa wi kan du san skrifi na 1 Yohanes 3:16-18?

 ¹² Lobi yu brada nanga sisa. Te wi lobi den, dan wi e sori tu taki wi e warderi a lusu-paiman. Fu san ede? Fu di Yesus no gi en libi gi unu wawan, ma sosrefi gi wi brada nanga sisa. Efu a ben de klariklari fu dede gi den, dan dati wani taki dati a lobi den trutru. (Leisi 1 Yohanes 3:16-18.) Wi e sori lobi gi wi brada nanga sisa na a fasi fa wi e libi nanga den (Ef. 4:29, 31–5:2). Fu eksempre, wi kan yepi den te den e siki noso te den e pasa hebi tesi soleki bigi rampu. Ma san wi musu du te wan brada noso wan sisa e taki wan sani di hati wi?

13. Fu san ede wi musu de klariklari fu gi trawan pardon?

¹³ Yu feni en muilek son leisi fu gi yu brada noso sisa pardon? (Lef. 19:18) Efu dati de so, dan teki a rai disi: „Tan frudrage makandra èn gi makandra pardon nanga un heri ati, srefi te wan sma feni taki wan trawan du wan hati sani nanga en. Soleki fa Yehovah e gi unu pardon nanga en heri ati, na so un musu gi trawan pardon tu” (Kol. 3:13). Ibri leisi te wi e gi wi brada noso sisa pardon, dan wi e sori wi hemel Tata taki wi e warderi a lusu-paiman trutru. San wi kan du fu kisi moro warderi gi a kado disi di Gado gi wi?

14. San na wan fasi fa wi kan kisi moro warderi gi a lusu-paiman?

¹⁴ Taki Yehovah tangi gi a lusu-paiman. Joanna, wan sisa fu 83 yari di e libi na ini India, e taki: „Mi feni taki a prenspari fu taki fu a lusu-paiman ibri leisi te mi e begi èn fu taki Yehovah tangi gi en.” Te yu e begi, dan a bun fu taigi Yehovah krin sortu fowtu yu meki a dei dati èn fu aksi en pardon gi ibriwan fu den. A no de fu taki dati efu yu du wan seryusu sondu, dan yu o abi yepi fanowdu fu den owruman èn na wan lobi-ati fasi den o gi yu rai nanga yepi fu Gado Wortu. Den o begi nanga yu èn den o aksi Yehovah fu gi yu pardon nanga yepi fu a lusu-paiman, so taki yu kan meki sani bun baka nanga en.​—Yak. 5:14-16.

15. Fu san ede wi musu meki ten fu leisi moro fu a lusu-paiman èn fu denki dipi fu en?

¹⁵ Denki dipi fu a lusu-paiman. Wan sisa  di nen Rajamani èn di abi 73 yari e taki: „Te mi e leisi fa Yesus pina, dan mi ai e furu nanga watra.” Kande yu feni en muilek tu fu prakseri fa a Manpikin fu Gado pina so hebi. Ma o moro yu e denki dipi fu na ofrandi di Yesus tyari, o moro yu o kon lobi en nanga en Papa. Yu kan studeri a tori fu a lusu-paiman moro fini gi yusrefi, so taki yu kan kon frustan a waarde fu en moro bun.

16. Fa wi e kisi wini te wi e leri trawan fu a lusu-paiman? (Luku a fowtow na tapu a kafti.)

¹⁶ Leri trawan fu a lusu-paiman. Ibri leisi te wi e fruteri trawan fu a lusu-paiman, dan wi srefi e kisi moro warderi gi en. Wi abi wan tu moi wrokosani di wi kan gebroiki fu leri trawan fu san ede Yesus ben musu dede gi wi. Fu eksempre, wi kan gebroiki les 4 fu a brochure Gado abi bun nyunsu gi wi! A les dati nen „Suma na Yesus Krestes?” Noso wi kan poti prakseri na kapitel 5 fu a buku San Bijbel kan leri wi? A kapitel dati nen „A lusu-paiman na a moro bigi kado di Gado gi wi”. Èn ibri yari te wi e go na Memrefesa fu a dede fu Yesus èn te wi e gi trawan wan kari fu kon na a fesa disi, dan wi e kisi moro warderi gi a seti disi. A no de fu taki dati Yehovah gi wi wan moi grani fu leri trawan fu en Manpikin!

17. Fu san ede a lusu-paiman na a moro bigi kado di Gado gi libisma?

¹⁷ A de krin taki a prenspari fu kon abi moro warderi gi a lusu-paiman èn fu no lasi a warderi dati. Na a lusu-paiman meki taki wi kan de bun mati fu Yehovah aladi wi abi sondu. Na a lusu-paiman o tyari wan kaba kon na ala den wroko fu Didibri (1 Yoh. 3:8). Èn na a lusu-paiman o meki taki a sani di Yehovah ben abi na prakseri gi grontapu biginbigin, o kon tru. Heri grontapu o tron wan paradijs. Ala sma di wi o miti o lobi Yehovah èn den o dini en. Dati meki ibri dei wi musu suku fasi fu sori warderi gi a lusu-paiman, fu di dati na a moro bigi kado di Gado gi libisma!