Mi gebore na ini 1955 leki a moro yonguwan fu dri boi. Mi gro kon na a zuidsei fu Fensikondre, na ini wan kontren di sma sabi now leki a foto Vantaa.

Mi m’ma teki dopu leki Yehovah Kotoigi wan tu yari fosi mi gebore. Ma mi p’pa ben de teige a waarheid èn a no ben wani taki mi m’ma ben e studeri nanga, wi noso taki a ben e tyari wi go na den gemeente konmakandra. Dati meki mi m’ma ben e leri wi den moro prenspari tru tori fu Bijbel te mi p’pa no ben de nanga wi.

Sensi di mi ben pkin, mi weigri fu du sani di Yehovah no feni bun. Fu eksempre wan leisi di mi ben abi seibi yari, mi skorojufrow atibron nanga mi fu di mi no ben wani nyan verilättyjä (Fensi pankuku di meki fu brudu). A kwinsi mi fesi nanga wán anu fu opo mi mofo, èn nanga a tra anu a pruberi fu pusu wan forku nanga wan pisi pankuku go na ini mi mofo. Ma te fu kba mi ben man naki a forku puru na ini en anu.

Di mi ben abi 12 yari, dan mi p’pa kon dede. Baka dati, mi ben man go na den gemeente konmakandra. Den brada na ini a gemeente ben e sori swit’fasi gi mi èn a sani disi yepi mi fu tron wan moro bun mati fu Yehovah. Mi bigin leisi Bijbel ibri dei èn mi  studeri den buku fu wi fayafaya. A sani disi meki taki mi ben man dopu tapu 8 augustus 1969, di mi ben abi 14 yari.

Syatu baka dati, mi klari skoro èn mi bigin pionier. Baka wan tu wiki mi froisi go na foto Pielavesi, fu di moro preikiman ben de fanowdu drape.

Na ini Pielavesi, mi miti a meisje di ben o tron mi lobi wefi, Sirkka. Mi ben lobi en fu di a ben abi sakafasi èn a ben lobi Yehovah trutru. A no ben e suku biginen èn a no ben e suku fu abi wan gudu libi. Wi ala tu ben wani du ala san wi man fu dini Yehovah èn wi ben de klarklari fu teki iniwan toewijzing di wi kisi. Wi trow tapu 23 maart 1974. Baka di wi trow, wi no go nanga fakansi, ma wi go dini na ini a foto Karttula pe moro preikiman ben de fanowdu leki na ini a foto pe wi ben de fosi.

Sensi a bigin di wi trow, Yehovah sori wi taki a o sorgu gi wi efu wi poti a Kownukondre na a fosi presi na ini wi libi (Mat. 6:33). Fu eksempre, wi no ben abi wan wagi di wi ben de na ini Karttula. Na a bigin wi ben e go na ini a diniwroko nanga baisigri. Ma na ini winter ten, a ben e kowru srefsrefi. Wi ben abi wan wagi fanowdu fu man preiki na ini a bigi kontren fu a gemeente. Ma wi no ben abi moni fu bai wan wagi.

Sondro taki wi ben ferwakti dati, mi bigi brada kon luku wi èn a gi wi a wagi fu en. A ben pai a verzekering kba. Na oli w’wan wi ben musu bai. Na so wi kisi a wagi di wi ben abi fanowdu.

Yehovah sori wi taki a ben e teki en na en tapu fu sorgu gi wi. San wi ben musu du, na taki wi ben musu poti a Kownukondre na a fosi presi na ini wi libi.

Di wi ben de na a Pionierskoro na ini 1978, dan Raimo Kuokkanen a, wan fu den leriman fu wi, gi wi dek-ati fu gi wi nen fu go na Gileadskoro. Dati meki wi bigin leri Ingrisitongo so taki wi ben kan doro den markitiki fu go na a skoro. Ma na ini 1980, fosi wi ben kan gi wi nen, wi kisi a kari fu go dini na a bijkantoro na ini Fensikondre. Na a ten dati, sma di ben e wroko na Betel no ben  man go na Gilead. Ma wi no ben wani dini pe wi srefi ben wani. Wi ben wani dini pe Yehovah ben wani. Sobun, wi teki a kari. Ma tòg wi tan leri Ingrisitongo so taki efu wi ben o kisi na okasi ete fu go na Gileadskoro, dan wi no ben o abi problema nanga a tongo.

Wan tu yari baka dati, a Tiri Skin besroiti taki sma na Betel ben kan go na Gilead. Wi vul den formulier in wantewante, ma a no fu di wi no ben e firi koloku na Betel. Nôno, kwetkweti! Fu taki en leti, efu wi ben o kisi okasi fu go na a skoro, dan wi ben o wani go dini na wan kontren pe moro preikiman de fanowdu. Wi kisi wan kari fu go na Gileadskoro èn wi klari a di fu 79 klas na ini september 1985. Wi kisi a toewijzing fu go dini na ini Kolombia.

Na ini Kolombia, wi ben musu go dini fosi na a bijkantoro. Mi du a wroko na a bijkantoro so bun leki mi man, ma baka wan yari mi ben e firi fu du wan tra sani. Disi na a fosi èn a wan-enkri leisi di mi aksi fu kisi wan tra toewijzing. Baka dati, wi tron zendeling na ini a preikiwroko èn wi kisi a toewijzing fu go dini na ini a foto Neiva, di ben de na ini a kontren fu Huila.

Ala ten mi ben lobi a preikiwroko. Di mi ben e pionier na ini Fensikondre na a ten di mi no ben trow ete, dan mi ben e preiki fruku m’manten te lati neti. Na a bigin di mi nanga Sirkka trow, dan wi ben e preiki heri dei tu. Di wi ben e dini na ini farawe kontren, dan wi ben e sribi na ini wi oto son leisi. Na so wi no ben abi fu de na pasi so langa èn wi ben kan bigin preiki fruku m’manten a tra dei.

Leki zendeling na ini a preikiwroko, wi ben e preiki fayafaya baka leki fosi. A gemeente fu wi ben e gro èn den brada nanga sisa fu Kolombia ben abi lespeki, den ben abi switifasi, nanga warderi.

Pkinso moro fara fu a kontren pe wi ben e dini na ini Neiva, yu ben abi foto pe Kotoigi no ben de. Mi ben e tan aksi misrefi fa a bun nyunsu ben o doro den sma drape. Ma fu di grupu ogr’ati fetiman ben e opo densrefi teige a regering, meki ogri ben kan miti sma di no ben de fu den foto dati. Dati meki mi begi taki wan sma fu wan fu den foto dati ben o tron wan Kotoigi. Mi ben denki taki a sma dati ben o abi fu libi na ini Neiva fu kon sabi waarheid. Dus mi begi tu taki baka te a dopu a ben o tron wan lepi brada èn a ben o drai go baka na a foto fu en fu go preiki. Ma san mi no ben hori na prakseri, na taki Yehovah ben abi wan moro bun lusu gi a problema.

Syatu baka dati, mi bigin studeri Bijbel nanga wan yonguman di nen Fernando González. A ben e libi na ini Algeciras, wan fu den foto pe Kotoigi no ben de. Ibri wiki, Fernando ben e go na wroko na ini Neiva. A foto disi ben de moro leki 50 kilometer fu pe a ben e tan èn a ben e teki 30 miniti fu doro drape. A ben e sreka bun gi ibri studie èn a bigin kon na den konmakandra wantewante. Sensi a fosi wiki di Fernando bigin studeri, a ben e tyari sma fu en foto kon na  wan fu leri den san a ben kon sabi na a Bijbelstudie fu en.

Fernando dopu na ini yanuari 1990, siksi mun baka di a bigin studeri. Baka dati a tron wan gewoon pionier. Fu di wan Kotoigi ben e libi na ini Algeciras now, meki a bijkantoro ben kan seni spesrutu pionier go na a kontren dati. Na ini februari 1992, wan gemeente seti na ini a foto dati.

Ma a de so taki Fernando ben e preiki soso na ini a foto fu en? Nôno! Baka di a trow, en nanga en wefi froisi go na San Vicente del Caguán, wan tra foto pe Kotoigi no ben de. Drape den yepi fu seti wan gemeente. Na ini 2002, Fernando tron kring-owruman èn te nanga a dei fu tide en nanga en wefi Olga e du a kringwroko ete.

A sani disi leri mi o prenspari a de fu begi Yehovah krin te a abi fu du nanga den toewijzing di wi e kisi. Yehovah man du san wi no man. Te yu luku en bun, a kotiwroko na fu en, a no fu wi.​—Mat. 9:38.

Na ini 1990 wi ben musu go du kringwroko. A fosi kring fu wi ben de na ini a mamafoto Bogotá. Wi ben frede taki wi no ben o man du a toewijzing disi bun. Mi nanga mi wefi na gewoon sma èn wi no abi spesrutu koni. Boiti dati wi no ben gwenti libi na ini bigi foto. Ma Yehovah du san a pramisi na Filipisma 2:13, pe skrifi: „Gado na a sma di e gi un krakti. A e gi unu a firi nanga a krakti fu du sani di e plisi en.”

Bakaten wi ben musu go dini na ini wan kring di ben de na ini Medellín, a foto di kari na a bigin fu na artikel. Den sma drape ben kon gwenti na ogri di ben e psa na strati èn den no ben e frede moro. Fu eksempre, wán leisi mi ben e studeri Bijbel nanga wan sma, dan sma na dorosei bigin sutu tapu makandra. Mi ben de kba fu go d’don plata na gron, ma a Bijbelstudenti go doro fu leisi a paragraaf leki noti no psa. Di a kba leisi, dan a taigi mi taki a e kon. A go na dorosei èn baka wan pisi ten a kon baka nanga tu pkin èn a taigi mi gewoon: „Sorry yèrè, mi ben musu go teki mi pkin.”

Tra okasi ben de tu pe bijna ogri miti wi. Wan leisi di wi ben e preiki oso fu oso, a frow fu mi lon kon na mi èn mi si taki a ben e frede. A taigi mi taki wan man ben sutu na en tapu. Mi skreki. Ma bakaten wi kon si taki a no Sirkka a man ben wani sutu, ma a ben e sutu tapu wan man di ben e waka psa leti na en sei.

Baka wan pisi ten wi no ben e senwe so moro te wi ben de na strati. A ben e gi wi dek’ati fu si fa den Kotoigi drape ben e tan hordoro aladi moro ogri sani ben e miti den. Wi ben e prakseri taki efu Yehovah ben e yepi den, dan a ben o yepi wi tu. Ala ten wi ben e gi yesi na den rai fu den owruman drape, wi ben e luku bun taki ogri no miti wi, èn den tra sani wi ben e libi gi Yehovah.

A no de fu taki dati a no ala ten wi ben de na ini situwâsi pe ogri ben kan miti wi. Wan leisi di mi ben e preiki na wan oso, dan a ben gersi leki mi ben e yere tu uma e kosi  makandra na dorosei. Mi no ben wani go luku fa tu sma e krutu nanga makandra, ma na ososma taigi mi fu kon tapu en balkon. Ne mi kon si taki na tu p’pokai ben e du neleki den birtisma fu na ososma disi.

Na ini 1997 mi tron leriman na a Dinariskoro. b Ala ten mi ben lobi fu kisi leri na den skoro fu na organisâsi, ma noiti mi ben denki taki mi ben o kisi a grani fu gi leri na wan fu den skoro disi.

Bakaten mi tron distrikt-opziener. Di a seti dati kon na wan kba, dan mi go du kringwroko baka. Sobun, na ini den 30 yari di psa, mi kisi furu toewijzing. Wan tu fu den, na taki mi ben e dini leki leriman èn leki kring-owruman. Den toewijzing disi tyari furu blesi kon gi mi. Ma a no ben makelek ala ten. Meki mi ferteri yu fu san ede.

Nofo tron mi sabi precies san mi musu du te mi de na ini wan muilek situwâsi. A sani disi yepi mi furu leisi. Ma son leisi te problema ben de na ini son gemeente, dan mi ben e du ala san mi man fu seti sani kon bun baka, sondro fu hori den firi fu trawan na prakseri. A psa wan tu leisi taki mi pir’ai gi son sma taki den musu sori moro lobi èn taki den no musu ferwakti tumsi furu fu trawan. Ma mi kon si taki na den momenti dati, na mi ben musu sori den srefi fasi dati.​—Rom. 7:21-23.

Den swakifasi fu mi meki taki son leisi mi ben e firi brokosaka trutru (Rom. 7:24). Wan leisi mi begi Yehovah fu taigi en taki a moro bun mi tapu nanga a zendelingwroko èn drai go baka na Fensikondre. A neti dati, mi go na wan gemeente konmakandra èn den brada nanga sisa drape gi mi so furu dek’ati. A sani dati sori mi taki mi no musu gwe libi a toewijzing fu mi èn taki mi musu tan wroko na den swakifasi fu mi. Te nanga a dei fu tide a e naki mi ati ete te mi e prakseri fa Yehovah piki a begi fu mi so krin. Boiti dati, mi de nanga tangi trutru taki a yepi mi fu basi den swakifasi fu mi.

Mi nanga Sirkka breiti srefsrefi taki Yehovah gi wi a grani fu gebroiki moro leki afu fu wi libi fu dini en leki furuten preikiman. Mi breiti tu taki Yehovah gi mi so wan lobi wefi di tan horbaka gi mi ala den yari di psa.

Dyonsro mi o tron 70 yari èn mi o tapu fu dini leki zendeling na ini a preikiwroko èn leki kring-owruman. Ma a sani disi no e meki mi firi sari. Fu san ede? Fu di mi e bribi tranga taki te wi e dini Yehovah nanga sakafasi èn te wi e prèise en nanga wan ati di furu nanga lobi nanga warderi, dan dati e gi en moro grani (Mika 6:8; Mark. 12:32-34). Wi no abi fu de wan prenspari sma fu man gi grani na Yehovah.

Te mi e prakseri ala den toewijzing di mi kisi, dan mi e si taki mi no kisi den fu di mi ben prenspari moro trawan. Mi no kisi den tu fu di mi man du kfalek sani. Kwetkweti. Na presi fu dati, Yehovah gi mi den toewijzing disi fu di a abi bun-ati. A gi mi den grani disi ala di mi abi swakifasi. Mi sabi taki mi ben man du den wroko disi soso fu di Yehovah yepi mi. Na so Gado gi mi krakti di mi ben swaki.​—2 Kor. 12:9.