1. Sortu tesi ben miti Yosef èn san a du?

 WAN bigi tesi ben miti Yosef, a manpikin fu Yakob. Wan uma ben taigi en: „Kon didon nanga mi.” Na uma disi ben de a wefi fu Potifar, a basi fu Yosef. Ma Yosef weigri fu du san na uma disi ben taigi en. Wan sma ben kan aksi ensrefi: ’Fu san ede Yosef no du san na uma ben wani?’ Potifar no ben de na oso. Boiti dati, Yosef ben de wan srafu fu en èn na uma disi ben kan pori en libi efu a no ben du san a wani. Ma toku Yosef tan weigri di na uma ben e dwengi en fu abi seks nanga en. Fu san ede? Yosef taigi en: „Fa mi kan du so wan bigi ogri èn sondu teige Gado?”​—Gen. 39:7-12.

2. Fa Yosef ben sabi taki a ben o sondu teige Gado efu a ben du sutadu?

² Fa Yosef ben sabi taki Yehovah ben o si sutadu leki wan „bigi ogri”? A Wet fu Moses di ben taki dati sma „no musu du sutadu”, ben skrifi sowan tu hondro yari baka dati (Eks. 20:14). Ma toku Yosef ben sabi Yehovah bun nofo fu frustan taki a no ben o feni sutadu bun. Fu eksempre, Yosef ben musu fu sabi taki Yehovah ben seti a trowlibi so taki wán man ben kan trow nanga wán uma. Èn a ben musu fu yere fa Yehovah ben kibri en afo Sara na tu okasi di wan kownu ben wani teki en leki en wefi. Yehovah ben kibri Rebeka, a wefi fu Isak, na a srefi fasi tu (Gen. 2:24; 12:14-20; 20:2-7; 26:6-11). Di Yosef ben e denki fu den sani disi, dan a kon frustan san Yehovah ben feni bun èn san a no ben feni bun. Èn fu di Yosef ben lobi a Gado fu en, meki a du ala san a man fu du san Yehovah ben wani taki a du.

3. San wi o luku na ini na artikel disi?

 ³ Yu lobi retidu? A no de fu taki dati yu lobi a moi fasi disi. Ma wi alamala abi fowtu èn efu wi no e luku bun, dan wi kan bigin si retidu na a fasi fa grontapu e si dati (Yes. 5:20; Rom. 12:2). Dati meki wi o luku san na a retidu èn fa wi kan kisi wini te wi kon lobi a fasi disi. Baka dati wi o taki fu dri sani di wi kan du fu kon abi moro lobi gi den wet fu Yehovah.

4. Sortu fowtu denki furu sma abi?

⁴ Den kerki fesiman na ini a ten fu Yesus ben e denki taki den ben e du san reti. Ma Yesus ben krutu den fu di den ben lobi krutu trawan èn den ben e kon nanga den eigi wet fu sori san bun èn san no bun (Preik. 7:16; Luk. 16:15). Furu sma na ini a ten fu wi e du a srefi. Den feni taki den no e du nowan ogri fu di den e hori densrefi na den wet di den srefi meki. Nofo tron den sma disi e denki tumusi furu fu densrefi, den e krutu trawan, noso den e denki taki den bun moro trawan. Yehovah no lobi den sortu fasi disi èn den sma disi no e du san reti kwetikweti.

5. Soleki fa Bijbel e sori, dan san na retidu? Gi wan tu eksempre.

⁵ Retidu na wan moi fasi. Retidu wani taki dati wan sma e du san Yehovah Gado feni bun. Na ini Bijbel, den wortu di vertaal nanga „retidu” wani taki dati wan sma e hori ensrefi na den moro hei wet èn dati na den wet fu Yehovah. Fu eksempre, a wet fu Gado e taki dati bisnisman musu gebroiki wan „wegiston di e wegi sani soifri” (Deut. 25:15). A Hebrew wortu di vertaal nanga „soifri” wani taki sosrefi „du san reti”. Sobun, wan Kresten di wani du san reti soleki fa Gado wani, ala ten o de eerlijk te a e du bisnis. Boiti dati, wan sma di lobi retidu no lobi te sma no e libi bun nanga trawan. Èn efu wan sma di lobi retidu trutru wani „tan prisiri [Yehovah] dorodoro”, dan a o luku fa Yehovah e si den bosroiti di a e teki.​—Kol. 1:10.

6. Fu san ede wi kan frutrow den wet fu Yehovah di e sori san bun èn san no bun? (Yesaya 55:8, 9)

⁶ Bijbel e taki dati retidu e komoto fu Yehovah. Dati meki Bijbel e kari en „a tanpe fu retidu” (Yer. 50:7). Fu di Yehovah na wi Mekiman, meki en wawan abi a reti fu taki san bun èn san no bun. Yehovah no abi sondu, sobun a sabi moro bun leki wi san bun èn san no bun. Wi no man sabi dati fu di wi na sondu sma (Odo 14:12; leisi Yesaya 55:8, 9). Ma fu di Gado meki wi leki fa en srefi de, meki wi man hori wisrefi na den wet fu en di e sori san bun èn san no bun (Gen. 1:27). Wi lobi fu du dati. A lobi di wi abi gi wi hemel Tata e meki taki wi wani du ala san wi man fu teki na eksempre fu en.​—Ef. 5:1.

7. Fu san ede wi abi bun wet nanga regel fanowdu? Gi wan tu eksempre.

⁷ Wi e kisi wini te wi e hori wisrefi na den wet fu Yehovah di e sori wi san bun èn san no bun. Yu man si fu san ede dati de so? Prakseri san ben o pasa efu ibri foto na ini a srefi kondre ben o abi tra regel gi a verkeer. Na soso bruya ben o pasa. Èn efu datra noso ati-oso wrokoman ben abi den eigi fasi fa den ben o yepi sikisma, dan son sma ben kan dede. A no de fu taki dati te sma e hori densrefi na bun wet nanga regel, dan dati e kibri sma libi. Na so a de tu taki den wet fu Yehovah di e sori sma san bun èn san no bun, e kibri wi.

8. Sortu blesi e wakti den wan di lobi fu du san reti?

 ⁸ Yehovah e blesi den wan di e pruberi fu hori densrefi na den wet fu en. A e pramisi: „Na den reti-ati sma o kisi grontapu èn fu têgo den o tan libi drape” (Ps. 37:29). Yu man si kaba fa ala libisma o libi na ini wánfasi, fa den o abi freide, èn fa den o de koloku te den e hori densrefi na den wet fu Yehovah? Na a libi dati Yehovah wani taki yu abi. A no de fu taki dati ibriwan fu wi abi bun reide fu lobi retidu. Fa wi kan kon abi moro lobi gi a fasi disi? Meki wi luku dri sani di wi kan du.

9. San o yepi wi fu lobi retidu?

⁹ A fosi sani: Lobi a sma di e poti den wet. Fu man lobi retidu, dan wi musu kon lobi a sma di e poti den wet di e sori san bun èn san no bun. O moro wi lobi Yehovah, o moro wi o wani hori wisrefi na den wet fu en di reti ala ten. Fu eksempre, efu Adam nanga Eva ben lobi Yehovah, dan noiti den ben o trangayesi a wet fu en.​—Gen. 3:1-6, 16-19.

10. Fa Abraham kon frustan Yehovah moro bun?

¹⁰ A no de fu taki dati wi no wani meki a srefi fowtu di Adam nanga Eva ben meki. San o yepi wi, na te wi e tan du muiti fu leri sabi Yehovah moro bun, te wi warderi den fasi fu en, èn te wi e pruberi fu frustan fa a e denki. Te wi e du dati, dan seiker wi o kon abi moro lobi gi Yehovah. Luku na eksempre fu Abraham. A ben lobi Yehovah trutru. Srefi di a ben feni en muilek fu frustan den bosroiti di Yehovah teki, toku a no opo ensrefi teige Yehovah. Na presi fu dati, a pruberi fu kon sabi Yehovah moro bun. Fu eksempre, di a kon sabi taki Yehovah ben o pori Sodom nanga Gomora, dan a ben frede taki „a sma di e krutu heri grontapu” ben o kiri ala reti-ati sma makandra nanga den ogri sma. Gi Abraham a sani dati no ben kan èn dati meki nanga sakafasi a poti wan tu aksi gi Yehovah. Yehovah ben abi pasensi nanga Abraham èn a piki den aksi fu en. Te fu kaba Abraham kon si taki Yehovah e ondrosuku na ati fu ibri sma èn taki noiti a o kiri den reti-ati sma makandra nanga den ogri sma.​—Gen. 18:20-32.

11. Fa Abraham sori taki a ben lobi Yehovah èn taki a ben e frutrow na en tapu?

¹¹ A takimakandra disi di Abraham ben abi nanga Yehovah ben abi furu krakti na en tapu. A no de fu taki dati a kon abi moro lobi nanga lespeki gi en Tata. Yari baka dati, Abraham kon de na ini wan muilek situwâsi pe a ben musu sori taki a ben e frutrow tapu Yehovah. Yehovah aksi en fu gi en lobi manpikin Isak leki ofrandi. Ma fu di Abraham ben kon sabi en Gado moro bun, meki now a no ben abi fu poti aksi gi en. Sobun, Abraham du san Yehovah ben aksi fu en. Toku wi kan frustan fa a ben muilek gi en di a ben e seti sani fu du san Yehovah ben aksi fu en. Abraham ben musu fu denki dipi fu den sani di a ben leri fu Yehovah. A ben sabi taki noiti Yehovah ben o du wan sani di no reti èn di ben e sori taki a no abi lobi. Soleki fa na apostel Paulus e taki, dan Abraham ben de seiker taki Yehovah ben o man gi en lobi manpikin Isak wan opobaka (Hebr. 11:17-19). Te yu luku en bun, dan Yehovah ben pramisi taki den pikin fu Isak ben o tron wan bigi pipel èn na a ten dati, Isak no ben abi pikin  ete. Abraham ben lobi Yehovah èn dati meki a ben abi a frutrow taki en Tata ben o du san reti. Fu di a ben e bribi Yehovah, meki a du san Yehovah aksi fu en aladi a no ben makelek.​—Gen. 22:1-12.

12. Fa wi kan teki na eksempre fu Abraham? (Psalm 73:28)

¹² Fa wi kan teki na eksempre fu Abraham? Neleki Abraham wi musu tan du muiti fu kon sabi Yehovah moro bun. Te wi e du dati, dan wi o kon moro krosibei na en èn wi o kon abi moro lobi gi en. (Leisi Psalm 73:28.) A konsensi fu wi o wroko moro bun èn wi o man si sani soleki fa Yehovah e si sani (Hebr. 5:14). Disi o meki taki te wan sma e dwengi wi fu du wan sani di no bun, dan wi o weigri fu du dati. Noiti wi o prakseri fu du wan sani di o hati wi hemel Tata èn di o pori a matifasi di wi abi nanga en. Ma na sortu tra fasi wi kan sori taki wi lobi retidu?

13. Fa wi kan meki muiti fu du san reti? (Odo 15:9)

¹³ A di fu tu sani: Du muiti ibri dei fu kon lobi retidu. Neleki fa wi e tan oefen wi skin so taki a e kon tranga, na so wi kan tan du muiti fu kon lobi den wet fu Yehovah di e sori san bun èn san no bun. A no muilek fu du a sani disi ibri dei. Yehovah noiti no e aksi moro fu wi leki san wi man du (Ps. 103:14). A e gi wi a dyaranti taki „a lobi a sma di e meki muiti fu du san reti”. (Leisi Odo 15:9.) Efu wi e suku fu doro wan spesrutu marki na ini Yehovah en diniwroko, dan wi o tan du muiti fu doro a marki dati. Na so a de tu te wi e meki muiti fu du san reti. Yehovah o abi pasensi nanga wi èn a o yepi wi fu go na fesi te fu kaba.​—Ps. 84:5, 7.

14. San na a ’retidu di sma e weri leki wan sani di e kibri den borsu’ èn fu san ede wi abi en fanowdu?

¹⁴ Fu di Yehovah lobi wi, meki a e memre wi taki a no de wan hebi fu sori retidu (1 Yoh. 5:3). Na presi fu dati retidu e kibri wi èn wi abi dati tranga fanowdu ibri dei. Prakseri den difrenti fetisani di Yehovah gi wi èn di Paulus ben taki fu den (Ef. 6:14-18). Sortuwan fu den fetisani dati ben kibri na ati fu sma? A ben de  retidu di ben de leki wan sani di ben e kibri en borsu. Dati na den wet fu Yehovah di e sori san bun èn san no bun. Neleki fa a sani di a srudati ben e weri na en borsu ben e kibri en ati, na so den wet fu Yehovah di reti ala ten kan kibri a sma di wi de na inisei. Dati meki a prenspari fu weri retidu leki wan sani di e kibri yu borsu.​—Odo 4:23.

15. Fa yu kan weri retidu leki wan sani di e kibri yu borsu?

¹⁵ Fa yu kan weri retidu leki wan sani di e kibri yu borsu? Na te yu e prakseri san Yehovah wani taki yu du te yu musu teki bosroiti ibri dei. Te yu musu bosroiti fu san yu o taki, sortu poku yu o arki, sortu felem yu o luku, noso sortu buku yu o leisi, dan aksi yusrefi: ’Sortu krakti den sani disi o abi tapu mi ati? Yehovah ben o feni disi bun? Noso den sani disi kan meki taki mi du hurudu, taki mi du ogri, taki mi kisi bigi-ai, noso taki mi denki misrefi nomo aladi mi sabi taki Yehovah no feni den sani disi bun?’ (Fil. 4:8) Efu den bosroiti di yu e teki na sani di Yehovah feni bun, dan yu o man kibri yu ati gi den takru sani disi.

16-17. Fa Yesaya 48:18 e gi wi a dyaranti taki wi kan du san reti fu ala ten?

¹⁶ Oiti yu e broko yu ede efu yu o man tan du san reti ibri dei èn ibri yari? Luku wan agersitori di Yehovah e gebroiki na Yesaya 48:18. (Leisi en.) Yehovah e pramisi taki a retidu fu wi kan „de leki den skwala fu se”. Prakseri taki yu e tanapu na a syoro fu wan bigi se èn taki yu e luku fa den skwala e wasi kon na syoro doronomo. Yu no ben o firi bun te yu e si dati? Yu ben o broko yu ede taki wan dei den skwala dati no ben o wasi kon na syoro moro? Nôno! Yu sabi taki dusundusun yari kaba den skwala e wasi kon na syoro èn taki disi o tan go doro.

¹⁷ A retidu fu yu kan de leki den skwala fu se. Fa so? Te yu musu teki wan bosroiti, dan luku fosi san Yehovah ben o wani taki yu du èn du dati. Awinsi fa a muilek gi yu fu teki a bosroiti, yu lobi-ati Tata ala ten o de drape fu tranga yu èn fu yepi yu fu tan du san reti ibri dei.​—Yes. 40:29-31.

18. Fu san ede wi musu luku bun fu no krutu trawan?

¹⁸ A di fu dri sani: Libi en gi Yehovah fu krutu sma. Aladi wi e du tranga muiti fu du san reti, toku wi musu luku bun fu no krutu trawan èn fu denki taki wi bun moro den. Wi no abi a reti fu bosroiti efu sma e du san Yehovah e aksi fu den. Na presi fu dati wi musu hori na prakseri taki Yehovah na „a sma di e krutu heri grontapu” (Gen. 18:25). Yehovah no gi wi a reti fu krutu sma. Fu taki en leti, Yesus e gi wi a komando disi: „No krutu sma moro, so taki Gado no krutu unu.”​—Mat. 7:1. *

19. Fa Yosef sori taki a ben abi a frutrow taki Yehovah ben o krutu sani na wan reti fasi?

¹⁹ Kow luku na eksempre fu a reti-ati man Yosef baka. A ben e luku bun fu no krutu trawan, srefi den wan di no ben e libi bun nanga en. En eigi brada du ogri nanga en, den seri en leki wan srafu, èn den lei gi den papa taki Yosef ben dede. Yari baka dati, Yosef ben de baka nanga en famiri. Now di a ben de wan makti tiriman,  a ben kan krutu en brada sondro fu abi sari-ati nanga den èn a ben kan pai den ogri fu ogri. Den brada fu Yosef ben frede taki na dati Yosef ben o du, aladi den ben sori berow nanga den heri ati. Ma Yosef taigi den: „No frede. Mi na Gado?” (Gen. 37:18-20, 27, 28, 31-35; 50:15-21) Fu di Yosef ben abi sakafasi, meki a libi en gi Yehovah fu krutu den.

20-21. Fa wi kan sori taki wi no e denki taki wi bun moro trawan?

²⁰ Neleki Yosef, wi e libi en gi Yehovah fu krutu sma. Fu eksempre, wi no e du leki wi sabi soifri fu san ede wi brada nanga sisa e du den sani di den e du. Wi no man si san de na ini sma ati. Na Yehovah wawan „e ondrosuku na ati fu sma” (Odo 16:2). A lobi ala sortu sma fu ala kondre nanga kulturu. Èn Yehovah e gi wi deki-ati fu „opo [wi] ati moro” gi trawan (2 Kor. 6:13). Wi e du muiti fu lobi ala wi brada nanga sisa èn wi no wani krutu den.

²¹ Disi wani taki tu taki wi no e krutu den wan di no de fu a gemeente (1 Tim. 2:3, 4). Efu wan famiriman fu yu no de wan Kotoigi, dan oiti yu ben o taki: „A man dati noiti no o kon ini waarheid”? Nôno. Dati ben o sori taki yu e denki tumusi furu fu yusrefi èn taki yu e denki taki yu bun moro en. Te nanga now ete Yehovah e gi „ala libisma na ala sei” na okasi fu sori berow (Tori 17:30). Dati meki wi musu tan hori na prakseri taki Yehovah no feni sma bun di e denki taki den bun moro trawan.

22. Fu san ede yu o meki ala muiti fu du san reti?

²² Te wi lobi den wet fu Yehovah di e sori san bun èn san no bun, dan wi o de koloku èn a o yepi wi fu de wan bun eksempre gi trawan. Disi o meki taki sma o kon abi moro lobi gi wi èn gi Yehovah. Meki wi sorgu taki wi e „angri fu retidu” ala ten (Mat. 5:6). Wi kan de seiker taki Yehovah e si a muiti di wi e meki fu du san reti èn taki ala ten a breiti te wi e go na fesi. Aladi a grontapu disi e kon moro ogri dei fu dei, toku wi no abi fu bruya. Ala ten wi musu hori na prakseri taki „Yehovah lobi den reti-ati sma”.​—Ps. 146:8.