Aksi fu leisiman
Fa na artikel di nen „Meki yu nen de santa” na ini A Waktitoren fu yuni 2020 sori san wi e bribi te a abi fu du nanga Yehovah en nen èn nanga a reti di a abi fu tiri wi?
Na artikel dati sori taki gi libisma nanga engel wán prenspari aksi nomo de di musu kisi wan piki èn dati na a fasi fa Yehovah en bigi nen o meki kon santa. A tori di abi fu du nanga a reti di Yehovah abi fu tiri wi fu di en na a moro bun Tiriman, na wan pisi nomo fu a prenspari aksi disi. Wan tra sani di abi fu du nanga a prenspari aksi disi na efu libisma o man tan gi yesi na Gado.
Fu san ede a de fanowdu fu luku a prenspari aksi disi di abi fu nanga Yehovah en nen èn a fasi fa a nen disi o meki kon santa? Meki wi luku dri reide.
Sensi a ten di sma opo densrefi teige Gado na ini a dyari fu Eden, Satan tan gi Gado porinen
A fosi reide: Satan pori Yehovah en nen na ini a dyari fu Eden. Satan poti wan doti aksi gi Eva fu di a ben wani meki Eva denki taki Yehovah na wan gridi Gado di aksi den futuboi fu en sani di den no man du. Baka dati Satan taki dati san Yehovah taki, no tru. Yu taki dati Gado na wan leiman. Na so a pori Yehovah nen èn a kon tron „Didibri”, san wani taki „ogri-ati leiman” (Yoh. 8:44). Fu di Eva bribi den lei fu Satan, meki a trangayesi Gado èn na a fasi dati a sori taki a no ben wani taki Yehovah de en Tiriman (Gen. 3:1-6). Te na a dei fu tide, Satan e gi Gado porinen fu di a e fruteri omeni lei fu a fasi fa Yehovah de. Den sma di e bribi den lei disi o trangayesi Yehovah moro esi. Dati meki Gado pipel e si en leki wan bigi sani te trawan a pori a santa nen fu Yehovah. Na a sani disi meki taki someni sari nanga ogri de grontapu now.
A di fu tu reide: Yehovah wani soso bun gi ala sani di a meki. Fu dati ede Yehovah o du ala sani fu krin en nen. A sani disi prenspari srefisrefi gi en. Dati meki a taki: „Mi o meki a bigi nen fu mi kon santa” (Esek. 36:23). Yesus srefi sori krin san musu de a moro prenspari sani gi ala futuboi fu Yehovah te den e begi. A leri den fu begi: „Meki yu nen de santa” (Mat. 6:9). Ibri leisi baka Bijbel e sori o prenspari a de fu gi Yehovah nen glori. Luku wan tu eksempre: „Fruteri sma fu a glori di a nen fu Yehovah musu kisi” (1 Kron. 16:29; Ps. 96:8). „Un singi fu prèise a bigi nen fu en” (Ps. 66:2). „Mi o tan gi yu nen glori fu ala ten” (Ps. 86:12). Wan leisi di Yesus ben de ini a tempel na Yerusalem, a taki: „Mi Tata, gi yu nen glori.” Dan Yehovah srefi taki komoto fu hemel, di a piki Yesus: „Mi ben gi mi nen glori kaba èn mi o du en baka.”—Yoh. 12:28. a
A di fu dri reide: Ala ten a o de so taki den sani di Yehovah e du, abi fu du nanga a nen fu en. Luku wan eksempre: San o pasa baka a Dusun Yari Tiri fu Krestes te wi o kisi wan lasti tesi? San libisma nanga engel o denki fu Yehovah en santa nen na a ten dati? Efu wi wani a piki tapu na aksi dati, dan wi musu luku tu prenspari sani di abi fu du nanga a tori disi: Efu libisma o man tan gi yesi na Gado èn efu Gado abi a reti fu de wi Tiriman. A de so taki libisma di sori kaba taki den man gi yesi na Gado, o abi fu buweisi ibri tron baka taki den wani tai hori na en? Nôno. Na a ten dati den no o abi sondu moro èn den pasa a bigi tesi kaba. Den o kisi têgo libi. Yu denki taki libisma nanga engel o tan aksi densrefi nomo efu Gado abi a reti fu tiri wi, noso taki a sani disi o tyari pratifasi kon srefi na den mindri? Nôno. Na a ten dati ala sma ini hemel nanga grontapu o sabi taki Yehovah abi a reti fu tiri wi fu ala ten. Ma a fa de nanga Yehovah en nen?
Na a ten dati, a o de krin taki Yehovah en nen de santa èn nowan sma o man du wan sani moro fu pori a nen dati. Ma nen fu Yehovah o tan de a moro prenspari sani gi ala futuboi fu Yehovah na hemel èn na grontapu. Fa so? Fu di den o si taki Yehovah o tan du bigi sani. Denki a tori: Na sakafasi o meki taki Yesus o gi ala makti abra baka na Yehovah. Dan Gado o „de ala sani gi ala sma” (1 Kor. 15:28). Baka dati libisma o prisiri fu di den o „kon fri na wan tumusi moi fasi leki pikin fu Gado” (Rom. 8:21). Dan Yehovah o du san a ben abi na prakseri someni langa kaba: A o meki ala den pikin fu en na hemel èn na grontapu kon de wán bigi famiri.—Ef. 1:10.
Fa Yehovah en osofamiri na hemel èn na grontapu o firi baka te ala den sani disi pasa? Wi kan de seiker taki wi o angri fu tan prèise a Yehovah en bigi nen. A psalm skrifiman David ben skrifi: „Blesi fu Yehovah Gado, a Gado fu Israel . . . Meki sma prèise a bigi nen fu en fu ala ten” (Ps. 72:18, 19). Fu ala ten wi o tan feni en fanowdu fu prèise en nen.
Yehovah en nen e sori krin sortu sma a de. Iya, a nen fu Yehovah e memre wi taki en na wan Gado fu lobi (1 Yoh. 4:8). Ala ten wi o memre taki na fu di Yehovah abi lobi, meki taki a meki wi. Na fu di a abi lobi meki a gi wi a lusu paiman èn noiti wi o frigiti taki na en abi a reti fu tiri wi èn taki a e tiri wi na wan lobi-atifasi. Ma fu ala ten wi o si fa Yehovah o sori engel, libisma nanga ala tra sani di a meki, taki a lobi den. Fu ala ten wi o kon moro krosibei na wi Papa èn wi o singi moi singi di o prèise en bigi nen.—Ps. 73:28.
a Bijbel e sori tu taki Yehovah e du sani „fu di a e prakseri a nen fu en”. Fu eksempre, a e sori en pipel fa den musu tyari densrefi, a e yepi den, a e frulusu den, a e gi den pardon èn a e hori den na libi. Ala den sani disi a e du fu gi glori na en bigi nen Yehovah.—Ps. 23:3; 31:3; 79:9; 106:8; 143:11.
