1. San Yehovah wani gi ala sma?

 DI YEHOVAH meki libisma, dan a gi den a grani fu teki den eigi besroiti. Wi e teki besroiti ibri dei. A moro prenspari besroiti di wan libisma kan teki, na fu gi ensrefi abra na Yehovah èn fu anbegi en makandra nanga wi brada nanga sisa. Yehovah wani taki ala sma du dati. Fu san ede? Fu di a lobi libisma èn a abi a bun fu den na prakseri. A wani taki den tron mati fu en èn taki den libi fu têgo.​—Deut. 30:19, 20; Gal. 6:7, 8.

 2. San Yehovah wani gi sma di no sori berow? (1 Yohanes 2:1)

² Ma Yehovah no e dwengi nowan sma fu dini en. A e meki ibri sma besroiti gi ensrefi san a o du. Ma fa a de te wan dopu Kresten du wan seryusu sondu? Efu a no e sori berow, dan den musu puru en fu a gemeente (1 Kor. 5:13). Ma awinsi den brada puru a sma fu a gemeente, tòg Yehovah wani taki a sma dati e sori berow èn taki a e tron en mati baka. Fu taki en leti, wan prenspari reide fu san ede Yehovah sorgu gi a lusu-paiman, na fu gi sma pardon te den sori berow. (Leisi 1 Yohanes 2:1.) Yehovah na wan lob’ati Gado di e gi sma di du seryusu sondu a dek’ati fu sori berow.​—Sak. 1:3; Rom. 2:4; Yak. 4:8.

 3. San wi o luku na ini na artikel disi?

³ Yehovah wani taki wi kon abi a srefi denki leki en te a abi fu du nanga sondu èn nanga sma di e du sondu. Na artikel disi o sori wi fa wi kan kon abi a denki dati. Na ini na artikel disi, wi o luku (1) san Paulus ben taigi a gemeente  na ini Korente fu du di wan brada du wan seryusu sondu, (2) san Paulus ben taigi a gemeente fu du baka di a man sori berow, èn (3) fa Yehovah e si sma di du wan seryusu sondu.

SAN A GEMEENTE DU DI WAN BRADA DU WAN SERYUSU SONDU

 4. San ben psa na ini a gemeente Korente fu a fosi yarihondro? (1 Korentesma 5:1, 2)

⁴ Leisi 1 Korentesma 5:1, 2. Di Paulus ben e teki a di fu dri zendelingwaka fu en, dan a yere taki wan ogri sani ben e psa na ini a nyun gemeente na ini Korente. Wan brada na ini a gemeente dati ben e du hurudu nanga a wefi fu en p’pa. A sani disi ben ogri so te taki ’srefi den trakondre sma no ben e du dati’! Boiti taki den brada nanga sisa ben e tapu den ai gi a sondu dati, a kan tu taki den no ben si en leki wan problema taki sowan sma ben e tan na ini a gemeente. Kande wan tu sma na ini a gemeente ben e denki taki den ben e sori sar’ati, neleki fa Yehovah e du dati. Ma Yehovah no feni en bun taki a pipel fu en e du ogri. Fu di a brada ben du na ogri disi, meki a kan taki son sma di no ben e anbegi Yehovah no ben man bribi taki a sani disi ben e psa èn a musu fu de so taki den ben e taki ogri fu a pipel fu Yehovah. A kan tu taki tra brada nanga sisa di ben e bemui nanga a brada disi ben e bigin denki taki a sani di a ben du no ben de wan ogri. Sobun, san Paulus ben taigi a gemeente fu du?

 5. San Paulus taigi a gemeente fu du, èn san a ben wani taki nanga dati? (1 Korentesma 5:13) (Luku a prenki.)

⁵ Leisi 1 Korentesma 5:13. Nanga yepi fu santa yeye, Paulus skrifi wan brifi gi a gemeente fu sori den taki den musu puru a brada fu a gemeente, fu di a no ben sori berow. Fa den sma na ini a gemeente ben musu libi nanga a sma dati? Paulus taigi den taki den „no musu bumui nanga” en. San dati ben wani taki? Paulus tyari kon na krin taki den no ben musu „nyan srefi nanga so wan sma” (1 Kor. 5:11). Te yu e sdon nyan nanga wan sma, dan nofo tron unu e taki switi tori nanga makandra. Dati meki wi kan ferstan taki Paulus ben wani taigi a gemeente fu no abi prisiriten nanga a man dati. Na so a takru eksempre fu a man dati no ben o pori a gemeente (1 Kor. 5:5-7). Boiti dati, disi ben o yepi a man fu kon ferstan taki a sani di a ben du ben hati Yehovah trutru èn kande a ben o firi syen èn sori berow.

 6. San a gemeente du di den kisi a brifi fu Paulus, èn san a man du leki bakapisi fu dati?

⁶ Baka di Paulus seni a brifi fu en gi den  Kresten na ini Korente, dan a bigin aksi ensrefi efu a gemeente ben o du san a ben taigi den. Te fu kba, Titus tyari bun nyunsu gi Paulus. A gemeente ben du san Paulus ben taigi den èn den puru na ogriman na den mindri (2 Kor. 7:6, 7). Èn na ini den mun baka di Paulus ben seni a brifi, na ogriman sori berow. A tapu fu du hurudu, a kenki a denki fu en, èn bigin hori ensrefi na den bun wet fu Yehovah (2 Kor. 7:8-11). San Paulus taigi a gemeente fu du now?

FA A GEMEENTE BEN MUSU LIBI NANGA A MAN DI BEN SORI BEROW

 7. San a man du baka di den puru en fu a gemeente? (2 Korentesma 2:5-8)

⁷ Leisi 2 Korentesma 2:5-8. Paulus ben taki dati ’a piri-ai di furu fu den ben gi a sma dati, ben nofo gi en’. Disi wani  taki dati baka di den puru a man fu a gemeente, a kon si taki a ben musu sori berow. Èn fu di a ben sori berow, meki a no ben de fanowdu fu gi en pir’ai moro langa.​—Hebr. 12:11.

 8. San Paulus taigi a gemeente fu du now?

⁸ Fu di a man ben sori berow, meki Paulus taigi den owruman fu teki a man baka na ini a gemeente. A taigi den tu fu ’gi en pardon nanga den heri ati èn fu trowstu en’. Den ben musu ’sori en tu taki den lobi en’. Paulus taigi a gemeente fu sori a man taki den ben gi en pardon trutru èn taki den lobi en. Den sani di den ben e taki èn du ben o sori dati. Na so a brada ben o firi taki den ben breiti taki a drai kon baka.

 9. Fu san ede a kan taki son sma ben feni en muilek fu gi a brada pardon baka di a sori berow?

⁹ A kan taki son sma na ini a gemeente ben feni en muilek fu sori swit’fasi gi a man di ben drai kon baka na a gemeente. Fu san ede wi e taki dati? A kan taki son sma ben e mandi ete fu di a man ben tyari problema kon na ini a gemeente. Èn a kan tu taki trawan ben e atibron ete fu di a sani di a man ben du ben hati den. Den sma na ini a gemeente ben du tranga muiti fu gi yesi na den komando fu Yehovah. Sobun, sowan fu den ben kan feni taki a no eerlijk taki wan sma di ben du sowan bigi ogri, ben mag drai kon baka na a gemeente. (Luku Lukas 15:28-30.) Ma fu san ede a ben prenspari taki a gemeente sori a brada taki den lobi en trutru.

10-11. San ben kan psa efu den owruman ben e weigri fu gi a brada pardon baka di a sori berow?

¹⁰ Prakseri san ben kan psa efu den owruman ben weigri fu teki a man baka na ini a gemeente baka di a sori berow. Noso fa a man ben o firi efu te a ben drai kon baka, den brada nanga sisa ben o weigri fu sori lobi gi en? A kan taki a ben o „sari so te, taki a lasi-ati”. Kande a ben o firi leki a no ben o man dini Yehovah noiti moro. Kande a ben o denki srefi taki Yehovah noiti no ben o man gi en pardon, èn taki na fu soso a ben o kenki den fasi fu en.

¹¹ Ma san moro ben kan psa efu den brada nanga sisa ben weigri fu gi a man pardon baka di a sori berow? A sani disi ben kan pori a matifasi di den ben abi nanga Yehovah. Fu san ede? Fu di den ben o sori taki den no de leki Yehovah di de klarklari fu gi sma pardon te den sori berow. Na presi fu dati, den ben o de leki Satan di abi ogr’ati èn di no e sori sar’ati gi sma. Fu taki en leti, den ben o meki Didibri gebroiki den fu meki a man tapu fu dini Yehovah.​—2 Kor. 2:10, 11; Ef. 4:27.

12. Fa a gemeente ben kan sori taki den de leki Yehovah?

¹² Fa a gemeente na ini Korente ben kan sori taki den no de leki Satan, ma leki Yehovah? Neleki Yehovah, den ben musu gi sma pardon te den ben sori berow. David ben taki fu Yehovah: „Yu na wan bun Gado èn yu de klarklari fu gi sma pardon” (Ps. 86:5). Mika ben skrifi: „Sortu gado de leki yu? Yu e gi yu pipel . pardon fu den sondu èn yu no e tan prakseri a fowtu di den meki” (Mika 7:18). Èn Yesaya ben taki: „Meki den ogri sma libi den pasi fu den èn meki den sma di e du ogri, puru den takru prakseri fu den na den ede. Meki den drai go baka na Yehovah di o sori den sari-ati. Meki den drai go baka na wi Gado, bika a o gi den pardon nanga en heri ati.”​—Yes. 55:7.

13. Fu san ede a ben fiti taki den teki a man baka na ini a gemeente baka di a sori berow? (Luku a faki „ O ten den ben teki a man na ini Korente baka na ini a gemeente?”)

 ¹³ Neleki Yehovah, a gemeente na ini Korente ben musu sori a man taki den ben lobi en èn taki den ben breiti taki a drai kon baka. Paulus ben taki dati efu den ben o gi a man pardon, dan den ben o sori taki den ben „e gi yesi na ini ala sani” (2 Kor. 2:9). A tru taki wan tu mun nomo ben psa sensi den ben puru a man fu a gemeente, ma a pir’ai di a ben kisi ben meki taki a sori berow. Dati meki den owruman no ben abi fu wakti moro langa fosi den teki en baka na ini a gemeente.

FA WI KAN DU SAN RETI ÈN SORI SAR’ATI NELEKI YEHOVAH

14-15. San wi leri fu a sani di psa na ini Korente? (2 Petrus 3:9) (Luku a prenki.)

¹⁴ Wi kan leisi na ini Bijbel san a gemeente na ini Korente du di a sani disi psa drape. A tori disi skrifi na ini Bijbel fu „leri wi wan sani” (Rom. 15:4). A e leri wi taki Yehovah no feni en bun taki sma e tan na ini a gemeente aladi den no sori berow gi den seryusu sondu di den du. Son sma ben kan denki taki fu di Yehovah abi sar’ati, meki a o gi pasi taki wan sma di no abi berow e tan na ini a gemeente. Ma Yehovah no e sori sar’ati na a fasi dati. Aladi Yehovah abi sar’ati, tòg  dati no wani taki dati a feni ala sani bun. Te a abi fu du nanga san bun èn san ogri, dan Yehovah no kenki (Yudas 4). Efu Yehovah ben o gi pasi taki sma tan na ini a gemeente aladi den no sori berow gi den sondu fu den, dan dati ben kan pori a heri gemeente.​—Odo 13:20; 1 Kor. 15:33.

¹⁵ Ma tòg Yehovah no wani taki nowan sma kisi pori. A wani kibri a libi fu sma te dati kan. A e sori sar’ati gi sma di kenki den fasi fu den èn di wani tron en mati baka (Esek. 33:11; leisi 2 Petrus 3:9). Dati meki di a man na ini Korente sori berow èn a tapu nanga a sondu libi fu en, dan Yehovah gebroiki Paulus fu ferteri a gemeente taki den musu gi a man pardon èn taki den musu teki en baka na ini a gemeente.

16. Te yu e luku san psa na ini a gemeente na ini Korente, dan fa dati e meki yu firi?

¹⁶ Na eksempre fu a gemeente na ini Korente e sori wi taki Yehovah na wan lob’ati Gado, taki a lobi retidu, èn taki a lobi te sma e koti krutu na wan reti fasi (Ps. 33:5). Fu di wi kon sabi disi, meki wi wani prèise wi Gado moro. Wi de nanga tangi trutru taki a abi sar’ati, bika wi alamala na sondu sma èn a prenspari taki a gi wi pardon. Wi de nanga tangi tu taki Yehovah sorgu gi a lusu-paiman so taki a kan gi wi pardon fu den sondu fu wi. A de wan trowstu gi wi fu sabi taki Yehovah lobi a pipel fu en trutru èn taki a wani soso bun gi den.

17. San wi o luku na ini den tra artikel?

¹⁷ Efu wan brada noso wan sisa du wan seryusu sondu na ini a ten disi, dan fa den gemeente owruman kan sori lobi gi en neleki fa Yehovah ben o du dati, èn fa den kan yepi en fu sori berow? San a gemeente musu du te den owruman e besroiti fu puru wan sma fu a gemeente noso te den e besroiti fu teki wan sma baka na ini a gemeente? Wi o piki den aksi disi na ini den artikel di e kon.