1. Fu san ede dopu na wan prenspari sani? (Luku a prenki na a bigin fu na artikel.)

IBRI yari dusundusun sma di e studeri Bijbel e teki dopu. Furu fu den na yongusma. Sonwan fu den yongu srefisrefi. Kande den kweki na ini a tru anbegi. Yu na wan fu den? Efu dati de so, dan yu du wan heri bun sani. Wan Kresten musu teki dopu efu a wani kisi frulusu èn efu a wani libi fu têgo.​—Mat. 28:19, 20; 1 Petr. 3:21.

2. Fu san ede yu no abi fu frede fu gi yusrefi abra na Yehovah?

² Baka di yu teki dopu, dan Yehovah bigin blesi yu na furu difrenti fasi. Ma yu kisi nyun frantwortu tu. Fa so? Na a dei di yu teki dopu, a brada di hori a dopu-lezing ben aksi: „Yu abi berow fu yu sondu èn yu gi yusrefi abra na Yehovah fu du a wani fu en, fu di yu e bribi na ini na ofrandi fu Yesus Krestes?” Yu piki ’Iya’. Yu pramisi taki yu ben o lobi Yehovah èn taki yu ben o poti na anbegi fu en na a fosi presi na ini yu  libi. A musu hati yu taki yu pramisi Gado den sani dati? Kwetikweti! Noiti a de wan don sani taki yu e meki Yehovah tiri yu. Den sma di no sabi Yehovah e meki Satan tiri den. Didibri no e broko en ede nanga den èn a no e broko en ede nanga yu tu. Fu taki en leti, a o breiti efu yu e drai baka gi Yehovah neleki en, fu di dati o meki taki yu no kisi têgo libi.

3. Fa Yehovah blesi yu fu di yu gi yusrefi abra na en?

³ Na presi taki yu e horibaka gi Satan, a bun fu prakseri den blesi di yu e kisi fu di yu gi yusrefi abra na Yehovah èn teki dopu. Now di yu gi yu libi na Yehovah, dan yu kan taki nanga overtoigi: „Yehovah de na mi sei. Mi no sa frede. San libisma kan du mi?” (Ps. 118:6) Wan moro bigi grani no de leki fu horibaka gi Gado aladi yu sabi taki a feni yu bun.

4, 5. (a) Fu san ede wan sma di gi ensrefi abra na Yehovah musu tyari en eigi frantwortu? (b) Sortu tesi e miti ibri Kresten, awansi den yongu noso owru?

⁴ Te yu dopu, dan yu no kan si a matifasi di yu abi nanga Yehovah leki te yu e tan na ini wan yuru-oso makandra nanga yu papa nanga mama, aladi yu papa e pai yuru-oso. Awansi yu e tan makandra nanga yu papa nanga mama, toku yusrefi abi a frantwortu fu sorgu taki a matifasi di yu abi nanga Yehovah e tan bun. Fu san ede a bun fu hori a sani dati na prakseri? Fu di yu no sabi ala ten sortu tesi yu o kisi na ini a ten di e kon. Fu eksempre, efu yu ben dopu yonguyongu kaba, dan te yu e gro kon moro bigi, yu o kisi fu du nanga nyun firi nanga tesi. Wan meisje di abi 18 yari ben taki: „Nofo tron wan pikin no e mandi taki a de wan Yehovah Kotoigi soso fu di a no mag teki kuku te wan pikin friyari na skoro. Ma te a kon moro bigi èn den seksfiri fu en e kon moro tranga, dan a musu abi a tranga overtoigi taki ala ten a de wan koni sani fu gi yesi na den wet fu Yehovah.”

⁵ A no de fu taki dati a no yongusma wawan e kisi tesi baka te den dopu. Srefi sma di teki dopu leki bigisma kan kisi tesi di den no ben fruwakti. Kande den tesi dati abi fu du nanga a trowlibi fu den, nanga a gosontu fu den, noso nanga a wroko fu den. Ibri sma, awansi a yongu noso owru o kisi fu du nanga situwâsi pe a o abi fu sori taki a e tan gi yesi na Yehovah.​—Yak. 1:12-14.

6. (a) Fu san ede yu musu gi yesi na Yehovah na ini ala sani te yu teki dopu? (b) San yu kan leri fu Filipisma 4:11-13?

⁶ Hori na prakseri taki yu pramisi Yehovah taki yu o gi yesi na en ala ten èn na ini ala sani. A sani disi o yepi yu fu tan du san Gado e aksi fu yu, awansi san e pasa. Yu pramisi a Moro Hei Tiriman fu hemel nanga grontapu taki yu o tan dini en, awansi yu papa nanga mama e tapu fu du dati (Ps. 27:10). Na ini ala situwâsi yu musu aksi Yehovah fu gi yu a krakti so taki yu kan du san yu pramisi en.​—Leisi Filipisma 4:11-13.

7. Fu san ede Bijbel e taki dati te wi e meki muiti fu kisi frulusu, wi musu du dati „nanga frede èn nanga beifi”?

⁷ Yehovah wani taki yu musu de en mati, ma yu musu meki muiti fu tan wan mati fu en so taki yu kan kisi frulusu. Fu taki en leti, Filipisma 2:12 e taki: „Nanga frede èn nanga beifi un musu tan meki muiti fu kisi frulusu.” Den wortu disi e sori taki yu musu kon sabi krin fa yu o tan krosibei fu Yehovah èn fa yu o tan gi yesi na en awansi san e pasa. Yu no musu de gaw fu denki taki a o makriki  gi yu fu du dati. Srefi wan tu fu den futuboi fu Yehovah di ben e anbegi en langa ten kaba, drai baka gi en. Sobun, san yu kan du fu sorgu taki yu e kisi frulusu?

8. San yu musu du te yu e studeri Bijbel, èn fu san ede a sani disi prenspari so?

⁸ Efu wi wani de wan mati fu Yehovah, dan wi musu arki en èn wi musu taki nanga en. A moro prenspari fasi fa wi kan arki Yehovah, na te wi e studeri Bijbel. Dati wani taki dati wi musu leisi Gado Wortu nanga den tra buku fu wi, èn wi musu denki dipi fu den sani di wi e leisi. Ma te yu e studeri Bijbel, dan hori na prakseri taki yu no musu leri sani na ede nomo neleki te yu musu meki eksame na skoro. Na presi fu dati, a musu gi yu prisiri fu ondrosuku Bijbel èn fu kon sabi nyun sani fu Yehovah. A sani disi o yepi yu fu kon moro krosibei na Gado, èn a o kon moro krosibei na yu.​—Yak. 4:8.

9. Sortu sani yepi yu fu studeri Bijbel moro bun?

⁹ Na organisâsi fu Yehovah gi wi furu sani di kan yepi yu fu studeri Gado Wortu bun. Fu eksempre, na jw.org yu abi wan pisi di nen „Jongeren”, èn te yu e go na „Projecten voor Bijbelstudie”, dan yu kan feni rai di o yepi yu fu fiti den sani di yu e leri fu den Bijbel tori. Boiti dati, na jw.org, den werkbladen gi a „San Bijbel e leri wi trutru?” buku, kan yepi yu fu tranga a bribi fu yu. Den e leri yu tu fa yu kan fruteri trawan fu a bribi fu yu. Na artikel „Jonge mensen vragen . . . Hoe maak ik Bijbellezen leuker?”, na ini na Ontwaakt! fu april 2009, abi tra sani di yu kan studeri. Efu yu wani kisi frulusu, dan a de prenspari srefisrefi taki yu e studeri èn taki yu e denki dipi fu den sani di yu e leri.​—Leisi Psalm 119:105.

10. Fu san ede a prenspari srefisrefi taki wan dopu Kresten e begi?

¹⁰ Te wi e studeri Bijbel, dan wi e arki Yehovah, èn te wi e begi, dan wi e taki nanga en. Wi no musu si begi leki wan gwenti nomo, noso leki wan sortu tapu di o sorgu taki ogri no miti wi. Te wi e begi, dan dati wani taki dati wi e taki nanga wi Mekiman. Denki a tori: Yehovah  wani yere san yu abi fu taki. (Leisi Filipisma 4:6.) Te yu e broko yu ede nanga wan sani, dan Bijbel e gi yu a koni rai fu „trowe yu hebi na tapu Yehovah” (Ps. 55:22). Yu e bribi taki a rai disi e yepi? Milyunmilyun brada nanga sisa de di kan gi yu a dyaranti taki a rai disi yepi den. A kan yepi yu tu!

11. Fu san ede yu musu gi tangi na Yehovah ala ten?

¹¹ Ma wi no musu begi soso te wi wani taki Yehovah yepi wi. Bijbel e memre wi: „Sori taki unu de nanga tangi” (Kol. 3:15). Son leisi wi e broko wi ede so te nanga den problema fu wi taki wi no man si den someni blesi di wi e kisi. Dati meki a bun fu du disi: Ibri dei yu musu prakseri awansi dri sani di yu breiti taki Yehovah du gi yu, èn taigi Yehovah tangi gi dati. Wan meisje di nen Abigail èn di ben teki dopu di a ben abi 12 yari, e taki: „Mi feni taki Yehovah na a moro prenspari sma di wi musu gi tangi. Wi musu teki ibri okasi fu taigi en tangi gi den sani di a gi wi. Wan leisi mi yere a moi sani disi: Efu yu wiki tamara èn yu abi soso den sani di yu ben taki Yehovah tangi fu dati, dan san yu ben o abi ete?”

12, 13. Fa yu srefi ondrofeni taki Yehovah bun, èn fu san ede a prenspari fu prakseri fa Yehovah yepi yu?

¹² Yehovah ben yepi Kownu David fu owruten fu pasa furu tesi. Dati meki David ben sabi san a ben taki di a skrifi: „Tesi èn si taki Yehovah bun. Koloku fu a man di e go suku kibri na en” (Ps. 34:8). A vers dati e sori krin o prenspari a de taki wi srefi e kon sabi Yehovah. Te yu e leisi Bijbel nanga den tra buku fu wi, èn te yu e go na den Kresten konmakandra, dan yu e yere moi ondrofenitori fu tra brada nanga sisa di Yehovah yepi fu tan gi yesi na en. Ma o moro yu e kon sabi Yehovah, o moro yu musu kon si fa a e yepi yu. Yu srefi ondrofeni kaba taki Yehovah bun?

¹³ Wan fasi de fa ala Kresten ondrofeni taki Yehovah bun. A gi ibriwan fu wi a kari fu kon moro krosibei na en nanga en Manpikin. Yesus ben taki: „Nowan sma kan kon na mi, efu a Tata di seni mi kon no e hari en kon” (Yoh. 6:44). Yu feni taki Yehovah hari yu kon na en? Kande wan tra yonguwan e taki: ’Yehovah hari mi papa nanga mama kon na en, èn mi e waka nomo na den baka.’ Ma di yu gi yusrefi abra na Yehovah èn teki dopu, dan yu sori taki yu srefi kon abi wan matifasi nanga Yehovah. Bijbel e gi wi a dyaranti disi: „Efu wan sma lobi Gado, dan Gado sabi a sma dati” (1 Kor. 8:3). Ala ten yu musu warderi a presi di Yehovah gi yu na ini na organisâsi fu en.

14, 15. Fa a preikiwroko kan yepi yu fu kon abi wan moro tranga bribi?

¹⁴ Wan tra fasi fa yu kan ondrofeni taki Yehovah bun, na te a e gi yu deki-ati fu fruteri trawan fu a bribi fu yu. Yu kan du dati na ini a preikiwroko èn te yu de na skoro. Kande a muilek gi yu fu preiki gi den speri fu yu na skoro. Kande yu e broko yu ede nanga san den o taki noso nanga san den o du. Kande wan moro muilek sani gi yu, na te yu musu taki fu a bribi fu yu na fesi wan bigi grupu yonguwan. San kan yepi yu?

¹⁵ Prakseri fu san ede yu e bribi den sani di yu leri fu Bijbel. Wan sani di kan yepi yu fu du disi na den werkbladen tapu jw.org. Den de fu feni na ini a tongo fu yu? Efu yu no sabi seiker, dan  teki ten fu suku den. Den meki fu yepi yu fu poti prakseri na den sani di yu e bribi, fu san ede yu e bribi den, èn den e yepi yu tu fu kon sabi fa yu kan fruteri trawan fu a bribi fu yu. Te yu de seiker fu den sani di yu e bribi, èn te yu luku na fesi san yu o taki, dan yu o wani fruteri trawan fu Yehovah.​—Yer. 20:8, 9.

16. San kan yepi yu te yu e frede fu taki nanga sma fu den sani di yu e bribi?

¹⁶ Ma awansi yu sreka bun, toku yu kan tweifri ete fu taki nanga sma fu a bribi fu yu. Wan sisa di abi 18 yari now, ben teki dopu di a ben abi 13 yari. A e taki: „Mi sabi san mi e bribi, ma son leisi mi no sabi fa mi musu taki nanga sma fu a bribi fu mi.” A e taki moro fara: „Mi e pruberi fu taki fri fu na anbegi fu mi, sondro fu meki a gersi leki mi e preiki gi trawan. Den pikin na ini mi klas e taki fri fu den sani di den e du, èn mi musu firi fri tu fu du a srefi. Dati meki son leisi te wi e taki tori, dan mi e taki sani soleki: ’Wan fu den dei di mi ben e gi sma leri fu Bijbel, dan . . .’ Baka dati, mi e taki go doro fu a tori di mi ben e taki. Aladi mi no e taki fu Bijbel srefi, toku sonwan fu den wani kon sabi fa mi e gi sma leri fu Bijbel. Son leisi den e poti aksi gi mi. O moro mi e taki nanga den na a fasi disi, o moro a e kon makriki gi mi fu taki fu a bribi fu mi. Bakaten mi e firi so bun!”

17. Sortu tra sani kan yepi yu fu fruteri sma san yu e bribi?

¹⁷ Te tra sma e si taki yu e broko yu ede nanga den èn taki yu e lespeki den, dan a o makriki gi den fu lespeki yu èn a bribi fu yu. Olivia di abi 17 yari now ben teki dopu di a ben moro yongu. A e taki: „Ala ten mi ben frede taki efu mi ben e bigin taki fu Bijbel, dan sma ben o feni taki mi e du leki mi santa.” Bakaten a bigin denki tra fasi. Olivia no ben frede so furu moro, ma na presi fu dati, a ben e prakseri: „Wan lo yongusma no sabi noti fu Yehovah Kotoigi. Wi na den wan-enkri Kotoigi di den sabi. Sobun, a fasi fa wi e tyari wisrefi kan meki taki den yonguwan disi e arki wi. Ma fa a de te wi e syensyen noso te a muilek gi wi fu taki fu a bribi fu wi? Efu dati de so dan den o denki taki wi e syen fu de Kotoigi. Kande den no o wani arki wi tu fu di den e si taki wi no de seiker fu den sani di wi e leri. Ma efu wi no e frede fu taki nanga sma fu a bribi fu wi, dan nofo tron den o lespeki wi.”

18. San yu musu du efu yu wani kisi frulusu?

¹⁸ Soleki fa wi si, dan difrenti sani de di yu musu du fu kan kisi frulusu. Yu musu du muiti fu leisi Gado Wortu, yu musu denki dipi fu en, yu musu tan begi Yehovah èn yu musu prakseri fa Yehovah blesi yu. Te yu e du den sani disi, dan dati o gi yu a frutrow taki Yehovah na yu mati. Disi o meki taki yu o wani taki nanga trawan fu a bribi fu yu.​—Leisi Psalm 73:28.

19. Fu san ede a bun taki wi e du muiti fu kisi frulusu?

¹⁹ Yesus ben taki: „Efu wan sma wani kon na mi baka, dan a no musu teri ensrefi moro, ma a musu teki en pinapostu èn a musu tan waka na mi baka” (Mat. 16:24). A tru taki ibri Kresten di wani waka baka Yesus, musu gi ensrefi abra na Yehovah èn musu teki dopu. Ma disi o meki taki yu kisi furu blesi now èn sosrefi têgo libi na ini a nyun grontapu fu Gado. Dati meki yu abi ibri reide fu tan du muiti fu kisi frulusu!