1, 2. Te wi musu bosroiti san wi o du nanga wi libi, dan fu san ede a bun fu arki wi Mekiman? (Luku den prenki na a bigin fu na artikel.)

EFU yu na wan yonguwan, dan seiker yu kisi rai fu furu sma. Kande jufrow nanga meneer noso tra sma gi yu rai fu go na heiskoro èn fu suku wan wroko pe yu kan meki furu moni. Ma Yehovah e gi yu tra sortu rai. A no de fu taki dati a wani taki yu wroko tranga te yu de na skoro so taki yu kan sorgu yusrefi te yu kon bigi (Kol. 3:23). Ma a sabi tu taki te yu yongu, yu musu teki prenspari bosroiti na ini yu libi. Dati meki a e gi yu bun rai di kan yepi yu fu libi na wan fasi di a feni bun na ini den lasti dei disi.​—Mat. 24:14.

² Hori na prakseri tu taki Yehovah sabi ala sani. A sabi san o pasa na ini a ten di e kon èn a sabi o ten a grontapu disi o kisi pori (Yes. 46:10; Mat. 24:3, 36). A sabi wi bun tu. A sabi san kan meki taki wi de koloku èn san kan meki taki wi no de koloku. Sobun, awinsi a gersi leki den rai fu libisma bun, efu den no komoto fu Gado Wortu, dan a no koni rai.​—Odo 19:21.

3, 4. San pasa nanga Adam, Eva nanga den bakapikin fu den di den arki rai di no bun?

³ Langa ten kaba libisma e kisi rai di no bun. A fosi sma di gi trawan rai di no bun, na Satan. A taigi Eva taki en nanga Adam ben o de moro koloku efu den srefi ben mag bosroiti fa den o libi (Gen. 3:1-6). Fu taki en leti, Satan ben e denki ensrefi nomo. A ben wani taki Adam nanga Eva, nanga ala den bakapikin fu den arki en èn anbegi en na presi fu anbegi Yehovah. Ma Satan no ben du nowan bun gi den. Na Yehovah ben gi den ala sani. Den ben abi makandra leki patna, a ben gi den wan moi dyari, wan gosontu skin èn a howpu fu libi fu têgo.

⁴ A sari taki Adam nanga Eva trangayesi Gado èn taki den drai baka gi a sma di gi den libi. Soleki fa yu sabi, dan sani no waka bun gi den. Neleki bromki di broko puru fu wan bon, den bigin dede gowe safrisafri. Den pikin fu den srefi kisi sondu (Rom. 5:12). Toku furu sma e bosroiti ete fu no gi yesi na Gado. Den wani libi leki fa den srefi wani (Ef. 2:1-3). San na a bakapisi? Bijbel e sori taki te sma no e gi yesi na Gado, dan den no koni trutru.​—Odo 21:30.

5. San Yehovah ben sabi fu libisma èn fu san ede wi kan taki dati a ben abi leti?

⁵ Toku Yehovah ben sabi taki sma ben o de di ben o suku en èn anbegi en. Furu fu den sma disi na yonguwan (Ps. 103:17, 18; 110:3). A lobi den yonguwan disi! Yu na wan fu den? Efu dati de so, dan a no de fu taki dati Gado e du furu „bun” sani gi yu so taki yu kan de koloku (leisi Psalm 103:5; Odo 10:22). Na ini na artikel disi wi o taki fu fo fu den sani di a e du gi wi. A e gi wi bun leri, a e gi wi bun mati, a e sori wi sortu marki wi kan poti na ini wi libi èn a e meki taki wi de fri.

6. Fu san ede wi musu meki muiti fu tron mati fu Yehovah èn fa Yehovah e yepi wi fu du dati?

⁶ Meti no abi a firi taki den musu anbegi wan Mekiman. Ma libisma abi a firi dati (Mat. 4:4). Te yu e arki Gado, dan yu o kisi koni nanga frustan èn yu o de koloku. Yesus ben taki: „Koloku fu den sma di sabi taki den abi Gado fanowdu” (Mat. 5:3). Gado e yepi wi fu kon abi wan bun matifasi nanga en. A gi wi en Wortu èn a e gebroiki „a koni srafu di de fu frutrow” fu gi wi leri (Mat. 24:45). Iya, Yehovah e gi wi bun furu leri!​—Yes. 65:13, 14.

7. San na wan tu wini di wi e kisi te Yehovah e gi wi leri?

⁷ A leri di Gado e gi wi e meki taki wi kisi koni nanga frustan. Den sani disi e kibri wi na difrenti fasi. (Leisi Odo 2:10-14.) Te yu abi koni nanga frustan, dan sma no o man kori yu taki wan Mekiman no de. Den no o man kori yu tu taki moni nanga gudu kan meki yu de koloku. Koni nanga frustan o yepi yu tu fu basi takru firi èn fu no tyari yusrefi na wan fasi di no bun. Sobun, tan suku koni nanga frustan èn si den leki warti sani! Te yu abi den fasi disi, dan yu o si taki Yehovah lobi yu èn taki a e suku a bun fu yu.​—Ps. 34:8; Yes. 48:17, 18.

8. Fu san ede yu musu kon moro krosibei na Yehovah now èn fa disi o yepi yu na ini a ten di e kon?

⁸ Dyonsro, a heri grontapu fu Satan o kisi pori. Na soso Yehovah o man yepi wi èn na en o man gi wi san wi abi fanowdu. A ten e doro te en wawan o man gi wi  nyanyan fu a dei! (Hab. 3:2, 12-19) Sobun, now na a ten fu kon moro krosibei na wi hemel Tata èn fu frutrow moro na en tapu (2 Petr. 2:9). Te yu e du dati, dan awinsi san e pasa, yu o firi leki David di ben skrifi: „Doronomo mi e prakseri Yehovah. Fu di a de na mi reti-anusei, meki mi no o naki futu.”​—Ps. 16:8.

9. (a) Soleki fa Yohanes 6:44 e sori, dan san Yehovah e du? (b) San na a difrenti te yu miti wan sma di no de wan Kotoigi èn wan sma di de wan Kotoigi?

⁹ Na Yehovah e hari reti-ati sma kon na ini a tru anbegi. Ala den sma disi e kon na ini na osofamiri fu en. (Leisi Yohanes 6:44.) Te yu miti wan sma di no de wan Kotoigi fu a fosi leisi, dan san yu sabi fu a sma? Yu no sabi furu fu en. Kande yu o kon sabi en nen èn kande yu e si taki a langa noso a syatu. Ma a de heri tra fasi te yu e miti wan Kotoigi fu a fosi leisi. Yu sabi taki a sabi Yehovah èn taki a lobi en. Awinsi a sma de fu wan tra kondre, lo noso kulturu yu o sabi furu fu en èn ensrefi o sabi furu fu yu.

10, 11. San wi sabi fu ala Kotoigi èn sortu wini wi e kisi fu dati?

¹⁰ Awinsi yu miti wan Kotoigi di e taki wan tra tongo, yu sabi taki yu nanga en e taki a „soifri tongo” (Sef. 3:9). Disi wani taki dati unu ala tu e bribi na ini Gado, unu e hori unsrefi na den wet fu en èn un abi a srefi howpu gi a ten di e kon. Disi na den moro prenspari sani di wi musu sabi fu wan sma. Den sani disi kan yepi wi fu frutrow makandra èn fu tron bun mati fu makandra fu têgo.

¹¹ Sobun, te yu e anbegi Yehovah yu kan taki dati yu abi den moro bun mati. Yu abi mati na heri grontapu. A wan-enkri sani na taki yu no miti den alamala ete! Na a pipel fu Yehovah wawan abi a moi kado disi. Sortu tra presi yu o feni so wan kado?

12. Sortu marki yu kan poti gi yusrefi fu go na fesi na ini na anbegi?

¹² Leisi Preikiman 11:9–12:1. Sortu marki yu wani poti fu man go na fesi na ini na anbegi? Kande yu e pruberi fu leisi Bijbel ibri dei, fu gi moro bun piki na den konmakandra èn fu tron wan moro bun preikiman. Te yu e si taki yu e du den sani disi bun noso te tra sma e si dati, dan fa yu e firi? Wi de seiker taki yu e firi bun. Na so wi wani taki yu musu firi tu fu di yu e du san Yehovah wani, neleki Yesus.​—Ps. 40:8; Odo 27:11.

13. Fu san ede a moro bun fu dini Gado na presi fu feti baka grontapu sani?

¹³ Te yu e poti na anbegi fu Yehovah na a fosi presi, dan yu e du wan sani di o meki yu de koloku èn di o gi yu a firi taki yu e du wan bun sani nanga yu libi. Na apostel Paulus ben skrifi: „Tanapu kánkan, no degedege, èn ala ten abi furu fu du na ini a wroko fu Masra, fu di unu sabi taki a wroko di unu e du gi Masra no de fu soso” (1 Kor. 15:58). Ma te sma e feti fu kon gudu noso fu kon pôpi, dan den no de koloku trutru. Awinsi den meki en na ini a grontapu, toku den e firi taki den e mankeri wan sani na ini den libi (Luk. 9:25). Na dati Kownu Salomo srefi ben kon si.​—Rom. 15:4.

14. San Salomo ben wani kon sabi èn san wi kan leri fu dati?

¹⁴ Salomo di ben de wan fu den moro guduman di ben abi furu makti, ben wani kon sabi san e gi sma prisiri. A ben taki: „Meki mi pruberi fu si san na prisiri. Meki mi prisiri fu sani di bun” (Preik. 2:1-10). Dati meki a bow oso, a seti moi bigi dyari èn a du iniwan sani di a ben wani. Fa a ben firi bakaten? Yu denki taki a ben de koloku? Ensrefi e gi wi a piki. A e taki: „Mi luku ala den sani di mi du . . . Ne mi si taki ala sani ben de soso sani. . . . Nowan sani na grontapu e tyari wini kon gi libisma” (Preik. 2:11). Yu o leri fu na eksempre fu Salomo?

15. Soleki fa Psalm 32:8 e sori, dan fu san ede a prenspari fu abi bribi èn fa disi o yepi yu?

¹⁵ Son sma e leri wan sani baka te den ondrofeni takru bakapisi. Ma Yehovah no wani taki dati pasa nanga yu. A wani taki yu arki en èn taki yu poti a wani fu en na a fosi presi. Ma yu musu abi bribi fu man du dati. Noiti yu o sari taki yu ben poti bribi na ini Gado. Èn noiti Yehovah o frigiti ’a lobi di yu sori gi a nen fu en’ (Hebr. 6:10). Sobun, du muiti fu kon abi wan tranga bribi, dan yu o si taki yu hemel Tata e suku a bun fu yu.​—Leisi Psalm 32:8.

16. Fu san ede a de wan moi sani taki wi de fri èn fu san ede wi musu gebroiki a fri di wi abi na wan koni fasi?

¹⁶ Paulus ben skrifi: „Pe a yeye fu Yehovah de, drape sma de fri” (2 Kor. 3:17). Yehovah de fri èn a lobi a sani dati. A meki yu na so wan fasi tu taki yu srefi lobi en te yu de fri. Ma a wani taki yu gebroiki a fri di yu abi na wan koni fasi so taki ogri no miti yu. Kande yu sabi yonguwan di e luku porno, di e libi wan hurulibi, di e du sport pe den kan kisi mankeri noso lasi den libi, di e gebroiki drugs noso di e dringi tumusi furu sopi. Den yonguwan disi e prisiri fu wan syatu pisi ten te den e du den sani disi. Ma nofo tron den sani disi e tyari takru bakapisi kon gi den. Den e kon siki, den e tron dyonki noso den e dede srefi (Gal. 6:7, 8). Den yonguwan disi denki taki  den de „fri”, ma den e kori densrefi.​—Tit. 3:3.

17, 18. (a) Fu san ede wi de fri te wi e gi yesi na Gado? (b) Fu san ede wi kan taki dati Adam nanga Eva ben de moro fri leki wi na ini a ten disi?

¹⁷ Omeni sma di yu sabi, kon siki fu di den e hori densrefi na den wet fu Yehovah? A no de fu taki dati te wi e gi yesi na Yehovah, dan dati bun gi wi gosontu èn a e meki taki wi de fri (Ps. 19:7-11). Boiti dati, te yu e gebroiki a fri di yu abi na wan koni fasi, sobun te yu e hori yusrefi na den wet fu Yehovah, dan yu e sori Gado nanga yu papa nanga mama taki den kan frutrow yu. Disi o meki taki yu papa nanga mama gi yu moro okasi fu du san yu lobi. Boiti dati, Yehovah pramisi taki heri esi ala den reti-ati futuboi fu en „o kon fri na wan tumusi moi fasi leki pikin fu Gado”.​—Rom. 8:21.

¹⁸ Adam nanga Eva ben fri tu. Omeni wet Gado ben gi den na ini a dyari fu Eden? Wán nomo. Den no ben musu nyan a froktu fu wán bon (Gen. 2:9, 17). Yu denki taki Gado ben gi den wan tumusi hebi wet? Kwetikweti! Prakseri omeni wet lanti e meki gi sma èn fa den e fruplekti ala sma fu hori densrefi na den wet disi. Ma Yehovah ben gi Adam nanga Eva wán wet nomo.

19. Fa Yehovah e leri en pipel fu de fri?

¹⁹ Te wi e luku a fasi fa Yehovah e libi nanga den futuboi fu en, dan wi e si taki en na wan koni Gado. A no gi wi wan lo wet, ma nanga pasensi a e leri wi fu hori wisrefi na a moro hei wet, dati na a wet fu lobi trawan. A wani taki wi tyari wisrefi soleki fa a e leri wi na ini Bijbel èn fu tegu gi ogri (Rom. 12:9). Na ini a lezing di Yesus ben hori tapu wan bergi, a yepi wi fu frustan san e meki taki sma e du ogri (Mat. 5:27, 28). Na ini a nyun grontapu, Krestes a Kownu fu Gado Kownukondre, o tan gi wi leri so taki wi abi a srefi denki leki en. Wi o lobi retidu èn wi o tegu gi ogri neleki en (Hebr. 1:9). A o meki taki sondu no abi krakti moro tapu wi skin nanga wi frustan. Prakseri fa a o de te wi no o kisi a firi moro fu du sani di no bun èn te wi no o kisi den takru bakapisi fu sondu moro. Na a ten dati wi o prisiri fu di wi „o kon fri na wan tumusi moi fasi”, soleki fa Yehovah pramisi wi.

20. (a) Fa Yehovah e gebroiki a fri di a abi? (b) Fa wi kan teki na eksempre fu Gado?

²⁰ Ma awinsi wi o de fri, toku dati no wani taki dati wi o du ala san wi wani. Lobi gi Gado nanga tra sma musu de fu si na ini ala san wi e du. Te wi e du dati, dan wi e teki na eksempre fu Yehovah. Aladi a mag du ala san a wani, toku ala san a e du e sori taki a abi lobi. Wi e si dati tu te wi e luku fa a e libi nanga wi (1 Yoh. 4:7, 8). Sobun, wi kan taki dati wi de fri trutru soso te wi e du sani neleki Gado.

21. (a) Fa David ben denki fu Yehovah? (b) San wi o luku na ini a tra artikel?

²¹ Yu de nanga tangi gi ala den „bun” sani di Yehovah gi yu? Soleki fa wi si, dan a gi yu furu leri, a gi yu bun mati, a sori yu sortu marki yu kan poti fu man abi wan bun libi èn a pramisi taki yu o de fri trutru na ini a ten di e kon (Ps. 103:5). Kande den sani disi e meki yu firi leki David di ben begi: „Yu o sori mi fa mi musu libi. Mi e firi prisiri te mi si taki yu feni mi bun. Te mi de na yu reti-anusei, dan mi o prisiri fu ala ten” (Ps. 16:11). Na ini a tra artikel wi o luku sortu tra moi sani wi kan leri fu Psalm 16. Disi o yepi yu fu si san yu kan du fu de koloku trutru.