Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Sortu tori na ini Bijbel e sori taki Gado e firi gi wi?

Di den Israelsma ben de leki srafu na ini Egepte, dan Gado ben sabi taki den ben de na ini banawtu èn a ben firi gi den (Eks. 3:7; Yes. 63:9). Gado meki wi leki fa ensrefi de. Sobun, wisrefi man firi gi trawan. Gado e firi gi wi, srefi te wi feni taki wi no warti fu kisi a lobi fu en.​—wp18.3, blz. 8, 9.

Fa Yesus ben yepi den bakaman fu en fu no desko tra sma?

Furu Dyu na ini a ten fu Yesus ben e desko trawan. Yesus ben leri den bakaman fu en taki den ben musu abi sakafasi èn taki den no ben musu denki taki den bun moro sma fu tra ras. A ben taigi den fu si makandra leki brada nanga sisa.​—w18.06, blz. 9, 10.

San wi e leri te wi e luku taki Yehovah no meki Moses go na ini a Pramisi Kondre?

Moses ben de wan bun mati fu Yehovah (Deut. 34:10). Ma di den Israelsma ben de sowan 40 yari na ini a sabana, den bigin krutu baka taki watra no ben de. Gado taigi Moses fu taki nanga a stonbergi. Ma na presi fu du dati, Moses naki a stonbergi. A kan taki Yehovah ben atibron nanga Moses fu di a no ben du san a ben taigi en, noso fu di a no gi en a grani di a ben musu kisi fu a wondru di a du (Num. 20:6-12). A tori disi e leri wi o prenspari a de fu gi yesi na Yehovah èn fu gi en grani.​—w18.07, blz. 13, 14.

Fu san ede wi no musu meki den sani di wi e si nanga wi ai abi krakti tapu a fasi fa wi e si trawan?

Dri sani de di kan abi krakti tapu a fasi fa wi e si sma: Dati na a ras noso kondre fu wan sma, omeni moni a abi èn a yari di a abi. A prenspari taki wi e meki muiti fu si trawan soleki fa Gado e si den! (Tori 10:34, 35)​—w18.08, blz. 8-12.

Fa den owru brada kan yepi trawan na ini a gemeente?

Wan owru brada di no e tyari den frantwortu di a ben abi fosi moro, warti ete gi Gado èn a kan du furu fu yepi trawan. A kan yepi den masra di no de Kotoigi, a kan yepi den brada nanga sisa di no e preiki moro, a kan studeri Bijbel nanga sma èn a kan du moro na ini a preikiwroko.​—w18.09, blz. 8-11.

Sortu wrokosani wi abi fu gi sma leri?

Wi abi den Jw.org karta nanga den kari gi den konmakandra. Wi abi aiti traktaat di makelek fu prati èn wi abi A Waktitoren nanga na Ontwaakt! Wi abi wan tu brochure, wi abi tu buku di wi e gebroiki fu studeri nanga sma, èn wi abi fo felem di wi kan sori sma na ini a preikiwroko. Wan fu den felem disi nen Fu san ede wi musu studeri Bijbel?​—w18.10, blz. 16.

Soleki fa Odo 23:23 e sori, dan fa wan Kresten kan „bai san tru”?

Wi no abi fu pai moni fu kon sabi den tru leri fu Bijbel. Ma toku wi musu gebroiki wi ten èn wi musu meki muiti fu kon sabi den tru leri disi.​—w18.11, blz. 4.

San wi e leri te wi luku fa Hosea libi nanga en wefi, Gomer?

Gomer waka gi Hosea omeni leisi, ma toku Hosea tan gi en pardon èn a no broko a trow. Efu a trowpatna fu wan Kresten waka gi en, dan a Kresten di no du noti kan bosroiti fu gi en patna pardon. Efu a abi seks nanga en patna baka, dan a no man broko a trow moro.​—w18.12, blz. 13.