Yu man memre san yu leisi na ini den Waktitoren di kon na doro a yari disi? Luku efu yu kan piki den aksi di e kon now:

Yakobus 5:11 e taki dati „Yehovah lobi sma trutru” èn taki „a abi sari-ati”. Sortu dyaranti dati e gi wi?

Wi sabi taki na fu di Yehovah abi sari-ati, meki a wani gi wi pardon fu den fowtu fu wi. Yakobus 5:11 e taigi wi tu taki, na wan switi fasi Yehovah e aksi fu yepi wi. Wisrefi musu teki na eksempre fu en.​—w21.01, blz. 21.

Fu san ede Yehovah seti na edeman-wroko?

A du en fu di a abi lobi. A seti disi e meki taki osofamiri di e gi yesi na en man libi ini freide èn du sani na wan orga fasi. Ibri sma na ini na osofamiri di e wroko nanga a seti disi, sabi suma abi a frantwortu fu bosroiti san musu pasa èn fu teki fesi fu du san den bosroiti.​—w21.02, blz. 3.

Fu san ede Kresten musu luku bun fa den e gebroiki den app di meki fu seni noso fu kisi boskopu?

Efu wan sma bosroiti fu gebroiki den sortu app disi, dan a musu luku nanga suma a o taki. Efu a grupu bigi tumusi, dan a o moro muilek fu sabi suma na den sma di de na ini a grupu (1 Tim. 5:13). A kan tyari problema kon tu, kande fu di sma e prati boskopu di no tru. A kan tu taki den e gebroiki den app disi fu du bisnis nanga brada nanga sisa, noso fu seri sani gi den.​—w21.03, blz. 31.

San na wan tu reide fu san ede Yehovah gi pasi taki Yesus pina?

A fosi sani na taki te Yesus ben o anga na wan postu, dan a ben o puru wan fluku na tapu den Dyu (Gal. 3:10, 13). A di fu tu sani na taki Yehovah ben e sreka Yesus gi a wroko di a ben o du leki Granpriester. Èn a di fu dri sani na taki a tan di Yesus tan getrow teleki a dede, sori krin taki libisma man horidoro awansi den e kisi tesi (Yob 1:9-11).​—w21.04, blz. 16-17.

San yu kan du efu a no makriki fu feni sma na ini a preikiwroko?

Yu kan du muiti fu miti sma na den yuru di den gwenti de na oso. Yu kan pruberi fu preiki na difrenti presi tu noso yu kan skrifi brifi gi sma.​—w21.05, blz. 15-16.

San na apostel Paulus ben abi na prakseri di a taki: „Fu di mi du san a Wèt taki, meki mi dede te a abi fu du nanga a Wèt”? (Gal. 2:19)

A Wet di Gado gi Moses ben e meki sondu libisma kon krin èn a ben tyari den Israelsma go na Krestes (Gal. 3:19, 24). Na a sani disi meki taki Paulus tron wan Kresten. Fu di a du dati, meki a „dede nanga a Wèt”. A no ben abi fu hori ensrefi na a wet disi moro.​—w21.06, blz. 31.

Fa Yehovah na wan eksempre gi wi te wi e luku a fasi fa a horidoro?

Yehovah horidoro na ini someni muilek situwâsi: Sma gi en porinen, Satan gens a reti di a abi fu tiri, wan tu engel opo densrefi teige en, Satan fruteri someni lei fu en, den futuboi fu en pina, a lasi wan tu mati fu en fu di den kon dede, tiriman pina libisma na wan ogri-ati fasi èn sma pori den moi sani di a meki.​—w21.07, blz. 9-12.

Fa Yosef na wan moi eksempre te a abi fu du nanga pasensi?

A horidoro aladi den brada fu en no libi bun nanga en. Dati meki te fu kaba sma lei gi en èn den poti en na strafu-oso omeni yari na Egepte, aladi a no du noti.​—w21.08, blz. 12.

San ben o seki na wan agersifasi, soleki fa Hagai 2:6-9, 20-22 taki na fesi?

Den pipel na grontapu no wani arki a bun nyunsu fu a Kownukondre di wi e preiki, ma furu sma kon na ini a waarheid. Ete wan syatu pisi ten, dan den pipel o seki te den o kisi pori krinkrin.​—w21.09, blz. 15-19.

Fu san ede wi musu tan du wi diniwroko?

Yehovah e si a muiti fu wi èn a e prisiri nanga dati. Efu wi no kon weri èn wi no e gi abra, dan wi o kisi têgo libi.​—w21.10, blz. 25-26.

Fa Lefitikus kapitel 19 e yepi wi fu fiti a rai disi: „Un musu kon santa . . . na ini ala san unu e du”? (1 Petr. 1:15)

Kande a vers disi na wan pisi fu Lefitikus 19:2. Kapter 19 abi furu eksempre di e sori fa wi kan fiti 1 Petrus 1:15 na ini wi libi.​—w21.12, blz. 3-4.