1, 2. San wan brada kon si di a ondrosuku ensrefi èn san a du?

ROBERT dopu di a ben abi 15 yari, ma a no ben e si na anbegi leki wan seryusu sani. A taki: „Noiti mi du wan sani di no bun, ma na anbegi ben de wan gwenti nomo gi mi. A ben gersi leki mi ben de wan lepi Kresten. Mi ben e go na ala den konmakandra èn mi ben e dini leki yepi-pionier wan tu leisi na ini a yari. Ma mi ben e firi leki wan sani ben e misi.”

² Robert srefi no ben sabi san a no ben e du bun teleki a trow. En nanga en frow ben e lobi aksi makandra sani fu Bijbel. En frow di ben de wan lepi Kresten ben man piki furu fu den aksi, ma Robert ben e syen fu di a no ben sabi furu fu den piki. A e taki: „A ben de leki mi no ben sabi noti. Mi ben prakseri: ’Efu mi wani yepi mi frow leki edeman fu na osofamiri, dan mi musu du wan sani.’” Robert du wan sani tu. A e taki: „Mi bigin studeri Bijbel. Mi studeri teleki mi bigin frustan san den difrenti Bijbel tori abi fu du nanga makandra. Mi kon frustan Bijbel bun, ma san moro prenspari na taki mi kon abi wan bun matifasi nanga Yehovah.”

3. (a) San wi kan leri fu a tori fu Robert? (b) San wi o luku na ini na artikel disi?

 ³ A tori fu Robert e leri wi wan prenspari sani. Kande wi sabi wan tu sani fu Bijbel èn kande wi e go na ala den konmakandra. Ma dati no wani taki ete dati wi na lepi Kresten. Kande wi go na fesi kaba, ma te wi ondrosuku wisrefi wi kan si taki wi musu wroko na wan tu sani ete (Fil. 3:16). Na ini na artikel disi wi o luku dri prenspari aksi di o yepi wi fu tan go na fesi: (1) San kan yepi wi fu sabi efu wi na lepi Kresten trutru? (2) Fa wi kan tron wan moro lepi Kresten? (3) Te wi na lepi Kresten, dan fa dati o yepi wi na ini na aladei libi?

4. Suma kan kisi wini fu a rai na ini Efeisesma 4:23, 24?

⁴ Di wi bigin dini Yehovah wi tyari kenki kon di ben abi krakti tapu wi heri libi. Èn di wi dopu, dan wi no ben kaba ete. Bijbel e gi wi a deki-ati fu „tan du muiti fu meki a denki fu [wi] kon nyun” (Ef. 4:23, 24). Fu di wi na sondusma, meki wi musu tan tyari kenki kon. Srefi sma di e dini Yehovah wan langa ten kaba musu du muiti fu tan abi wan bun matifasi nanga Yehovah.​—Fil. 3:12, 13.

5. Sortu aksi kan yepi wi fu kon sabi efu wi go na fesi?

⁵ Fu man tan go na fesi, wi musu ondrosuku wisrefi bun. Awinsi wi yongu noso owru, wi musu aksi wisrefi: ’Mi man si taki mi tron wan moro lepi Kresten? Den sani di mi e du e sori taki mi abi a denki fu Krestes? A fasi fa mi e denki fu den konmakandra èn den sani di mi e du te mi de na den konmakandra e sori taki mi go na fesi? Te mi luku den tori di mi e taki, dan san na den moro prenspari sani gi mi? San a fasi fa mi e studeri, den krosi di mi e weri èn den sani di mi e du te mi e kisi rai, e sori fu mi? San mi e du te mi e kisi a firi fu du wan sani di no bun? Mi tron wan lepi Kresten?’ (Ef. 4:13) Den aksi disi kan yepi wi fu kon sabi efu wi go na fesi.

6. Sortu tra sani kan yepi wi fu kon sabi efu wi na lepi Kresten?

⁶ Son leisi tra sma musu yepi wi fu kon sabi efu wi na lepi Kresten. Na apostel Paulus ben taki dati wan sma di e denki leki fa libisma e denki no man si taki Yehovah no breiti nanga a fasi fa a e libi. Ma wan lepi Kresten e frustan fa Yehovah e si sani. A sabi taki Yehovah no feni en bun te wan sma e du san a sondu skin wani (1 Kor. 2:14-16; 3:1-3). Fu di owruman e denki soleki fa Krestes e denki, meki den man si efu wan sma e bigin tyari ensrefi na wan fasi di no fiti. Efu den owruman e kon taki nanga wi fu di den wani yepi wi, dan wi e teki a rai fu den èn wi e tyari kenki kon? Te wi e du dati, dan wi e sori taki wi wani tron lepi Kresten.​—Preik. 7:5, 9.

7. Efu wi wani tron wan lepi Kresten, dan fu san ede a no nofo fu sabi sani fu Bijbel?

⁷ Hori na prakseri taki a no te wan sma sabi sani fu Bijbel, dan en na wan lepi Kresten. Kownu Salomo ben sabi furu fu Yehovah. Bakaten den koni rai fu en tron wan pisi fu Bijbel. Ma te fu kaba en bribi kon swaki èn a bigin du sani di no bun (1 Kow. 4:29, 30; 11:4-6). Sobun, boiti taki wi sabi Bijbel, dan sortu tra sani wi musu du? Wi musu tan meki muiti fu tron lepi Kresten (Kol. 2:6, 7). San kan yepi wi?

8, 9. (a) San o yepi wi fu kon tron lepi Kresten? (b) Fu san ede wi e studeri Bijbel èn e denki dipi fu san wi leri? (Luku a prenki na a bigin fu na artikel.)

 ⁸ Paulus ben gi den Kresten fu a ten fu en a deki-ati fu „du ala muiti fu tron lepi sma” (Hebr. 6:1). Fa wi kan fiti a rai fu Paulus? Wan prenspari sani di wi musu du na fu studeri a buku Meki Gado tan lobi yu. Te yu e studeri a heri buku disi, dan dati o yepi yu fu fiti den rai fu Bijbel na ini yu libi. Efu yu kaba nanga a buku disi, dan yu kan studeri wan tra buku di o yepi yu fu kon abi wan tranga bribi (Kol. 1:23). Wi musu denki dipi tu fu san wi e leri èn wi musu aksi Yehovah fu yepi wi fu si fa wi kan du san wi leri.

⁹ Wi musu studeri Bijbel èn wi musu denki dipi fu san wi leri fu di wi wani prisiri Yehovah èn fu di wi wani gi yesi na en (Ps. 40:8; 119:97). Boiti dati, wi musu wai pasi gi sani di kan tapu wi fu go na fesi.​—Tit. 2:11, 12.

10. San yonguwan kan du fu tron lepi Kresten?

¹⁰ Efu yu na wan yonguwan, dan san yu wani du gi Yehovah? Wan brada di e wroko na Betel lobi go taki nanga den yonguwan di o dopu na den kring konmakandra èn nofo tron a e aksi den san den wani du gi Yehovah baka te den dopu. A si taki furu fu den sabi kaba san den wani du gi Yehovah. Sonwan fu den wani du a furuten diniwroko noso den wani go dini pe moro preikiman de fanowdu. Ma son yonguwan no sabi san den wani du. Kande disi e sori taki den no feni taki a de fanowdu fu poti marki na ini a tru anbegi. Efu yu na wan yonguwan, dan aksi yusrefi: ’Mi e go na den konmakandra èn na ini a preikiwroko soso fu di mi papa nanga mama wani dati? Noso misrefi e du muiti fu de wan mati fu Yehovah?’ A no de fu taki dati a no soso yonguwan musu poti marki na ini a tru anbegi. Wi alamala musu du disi fu di dati o yepi wi fu tron lepi Kresten.​—Preik. 12:1, 13.

11. (a) San wi musu du fu kan go na fesi? (b) Suma na ini Bijbel de wan bun eksempre gi wi?

¹¹ Te wi si sortu kenki wi musu tyari kon, dan wi musu du san de fanowdu fu go na fesi. A prenspari taki wi tron lepi Kresten. Efu wi no du dati, dan wi kan lasi wi libi srefi (Rom. 8:6-8). Ma awinsi wi na lepi Kresten, toku dati no wani taki dati wi no o meki fowtu. A santa yeye fu Yehovah kan yepi wi fu go na fesi. Toku wi srefi musu du muiti. Brada John Barr di ben de wan memre fu a Tiri Skin, ben taki fu Lukas 13:24: „Furu sma no man pasa a smara doro fu di den no e meki nofo muiti.” Wi musu de leki Yakob di ben e feti nanga wan engel. A horidoro teleki na engel blesi en (Gen. 32:26-28). A kan gi wi prisiri fu studeri Bijbel, ma wi no musu si Bijbel leki wan buku di abi soso span tori na ini. Wi musu tan meki muiti fu frustan den moi leri fu Bijbel di kan yepi wi.

12, 13. (a) San o yepi wi fu abi a srefi denki di Krestes Yesus ben abi? (b) Fa na eksempre fu na apostel Petrus èn a rai di a gi kan yepi wi? (c) San yu kan du fu tron wan moro lepi Kresten? (Luku a faki „ Sani di yu kan du fu tron wan lepi Kresten”.)

¹² Te wi e meki muiti fu tron moro lepi Kresten, dan santa yeye o yepi wi fu kenki wi denki. Safrisafri wi o leri fu denki neleki Krestes (Rom. 15:5). Santa yeye kan yepi wi tu fu basi den sondu firi fu wi èn fu kon kisi fasi di Yehovah feni bun (Gal. 5:16, 22, 23). Efu wi si taki wi abi a firi fu feti baka gudu noso fu meki soso prisiri, dan wi no musu lasi-ati. Tan aksi Yehovah fu gi yu en  santa yeye. Dati o yepi yu fu poti prakseri na sani di bun (Luk. 11:13). Prakseri na apostel Petrus. A no ala ten a ben e si sani leki fa Krestes ben e si sani (Mat. 16:22, 23; Luk. 22:34, 54-62; Gal. 2:11-14). Ma a no gi abra. Safrisafri Yehovah yepi Petrus fu kon abi a srefi denki fu Krestes. A kan yepi wi tu.

¹³ Bakaten Petrus taki fu wan tu fasi di wi musu abi. (Leisi 2 Petrus 1:5-8.) Wi musu „du ala muiti” fu dwengi wisrefi, fu horidoro, fu lobi wi brada nanga sisa, èn fu abi tra bun fasi. Ibri dei wi musu aksi wisrefi: ’Efu mi wani de wan lepi Kresten, dan sortu fasi mi musu sori tide?’

14. Te wi na lepi Kresten, dan fa dati o yepi wi na ini na aladei libi?

¹⁴ Te wi e denki neleki Krestes, dan dati o abi krakti tapu a fasi fa wi e taki èn fa wi e tyari wisrefi te wi de na wroko noso na skoro. A o yepi wi tu fu teki bun bosroiti ibri dei. Den bosroiti di wi e teki o sori taki wi e du muiti fu de leki Krestes. Te wi na lepi Kresten, dan wi no o wani du noti fu pori wi matifasi nanga wi hemel Papa. Te wi e kisi tesi fu du sani di no bun, dan wi o abi a krakti fu kakafutu gi den tesi dati. Efu wi musu teki bosroiti, dan wi o prakseri fu den aksi disi fosi: ’Sortu Bijbeltekst kan yepi mi fu teki wan bun bosroiti? San Krestes ben o du na ini so wan situwâsi? Sortu bosroiti ben o prisiri Yehovah?’ Wi musu kon abi a gwenti fu teki bosroiti na a fasi disi. Meki wi luku wan tu situwâsi pe wi kan poti den aksi disi gi wisrefi. Na ini ibri situwâsi wi musu luku sortu Bijbeltekst kan yepi wi fu teki wan bun bosroiti.

15, 16. Te wi e denki neleki Krestes, dan fa dati e yepi wi fu bosroiti (a) nanga suma wi o trow? (b) suma wi o teki leki mati?

¹⁵ Nanga suma yu o trow? A Bijbeltekst di o yepi yu na 2 Korentesma 6:14, 15. (Leisi en.) Paulus e sori krin taki wan Kresten di e denki soleki fa Krestes e denki, de heri tra fasi leki wan sma di abi libisma denki. Den no e si sani na a srefi fasi. Fa a rai na ini a Bijbeltekst disi kan yepi yu fu bosroiti nanga suma yu o trow?

¹⁶ Suma yu e teki leki mati? Luku sortu rai wi e kisi na ini 1 Korentesma 15:33. (Leisi en.) Wan lepi Kresten no o de mati nanga sma di kan swaki en bribi. Sortu aksi kan yepi yu fu kon sabi fa yu kan fiti a rai disi? Fu eksempre, fa a tekst disi kan yepi mi fu gebroiki Internet na wan bun fasi? Noso fa a kan yepi mi fu bosroiti efu mi o prei game tapu Internet nanga sma di mi no sabi?

17-19. Te wi e si sani leki fa Krestes e si sani, dan fa dati o yepi wi (a) fu no feti baka „soso sani”? (b) fu sabi san wi o du nanga wi libi? (c) fu lusu trobi?

¹⁷ Sani di kan tapu wi fu go na fesi. Luku gi san Paulus ben warskow den Kresten fu a ten fu en. (Leisi Hebrewsma 6:1.) San na den „soso sani” di wi  no musu du? Dati na iniwan sani di no e yepi wi fu kon tron wan lepi Kresten. A Bijbeltekst disi kan yepi wi fu piki aksi soleki: ’A sani disi na wan „soso sani”? Mi musu bigin nanga a bisnis disi? Fu san ede mi no musu go na ini wan organisâsi di wani kenki sani na grontapu?’

¹⁸ San yu wani du gi Yehovah? Yesus gi wi bun rai di kan yepi wi fu bosroiti san wi o du nanga wi libi (Mat. 6:33). Wan lepi Kresten e poti a Kownukondre na a fosi presi na ini en libi. A Bijbeltekst disi kan yepi wi fu piki aksi soleki: ’Mi musu go na heiskoro? Mi musu teki a wroko disi?’

¹⁹ Fa yu e lusu trobi? Fa a rai di Paulus gi a gemeente na ini Rome kan yepi wi te wi abi trobi nanga tra sma? (Rom. 12:18) Fu di wi e teki na eksempre fu Krestes, meki wi e pruberi fu „libi bun nanga ala sma”. San wi e du te wi nanga wan tra sma no e agri fu wan sani? A muilek gi wi fu gi a tra sma leti? Noso sma sabi wi leki wan sma di e suku fu meki freide?​—Yak. 3:18.

20. Fu san ede yu wani tron wan lepi Kresten?

²⁰ Disi na wan tu eksempre nomo di e sori fa Bijbel kan yepi wi fu teki bun bosroiti. Te wi e gebroiki Bijbel fu teki bosroiti, dan wi e sori taki wi na lepi Kresten. Efu wi na lepi Kresten, dan wi o de koloku. Robert, di wi ben taki fu en na a bigin fu na artikel, taki: „Baka di mi kon abi wan bun matifasi nanga Yehovah, mi tron wan moro bun masra nanga papa. Mi de koloku.” Efu wi e du ala san wi man fu tron lepi Kresten, dan wi o kisi furu blesi. Wi o de moro koloku now èn na ini a ten di e kon wi o kisi „a trutru libi”.​—1 Tim. 6:19.