1-3. (a) San o yepi wi fu tan gi yesi na Gado na ini den lasti dei disi? (b) San wi o luku na ini na artikel disi?

WI E libi na a kaba fu den lasti dei. Now wi e si fa moro nanga moro sma e du ogri. Bijbel taki dati den „e sproiti leki grasi” (Ps. 92:7). Dati meki a no e fruwondru wi taki furu sma no wani du san Gado feni bun. Paulus ben taigi Kresten: „Te a abi fu du nanga ogridu un musu de yongu pikin. Toku un musu kon de leki bigisma na ini a fasi fa unu e denki” (1 Kor. 14:20). Fa wi kan du a sani disi?

² Wi kan feni a piki na ini a tekst na a bigin fu na artikel. A e taki: „Den wan di e suku Yehovah man frustan ala sani.” Disi wani taki dati den man frustan ala sani di den musu sabi fu prisiri Yehovah (Odo 28:5). Odo 2:7, 9 e leri wi tu taki Yehovah e gi koni na den sma di e du san reti. Disi e meki taki den man ’frustan san na retidu. Den sabi tu fa fu koti krutu na wan reti fasi, fa fu de krin-ati sma èn fa fu du ala bun sani.’

³ Na a koni disi Noa, Danièl nanga Yob ben kisi fu Gado (Esek. 14:14). Na so a de tu nanga a pipel fu Gado na ini a ten disi. Fa a  de nanga yu? Yu man „frustan ala sani” di de fanowdu fu kan prisiri Yehovah? Wan prenspari sani di o yepi yu na te yu kon sabi Gado bun. Dati meki na ini na artikel disi wi o luku (1) fa Noa, Danièl nanga Yob kon sabi Gado, (2) fa a sabi di den ben sabi Gado yepi den, èn (3) fa wi kan kon abi bribi neleki den.

4. Fa Noa ben kon sabi Yehovah èn fa a sani disi yepi en?

⁴ Fa Noa ben kon sabi Yehovah? Sensi a ten di den fosi libisma ben de na grontapu, sma kon sabi Yehovah na dri fasi: Den ben luku den sani di Gado meki, den ben leri sani fu tra anbegiman fu Gado èn den ben ondrofeni fa Gado blesi den fu di den gi yesi na en (Yes. 48:18). Te Noa ben e luku den sani di Gado meki, dan a ben e si furu buweisi taki Gado de trutru. Ma a ben kon sabi den fasi fu en tu. Fu eksempre, a ben kon frustan taki Yehovah abi bun furu krakti èn taki en na a tru Gado (Rom. 1:20). A sani disi yepi Noa fu kon abi wan tranga bribi na ini Gado.

5. Fa Noa kon sabi san Gado wani gi libisma?

⁵ Bijbel e taki dati bribi „e kon baka te wan sma yere a boskopu” (Rom. 10:17). Fa Noa yere sani fu Yehovah? A no de fu taki dati a leri furu fu den famiri fu en. Wan fu den sma dati na en papa Lamek di ben abi wan tranga bribi èn di ben gebore kaba fosi Adam dede. (Luku a prenki na a bigin fu na artikel.) Tra sma di yepi Noa ben de en granpapa Metusala nanga en afo Yered di dede 366 yari baka di Noa gebore (Luk. 3:36, 37). * Kande na den man disi nanga den wefi fu den leri Noa taki na Yehovah meki libisma, taki a wani taki den meki pikin fu furu grontapu èn taki den musu dini en. Noa leri tu taki Adam nanga Eva trangayesi Yehovah èn a ben kan si sortu takru bakapisi a bosroiti fu den tyari kon (Gen. 1:28; 3:16-19, 24). Noa ben lobi san a leri èn dati meki a bigin dini Yehovah.​—Gen. 6:9.

6, 7. Fa a howpu di Noa ben abi tranga en bribi?

⁶ Wan sma en bribi e kon moro tranga te a abi howpu. Sobun, prakseri fa a bribi fu Noa ben kon moro tranga di a kon sabi taki en nen ben e gi sma howpu. En nen wani taki „Rostu” noso „Trowstu” (Gen. 5:29). Yehovah ben meki Lamek taki disi fu en manpikin Noa: „A wan disi [Noa] o meki wi kisi trowstu fu . . . a pina di wi e pina fu wroko a gron di Yehovah fluku.” Noa ben abi a howpu taki Gado ben o meki sani kon bun baka. Neleki Abel nanga Heinok di ben libi fosi en, a ben abi a bribi taki wan „pikin” ben o masi na ede fu a sneki.​—Gen. 3:15.

⁷ Noa no ben frustan ala sani fu a pramisi fu Gado di skrifi na Genesis 3:15. Ma a ben e frustan taki a profeititori disi ben e gi sma a howpu taki sani ben o kon bun baka. Heinok ben e preiki wan srefi sortu boskopu. A ben taki dati Yehovah ben o pori den ogrisma (Yud. 14, 15). A no de fu taki dati a boskopu fu Heinok, di o kon tru wan lasti leisi na ini Armagedon, ben e tranga a bribi nanga a howpu fu Noa.

8. Fa a sabi di Noa ben sabi Gado yepi en?

⁸ Fa a sabi di Noa ben sabi Gado yepi en? Fu di Noa ben kon sabi Yehovah, meki a ben abi bribi nanga koni. Disi yepi en fu no du sani di ben o meki Yehovah firi sari. Fu eksempre, Noa „ben e waka nanga a tru Gado”, a no ben e waka noso moksi nanga ogrisma. Den ogri yeye di ben de na grontapu na a ten dati ben abi furu makti èn den ben e du wan lo kefalek sani. A kan taki disi ben meki taki den sma ben wani anbegi den  srefi. Ma Noa no ben meki den ogri yeye disi kori en (Gen. 6:1-4, 9). Boiti dati, Noa ben sabi taki Yehovah wani taki na libisma musu meki pikin furu grontapu (Gen. 1:27, 28). Sobun, di den ogri yeye teki uma fu meki pikin nanga den, dan Noa ben sabi taki a sani dati no ben bun. Disi ben de moro krin gi en di a si taki den pikin dati no ben de leki ala tra pikin, fu di den ben moro bigi èn moro tranga. Te fu kaba Yehovah taigi Noa taki a ben o tyari wan frudu di ben o kiri ala ogri sma na grontapu. Fu di Noa ben bribi a sani disi, meki a bow wan ark di kibri en nanga en osofamiri.​—Hebr. 11:7.

9, 10. Fa wi kan kon abi bribi neleki Noa?

⁹ Fa wi kan kon abi bribi neleki Noa? A prenspari fu studeri Gado Wortu bun èn fu lobi den sani di wi e leri. Boiti dati, wi musu meki Gado Wortu kenki wi èn wi musu gebroiki en fu teki bun bosroiti (1 Petr. 1:13-15). Te wi e du dati, dan a bribi nanga a koni di Gado e gi wi o kibri wi gi den triki fu Satan èn den o yepi wi fu no teki a denki fu grontapu abra (2 Kor. 2:11). Sma di abi a denki fu grontapu lobi ogridu nanga hurudu èn den e du san a sondu skin wani (1 Yoh. 2:15, 16). Den no e bribi taki a bigi dei fu Yehovah de krosibei. Efu wi no abi wan tranga bribi, dan wi srefi kan bigin denki so. Wi no musu frigiti taki di Yesus ben e agersi a ten fu wi nanga a ten fu Noa, a no ben e taki fa sma ben e du ogri nanga hurudu. Ma a ben sori taki sma ben poti prakseri na den aladei sani, na presi fu dini Gado.​—Leisi Mateyus 24:36-39.

¹⁰ Aksi yusrefi: ’A fasi fa mi e libi e sori taki mi sabi Yehovah trutru? A bribi fu mi e meki taki mi e du san Yehovah feni bun èn a e meki taki mi e leri tra sma san Gado e aksi fu den?’ Den piki di yu e gi o yepi yu fu sabi efu yu srefi e waka nanga a tru Gado, neleki Noa.

11. (a) San a lobi di Danièl ben abi gi Gado di a ben yongu e leri wi fu en papa nanga mama? (b) Sortuwan fu den fasi fu Danièl yu ben o wani abi?

¹¹ Fa Danièl ben kon sabi Yehovah? A musu fu de so taki Danièl en papa nanga mama leri en fu lobi Yehovah nanga en Wortu. A ben lobi Yehovah en heri libi. Srefi di a ben kon owru a ben e studeri den Santa Buku fu Bijbel fayafaya (Dan. 9:1, 2). Danièl ben sabi Yehovah heri bun. Boiti dati, a ben sabi ala den sani di Yehovah du gi den Israelsma. Wi kan si disi na ini Danièl 9:3-19 pe a profeiti ben e begi nanga sakafasi èn nanga wan krin ati. A ben o bun fu leisi a begi disi èn fu denki dipi fu en. Aksi yusrefi: ’San a begi disi e leri mi fu Danièl?’

12-14. (a) Fa Danièl sori taki a ben abi a koni fu Gado? (b) Fa Yehovah blesi Danièl fu di a ben abi a deki-ati fu tan dini en?

¹² Fa a sabi di Danièl ben sabi Gado yepi en? Gi wan Dyu di ben wani gi yesi na Yehovah, a ben muilek fu libi na mindri den Babilonsma di ben e anbegi falsi gado. Fu eksempre, Yehovah ben taigi den Dyu: „Un no musu meki nowan dyugudyugu na ini a foto pe mi meki unu go leki katiboman” (Yer. 29:7). Ma na a srefi ten a ben wani taki den Dyu ben musu anbegi en wawan (Eks. 34:14). San yepi Danièl fu gi yesi na ala tu wet? A koni di Gado ben gi en yepi en fu sabi taki a ben musu gi yesi na Yehovah fosi, èn baka dati na libisma. Hondrohondro yari bakaten, Yesus leri sma a srefi sani disi.​—Luk. 20:25.

¹³ Luku san Danièl du di sma meki wan wet taki 30 dei langa nowan sma ben mag begi wan tra gado noso wan tra sma boiti a kownu. (Leisi Danièl 6:7-10.) Danièl ben kan taki dati 30 dei no langa. Ma a no meki wan wet fu libisma tapu en fu anbegi Gado.  Danièl ben kan begi Yehovah sondro taki tra sma si en. Ma a ben sabi taki furu sma ben sabi taki a ben e begi Gado ala dei. Sobun, aladi Danièl ben kan lasi en libi, toku a bosroiti fu begi pe ala sma ben kan si en. A no ben wani gi sma a denki srefi taki a tapu fu dini Yehovah.

¹⁴ Yehovah blesi Danièl fu di a ben abi a deki-ati fu tan dini en. A du wan wondru so taki den lew no kiri Danièl. Disi meki taki sma na ini a heri Gran Kownukondre Media nanga Persia kon yere fu Yehovah.​—Dan. 6:25-27.

15. Fa wi kan kon abi bribi neleki Danièl?

¹⁵ Fa wi kan kon abi bribi neleki Danièl? Efu wi wani abi wan tranga bribi, dan wi no musu leisi Bijbel nomo. Ma wi musu frustan san wi e leisi (Mat. 13:23). Wi wani kon sabi fa Yehovah e denki fu sani. Dati meki wi musu denki dipi fu san wi e leisi. Wan tra prenspari sani na taki wi musu abi a gwenti fu begi nanga wi heri ati, spesrutu te wi e kisi tesi noso te wi abi problema. Te wi e begi, dan wi musu abi a bribi taki Yehovah de klariklari fu gi wi koni nanga krakti.​—Yak. 1:5.

16, 17. Fa Yob ben kon sabi Gado?

¹⁶ Fa Yob ben kon sabi Yehovah? Yob no ben de wan Israelsma. Ma a ben de wan fara famiri fu Abraham, Isak nanga Yakob. Èn Yehovah ben leri den man disi suma na en èn san a wani gi libisma. Wi no sabi fa, ma Yob ben kon sabi furu fu den sani disi tu (Yob 23:12). A ben taigi Yehovah: „Mi ben yere fu yu” (Yob 42:5). Boiti dati, Yehovah srefi ben taki dati Yob ben taki sani fu en di tru.​—Yob 42:7, 8.

¹⁷ Yob ben kon sabi den fasi fu Yehovah di a luku den sani di Yehovah meki (Yob 12:7-9, 13). Bakaten Elihu nanga Yehovah ben e taki fu sani di Yehovah meki fu leri Yob taki libisma no de noti te yu e agersi den nanga Gado (Yob 37:14; 38:1-4). Den wortu fu Yehovah naki Yob ati èn dati meki Yob taigi en nanga sakafasi: „Mi kon si taki yu man du ala sani, èn nowan sma man tapu yu fu du san yu abi na prakseri. . . . Mi e sidon na doti èn na ini asisi fu sori taki mi e sari.”​—Yob 42:2, 6.

18, 19. Fa Yob sori taki a ben sabi Yehovah trutru?

 ¹⁸ Fa a sabi di Yob ben sabi Gado yepi en? Yob ben frustan krin san Gado feni bun èn san a no feni bun. A ben sabi Yehovah bun èn dati meki a ben du a wani fu en. Fu eksempre, Yob ben sabi taki efu a no lobi tra sma, a no kan taki dati a lobi Gado (Yob 6:14). A no ben feni taki a bun moro tra sma, ma a ben libi nanga den neleki den ben de en eigi famiri, awinsi den ben gudu noso pôti. Yob taki: „A sma di meki mi na ini mi mama bere, meki den tu, a no so?” (Yob 31:13-22) Aladi Yob ben gudu èn aladi a ben abi makti, toku a no kisi heimemre èn a no ben feni taki tra sma ben lagi moro en. Iya, Yob ben de heri tra fasi leki furu gudu nanga makti sma na ini a ten disi.

¹⁹ Yob no ben wani taki tra sani teki a presi fu Yehovah. A ben sorgu srefi taki den gudu fu en no ben kon prenspari moro na anbegi fu Yehovah. A ben sabi taki efu dati pasa, a ben o drai baka gi „a tru Gado na hemel”. (Leisi Yob 31:24-28.) A ben e si a trowlibi leki wan santa sani fu di te wan man nanga wan uma e trow, den e meki wan pramisi na fesi Gado. Yob ben meki wan frubontu srefi nanga en ai fu no luku wan tra uma na wan fasi di no fiti (Yob 31:1). Hori na prakseri taki na a ten dati Gado ben e gi pasi taki wan man ben kan abi moro leki wán wefi. Sobun, Yob ben kan teki ete wan wefi efu a ben wani. * A kan taki Yob ben sabi fu a fosi trow di Gado ben seti na ini Eden èn soleki fa a sori a ben bosroiti fu libi tu nanga wán uma (Gen. 2:18, 24). Sowan 1600 yari bakaten Yesus leri sma a srefi sani. A ben sori taki wan man mag trow nanga wán uma nomo èn den no mag abi seks nanga nowan tra sma.​—Mat. 5:28; 19:4, 5.

20. Te wi sabi Yehovah èn te wi sabi fa a e denki fu sani, dan fa dati o yepi wi fu sabi suma wi kan teki leki mati èn san wi kan du fu meki prisiri?

²⁰ Fa wi kan kon abi bribi neleki Yob? Leki fa wi ben taki kaba, wi musu kon sabi Yehovah bun èn wi musu meki a sabi dati tiri wi na ini ala san wi e du. Fu eksempre, a psalm skrifiman David taki dati „efu wan sma lobi ogridu, dan Gado no lobi en kwetikweti”. A warskow wi tu fu no bumui „nanga sma di lobi lei”. (Leisi Psalm 11:5; 26:4.) San den tekst disi e leri yu fu a fasi fa Gado e denki? Fa disi musu yepi yu fu kon sabi san moro prenspari? Fa den tekst disi o yepi yu fu kon sabi san yu kan luku tapu Internet, suma yu kan teki leki mati, sortu felem yu kan luku èn sortu poku yu kan arki? Den piki fu yu o yepi yu fu si o bun yu sabi Yehovah. Fu di wi no wani meki na ogri grontapu disi abi krakti na wi tapu, meki wi musu leri fa fu gebroiki wi „frustan fu man si sani krin”. Na so fasi wi o sabi san bun èn san no bun. Ma wi o sabi tu san na wan koni bosroiti èn san na wan don bosroiti.​—Hebr. 5:14; Ef. 5:15.

21. San o yepi wi fu „frustan ala sani” di de fanowdu fu prisiri wi hemel Tata?

²¹ Fu di Noa, Danièl nanga Yob suku Yehovah nanga den heri ati, meki a yepi den fu kon sabi en bun. A yepi den fu „frustan ala sani” di de fanowdu fu kan prisiri en. Na eksempre fu den e sori krin taki te wi e du sani soleki fa Yehovah wani, dan wi o abi wan koloku libi (Ps. 1:1-3). Aksi yusrefi: ’Mi sabi Yehovah bun neleki fa Noa, Danièl nanga Yob ben sabi en?’ Fu taki en krin, wi kan kon sabi Yehovah moro bun leki den man disi fu di na ini a ten disi wi leri moro fu en (Odo 4:18). Sobun, studeri Bijbel bun. Denki dipi fu san yu e leri. Èn begi Gado fu gi yu en santa yeye. Te yu e du disi, dan yu o kon moro krosibei na yu hemel Tata. Boiti dati, yu o waka nanga koni na ini na ogri grontapu disi.​—Odo 2:4-7.