1. Fa wan Samaria man sori taki a ben de nanga tangi di Yesus dresi en?

DEN tin man ben abi wan bigi problema. Den ben abi gwasi èn a ben gersi leki den no ben o kon betre moro. Wan dei, den si Yesus, a Bigi Leriman, ma den ben tanapu farawe. Den ben yere taki Yesus ben e dresi ala sortu siki èn den ben de seiker taki a ben o man dresi den tu. Dati meki den bari: „Yesus, Leriman, abi sari-ati gi wi!” Yesus dresi ala den tin man. A no de fu taki dati den alamala ben de nanga tangi fu a bun di Yesus ben du gi den. Ma wan fu den nomo sori taki a ben de nanga tangi *, fu di a drai kon baka fu taki Yesus tangi. A Samaria man disi di ben kon betre ben gi Gado glori „nanga wan tranga sten”.​—Luk. 17:12-19.

2-3. (a) Fa a du kon taki son leisi wi no e sori taki wi de nanga tangi? (b) San wi o luku na ini na artikel disi?

² Neleki a Samaria man, wi wani sori taki wi de nanga tangi te sma du wi wan bun. Ma son leisi wi e frigiti fu sori sma taki wi de nanga tangi.

³ Na ini na artikel disi, wi o luku fu san ede a prenspari fu sori taki wi de nanga tangi. Wi o luku wan tu eksempre fu sma na ini Bijbel di ben de nanga tangi èn fu sma di no ben sori warderi. Wi o luku tu fa wi kan sori taki wi de nanga tangi.

4-5. Fu san ede wi musu sori taki wi de nanga tangi?

⁴ Ala ten Yehovah e sori warderi gi den sani di wi e du gi en. Wan fasi fa a e du disi na fu blesi den wan di e du san a feni bun (2 Sam. 22:21; Ps. 13:6; Mat. 10:40, 41). Bijbel e gi wi a deki-ati fu „teki na eksempre fu Gado leki lobi pikin” (Ef. 5:1). Sobun, wan prenspari reide fu san ede wi e sori taki wi de nanga tangi, na fu di wi wani teki na eksempre fu Yehovah.

⁵ Meki wi luku wan tra reide fu san ede wi musu sori trawan taki wi de nanga tangi. Wi e firi bun te wi sabi taki trawan e warderi den sani di wi du gi den. Ma te wi e sori warderi gi trawan, dan den e firi bun. Te wi e taki wan sma tangi gi den sani di a gi wi noso di a du gi wi, dan wi e meki a sma sabi taki a yepi wi trutru. A bakapisi o de taki wi nanga a sma o tron moro bun mati.

6. Fu san ede wi kan agersi den sani di wi e taki fu gi trawan tangi, nanga gowtu apra?

⁶ A bun fu taki trawan tangi gi den bun sani di den e du. Bijbel e taki: „Sani di wan sma taki na a yoisti ten, de leki gowtu apra na ini solfru koba” (Odo 25:11). Prakseri fa wan gowtu apra na ini wan solfru koba moi èn o furu waarde a abi. A no de fu taki dati yu ben o firi bun efu yu ben o kisi so wan kado! Na so sma e firi tu te yu e taki den tangi. Wan tra sani na taki wan gowtu apra e tan fu wan langa pisi ten. Na so a de tu taki te yu e gi trawan tangi, dan nofo tron den no o frigiti dati.

7. Soleki fa Psalm 26:6-8 e sori, dan fa David sori taki a ben de nanga tangi èn fa tra psalm skrifiman sori dati tu?

⁷ Furu fu den futuboi fu Gado na ini  owruten ben sori taki den de nanga tangi. Wan fu den na David. (Leisi Psalm 26:6-8.) A ben abi furu warderi gi a tru anbegi èn a ben du sani fu sori dati. A gi furu fu den gudu fu en fu bow a tempel. Den bakapikin fu Asaf ben skrifi psalm noso prèisesingi gi Yehovah fu sori taki den de nanga tangi. Na ini wan fu den singi den e taki Gado tangi gi ’den bigi sani di a e du’ (Ps. 75:1). A de krin taki David nanga den bakapikin fu Asaf ben wani sori Yehovah o furu warderi den ben abi gi den blesi di den ben kisi fu en. Fa yu kan teki na eksempre fu den psalm skrifiman disi?

8-9. Fa na apostel Paulus ben sori warderi gi den brada nanga sisa, èn san ben de a bakapisi?

⁸ Na apostel Paulus ben warderi den brada nanga sisa èn a ben sori dati te a ben taki fu den. Ala ten te a ben e begi a ben taki Yehovah tangi gi den. A ben du dati tu na ini den brifi di a ben skrifi. Na ini den fosi 15 vers fu Romesma kapitel 16, Paulus e kari a nen fu 27 brada nanga sisa. Na ini a brifi disi Paulus e taki fu Preska nanga Akwila di „ben kan lasi den libi” fu en ede èn a e taki fu Feibe di ben „yepi furu sma”. A ben e prèise den brada nanga sisa disi di a ben lobi èn di ben wroko tranga.​—Rom. 16:1-15.

⁹ Paulus ben sabi taki den brada nanga sisa fu Rome ben de sondusma di e meki fowtu. Toku a ben taki fu den bun fasi fu den na a kaba fu a brifi di a skrifi gi den. Prakseri fa den brada nanga sisa ben e firi di den leisi a brifi fu Paulus na ini a gemeente! A no de fu taki dati a sani disi meki taki den tron moro bun mati fu Paulus. Yu abi a gwenti fu taki den brada nanga sisa na ini yu gemeente tangi gi den bun sani di den e taki noso du?

10. San wi e leri te wi e luku fa Yesus sori warderi gi den bakaman fu en?

¹⁰ Na ini den boskopu di Yesus ben abi gi den gemeente na ini Pikin Asia, a sori warderi gi a wroko di den bakaman fu en ben e du. Fu eksempre, a bigin a boskopu di a ben abi gi a gemeente na ini Tiatira nanga den wortu disi: „Mi sabi san yu e du èn mi sabi taki yu abi lobi nanga bribi. Mi sabi fa yu e du a diniwroko fu yu. Mi sabi taki yu e horidoro èn taki den sani di yu e du now, bigi moro den sani di yu ben du fosi” (Openb. 2:19). Boiti taki Yesus taki dati den ben e du moro leki san den ben du fosi, a prèise den tu gi den bun fasi fu den. Aladi Yesus ben gi a gemeente piri-ai, toku a prèise den fosi a du dati èn a gi den deki-ati na a kaba (Openb. 2:25-28). Prakseri o furu makti Yesus abi leki edeman fu a gemeente. A no abi fu taki wi tangi gi a wroko di wi e du gi en. Ma toku a e du dati. Yesus na wan moi eksempre gi owruman.

11. Fa Esau ben si santa sani soleki fa wi leisi na Hebrewsma 12:16?

¹¹ A sari taki son sma na ini Bijbel no ben sori taki den de nanga tangi. Fu eksempre, Esau en papa nanga mama ben lobi Yehovah èn den ben e lespeki en. Ma Esau srefi no ben abi warderi gi santa sani. (Leisi Hebrewsma 12:16.) Fa wi du sabi taki a no ben de nanga tangi? Sondro fu denki Esau seri a reti di a ben abi leki a fosi pikin gi wan preti nyanyan (Gen. 25:30-34). Bakaten a ben hati Esau taki a ben du a sani disi. Ma fu di a no sori warderi gi san a ben abi, meki a no ben mag krutu di a no kisi den blesi di a ben o kisi leki fosi pikin.

12-13. Fa den Israelsma sori taki den no ben de nanga tangi èn san ben de a bakapisi?

 ¹² Den Israelsma ben abi furu reide fu sori taki den de nanga tangi. Yehovah ben puru den na ini katibo baka di a tyari tin rampu kon tapu Egepte. Baka dati a frulusu den di a kiri a heri legre fu Egepte na ini a Redi Se. Den Israelsma ben singi prèisesingi gi Yehovah fu taki en tangi. Ma den tan sori taki den de nanga tangi?

¹³ Di den Israelsma kisi tra problema, den frigiti ala den bun sani di Yehovah ben du gi den. Den bigin sori taki den no de nanga tangi (Ps. 106:7). San den du? „Ala den Israelsma bigin krutu nanga Moses èn nanga Aron.” Fu taki en leti den ben krutu nanga Yehovah (Eks. 16:2, 8). A ben hati Yehovah taki en pipel no ben de nanga tangi gi den sani di a du gi den. A taki dati ala den Israelsma di no ben sori lespeki gi en ben o dede na ini a sabana, boiti Yosua nanga Kaleb (Num. 14:22-24; 26:65). Meki wi go luku san kan yepi wi fu no meki a srefi fowtu leki den èn fa wi kan teki na eksempre fu sma di ben de nanga tangi.

14-15. (a) Fa trowpatna kan sori warderi gi makandra? (b) Fa papa nanga mama kan leri den pikin fu den fu de nanga tangi?

¹⁴ Na ini na osofamiri. Ala sma na ini na osofamiri e kisi wini te den e sori warderi gi makandra. O moro trowpatna e sori warderi gi makandra, o moro den o lobi makandra. A o moro makriki gi den tu fu gi makandra pardon te den meki wan fowtu. Wan masra di e warderi en wefi e si den bun sani di en wefi e taki èn e du. A no e si den wawan, ma a e „opo tanapu èn a e prèise en” (Odo 31:10, 28). Na a tra sei wan wefi musu abi a gwenti fu taigi en masra sortu sani a e warderi fu en.

¹⁵ Papa nanga mama, fa unu kan leri den pikin fu unu fu de nanga tangi? Hori na prakseri taki den pikin fu unu e luku san unu e taki èn san unu e du. Dati meki yu musu de wan bun eksempre gi den. Yu musu taki den tangi te den du wan sani gi yu. Boiti dati, leri den pikin fu yu fu gi sma tangi te den du wan sani gi den. Yepi den fu frustan taki den no musu du en nomo fu di yu taigi den, ma fu di den de  nanga tangi trutru. Leri den tu taki den kan meki wan sma firi bun te den e sori warderi gi en. Fu eksempre, wan yongu uma di nen Clary e taki: „Di mi mama ben abi 32 yari, dan wantronso en wawan ben musu sorgu gi mi nanga den tu brada fu mi. Di mi srefi tapu 32 yari, mi bigin denki fa a ben hebi gi mi mama fu kweki wi en wawan di a ben abi a yari dati. Dati meki mi taigi en tangi gi ala sani di a du gi mi nanga den brada fu mi. No so langa pasa a taigi mi taki den wortu fu mi naki en ati. Furu leisi a e denki den wortu fu mi èn ala ten den e meki a firi bun.”

16. Gi wan eksempre di e sori fa wi kan gi trawan deki-ati te wi e sori warderi gi den.

¹⁶ Na ini a gemeente. Te wi e sori warderi gi den brada nanga sisa fu wi, dan dati e gi den deki-ati. Fu eksempre, Jorge, wan owruman di abi 28 yari kisi wan seryusu siki. Wán mun langa a no ben man go na den konmakandra. Srefi di a bigin go na den konmakandra baka, a no ben man hori nowan lezing. Jorge e taki: „Mi ben firi leki mi no ben warti noti fu di mi no ben man du so furu èn mi no ben man tyari den frantwortu fu mi na ini a gemeente. Ma baka wan konmakandra wan brada taigi mi: ’Mi wani taki yu tangi fu di yu de wan bun eksempre gi mi osofamiri. Wi lobi den lezing di yu hori na ini den yari di pasa. Den yepi wi fu kon abi wan tranga bribi.’ A sani disi naki mi ati so te taki mi bigin krei. A sani di a brada taki na soifri san mi ben abi fanowdu.”

17. Kolosesma 3:15 e taki dati wi musu sori taki wi de nanga tangi. Fa wi kan sori taki wi e warderi den furu sani di Yehovah e gi wi?

¹⁷ Gi den furu sani di Gado gi wi. Yehovah e gi wi furu sani di e yepi wi fu abi wan tranga bribi. Fu eksempre, a gi wi den konmakandra, den tijdschrift nanga den website fu wi. Oiti yu yere wan lezing, yu leisi wan artikel, noso yu luku wan broadcast programa, dan yu taki: ’Na disi mi ben abi fanowdu’? Fa wi kan sori Yehovah taki wi de nanga tangi? (Leisi Kolosesma 3:15.) Wan fasi na te wi abi a gwenti fu taigi en na ini begi taki wi de nanga tangi gi den moi kado di a e gi wi.​—Yak. 1:17.

18. Fa wi kan sori taki wi e warderi a Kownukondre zaal fu wi?

¹⁸ Wi e sori warderi gi Yehovah tu te wi e krin wi konmakandra presi èn te wi e sorgu taki a netjes. Wi musu abi a gwenti  fu yepi krin a Kownukondre zaal. Den wan di e yepi nanga a geluid musu luku bun taki den no broko den apparaat. Te wi e sorgu wi Kownukondre zaal bun, dan a presi o tan moi èn den brada no o abi fu meki sani ala yuru. Na a fasi disi moro moni o de fu bow Kownukondre zaal na heri grontapu noso fu seti den kon bun baka.

19. San na ondrofenitori fu wan kring-opziener nanga en wefi e leri wi?

¹⁹ Gi den wan di e wroko tranga. Te wi e taki wan sma tangi, dan a sma kan bigin denki tra fasi fu den problema di a abi. Luku a tori fu wan kring-opziener nanga en wefi. Wan leisi di a ben de winter den wroko heri dei na ini a preikiwroko. Di den doro oso den ben weri. A ben kowru so te taki a sisa sribi nanga a dyakti fu en. A tra mamanten a taigi en masra taki a no ben o man du a kringwroko moro. A srefi mamanten dati a sisa kisi wan brifi fu a bijkantoro. Na ini a brifi den brada ben prèise en gi a wroko di a ben e du èn a fasi fa a ben e horidoro. Den taigi en taki den ben frustan o muilek a ben de fu go ala wiki na wan tra presi. A masra e taki: „Den sani di a leisi naki en ati so te, taki noiti moro a taki dati a ben wani tapu nanga a kringwroko. Fu taki en leti, wan tu leisi na en gi mi deki-ati di mi ben wani tapu nanga a wroko disi.” A trowpaar disi du a kringwroko bijna 40 yari.

20. San wi musu du ibri dei èn fu san ede?

²⁰ Ibri dei wi musu meki muiti fu sori taki wi de nanga tangi. Den sani di wi e taki noso den sani di wi e du fu gi wan sma tangi kan yepi en fu no broko en ede tumusi nanga den problema di a e kisi na ini a grontapu disi pe sma no de nanga tangi. Wi o kon tron moro bun mati tu fu sma te wi abi a gwenti fu sori warderi gi den. Ma san moro prenspari na taki wi o teki na eksempre fu wi Papa, Yehovah, di ala ten e sori warderi gi den sani di wi e du gi en.