1. San wan sisa musu aksi ensrefi te a wani trow?

YESUS KRESTES, na a ede fu ala Kresten èn a no e meki fowtu. Ma te wan Kresten uma trow, dan a o abi fu saka ensrefi na ondro en masra di e meki fowtu. Son leisi a sani disi no makriki. Sobun, te wan uma e prakseri fu trow, a musu aksi ensrefi: ’San e sori taki a brada disi o de wan bun osofamiri-edeman? Na anbegi fu Yehovah de na a fosi presi na ini en libi? Ma efu na anbegi no de na a fosi presi na ini en libi, dan mi kan fruwakti taki a o de wan bun osofamiri-edeman te wi trow?’ A no de fu taki dati a sisa musu aksi ensrefi tu: ’Sortu moi fasi mi abi di kan meki a trowlibi waka bun? Mi abi pasensi èn mi lobi fu gi sma sani? Mi de wan bun mati fu Yehovah?’ (Preik. 4:9, 12) Efu wan sisa teki bun bosroiti fosi a trow, dan en trowlibi o waka bun èn a o de koloku.

2. San wi o luku na ini na artikel disi?

² Milyunmilyun Kresten sisa de wan bun eksempre na ini a fasi fa den e saka densrefi na ondro den masra. Wi wani prèise den fu dati. A de wan bigi grani fu dini Yehovah makandra nanga den sisa disi. Na ini na artikel disi wi o piki dri aksi: (1) Sortu sani kan meki en muilek gi wefi fu saka densrefi na ondro den masra? (2) Fu san ede wan Kresten wefi o wani saka ensrefi na ondro en masra? (3) San Kresten man nanga uma kan leri fu na eksempre fu Yesus, Abigayil, nanga Maria, di ben de a wefi fu Yosef nanga a mama fu Yesus?

3. Fu san ede ala trowpaar e kisi problema?

³ A trowlibi na wan kefalek moi kado di Gado gi libisma. Ma fu di wi na sondu sma, meki Gado Wortu e warskow sma  di trow taki „den o kisi benawtu na ini den libi” (1 Kor. 7:28; 1 Yoh. 1:8). Kon meki wi go luku wan tu fu den sani di kan meki en muilek gi wan wefi fu saka ensrefi na ondro en masra.

4. Fu san ede son frow kan firi leki den e lagi densrefi te den e saka densrefi na ondro den masra?

⁴ Kande a fasi fa wan frow kweki kan meki a firi leki a e lagi ensrefi te a e saka ensrefi na ondro en masra. Marisol di e libi na ini Amerkankondre e taki: „Pe mi kweki, sma ben gwenti taigi umasma taki noiti den musu lagi densrefi gi mansma. Mi sabi taki Yehovah poti mansma leki edeman fu na osofamiri èn taki den frow musu saka densrefi na den ondro. Mi sabi tu taki Yehovah wani taki wan man musu abi lespeki gi a frow fu en. Toku a no makriki gi mi ala ten fu saka misrefi na ondro mi masra.”

5. Sortu fowtu denki son mansma abi fu umasma?

⁵ Na a tra sei, a kan taki wan frow trow nanga wan man di feni taki umasma no prenspari leki mansma. Wan sisa di nen Yvon èn di e libi na ini Zuid-Amerika e taki: „Na ini a libimakandra fu wi, man gwenti nyan fosi èn baka dati den umasma e nyan. Yonguyongu kaba den meisje musu leri bori èn krin oso, ma den boi no abi fu du noti, fu di den mama nanga sisa e du ala sani gi den èn den e taigi den tu taki den na ’kownu na ini na oso’.” Wan sisa di nen Yingling èn di e libi na ini Asia e taki: „Na ini Sneisitongo sma abi wan sani e taki dati umasma no abi fu koni. Umasma meki fu du osowroko. Den no mag taigi den masra fa den e denki fu wan sani.” Wan man di e denki so no e sori lobi èn a no e du san Bijbel e taki. Na presi fu dati, a e hebi a libi gi a frow fu en. A no e teki na eksempre fu Yesus èn Yehovah no o feni en bun.​—Ef. 5:28, 29; 1 Petr. 3:7.

6. San wefi musu du fu tan bun mati fu Yehovah?

⁶ Soleki fa wi ben si na ini a tra artikel, Yehovah e fruwakti taki Kresten masra e yepi den osofamiri fu anbegi en, taki den e sori den taki den e broko den ede nanga den, èn taki den e sorgu gi den (1 Tim. 5:8). Ma aladi wan sisa di trow abi furu fu du, toku a musu meki ten ibri dei fu leisi Gado Wortu, fu denki dipi fu en, èn fu begi Yehovah nanga en heri ati. Ma a no ala ten a sani disi makriki. Fu di wan wefi abi furu fu du, meki a kan firi leki a no abi ten fu du den sani disi noso taki a weri tumusi. Toku a prenspari taki a meki ten gi den sani disi. Fu san ede? Fu di Yehovah wani taki ibriwan fu wi musu tron wan mati fu en èn musu tan wan mati fu en.​—Tori 17:27.

7. San o meki en moro makriki gi wan wefi fu saka ensrefi na ondro en masra?

⁷ Son leisi, wan wefi abi fu du tranga muiti fu saka ensrefi na ondro en masra di e meki fowtu. Ma a o moro makriki gi wan wefi fu saka ensrefi na ondro en masra te a e frustan fu san ede Bijbel e taki dati a musu du dati èn te a wani du dati tu.

8. Fu san ede wan Kresten wefi o wani saka ensrefi na ondro en masra soleki fa Efeisesma 5:22-24 e sori?

⁸ Wan Kresten wefi o wani saka ensrefi na ondro en masra, fu di na dati Yehovah e aksi fu en. (Leisi Efeisesma 5:22-24.) A e frutrow en hemel Tata fu di a sabi taki ala san a e du, a e du nanga lobi. Te Yehovah e aksi en fu du wan sani, dan dati na fu en eigi bun.​—Deut. 6:24; 1 Yoh. 5:3.

9. San e pasa te wan sisa e lespeki en masra leki ede fu na osofamiri?

⁹ A grontapu disi e leri umasma taki den no musu hori densrefi na den wet fu  Yehovah èn taki den e lagi densrefi te den e saka densrefi na ondro den masra. A no de fu taki dati sma di e taki den sani disi no sabi a Gado fu wi di lobi wi. Noiti Yehovah ben o aksi den umapikin fu en di a lobi so te, fu du wan sani di ben o lagi den. Te wan sisa e meki muiti fu du san Yehovah taki, dan a e yepi fu meki freide de na ini na osofamiri (Ps. 119:165). A sani dati bun gi en masra, a bun gi en, èn a bun gi den pikin fu den.

10. San wi kan leri fu den sani di Carol taki?

¹⁰ Wan sisa di e saka ensrefi na ondro en masra di e meki fowtu, e sori taki a lobi Yehovah èn taki a e lespeki en fu di en na a sma di poti en masra leki edeman. Carol di e libi na ini Zuid-Amerika e taki: „Mi sabi taki mi masra o meki fowtu. Ma mi sabi tu taki den sani di mi e taki èn den sani di mi e du te a meki wan fowtu, e sori fa mi e denki fu a grani di mi abi fu de wan mati fu Yehovah. Dati meki mi e tan pruberi fu saka misrefi fu di mi wani taki mi hemel Tata breiti nanga mi.”

11. San e yepi sisa Aneese fu gi en masra pardon èn san wi e leri fu den sani di a taki?

¹¹ A kan hebi gi wan wefi fu tan sori lespeki gi en masra èn fu saka ensrefi na en ondro te a feni taki a masra no e hori den firi fu en na prakseri noso taki a no e broko en ede nanga a fasi fa a e denki. Ma luku san sisa Aneese di trow e du te dati pasa: „Mi e du muiti fu no atibron. Mi e hori na prakseri taki wi alamala e meki fowtu. Mi wani du muiti fu gi pardon nanga mi heri ati neleki fa Yehovah e gi pardon. Te mi gi pardon, dan mi e firi moro bun” (Ps. 86:5). A o moro makriki gi wan wefi fu saka ensrefi na ondro en masra, te a de klariklari fu gi pardon.

12. Sortu eksempre de fu feni na ini Bijbel?

¹² Son sma e denki taki sakafasi na wan swakifasi. Ma a sani dati tru? Furu eksempre de na ini Bijbel di e sori taki disi no de so. Kon meki wi go luku na eksempre fu Yesus, Abigayil, nanga Maria.

13. (a) Fu san ede Yesus e saka ensrefi na ondro Yehovah? (b) Fa na eksempre fu Yesus e sori taki sakafasi a no wan swakifasi?

¹³ Yesus ben de wan koni man èn a ben man du furu sani. Ma toku a ben e saka ensrefi  na ondro Yehovah. Efu Yesus no ben abi so furu koni, dan a no ben o man gi leri na so wan krin èn makriki fasi (Yoh. 7:45, 46). Yehovah ben sabi san Yesus ben man du. Fu dati ede a meki Yesus yepi en fu meki hemel nanga grontapu (Odo 8:30; Hebr. 1:2-4). Baka di Yesus kisi wan opobaka, Yehovah gi en „ala makti na ini hemel èn na grontapu” (Mat. 28:18). Aladi Yesus abi so furu koni, toku a e tan suku rai na Yehovah. Fu san ede? Fu di a lobi en Papa.​—Yoh. 14:31.

14. San masra kan leri fu (a) a fasi fa Yehovah e si umasma? (b) den sani di skrifi na Odo 31?

¹⁴ San mansma kan leri. Yehovah taigi umasma taki den musu saka densrefi na ondro den masra, ma dati no wani taki dati den lagi moro mansma. Yehovah srefi ben sori taki umasma prenspari gi en. Wi e si dati te wi e luku taki a teki mansma nanga umasma fu tiri makandra nanga Yesus (Gal. 3:26-29). Yehovah ben sori taki a e frutrow en Manpikin èn dati meki a gi Yesus frantwortu. Na so a de tu taki wan koni masra abi a frutrow taki en wefi man tyari frantwortu èn dati meki a e libi son sani gi en. Bijbel e taki fu difrenti sani di wan koni wefi man du. Fu eksempre, a man sorgu taki sani e waka bun na ini en oso, a sabi fa fu bai noso seri gron, èn a man du bisnis. (Leisi Odo 31:15, 16, 18.) A wefi a no wan srafu di no mag taki fa a e prakseri. Dati meki en masra e frutrow en èn a e arki san a frow abi fu taki. (Leisi Odo 31:11, 26, 27.) Te wan man e sori lespeki gi en wefi na so wan fasi, dan a frow o wani saka ensrefi na en ondro.

15. San wefi kan leri fu na eksempre fu Yesus?

¹⁵ San wefi kan leri. Yesus du bigi sani. Toku a no e firi leki a e lagi ensrefi te a e saka ensrefi na ondro Yehovah leki edeman (1 Kor. 15:28; Fil. 2:5, 6). Na so wan koni uma di e teki na eksempre fu Yesus, no feni taki a e lagi ensrefi te a e saka ensrefi na ondro en masra. A no o horibaka gi en masra soso fu di a lobi en, ma a e du en moro furu fu di a lobi Yehovah èn fu di a e lespeki en.

16. Na ini sortu muilek situwâsi Abigayil ben de, soleki fa 1 Samuel 25:2, 3, 23-28 e sori? (Luku a fowtow na tapu a kafti.)

¹⁶ Abigayil ben trow nanga wan man di nen Nabal. A man disi ben e prakseri ensrefi nomo, a ben abi bigifasi, èn a no ben de nanga tangi. Efu Abigayil ben wani komoto na ini a trowlibi dati, dan a ben kan libi David nanga den man fu en meki den kiri a masra fu en. Ma a no du dati. Na presi fu dati, a suku wan fasi fu kibri en masra nanga ala den sma di ben e libi na ini na oso fu den. Prakseri o furu deki-ati Abigayil ben musu abi fu waka go miti den 400 man fu taki fu a problema nanga David na wan lespeki fasi. A ben de klariklari fu aksi David pardon gi den sani di en masra ben du. (Leisi 1 Samuel 25:2, 3, 23-28.) David ben agri taki na Yehovah ben gebroiki a koni uma disi fu gi en rai di tapu en fu du a bigi sondu di a ben o du.

17. San masra kan leri fu a tori fu David nanga Abigayil?

¹⁷ San masra kan leri. Abigayil ben de wan koni uma. Dati meki David gebroiki en frustan èn a teki a rai di na uma ben gi en. Disi ben tapu David fu du wan sani di ben kan poti en na brudu-paiman. Na so a de tu taki wan koni man o prakseri bun san en wefi e taigi en te a musu teki prenspari bosroiti. Kande en wefi e taki wan sani di kan yepi en fu no teki wan don bosroiti.

18. San wefi kan leri fu Abigayil?

¹⁸ San wefi kan leri. Wan wefi di lobi  Yehovah èn di e lespeki en, kan yepi en osofamiri, awinsi en masra a no wan Kotoigi, noso awinsi a no e libi soleki fa Bijbel e taki. A no o suku wan fasi tu fu komoto na ini a trowlibi dati. Na presi fu dati, a o tan sori lespeki gi en masra èn a o tan saka ensrefi na en ondro. Na so a kan gi en masra deki-ati fu kon leri sabi Yehovah (1 Petr. 3:1, 2). Ma awinsi a masra no e warderi a bun fasi fa a e tyari ensrefi, toku Yehovah o breiti efu a tan na en masra èn efu a tan saka ensrefi na en ondro.

19. O ten wan wefi no o gi yesi na en masra?

¹⁹ Ma wan Kresten wefi di e saka ensrefi, no o horibaka gi en masra efu a aksi en fu du wan sani di de teige den wet noso gronprakseri fu Bijbel. Kon meki wi taki dati a masra fu wan sisa no de na waarheid èn a e taigi a sisa fu lei, fu fufuru, noso fu du wan sani di Yehovah no feni bun. Ala Kresten, sosrefi sisa di trow, sabi taki na a fosi presi den musu gi yesi na Yehovah Gado. Efu a masra fu wan sisa e aksi en fu trangayesi Bijbel gronprakseri, dan a sisa musu weigri fu du dati. A musu taigi en masra krin èn na wan lespeki fasi taki a no o man du san a e aksi fu en.​—Tori 5:29.

20. Fa wi du sabi taki Maria ben de wan bun mati fu Yehovah?

²⁰ Maria ben de wan bun mati fu Yehovah. A de krin taki a ben sabi den buku fu Bijbel bun. Di a ben e taki nanga Elisabet, a mama fu Yohanes a Dopuman, dan moro leki 20 leisi, Maria taki fu sani di skrifi na ini den Hebrew Buku fu Bijbel (Luk. 1:46-55). Denki a tori disi: Aladi Maria ben meki mofo fu trow nanga Yosef, toku na engel fu Yehovah no ben go taki nanga Yosef. Na presi fu dati, na engel go taki fosi nanga Maria èn a ben taigi en taki a ben o kisi wan pikin di ben o de a Manpikin fu Gado (Luk. 1:26-33). Yehovah ben sabi Maria heri bun èn a ben de seiker taki a ben o lobi a Manpikin fu en èn taki a ben o sorgu en bun. Èn soleki fa Bijbel e sori, Maria tan wan bun mati fu Yehovah, srefi baka di Yesus dede èn kisi wan opobaka fu go na hemel.​—Tori 1:14.

21. San masra kan leri fu den sani di Bijbel e taki fu Maria?

 ²¹ San masra kan leri. Wan koni masra breiti te a wefi fu en sabi Bijbel bun. A sani dati no e meki a firi wan fasi èn a no o prakseri taki en frow wan teki en presi. A sabi taki wan frow di e frustan Bijbel nanga Bijbel gronprakseri bun, kan de wan bigi yepi gi na osofamiri. A no de fu taki dati awinsi wan frow kisi moro skoro leki en masra, toku na a masra abi a frantwortu fu teki fesi na a Osofamiri Anbegi èn fu yepi en osofamiri fu dini Yehovah.​—Ef. 6:4.

22. San wefi kan leri fu Maria?

²² San wefi kan leri. Aladi wan uma musu saka ensrefi na ondro en masra, toku a abi a frantwortu fu tranga en eigi bribi (Gal. 6:5). Dati meki a musu meki ten fu studeri Bijbel èn fu denki dipi fu san a leri. Disi o yepi en fu tan lobi Yehovah èn fu lespeki en, èn a no o si en leki wan hebi fu saka ensrefi na ondro en masra.

23. Te wan uma e saka ensrefi na ondro en masra, dan dati bun gi en, gi en osofamiri, èn gi a gemeente. Fruklari dati.

²³ Wefi di e tan saka densrefi na ondro den masra fu di den lobi Yehovah, o de moro koloku leki den wan di no e lespeki a seti disi. Den de wan bun eksempre gi yonguman nanga yongu uma. Den e yepi tu fu sorgu taki lobi nanga freide e tan na ini na osofamiri èn na ini a gemeente (Tit. 2:3-5). Na ini a ten disi, bun furu fu den sma di e dini Yehovah na umasma (Ps. 68:11). Wi alamala, mansma nanga umasma, kan yepi fu meki sani waka bun na ini a gemeente. A tra artikel o sori fa ibriwan fu wi kan du dati.