Mi lafu fu di mi no ben e si mi mati leki wan sma di e go na kerki. Mi aksi en: „San yu sabi fu Bijbel?” A no piki mi wantewante. Ma te fu kaba a taigi mi taki en mama ben de wan Yehovah Kotoigi èn taki a ben leri en wan tu sani. Fu di mi ben wani sabi moro, meki mi begi en fu fruteri mi moro.

Wi taki a heri neti. Mi mati fruteri mi taki Bijbel e taki dati Satan na a tiriman fu grontapu (Yoh. 14:30). Kande yu sabi dati yu heri libi kaba, ma mi no ben sabi dati èn a ben hari mi prakseri. Ala ten mi ben yere taki wan Gado di abi lobi e tiri grontapu. Ma mi no ben man bribi dati te mi ben e prakseri san mi ben si na ini a libi. Mi ben abi 26 yari nomo èn mi ben si furu sani di ben e gi mi broko-ede.

Mi papa ben de wan piloot na ini a legre fu Amerkankondre. Sobun, di mi ben yongu, mi ben sabi heri bun taki wan kernoorlog ben kan pasa trutru. Fu taki en leti, den legre ben kan fringi wan atoom bom na iniwan momenti. A feti na ini Vietnam ben pasa na a ten di mi ben de na heiskoro na ini Kalifornia. Mi go protesteer na strati makandra nanga tra studenti. Skowtu lon na wi baka nanga kodya èn wi lon gwe. Wi no ben man bro noso si bun fu di den ben trowe traangas na wi tapu. Na a ten dati furu dyugudyugu ben de èn sma ben e opo densrefi. Sma kiri tiriman, den ben e protesteer èn den ben e waka du ala sortu ogri. Ala sma ben abi den eigi denki fu san musu pasa. A sani disi ben e bruya mi.

Na ini 1970, mi go wroko te na a noordsei fu Alaska èn mi meki furu moni. Ne mi teki wan plane go na Londen, mi bai wan motro, dan mi rèi go na zuidsei sondro fu sabi precies pe mi ben e go. Wan tu mun baka dati, mi doro na Afrika. Mi miti sma na pasi di ben winsi tu taki den ben kan gwe èn frigiti ala den problema fu den.

Te mi ben e luku den sani di mi ben si èn yere, dan mi ben kan bribi a sani di Bijbel e taki  fu wan ogri-ati yeye di e basi grontapu. Ma efu a no Gado e tiri grontapu, dan fu san ede a no e du noti? Mi ben wani sabi dati.

Na ini den mun baka dati, mi kisi piki tapu na aksi fu mi. Èn baka wan pisi ten mi kon sabi furu man nanga uma di tan gi yesi na a wan-enkri tru Gado èn mi kon lobi den. Den tan getrow na en awinsi na ini sortu situwâsi den ben de.

Di mi drai kon baka na Londen, dan mi go na mi mati en mama èn a gi mi wan Bijbel. Bakaten, di mi go na Amsterdam, Bakrakondre, dan wan Kotoigi si fa mi ben e leisi Bijbel na ondro wan strati lampu èn a yepi mi fu kon sabi moro. Baka dati, mi go na Dublin, Ierland, èn mi go suku a bijkantoro fu Yehovah Kotoigi. Mi naki na a fesidoro. Na drape mi miti Arthur Matthews, wan koni brada di ben abi ondrofeni. Mi aksi en fu studeri Bijbel nanga mi èn a ben feni dati bun.

Mi bigin studeri fayafaya èn mi leisi ala den buku nanga den tijdschrift di den Kotoigi tyari kon na doro. Èn a no de fu taki dati mi leisi Bijbel tu. A ben e gi mi prisiri trutru fu kon sabi den sani dati! Na den gemeente konmakandra mi si taki srefi den pikin ben sabi den piki tapu den aksi di koniman no ben man piki hondrohondro yari langa. Aksi soleki:’Fu san ede ogri de? Suma na Gado? San e pasa te wan sma dede?’ Mi ben e moksi soso nanga Yehovah Kotoigi. A sani dati ben makelek fu di mi no ben sabi nowan tra sma na ini a kondre. Den yepi mi fu kon lobi Yehovah èn fu du a wani fu en.

Na ini 1972, mi dopu. Wán yari baka dati, mi bigin pionier èn mi go dini na ini wan pikin gemeente na ini a foto Newry, na Noord Ierland. Mi yuru wan pikin ston oso di ben de te na a sei fu wan bergi. Yu ben abi kaw na ini wan gron krosibei èn mi ben e oefen den lezing fu mi na fesi den. A ben gersi leki den kaw ben arki bun aladi den ben e nyan. Den no ben man gi mi rai, ma den yepi mi fu kon sabi fa fu luku den arkiman te mi e hori lezing. Na ini 1974, mi tron spesrutu pionier èn Nigel Pitt tron mi pionier patna. Mi nanga en na mati te now ete.

Na a ten dati furu ogri ben e pasa na ini Noord Ierland. Son sma ben e kari drape „a kondre fu bom nanga kugru”. Doronomo sma ben e feti na strati, den ben e luru trawan fu sutu den kiri, èn sma ben e poti bom na ini wagi. Furu fu den problema ben abi fu du nanga politiek èn nanga  kerki. Ma fu di Protestantsma nanga Lomsusma kon si taki den Kotoigi no ben e teki sei na ini politiek, meki wi ben man preiki fri sondro taki sma ben wani du ogri nanga wi. Nofo tron te den ososma ben sabi o ten èn pe dyugudyugu ben o de, dan den ben e warskow wi fu no go drape.

Toku wi ben de na ini situwâsi pe ogri ben kan miti wi. Wan dei mi nanga Denis Carrigan di ben de wan pionier sosrefi, ben e preiki na ini wan foto krosibei pe Kotoigi no de èn pe wi ben go preiki wán leisi kaba. Wan uma ben feni taki wi na srudati fu Ingrisikondre di e wroko kibrikibri, kande na fu di wi no ben e taki leki den sma fu Ierland. A sani di a frow ben taki ben frede wi. Efu sma ben e si yu e taki nomo nanga srudati, dan den ben kan sutu yu kiri kaba, noso den ben kan sutu yu na ini yu kindi. Wi wawan ben de na strati e wakti wan bus èn wi ben e kowru. Ne wi si taki wan wagi stop na a wenkri pe na uma ben de di ben taki a sani fu wi. Safrisafri den man rèi kon pe wi ben e tanapu èn den aksi wi o lati a bus ben o kon. Di a bus doro, den taki nanga a syafeur. Wi no ben man yere san den ben e taki. Fu di tra sma no ben de na ini a bus, meki wi ben e denki taki den ben o rèi tyari wi go dorosei fu a foto fu du ogri nanga wi. Ma dati no pasa. Di mi komoto na ini a bus, dan mi aksi a syafeur: „Den tu man na ini a wagi ben aksi fu wi noh?” A piki: „Mi sabi suma na unu èn mi taigi den tu. Un no abi fu span. Neks no o pasa nanga unu.”

Na ini 1976, di mi ben de na wan kongres na ini Dublin, dan mi miti Pauline Lomax. A sisa disi ben de wan spesrutu pionier fu Ingrisikondre. A ben lobi Gado èn a ben abi sakafasi nanga switifasi. En nanga en brada, Ray, ben gebore na ini waarheid. Wán yari baka dati, mi nanga Pauline trow èn wi tan du a spesrutu pionierwroko na ini Ballymena, Noord Ierland.

Wi du a kringwroko wan pisi ten na ini Belfast, Londonderry èn na tra presi pe furu ogri ben e pasa. A tranga bribi fu den brada nanga sisa ben gi wi deki-ati fu di den ben drai baka gi kerki bribi di rutu dipi, den tapu fu desko sma èn den no ben abi bita-ati moro. Den tyari ala den kenki disi kon soso fu man dini Yehovah. A no de fu taki dati Yehovah blesi den èn a kibri den.

Mi tan tin yari na ini Ierland. Baka dati, na ini 1981, wi kisi a kari fu go na a di fu 72 klas fu Gileadskoro. Di wi klari a skoro, dan wi ben musu go dini na Sièra Leon, West-Afrika.

Wi ben e tan na ini wan zendeling oso makandra nanga 11 brada nanga sisa. Wi ben abi wán kukru, dri toilet, tu badkamer, wán telefon, wán wasmasyin, nanga wán droger. Doronomo stroom ben fadon gwe èn wi no ben sabi o ten dati ben o pasa. Alata ben e lai na ini a plafon èn kobrasneki ben gwenti go na ini na ondrogron kamra.

Aladi disi ben de a situwâsi na a oso pe wi ben e tan, toku a preikiwroko ben e gi wi furu prisiri. Sma ben e lespeki Bijbel èn den ben e arki bun te wi ben e preiki gi den. Furu fu den sma drape studeri Bijbel èn den kon na ini waarheid. Den sma ben e kari mi „Meneer Robert”. Den ben e kari Pauline „Mevrouw Robert”. Ma baka wan pisi ten di mi ben e wroko moro furu na a bijkantoro, dan mi no ben man go so furu na ini preikiwroko. Dati meki sma bigin kari Pauline „Mevrouw Pauline” èn den ben e kari mi  „Meneer Pauline”. A no de fu taki dati Pauline ben lobi a sani dati.

Furu fu den brada nanga sisa ben pôti, ma ala ten Yehovah sorgu gi den èn son leisi a du dati na tumusi moi fasi (Mat. 6:33). Mi sabi ete taki wan sisa ben abi moni soso fu bai nyanyan fu a dei dati gi ensrefi nanga en pikin, ma toku a gi wan siki brada a moni fu bai malaria dresi. Moro lati a dei dati, wan uma kon na a sisa èn a pai en fu brei en wiwiri gi en sondro taki den ben abi wan afspraak. Furu fu den sortu situwâsi dati ben de.

Wi tan neigi yari na ini Sièra Leon. Baka dati, wi ben musu go dini na Betel fu Nigeria. Now wi ben e wroko na wan bigi bijkantoro. Mi ben e du a srefi sortu kantoro wroko di mi ben e du na ini Sièra Leon, ma a kenki disi no ben makelek gi Pauline. A ben gwenti wroko 130 yuru ibri mun na ini a preikiwroko èn a ben abi Bijbelstudie di ben e go na fesi. Now a ben e wroko na a afdeling pe den ben e nai krosi. A teki wan pisi ten fosi a kon gwenti a wroko fu en, ma a kon si taki den brada nanga sisa ben abi furu warderi gi a wroko di a ben e du. Boiti dati, a bosroiti fu du ala san a man fu gi den tra sma na Betel deki-ati.

Wi ben musu kon gwenti a kulturu fu den Nigeriasma èn wi ben musu leri furu. Wan leisi, wan brada kon na ini mi kantoro nanga wan nyun sisa di ben kon wroko na Betel. Di mi langa mi anu fu seki en anu, dan a saka kindi boigi te na mi futu. Mi no ben man bribi. Wantronso mi prakseri Tori fu den apostel 10:25, 26 nanga Openbaring 19:10. Mi aksi misrefi efu mi ben musu taigi a sisa fu no du dati. Ma wantewante mi prakseri taki a ben kon dini na Betel, dus a ben sabi san Bijbel e leri.

Mi ben e firi syen di mi ben e taki nanga en, ma bakaten mi go ondrosuku a tori. Mi kon si taki a sisa ben e hori ensrefi na wan gwenti di sma na son presi fu a kondre ben e hori ete. Mansma ben e du a srefi. Na so den ben e sori lespeki gi trawan. A no anbegi den ben e anbegi sma. Bijbel abi wan tu eksempre fu sma di ben e boigi so gi trawan (1 Sam. 24:8). Fu di mi no ben sabi notinoti fu a kulturu, meki mi ben breiti taki mi no ben de gaw fu taki wan sani di ben o meki a sisa firi syen.

 Wi miti furu Nigeriasma di tan gi yesi na Gado furu yari langa awinsi san pasa. Luku a tori fu Isaiah Adagbona. a A leri sabi waarheid di a ben de wan yonguman, ma dan datra kon si taki a ben abi gwasi. Den seni en fu go tan na wan presi pe den sortu sma disi e tan èn a ben de a wan-enkri Kotoigi drape. Aladi a kisi gens, toku a yepi moro leki 30 gwasiman fu teki a waarheid èn a seti wan gemeente na a presi drape.

Na ini 1996, wi ben musu go dini na a bijkantoro fu Kenia. Disi ben de a fosi leisi di mi ben de baka na ini a kondre sensi a ten di mi ben go drape nanga motro, soleki fa yu kan leisi na a bigin. Wi ben e tan na Betel. Boiti den sma di ben e kon luku Betel, yapiyapi ben e kon drape tu. Te den sisa ben e waka nanga froktu na ini den anu, dan den ben e grabu den froktu fu den sisa disi. Wan dei, wan sisa na Betel ben libi en fensre opo. Di a kon na oso a si taki wan tu yapiyapi ben e nyan a nyanyan di ben de na ini en kamra. A bari èn a lon go na doro. Den yapiyapi skreki èn den dyompo na a fensre go na doro.

Mi nanga Pauline go dini na ini wan Swahilitongo gemeente. Baka wan syatu pisi ten, mi kisi a frantwortu fu hori a Gemeente Bukustudie (now wi sabi en leki a Gemeente Bijbelstudie). Ma mi no ben man taki a tongo bun. Mi ben e studeri a les na fesi, so taki mi ben kan poti den aksi. Ma efu den piki fu den sma ben e difrenti pikinso nomo fu san ben skrifi, dan mi no ben frustan den. Mi ben e syen srefisrefi. Mi ben e firi sari gi den brada nanga sisa di ben musu sidon arki mi. Ma mi ben breiti srefisrefi taki den ben abi pasensi nanga mi èn taki den no ben e krutu mi.

Wi no tan wan yari na ini Kenia. Ne wi kisi a kari na ini 1997 fu go dini na Betel na ini Brooklyn, New York. Now wi ben de na ini wan gudu kondre èn a sani dati ben kan tyari problema kon (Odo 30:8, 9). Ma srefi na ini so wan kondre den brada nanga sisa fu wi e sori taki den bribi tranga. Den no e gebroiki den ten nanga den sani di den abi fu kon gudu, ma den e gebroiki den fu horibaka gi a wroko di Yehovah en organisâsi e du.

Na ini den yari di pasa, wi si fa wi Kresten brada nanga sisa sori bribi na ini difrenti sortu situwâsi. Na ini Ierland den sori bribi aladi furu ogri ben e pasa drape. Na ini Afrika den sori bribi aladi den pôti èn den e libi na presi pe Kotoigi no de. Na Amerkankondre, den sori bribi aladi a kondre gudu. Yehovah musu fu breiti te a e luku kon na grontapu èn a e si fa den e tan sori lobi gi en awinsi san na a situwâsi fu den.

Den yari frei pasa heri esi, iya, „moro esi leki te wan sma e brei krosi” (Yob 7:6). Now wi e wroko makandra nanga tra brada nanga sisa na a edekantoro na ini Warwick, New York. Wi breiti taki wi man tan dini nanga sma di lobi makandra trutru. Wi de koloku, wi de tevrede, èn wi e prisiri srefisrefi fu du san wi man fu horibaka gi wi Kownu, Yesus Krestes, di heri esi o blesi den someni bakaman fu en di e tan gi yesi na en.​—Mat. 25:34.