OITI yu ben abi wan problema èn yu ben e firi leki nowan sma no de fu yepi yu? Wi e libi na ini ’muilek ten di tranga fu psa’ èn disi kan meki wi firi leki wi de wi w’wan (2 Tim. 3:1). Ma te wi abi problema, dan sma de di kan yepi wi. Bijbel e sori o prenspari a de fu abi trutru mati „te nowtu de”.​—Odo 17:17.

Na apostel Paulus ben go na den preikiwaka fu en makandra nanga wan tu fu den mati fu en èn den mati disi ben e yepi Paulus na furu difrenti fasi (Kol. 4:7-11). Di Paulus ben de na ini Rome, dan den mati fu en ben e du son sani gi en fu di en srefi no ben man du den sani dati. Fu eksempre, Epafroditus ben e tyari son sani gi Paulus di den brada nanga sisa na ini Filipi ben seni gi en (Fil. 4:18). Tikikus ben tyari den brifi fu Paulus go gi difrenti gemeente (Kol. 4:7). A yepi di Paulus ben e kisi fu den mati fu en, meki taki a ben man du a diniwroko fu en aladi a no ben mag gwe libi en oso. Den ben e yepi en srefi di a ben de na straf’oso bakaten. Fa yu kan de wan trutru mati na ini a ten disi?

Na ini a ten disi, brada nanga sisa de di e sori san mati kan du fu yepi makandra. Elisabet, wan gewoon pionier di e libi na ini Spanyorokondre, e ferteri fa wan sisa yepi en di a ben abi en muilek. Di Elisabet kon sabi taki en m’ma ben abi kanker, dan a sisa seni furu app gi Elisabet di ben abi Bijbeltekst na ini èn den app dati ben gi en furu dek’ati. Elisabet e taki: „Den app disi tranga mi fu man psa ibri dei èn mi no ben e firi leki mi ben de mi w’wan.”​—Odo 18:24.

Wi kan tron moro bun mati fu wi brada nanga sisa te wi e yepi den fu go na ini a preikiwroko noso na den konmakandra. Fu eksempre, yu kan besroiti fu tyari wan owru brada noso sisa go na den konmakandra noso na ini a preikiwroko. Na so yu kan gi den dek’ati èn den kan de wan dek’ati gi yu tu (Rom. 1:12). Ma son Kresten no man gwe libi den oso. Fa wi kan de wan trutru mati gi den?

Son brada nanga sisa fu wi no man kon na den konmakandra na ini a Kownukondre zaal, fu di a kan taki den e siki seryusu. Na dati ben de situwâsi fu David, wan brada di ben abi kanker. Moro leki siksi mun langa a ben e kisi datrayepi. Na a ten dati, David nanga en wefi Lidia, ben e teki prati na den konmakandra nanga yepi fu Internet.

Fa den kisi yepi fu den mati fu den na ini a gemeente? Baka ibri konmakandra, son brada nanga sisa di ben de na ini a Kownukondre zaal, ben e meki muiti fu taki nanga  David nanga Lidia nanga yepi fu Internet. Boiti dati, te David nanga Lidia ben e gi piki, dan den ben e kisi app fu den brada nanga sisa di ben e gi den dek’ati. San ben de a bakapisi? David nanga Lidia ben e firi taki den brada nanga sisa lobi den.

Kande wi kan seti sani fu preiki makandra nanga wan brada noso sisa di no man gwe libi oso. Kande wi kan tyari wan tu kenki kon fu man wroko makandra nanga den. Na so wi kan sori den taki wi no fergiti den (Odo 3:27). Kande yu kan skrifi brifi makandra nanga den, noso kande yu kan bel sma makandra nanga den. Kande den owruman kan seti sani, so taki den brada nanga sisa di no man gwe libi oso e teki prati na a preikiwroko nanga yepi fu Internet. David nanga Lidia ben breiti nanga a seti disi. David e taki: „Wi ben e kisi dek’ati trutru taki wi ben man de makandra nanga wi preikiwroko grupu fu yere a syatu takimakandra nanga a begi.” Boiti dati, efu a situwâsi e gi pasi taki a gemeente man du den sortu sani disi, dan kande yu kan tyari wan Bijbelstudie go na a oso fu wan preikiman di no man gwe libi oso. Kande yu kan hori a studie drape wanwan leisi.

Te wi e wroko makandra nanga den brada nanga sisa fu wi di no man gwe libi oso, èn te wi srefi man si den moi fasi fu den, dan wi o tron moro bun mati fu den. Te yu e yepi yu brada nanga sisa fu go na ini a preikiwroko èn na den konmakandra, dan dati kan yepi yu fu meki moro mati.​—2 Kor. 6:13.

Di Paulus ben abi en muilek, dan en mati Titus go luku en èn a ben de wan trowstu gi Paulus (2 Kor. 7:5-7). A tori disi e memre wi taki wi kan de wan trowstu gi den wan di de na nowtu te wi no e taki nomo taki wi e firi gi den, ma te wi e meki ten fu de makandra nanga den èn te wi e du ala san wi man fu yepi den.​—1 Yoh. 3:18.

Den brada nanga sisa fu wi na ini Rosiakondre na wan moi eksempre gi wi te wi e luku fa den e horbaka gi makandra. Luku san ben miti Sergey nanga en wefi Tatyana. Baka di skowtu ben drai na oso fu den tapu, dan den teki den tyari go na skowt’oso. Den lusu Tatyana fosi èn a ben mag drai kon baka na oso. Sergey e ferteri: „Di [Tatyana] doro na oso, dan wantewante wan sisa di ben abi dek’ati kon na wi oso. Baka dati, moro mati kon tu èn den yepi wi fu seti sani bun baka na ini na oso fu wi.”

Sergey e taki moro fara: „Mi lobi Odo 17:17, pe skrifi: ’Wan trutru mati e sori lobi ala ten. En na wan brada di gebore fu te nowtu de.’ Na a ten di mi ben abi yepi fanowdu, mi kon si taki a sani di a tekst disi e taki, tru. Yehovah gi mi mati di sori dek’ati èn di yepi mi.”

Wi abi den mati fu wi fanowdu na ini den muilek ten disi. Wi o abi den moro tranga fanowdu na a ten fu a bigi banawtu. Dus, meki wi du ala san wi man fu de wan trutru mati nownow kba.​—1 Petr. 4:7, 8.