Mary nanga en masra, John, a e libi na ini wan kondre pe den kan preiki a bun nyunsu gi furu sma fu den Filippijnen di e kon wroko drape. Na a ten fu a COVID-19 siki di ben panya na ala sei, Mary bigin studeri Bijbel nanga sma na ini a kondre pe a ben e tan èn sosrefi nanga sma na ini tra kondre. Fa a ben man du dati?

Mary ben e aksi den Bijbelstudie fu en: „Un sabi tra sma di ben o wani studeri Bijbel?” Efu den ben e taki ’iya’, dan a ben e aksi den fu yepi en fu meki kontakti nanga den sma dati. Nofo tron te wi e aksi sma a simpel sani disi, dan dati e tyari bun bakapisi kon. Fu san ede? Fu di te sma lobi san den e leri fu Bijbel, dan furu tron den wani prati den sani dati nanga famiriman nanga mati. San psa di Mary poti na aksi disi gi den Bijbelstudie fu en?

Jasmin, wan Bijbelstudie fu Mary, meki a kon sabi fo sma di ben wani studeri Bijbel. Wan fu den, Kristine, ben lobi a studie so te taki a aksi Mary fu studeri nanga en tu leisi wan wiki. Di Mary aksi en efu a ben sabi tra sma di ben wani studeri Bijbel, dan Kristine taki: „Iya, mi o meki yu kon sabi den mati fu mi.” Baka wan tu wiki, Kristine meki Mary kon sabi fo mati fu en di ben wani studeri. Bakaten, Kristine meki a kon sabi tra mati fu en èn sonwan fu den mati dati meki Kristine kon sabi tra mati fu den di ben wani studeri tu.

Kristine ben wani taki a famiri fu en na ini den Filippijnen kon sabi Bijbel. Dati meki a taki nanga Andrea, na umapkin fu en. Na a bigin, Andrea ben e denki taki den Kotoigi na wan sekte èn taki den e gebroiki soso na Owru Testamenti. Ma baka di a studeri wán leisi nomo, dan a kon si taki den sani di a ben e bribi fu den Kotoigi no ben tru. Te a ben e studeri, dan a ben gwenti taki: „Efu Bijbel e taki so, dan a mus’ de so!”

Baka wan pisi ten, Andrea meki Mary kon sabi tu fu den mati fu en èn sosrefi wan sma na en wrokope. Den alamala bigin studeri Bijbel. Ma san Mary no ben sabi, na taki Andrea en tante di ben breni, ben e sdon arki te Andrea ben e studeri. Ne wan dei, Angela aksi Andrea efu a ben kan meki kennis nanga Mary, èn na so a aksi Mary fu studeri nanga en. Angela ben lobi den sani di a ben e leri. Baka wán mun, a ben sabi furu Bijbeltekst na ede èn a ben wani studeri fo leisi wan wiki. Èn Andrea yepi en fu arki den konmakandra ibri wiki nanga yepi fu Internet.

 Di Mary kon sabi taki Kristine en masra, Joshua ben e arki tu te Kristine ben e studeri, dan Mary aksi en efu a ben wani teki prati na a studie. Joshua piki en: „Mi o arki gewoon, ma yu no musu poti aksi gi mi, noso mi o gwe.” A dei dati, a poti moro aksi leki Kristine èn a ben wani studeri Bijbel tu.

A simpel aksi di Mary ben poti gi sma, meki taki a feni omeni Bijbelstudie. A seti sani so taki tra brada nanga sisa ben kan yepi en nanga furu fu den studie disi. Ala nanga ala, Mary bigin 28 Bijbelstudie na ini fo difrenti kondre.

Jasmin, a fosi Bijbelstudie di Mary ben feni, dopu na ini april 2021. Kristine dopu na ini mei 2022 èn a drai go baka na en famiri na den Filippijnen. Tu tra Bijbelstudie di Kristine ben meki Mary kon sabi, dopu tu. Angela dopu wan tu mun baka dati èn now a e dini leki gewoon pionier. Kristine en masra, Joshua, Andrea, na umapkin fu den, nanga difrenti tra Bijbelstudie, e tan studeri èn den e kon moro krosbei fu Yehovah.

Na ini a ten fu Yesus nanga den apostel, furu sma ben e ferteri den famiriman nanga mati fu den san den ben leri fu Yesus (Yoh. 1:41, 42a; Tori 10:24, 27, 48; 16:25-33). Kande yu kan aksi den Bijbelstudie fu yu efu den sabi wan sma di ben o wan studeri Bijbel. Kande yu kan aksi tra sma di wani sabi moro a sani dati tu. Efu yu poti na aksi disi gi sma, dan kande yu o feni moro sma tu di ben o wani studeri Bijbel.