1, 2. Te wi e luku san Yesus taki na Mateyus 24:14, dan san wi kan aksi wisrefi?

AWINSI sma no e agri nanga wi noso den e gens wi srefi, toku furu fu den sabi Yehovah Kotoigi leki sma di e preiki na ala sei. Kande yu miti sma srefi na ini a preikiwroko di taki dati aladi den no e agri nanga den leri fu wi, toku den abi lespeki gi wi te den e luku a wroko di wi e du. Soleki fa wi sabi, dan Yesus ben taki dati a bun nyunsu fu a Kownukondre ben o preiki na heri grontapu (Mat. 24:14). Ma fa wi sabi taki a wroko di wi e du, na a wroko di Yesus ben taki fu en na ini a profeititori? Wi abi a reti fu denki taki na wi wawan e du a wroko disi?

² Furu kerki feni taki na den e preiki a bun nyunsu. Ma san den e du nomo na taki den e fruteri sma san densrefi ondrofeni na ini den libi, den e hori kerki, noso den e meki programa di den e sori tapu telefisi, radio noso Internet. Trawan e taki dati den e yepi sma, den e gi den moni, den e gi datrayepi noso den e opo skoro. Ma wi kan taki dati den sani disi di  den e du na a srefi leki a wroko di Yesus ben gi den bakaman fu en fu du?

3. Soleki fa Mateyus 28:19, 20 e taki, dan sortu fo sani den bakaman fu Yesus ben musu du?

³ Den bakaman fu Yesus ben musu wakti fu sma kon na den? Kwetikweti! Baka di Yesus kisi wan opobaka, a taki nanga hondrohondro bakaman fu en èn a taigi den: „Fu dati ede, go na sma fu ala kondre èn meki den tron disipel. Dopu den . . . . Leri den fu du ala san mi taigi unu fu du” (Mat. 28:19, 20). Sobun, wi leki bakaman fu Yesus musu du fo sani: Wi musu meki sma tron disipel, wi musu dopu den èn wi musu gi den leri. Ma san na a fosi sani di wi musu du? Yesus ben taki: „Go”! Wan Bijbel sabiman ben taki: „Ibri Kresten kisi a komando fu ’go’, awinsi a musu go na den birtisma fu en noso awinsi a musu abra bigi liba.”​—Mat. 10:7; Luk. 10:3.

4. San a wani taki fu tron „fisiman di e fanga libisma”?

⁴ Yu denki taki Yesus ben taki dyaso fu a muiti di ibriwan fu den bakaman fu en ben o du, noso a ben e taki fu wan heri grupu di orga bun fu du a preikiwroko? Wán sma nomo no ben o man go na „sma fu ala kondre”. Dati meki na wan bigi grupu sma di orga bun ben o de fanowdu fu du a wroko disi. Na dati Yesus ben abi na prakseri di a kari den bakaman fu en fu tron „fisiman di e fanga libisma”. (Leisi Mateyus 4:18-22.) A fisiwroko di Yesus ben taki fu en dya, no de leki san wan fisiman e du te a e teki en uku nanga beti go sidon wakti fu fanga fisi. A fisiwroko disi e du nanga wan fisinèt. Na wan hebi wroko èn son leisi furu sma musu wroko makandra fu man du en.​—Luk. 5:1-11.

5. Sortu fo aksi musu kisi piki èn fu san ede?

⁵ Efu wi wani sabi suma na den sma di e preiki a bun nyunsu na ini a ten disi soleki fa Yesus profeititori e taki, dan wi musu go luku den fo aksi disi:

• San na a boskopu di wi musu preiki?

• Fu san ede wi e du a wroko disi?

• Fa wi musu du a wroko?

• O bigi a preikiwroko musu de èn o langa a musu du?

Te wi sabi a piki tapu den aksi disi, dan dati o yepi wi fu kon sabi suma e du a wroko di e kibri sma libi. Ma a o gi wi deki-ati tu fu tan du a wroko, awinsi san e pasa.​—1 Tim. 4:16.

6. Fu san ede yu kan de seiker taki na Yehovah Kotoigi e preiki a boskopu di Yesus ben taigi wi fu preiki?

⁶ Leisi Lukas 4:43. Yesus ben preiki „a bun nyunsu fu Gado Kownukondre” èn a ben wani taki den bakaman fu en du a srefi. Sortu grupu sma e preiki a boskopu dati gi „sma fu ala kondre”? A piki de krin. Na soso Yehovah Kotoigi e du a wroko disi. Srefi sma di e gens wi e agri nanga dati. Fu eksempre, wan leisi wan priester di ben de wan zendeling tu, taigi wan Kotoigi taki a libi na furu kondre èn na ibriwan fu den kondre dati a aksi Kotoigi san na a boskopu di den e preiki. Sortu piki den gi en? A priester taki: „Den alamala gi mi a srefi don piki: ’A bun nyunsu fu a Kownukondre’.” Den Kotoigi no don, ma a piki fu den e sori taki leki tru Kresten den de wán (1 Kor. 1:10). A piki fu den e kruderi nanga san skrifi tapu a tijdschrift fu wi di nen A Waktitoren–A e taki fu Yehovah Kownukondre. A tijdschrift disi de fu kisi na ini 254 tongo èn sowan 59 milyun fu en e druk ibri leisi. Nowan tijdschrift na  grontapu e druk so furu leki A Waktitoren.

7. Fa wi sabi taki den fesiman fu den Kresten kerki no e preiki a yoisti boskopu?

⁷ Den fesiman fu den Kresten kerki no e preiki fu Gado Kownukondre. Èn efu den e du en, dan den e sori sma taki na wan firi nomo na ini na ati fu wan Kresten (Luk. 17:21). Den no e yepi sma fu kon frustan taki Gado Kownukondre na wan regering na hemel èn taki Yesus Krestes na a Tiriman fu en. Den no e sori sma taki na a regering disi o lusu ala den problema fu libisma èn taki dyonsro a o puru ala ogri na grontapu (Openb. 19:11-21). Na presi fu dati, te Kresneti doro den e memre Yesus leki wan beibi èn na Pasen den e si en nomo leki wan man di de fu dede. Den no sabi noti fu san Yesus o du te a de a nyun Tiriman fu grontapu. Efu den no sabi san na a boskopu di den musu preiki, dan fa den o sabi fu san ede den musu preiki?

8. Fu san ede wi kan taki dati den kerki fesiman e preiki gi sma soso fu kisi wini gi densrefi?

⁸ Fu san ede wi e du a preikiwroko? A no fu di wi wani aksi sma moni noso fu di wi wani meki wan lo bigi gebow, meki wi e du en. Yesus ben taigi den bakaman fu en: „Unu kisi sondro fu pai, sobun un musu gi sma sondro fu meki den pai” (Mat. 10:8). Fu dati ede wi no musu preiki a boskopu fu Gado fu meki moni na sma tapu (2 Kor. 2:17). Te wi e preiki a boskopu, wi no e aksi sma moni gi a wroko di wi e du. (Leisi Tori fu den apostel 20:33-35.) Aladi Bijbel e taki a sani disi krin, toku furu kerki e piki moni na sma, noso den e du wan lo tra sani fu feni moni. Den kerki disi musu pai den fesiman fu den nanga wan lo tra sma di e wroko gi den. Furu fu den fesiman fu den Kresten kerki kon gudu fu di den kisi furu moni.​—Openb. 17:4, 5.

9. Fa Yehovah Kotoigi sori taki a no fu di den wani kisi moni, meki den e du a preikiwroko?

⁹ Ma fa a de nanga Yehovah Kotoigi? Den e piki moni na sma te den de na den konmakandra fu den? Nôno. Na sma di wani, e gi moni fu horibaka gi a wroko di den Kotoigi e du (2 Kor. 9:7). Na ini den Kownukondre zaal noso na den kongres fu den, den no e piki moni na sma. Toku a de so taki a yari di pasa, Yehovah Kotoigi preiki 1,93 milyard yuru èn ibri mun den hori moro leki neigi milyun Bijbelstudie sondro fu aksi moni. Ma boiti taki den no e kisi moni fu a wroko di den e du, den de klariklari tu fu pai gi den kostu di den e meki. Luku san wan sabiman taki fu a wroko fu Yehovah Kotoigi: „A moro prenspari sani di den e du na fu preiki èn fu gi sma leri. . . . Den no abi domri, pater noso tra kerki fesiman èn dati meki den no abi so furu kostu.” Dan fu san ede wi e du a wroko disi? We, na fu di wi srefi wani èn fu di wi lobi Yehovah nanga tra sma. Soleki fa a profeititori na Psalm 110:3 e sori (leisi en), dan wi e du a wroko sondro fu sma dwengi wi.

10. Na sortu fasi Yesus nanga den bakaman fu en ben e du a preikiwroko?

¹⁰ Na sortu fasi Yesus nanga den bakaman fu en ben e preiki a bun nyunsu? Na ala presi den ben e go fu feni sma, awinsi den sma ben de na strati, na den pren, na den oso noso na tra presi. Boiti dati, den ben e go oso fu oso fu suku sma di ben wani arki (Mat. 10:11; Luk. 8:1; Tori 5:42; 20:20). Na a fasi disi den ben  man preiki gi ala sma, awinsi suma den ben de.

11, 12. Te wi e luku san den Kresten kerki e du fu preiki a bun nyunsu, dan fa a e difrenti nanga san den Kotoigi e du?

¹¹ Yu denki taki na dati den Kresten kerki e du? We, furu kerkisma breiti kaba taki den kan libi a wroko gi den kerki fesiman fu den di e kisi pai. Ma den kerki fesiman disi no de trutru „fisiman di e fanga libisma”. San den e du nomo na taki den e pruberi fu hori den sma di de na ini a kerki fu den kaba. A tru taki son leisi wan tu kerki fesiman ben pruberi fu gi den sma fu a kerki fu den deki-ati fu go preiki. Fu eksempre, na ini a yari 2001, Paus Yohanes Paulus II taki na ini wan brifi: „Den yari di pasa, na omeni leisi mi gi den bribiman a kari fu bigin baka nanga a wroko fu preiki a boskopu. Now mi e du en baka . . . Wi musu kon de leki Paulus di ben du a wroko fayafaya èn di ben taki: ’Helu fu mi efu mi no e preiki a bun nyunsu. ’” Baka dati a paus taki dati den no kan libi a wroko gi wan pikin grupu nomo di leri fu du en, ma ala sma di e taki dati den na Pikin fu Gado abi a frantwortu fu du a wroko.” Ma omeni sma teki a kari fu a paus?

¹² Fa a de nanga Yehovah Kotoigi? Na den wawan e preiki taki Yesus e tiri leki Kownu sensi 1914. Soleki fa Yesus ben leri den bakaman fu en, dan den Kotoigi e si a preikiwroko leki a moro prenspari sani (Mark. 13:10). Wan buku e taki: „A moro prenspari sani gi Yehovah Kotoigi, na a preikiwroko.” Na ini a buku disi, a skrifiman e taki san wan Kotoigi ben taki: „Te den miti sma di abi angri, sma di e sari fu di den de den wawan, noso sma di siki, dan den e pruberi fu yepi den, . . . ma noiti den e frigiti taki a moro prenspari wroko fu den na fu fruteri a boskopu fu Gado taki a grontapu disi o kaba èn taki a de fanowdu fu kisi frulusu” (Pillars of Faith​—American Congregations and Their Partners). Yehovah Kotoigi e tan preiki a boskopu èn den e du en neleki fa Yesus nanga den fosi bakaman fu en ben e du en.

13. O bigi a preikiwroko ben o de?

¹³ Fu sori den bakaman fu en o bigi a preikiwroko ben o de, Yesus taki dati a bun nyunsu ben o preiki „gi sma na heri grontapu” (Mat. 24:14). Wi musu „go na sma fu ala kondre” fu meki den tron disipel (Mat. 28:19, 20). Sobun, a wroko ben o du na heri grontapu.

14, 15. San e sori taki Yehovah Kotoigi e du wan bigi preikiwroko soleki fa Yesus ben taki? (Luku den prenki na a bigin fu na artikel.)

¹⁴ Meki wi go luku omeni sani Yehovah Kotoigi du fu preiki a bun nyunsu na heri grontapu soleki fa Yesus ben taki. Na ini Amerkankondre, yu abi sowan 600.000 kerki fesiman na ini den difrenti kerki, aladi yu abi sowan 1.200.000 Kotoigi fu Yehovah na ini a kondre disi. Na heri grontapu, Lomsu  Kerki abi sowan 400.000 priester. Ma omeni Kotoigi e preiki a bun nyunsu fu a Kownukondre? Na heri grontapu yu abi sowan aiti milyun Yehovah Kotoigi di e preiki gi sma na ini 240 kondre. Iya, den Kotoigi e du a bigi wroko disi fu di den wani prèise Yehovah èn gi en grani.​—Ps. 34:1; 51:15.

¹⁵ Fosi a kaba kon, wi leki Yehovah Kotoigi wani taki fu a bun nyunsu nanga someni sma leki wi man. Dati meki na wi wawan e meki so furu muiti fu vertaal èn fu druk buku nanga tra sani di e fruklari sani fu Bijbel. Wi e prati milyunmilyun buku, tijdschrift, traktaat nanga kari gi kongres nanga Memrefesa. Ala den sani disi wi e prati sondro taki sma abi fu pai gi dati. Wi tyari omeni buku nanga tra sani kon na doro na ini moro leki 700 tongo. Moro leki 200 milyun kopi fu a Nyun-Grontapuvertaling druk na ini moro leki 130 tongo. A yari di pasa, wi druk sowan 4,5 milyard buku, tijdschrift, brochure, traktaat nanga tra sani. Tapu a website fu wi yu kan leisi sani na ini moro leki 750 tongo. Boiti Yehovah Kotoigi, nowan tra kerkigrupu de di e du a sortu wroko disi.

16. Fa wi sabi taki Yehovah Kotoigi abi a yeye fu Gado?

¹⁶ O langa a preikiwroko ben o du? Yesus ben taki dati a wroko disi ben o du na ini a heri pisi ten fu den lasti dei teleki ’a kaba ben o kon’. Sortu tra kerkigrupu tan preiki a bun nyunsu na ini den lasti dei fu a grontapu disi? Son leisi wi e miti sma na ini a preikiwroko di e taki: „Na wi abi a santa yeye, ma na unu e du a wroko.” Ma efu wi no ben o abi a yeye fu Gado, yu denki taki wi ben o man tan du a wroko disi? (Tori 1:8; 1 Petr. 4:14) Son leisi wan tu kerkigrupu e pruberi fu du san Yehovah Kotoigi e du, ma nofo tron den no man horidoro. Tra kerkisma e go na tra kondre fu preiki, ma den e tan drape wan syatu pisi ten èn baka dati den e drai go baka na den kondre. Trawan baka e pruberi fu go oso fu oso, ma san den e preiki? We, soleki fa a sori, dan den no e du a wroko di Krestes ben e du.

17, 18. (a) Fu san ede wi kan de seiker taki na Yehovah Kotoigi e preiki a bun nyunsu fu a Kownukondre na ini a ten disi? (b) Fa a du kon taki wi man tan du a wroko disi?

¹⁷ Sobun, suma na den sma di e preiki a bun nyunsu fu a Kownukondre na ini a ten disi? Nanga wi heri ati wi kan taki: „Na Yehovah Kotoigi!” Fu san ede wi kan de seiker fu dati? Fu di na wi e preiki a boskopu di Yesus ben taigi wi fu preiki. Dati na a bun nyunsu fu a Kownukondre. Fu di na wi e go na sma, meki wi kan taki tu dati wi e du a wroko disi na a yoisti fasi. Te wi e luku fu san ede wi e du a preikiwroko, dan wi e si taki na fu di wi lobi Gado nanga tra sma. A no fu di wi wani meki moni na sma tapu. Wi e preiki na heri grontapu gi sma fu ala kondre nanga tongo èn wi o tan du a wroko disi teleki a kaba doro.

¹⁸ A moi fu si san Gado pipel e du na ini den span ten disi. Ma fa a du kon taki den man du ala den sani disi? Na ini a brifi di na apostel Paulus ben skrifi gi den Filipisma, a ben taki: „Gado na a sma di e gi un krakti. A e gi unu a firi nanga a krakti fu du sani di e plisi en” (Fil. 2:13). Meki wi lobi Tata Yehovah tan gi wi alamala a krakti fu man du a preikiwroko finifini.​—2 Tim. 4:5.