1, 2. (a) Sortu problema furu pikin abi te den go libi na ini wan tra kondre? (b) Sortu aksi wi o luku na ini na artikel disi?

„MI PAPA nanga mama komoto fu wan tra kondre èn sensi mi pikin mi ben e taki a tongo fu den na oso èn na ini a gemeente”, na so Joshua e fruteri. A taki moro fara: „Ma di mi bigin go na skoro, dan moro furu mi ben e taki a tongo fu a kondre pe wi e tan now. Baka wan tu yari, mi ben e taki soso a tongo dati. Mi no ben man frustan san wi ben e leri na den konmakandra èn mi no ben e si a kulturu fu mi papa nanga mama leki mi kulturu.” A sani di pasa nanga Joshua e pasa nanga furu pikin.

² Na ini a ten disi, moro leki 240.000.000 sma no e libi na ini a kondre pe den gebore. Efu yu na wan papa noso mama di go libi na ini wan tra kondre, dan fa yu kan meki en makriki gi yu pikin fu kon lobi Gado èn fu „tan du san den leri”? (3 Yoh. 4) Fa trawan kan yepi tu?

3, 4. (a) Fa papa nanga mama kan de wan bun eksempre gi den pikin fu den? (b) San papa nanga mama no musu fruwakti fu den pikin fu den?

³ Papa nanga mama, a prenspari taki yu de wan bun eksempre gi den pikin fu yu, so taki den kan waka a pasi di e tyari sma go na  têgo libi. Te den pikin fu yu e si taki yu e ’suku a Kownukondre’ fosi, dan den e leri fu abi a frutrow taki Yehovah o sorgu gi den sani di den abi fanowdu ibri dei (Mat. 6:33, 34). Dati meki a bun fu de tevrede nanga san yu abi. No feti baka gudu, ma suku fu kon abi wan moro bun matifasi nanga Gado. No meki paiman te dati no de fanowdu. Suku „gudu na hemel”. Na so Yehovah o feni yu bun. No feti fu abi furu sani, noso fu kisi ’grani fu libisma’.—Leisi Markus 10:21, 22; Yoh. 12:43.

⁴ Noiti yu musu abi so furu fu du taki yu no abi ten gi den pikin fu yu. Taigi den taki yu breiti nanga den te den e bosroiti fu poti Yehovah na a fosi presi, na presi taki den e suku biginen noso taki den e feti baka gudu. Son leisi pikin e feti baka den sani dati gi densrefi, noso fu di a papa nanga mama fu den wani dati. No denki taki pikin abi a frantwortu fu meki a libi moro makriki gi den papa nanga mama. A denki dati no fiti gi wan Kresten. Memre taki „a no den pikin musu poti wan sani na wan sei gi den papa nanga mama fu den, ma na den papa nanga mama musu poti wan sani na wan sei gi den pikin fu den”.—2 Kor. 12:14.

5. Fu san ede papa nanga mama musu gi den pikin fu den leri fu Yehovah?

⁵ Soleki fa Bijbel ben taki na fesi, sma „di e taki difrenti tongo” e kon na ini Yehovah en organisâsi (Sak. 8:23). Ma te den pikin fu yu no e frustan a tongo di yu e taki, dan dati kan meki en muilek gi yu fu gi den leri fu Bijbel. Den pikin fu yu na den moro prenspari Bijbelstudie di yu abi èn a prenspari taki den e „leri sabi” Yehovah, fu di dati kan meki taki den libi fu têgo (Yoh. 17:3). Efu yu wani gi den pikin fu yu leri fu Yehovah, dan yu musu abi a gwenti fu „taki fu den sani disi” na ibri okasi.—Leisi Deuteronomium 6:6, 7.

6. Fa den pikin fu yu kan kisi wini te den e leri a tongo fu yu? (Luku a prenki na a bigin fu na artikel.)

⁶ Nofo tron den pikin fu yu e leri a tongo fu a kondre na skoro èn fu tra sma di den e miti. Ma den e leri a tongo fu yu moro furu te yu gwenti taki nanga den na ini a tongo fu yu. Te den pikin sabi fa fu taki a tongo fu yu, den o man fruteri yu san de na tapu den ati. Ma tra fasi de tu fa den e kisi wini. Te pikin man taki tu tongo, dan den o man frustan sani moro bun èn den o man feni en moro makriki nanga trawan. A sani disi e gi den na okasi tu fu du moro na ini a diniwroko. A papa nanga mama fu Carolina komoto fu wan tra kondre. A e taki: „Mi lobi taki mi de na ini wan gemeente pe sma e taki wan tra tongo. Èn mi feni en moi taki mi man yepi pe moro preikiman de fanowdu.”

7. San yu kan du efu yu nanga yu pikin no e taki a srefi tongo?

⁷ Ma te pikin fu sma di komoto fu tra kondre teki a kulturu abra fu a nyun kondre èn e bigin taki a tongo fu a kondre, dan kande sonwan fu den no o wani taki a tongo fu den papa nanga mama moro. Kande den no o man taki en moro tu. Papa nanga mama, efu na dati e pasa nanga den pikin fu yu, dan yu no denki taki a ben o bun fu pruberi fu leri taki a tongo fu a kondre? Yu o sabi moro bun fa fu kweki yu pikin na ini a Kresten bribi efu yu e frustan sortu tori den e taki, sortu felem noso poku den lobi èn sortu skorowroko den musu du. A e yepi tu te yu srefi man taki nanga den sma di e gi den leri na skoro. A no de fu taki dati a e teki ten nanga muiti fu leri wan nyun tongo èn yu musu abi sakafasi tu. Ma kon meki wi taki dati a pikin fu yu ben dofu. Yu no ben o pruberi fu leri Dofusma-tongo fu man taki nanga a pikin? Yu no feni taki na a srefi muiti dati yu musu meki te a pikin fu yu no man taki a tongo fu yu so bun? *

8. Fa yu kan yepi yu pikin efu yu no e frustan a tongo fu den so bun?

 ⁸ Kande a no makriki gi son papa nanga mama di komoto fu tra kondre fu leri taki a nyun tongo fu den pikin fu den bun. A problema disi kan meki en muilek gi papa nanga mama fu leri den pikin den dipi tori „di skrifi na ini den Santa Buku” (2 Tim. 3:15). Efu na so a de nanga yu, dan toku yu kan yepi yu pikin fu kon sabi Yehovah èn fu kon lobi en. Wan owruman di nen Shan, e taki: „Mi mama ben e kweki unu en wawan èn a no ben e frustan a tongo di wi ben e taki so bun. Mi nanga den sisa fu mi no ben man taki a tongo fu en bun tu. Ma te wi ben e si fa a ben e studeri, fa a ben e begi èn fa a ben e meki muiti fu studeri nanga wi ibri wiki, dan wi ben e frustan taki a prenspari srefisrefi fu kon sabi Yehovah.”

9. Fa papa nanga mama kan yepi den pikin fu den te a de fanowdu taki den e leri sani fu Yehovah na ini tu tongo?

⁹ Gi son pikin a prenspari taki den e leri sani fu Yehovah na ini tu tongo, a tongo di den e taki na skoro èn a tongo di den e taki na oso. Dati meki son papa nanga mama e gebroiki tijdschrift, buku, CD, nanga felem na ini ala tu tongo. A de krin taki a e teki moro ten gi son papa nanga mama fu yepi den pikin fu den fu kon abi wan bun matifasi nanga Yehovah èn den musu meki moro muiti tu.

10. (a) Suma musu bosroiti na sortu gemeente a famiri e go? (b) San a musu du fosi a teki wan bosroiti?

¹⁰ Te „trakondre sma” e libi farawe fu tra Kotoigi di e taki a tongo fu den, dan den abi fu go na wan gemeente pe sma e taki a tongo fu a kondre pe den kon tan (Ps. 146:9). Ma efu wan gemeente de krosibei pe sma e taki a mamatongo fu yu, dan kande yu musu aksi yusrefi sortu gemeente moro bun gi na osofamiri fu yu. Baka te wan papa begi Yehovah fu sori en san fu du èn baka te a taki nanga a patna fu en, dan a musu teki wan bosroiti (1 Kor. 11:3). Sortu sani wan famiri-edeman musu hori na prakseri? San Bijbel e taki fu a tori disi? Meki wi go luku.

11, 12. (a) Te wan pikin de na wan konmakandra, dan fa a tongo di e taki drape kan yepi en fu teki leri? (b) Fu san ede son pikin e weigri fu leri a tongo fu den papa nanga mama?

¹¹ Papa nanga mama musu denki bun san den pikin fu den abi fanowdu trutru. A no de fu taki dati awansi sortu tongo wan pikin e taki, den tu yuru di a e kisi leri fu Gado na den konmakandra, no sari fu yepi en fu kon frustan den tru tori fu Bijbel bun. Ma luku a sani disi: Te wan pikin de na wan konmakandra pe a e frustan a tongo, dan a kan teki a leri moro makriki. Kande den e leri moro leki den papa nanga mama denki. Te pikin no e frustan a tongo so bun, dan kande dati no o pasa. (Leisi 1 Korentesma 14:9, 11.) Boiti dati, a no abi fu de so taki a pikin e leri denki na ini a mamatongo fu en, èn kande a tongo dati no e tron a tongo fu en ati. Fu taki en leti, son pikin kan leri fu gi piki, fu hori demo èn fu hori lezing na ini a tongo fu den papa nanga mama, sondro taki den wortu e komoto fu den ati.

¹² Boiti dati, a tongo di wan pikin e taki, a no a wan-enkri sani di abi krakti na tapu en ati. Na so a ben de nanga Joshua di kari na a bigin fu na artikel. En sisa Esther e taki: „Gi yongu pikin, a tongo, a kulturu èn a bribi fu den papa nanga mama na wán.” Efu pikin no teki a kulturu fu den papa nanga mama, dan kande den no o wani leri a tongo fu den. Kande den no o wani teki a bribi fu den tu. San papa nanga mama di komoto fu tra kondre kan du?

13, 14. (a) Fu san ede wan trowpaar di ben kon fu wan tra kondre, go na wan gemeente pe den e taki a tongo fu a kondre pe den e tan now? (b) San yepi a papa nanga mama fu tan abi wan tranga bribi?

¹³ Gi Kresten papa nanga mama, a bribi fu den pikin fu den prenspari moro iniwan tra sani di den srefi ben o wani (1 Kor. 10:24).  Samuel, a papa fu Joshua nanga Esther, e taki: „Mi nanga mi wefi teki wi ten fu luku na ini sortu tongo den pikin fu wi ben e leri sani moro makriki èn wi begi Gado fu sori wi san wi musu du. Wi kon si taki wi no ben musu luku san ben moro makriki gi wi leki papa nanga mama. Di wi si taki den no ben e kisi wini fu den konmakandra di ben e hori na ini a tongo fu wi, dan wi bosroiti fu go na a gemeente pe den e taki a tongo fu a kondre pe wi e tan now. Wi e go na den konmakandra doronomo makandra nanga den èn wi e go tu nanga den na ini a preikiwroko. Wi ben e kari mati tu fu kon nyan na wi oso noso fu go na presi makandra nanga wi. Ala den sani disi yepi den pikin fu wi fu kon sabi den brada nanga sisa fu a gemeente èn fu kon sabi Yehovah. Den leri fu no si Yehovah soso leki a Gado fu den, ma sosrefi leki den Papa nanga Mati. A sani disi ben moro prenspari gi wi leki te den ben o leri taki a tongo fu wi bun.”

¹⁴ Samuel e taki moro fara: „Fu man tan abi wan tranga bribi, mi nanga mi wefi ben e go tu na konmakandra di ben e hori na ini a mamatongo fu wi. Wi ben abi furu fu du te dei opo èn wi ben weri. Ma wi breiti taki Yehovah blesi a muiti di wi du. Ala den dri pikin fu wi de na ini a furuten diniwroko.”

15. Fu san ede Kristina ben feni taki a ben o go na fesi te a ben de na ini wan gemeente di e taki a tongo fu a kondre pe a e libi?

¹⁵ Pikin di bigi kaba kan kon si taki a moro bun te den e dini Yehovah na ini a gemeente di e taki a tongo di den e frustan moro bun. Efu dati de so dan a papa nanga mama fu den no musu denki taki den no lobi den moro. Kristina e taki: „Mi ben sabi a tongo fu mi papa nanga mama pikinso, ma na a konmakandra mi no ben e frustan srefisrefi san sma ben e taki. Di mi ben abi 12 yari, dan mi go na wan kongres di ben hori na ini a tongo di mi e taki na skoro. Dati ben de a fosi leisi di mi kon frustan den tru tori fu Bijbel! Wan tra sani di pasa, na taki mi bigin begi na ini a tongo di mi ben e taki na skoro. Mi ben man taki nanga Yehovah komoto fu mi ati!” (Tori 2:11, 41) Di Kristina kon bigi, dan a taki fu a tori disi nanga en papa nanga mama èn a bosroiti fu froisi go na wan gemeente pe sma e taki a tongo fu a kondre pe den e tan now. A e taki: „Fu di mi ben e leri sani fu Yehovah na ini a tongo di mi ben taki na skoro, meki mi bigin go na fesi.” Fosi yu denki, Kristina tron wan pionier di e du a diniwroko nanga prisiri.

16. Fu san ede wan sisa di nen Nadia ben breiti taki a tan na ini wan gemeente di e taki a mamatongo fu en papa nanga mama?

¹⁶ Yonguwan, yu feni taki a ben o moro bun gi yu fu de na ini wan gemeente pe sma e taki a tongo fu a kondre pe yu go tan? Efu na dati yu e feni, dan aksi yusrefi fu san ede. Yu denki taki yu o kon abi wan moro bun matifasi nanga Yehovah efu yu froisi go na so wan gemeente? (Yak. 4:8) Noso yu wani froisi go na wan tra gemeente fu di yu no wani taki yu papa nanga mama e luku ala san yu e du, noso fu di yu no wani meki so furu muiti fu go na fesi? Nadia di e dini na Betel now, e taki: „Di mi nanga den brada nanga sisa fu mi kon moro bigi, dan wi ben wani go na a gemeente pe sma e taki a tongo fu a kondre pe wi kon tan.” Ma en papa nanga mama ben sabi taki a sani dati no ben o bun gi den pikin fu den. Nadia e taki moro fara: „Now wi breiti taki wi papa nanga mama du tranga muiti fu leri wi a tongo fu den èn taki den hori wi na ini a gemeente di e taki a mamatongo fu den. A sani disi tyari furu wini kon gi wi èn a gi wi moro okasi fu yepi tra sma fu kon sabi Yehovah.”

17. (a) Suma Yehovah gi a frantwortu fu kweki pikin? (b) Fa papa nanga mama kan feni yepi fu gi den pikin fu den leri fu Bijbel?

¹⁷ Yehovah gi papa nanga mama a frantwortu fu kweki den pikin fu den na ini a tru anbegi. A no gi a frantwortu dati na den  granpapa nanga granmama, noso na iniwan tra sma. (Leisi Odo 1:8; 31:10, 27, 28.) Toku a kan taki papa nanga mama di no sabi a tongo fu a kondre pe den go tan, abi yepi fanowdu fu man doro na ati fu den pikin. Disi no wani taki dati den e libi a frantwortu dati gi tra sma. Na presi fu dati, disi kan yepi den fu kweki den pikin „nanga a leri èn nanga den rai fu Yehovah” (Ef. 6:4). Fu eksempre, papa nanga mama kan aksi owruman fu a gemeente fu gi den wan tu rai fa den kan hori na Osofamiri Anbegi èn fa den kan feni bun mati gi den pikin fu den.

18, 19. (a) Fa tra brada nanga sisa kan yepi yonguwan? (b) San papa nanga mama musu tan du?

¹⁸ Fu eksempre, papa nanga mama kan kari tra osofamiri fu kon hori na Osofamiri Anbegi makandra nanga den. Boiti dati, furu yongusma e kisi wini te den abi demakandra nanga sma di abi wan tranga bribi. Fu eksempre, den sma disi kan wroko makandra nanga den na ini a preikiwroko noso den kan du sani makandra fu abi prisiri (Odo 27:17). Shan, di wi ben kari kaba e taki: „Noiti mi o frigiti den brada di teki den ten fu yepi mi. Ala ten mi ben e leri moro te den ben e yepi mi fu sreka den lezing di mi ben musu hori na a konmakandra. Èn mi ben lobi te wi ben e du prisiri sani nanga makandra.”

¹⁹ A no de fu taki dati te papa nanga mama aksi sma fu yepi den pikin fu den, dan ala ten den sma dati musu leri den pikin fu sori lespeki gi den papa nanga mama. Den musu taki bun fu a papa nanga mama fu den pikin èn den no musu pruberi fu teki a frantwortu fu den abra. Boiti dati, den sma di e yepi no musu du sani di trawan na ini a gemeente noso na dorosei fu a gemeente e si leki sani di no fiti (1 Petr. 2:12). Papa nanga mama no musu libi den pikin fu den gi trawan fu kweki den na ini a tru anbegi. Den musu luku doronomo efu a yepi di den pikin e kisi e tyari wini kon èn den srefi musu tan gi den pikin fu den leri.

20. Fa papa nanga mama kan yepi den pikin fu tron futuboi fu Yehovah?

²⁰ Papa nanga mama, begi Yehovah fu yepi yu èn du ala san yu man fu yepi yu pikin. (Leisi 2 Kroniki 15:7.) A matifasi di yu pikin abi nanga Yehovah musu prenspari moro leki den sani di yu lobi fu du. Du ala san yu man fu sorgu taki Gado Wortu e doro na ati fu yu pikin. Noiti no lasi bribi taki a pikin fu yu o tron wan futuboi fu Yehovah. Te den pikin fu yu e hori densrefi na a Wortu fu Gado èn te den e teki a bun eksempre fu yu, dan yu o firi neleki na apostel Yohanes di ben taki: „Nowan tra sani e gi mi moro prisiri leki te mi e yere taki den pikin fu mi e tan du san den leri.”—3 Yoh. 4.