1, 2. (a) San Yesus taigi den disipel fu en syatu fosi a dede? (Luku a prenki na a bigin fu na artikel.) (b) Fu san ede a prenspari fu tan hori na prakseri sortu reide wi abi fu preiki? (c) San wi o luku na ini na artikel disi?

A LASTI neti fosi Yesus dede, a taki wan langa pisi ten nanga den apostel fu en. A taigi den taki a ben lobi den trutru. A fruteri den na agersitori tu di wi taki fu en na ini a fosi studie-artikel. Yesus gebroiki na agersitori dati fu gi den disipel a deki-ati fu „tan meki furu froktu”, sobun fu tan preiki a Kownukondre boskopu.​—Yoh. 15:8.

² Yesus no ben taigi den disipel nomo san den ben musu du, ma a taigi den tu fu san ede den musu du en. A gi den difrenti reide fu san ede den musu tan du a preikiwroko. A prenspari taki wi e tan hori na prakseri tu fu san ede wi musu tan preiki. Te wi e du dati, dan dati o gi wi deki-ati fu tan „preiki gi sma na heri grontapu” (Mat. 24:13, 14). Meki wi go luku fo reide di Bijbel e gi wi fu san ede wi musu preiki. Boiti dati, wi o taki tu fu fo sani di e yepi wi fu tan du a wroko di Yehovah gi wi.

3. (a) Sortu reide wi abi fu preiki soleki fa Yohanes 15:8 e sori? (b) San den droifi na ini na agersitori fu Yesus e prenki èn fu san ede dati fiti?

³ A moro prenspari reide fu san ede wi e preiki, na taki wi wani gi glori na Yehovah èn wi wani meki en nen kon santa. (Leisi Yohanes 15:1, 8.) Luku taki Yesus agersi en Papa Yehovah nanga wan gronman di e prani droifi. Yesus agersi ensrefi nanga wan droifibon èn den bakaman fu en na den taki (Yoh. 15:5). Sobun, na ini na agersitori disi, den droifi e prenki den froktu di den bakaman fu Krestes e meki, noso a preikiwroko di den e du. Yesus taigi den apostel fu en: „Te unu e tan meki furu froktu èn e sori taki unu na mi disipel, dan dati o gi mi Tata glori.” Te wan droifibon e gi bun droifi, dan a gronman e kisi grani. Na so a de tu taki te wi e du ala san wi man fu preiki a bun nyunsu fu a Kownukondre, dan wi e gi Yehovah glori.​—Mat. 25:20-23.

4. (a) Fa wi e meki Gado nen kon santa? (b) Fa yu feni en taki yu abi a grani fu meki Gado nen kon santa?

⁴ Fa a preikiwroko di wi e du e santa a nen fu Gado? Wi no kan meki a nen fu Gado kon moro santa. A santa dorodoro kaba. Ma luku san a profeiti Yesaya taki: „Na Yehovah di e tiri den legre un musu si leki wan santa sma” (Yes. 8:13). Wi e santa a nen fu Gado te wi e si en leki a moro prenspari nen di de èn te wi e yepi tra sma fu frustan taki a nen dati santa (Mat. 6:9). Fu eksempre, te wi e meki sma kon sabi den moi fasi fu Yehovah èn san a o du gi libisma, dan wi e yepi den fu kon si taki den ogri di Satan taki fu Yehovah, na soso lei (Gen. 3:1-5). Èn te wi e yepi sma na ini wi kontren fu si taki Yehovah ’warti fu sma prèise en gi a glori, a grani nanga a makti di a abi’, dan wi e meki en nen kon santa (Openb. 4:11). Ronnie, * wan brada di e pionier 16 yari, taki: „Mi de nanga tangi taki mi kisi na okasi fu meki sma kon sabi a Mekiman fu hemel nanga grontapu. Disi e meki taki mi e angri fu du a preikiwroko.”

5. (a) Fu san ede wi e preiki, soleki fa Yohanes 15:9, 10 e sori? (b) Fa Yesus sori taki a prenspari fu horidoro?

⁵ Leisi Yohanes 15:9, 10. A di fu tu reide fu san ede wi e preiki a bun nyunsu fu a Kownukondre, na taki wi lobi Yehovah nanga Yesus nanga wi heri ati (Mark. 12:30; Yoh. 14:15). Yesus taigi den disipel fu en taki den musu ’tyari densrefi na so wan fasi, taki a tan lobi den’. Fu san ede? Fu di bakaman fu Krestes o kisi tesi èn dati meki den abi fu horidoro. Na ini Yohanes 15:4-10 Yesus gebroiki a wortu „tan” furu leisi fu yepi den disipel fu en fu frustan taki den musu horidoro.

6. Fa wi e sori taki wi wani taki Krestes tan lobi wi?

⁶ Fa wi e sori taki wi wani taki Krestes tan lobi wi èn taki a tan feni wi bun? Wi musu gi yesi na en. Yesus e aksi wi fu du san en srefi ben e du tu. A taki: „Mi Tata tan lobi mi, fu di mi e gi yesi na den komando fu en” (Yoh. 15:10). Iya, Yesus gi wi na eksempre.​—Yoh. 13:15.

7. Fa wan sma kan sori taki a lobi Yesus?

⁷ Yesus ben taigi den apostel fu en taki te den e gi yesi na en, dan den e  sori taki den lobi en. A taki: „Efu wan sma sabi den komando fu mi èn a e du san den e taki, dan a sma disi lobi mi” (Yoh. 14:21). Boiti dati, te wi e go preiki soleki fa Yesus taigi wi fu du, dan wi e sori taki wi lobi Gado tu, fu di ala sani di Yesus leri wi kon fu en Papa (Mat. 17:5; Yoh. 8:28). Te wi e sori taki wi lobi Yehovah nanga Yesus, dan den o tan lobi wi.

8, 9. (a) Sortu tra reide wi abi fu preiki? (b) Fu san ede den sani di Yehovah taki na Esekièl 3:18, 19 nanga 18:23 e gi wi deki-ati fu preiki?

⁸ A di fu dri reide fu san ede wi e preiki, na taki wi wani warskow sma taki a dei fu Yehovah de krosibei. Bijbel e kari Noa „wan preikiman”. (Leisi 2 Petrus 2:5.) Di Noa ben e preiki gi sma, dan a musu de so taki a ben e warskow den tu taki a Frudu ben o kon. Fu san ede wi kan taki dati? Luku san Yesus taki: „Na ini a ten dati bifo a frudu, sma ben nyan, den ben dringi, man ben teki uma fu trow èn uma ben trow nanga man, teleki a dei doro di Noa go na ini na ark. Ma den no ben poti prakseri na san ben e pasa, teleki a frudu kon èn a wai den alamala puru. Na so a o de te a Manpikin fu libisma kon” (Mat. 24:38, 39). Aladi furu sma no ben e arki Noa, toku a tan warskow den taki a Frudu ben o kon.

⁹ Na ini a ten disi wi e preiki a Kownukondre boskopu fu gi sma na okasi fu kon sabi san Gado o du gi libisma. Neleki Yehovah, wi wani taki sma arki a boskopu disi so taki den kan „tan na libi” (Esek. 18:23). Te wi e preiki oso fu oso èn na presi pe furu sma de, dan wi e warskow sma tu taki Gado Kownukondre o kon èn taki a o tyari wan kaba kon na a ogri grontapu disi.​—Esek. 3:18, 19; Dan. 2:44; Openb. 14:6, 7.

10. (a) Sortu tra reide wi abi fu preiki, soleki fa Mateyus 22:39 e sori? (b) Fruteri fa Paulus nanga Silas yepi wan waktiman na ini Filipi.

¹⁰ A di fu fo reide fu san ede wi e tan preiki, na taki wi lobi sma (Mat. 22:39). A lobi disi e meki taki wi e tan du a wroko disi fu di wi sabi taki sma kan kenki te a situwâsi fu den kenki. Luku san na apostel Paulus nanga Silas ondrofeni. Di den ben de na ini a foto Filipi, gensman poti den na ini strafu-oso. Ma mindrineti wan gronseki seki a strafu-oso èn ala den doro opo. A waktiman fu a strafu-oso ben wani kiri ensrefi fu di a ben denki taki den strafuman ben lowe. Ma Paulus bari gi en: „No kiri yusrefi.” A waktiman aksi en: „Unu kan taigi mi san mi musu du fu kisi frulusu?” Den taigi en: „Bribi na ini Masra Yesus, dan yu nanga yu osofamiri sa kisi frulusu.”​—Tori 16:25-34.

11, 12. (a) San a tori fu a strafu-oso waktiman e leri wi fu a preikiwroko di wi e du? (b) Fu san ede wi wani tan preiki?

¹¹ San a tori fu a strafu-oso waktiman  e leri wi fu a preikiwroko di wi e du? Luku taki a waktiman aksi fu kisi yepi baka di a gronseki pasa. Na so a de tu taki son sma di no wani arki a Bijbel boskopu fu wi kan kenki èn kan kon suku yepi na wi baka te wan sari sani miti den. Fu eksempre, a kan taki son sma na ini a kontren fu wi e lasi den wroko sondro taki den fruwakti dati èn disi kan bruya den. Kande trawan brokosaka fu di a trow fu den broko. A kan taki son sma lasi-ati fu di den yere taki den abi wan seryusu siki noso den e sari fu di wan sma di den lobi dede. Te den sortu sani disi e pasa, dan son sma kan bigin denki fu sani di no ben prenspari gi den fosi. Kande neleki a waktiman den e aksi densrefi: ’San mi musu du fu kisi frulusu?’ Te wi e miti den sortu sma disi, dan kande fu a fosi leisi na ini den libi den o wani arki a boskopu fu wi.

¹² Sobun, te wi e tan preiki, dan wi o man gi sma trowstu te den abi dati fanowdu èn te den de klariklari fu arki a boskopu fu wi (Yes. 61:1). Carla, di e du a furuten diniwroko 38 yari kaba, e taki: „Sma na ini a ten disi no sabi san fu du. Den musu kisi na okasi fu arki a bun nyunsu.” Eva, wan sisa di e pionier 34 yari, taki: „Now moro nanga moro sma e firi brokosaka. Mi wani yepi den trutru. Dati meki mi wani tan preiki.” A de krin taki a lobi di wi abi gi sma e meki taki wi e tan preiki gi den!

13, 14. (a) San o yepi wi fu tan preiki, soleki fa Yohanes 15:11 e sori? (b) Fa wi kan prisiri neleki fa Yesus e prisiri? (c) Fa wi o du a preikiwroko te wi abi prisiri?

¹³ A lasti neti fosi Yesus dede, a taigi den apostel fu en sortu sani ben o yepi den fu tan preiki. San na den sani disi èn fa den kan yepi wi na ini a ten disi?

¹⁴ Prisiri. A preikiwroko na wan hebi gi wi? Kwetikweti. Baka di Yesus taki fu na agersitori fu a droifibon, a taki dati Kownukondre preikiman e prisiri. (Leisi Yohanes 15:11.) Yesus taki dati wi o prisiri neleki fa en e prisiri. Fa dati e pasa? Soleki fa wi si kaba, dan Yesus agersi ensrefi nanga wan droifibon èn den disipel fu en na den taki. Den taki fu a droifibon e kisi watra nanga nyanyan soso te den fasi na a bon. Sobun, solanga wi e tan na ini wánfasi nanga Yesus èn solanga wi e gi yesi na en, wi o prisiri neleki fa en e prisiri te a e du a wani fu en Papa (Yoh. 4:34; 17:13; 1 Petr. 2:21). Ana, wan sisa di e pionier 40 yari kaba, taki: „A prisiri di mi e kisi te mi e du a preikiwroko e meki taki mi wani tan dini Yehovah.” Iya, prisiri o yepi wi fu tan preiki awinsi furu sma no wani arki wi.​—Mat. 5:10-12.

15. (a) Soleki fa Yohanes 14:27 e sori, dan san na ete wan sani di e yepi wi fu tan preiki? (b) Fa wan korostu firi e yepi wi fu tan preiki?

¹⁵ Wi e firi korostu. (Leisi Yohanes 14:27.) A srefi neti fosi Yesus dede, a taigi den apostel fu en: „Mi o meki unu firi korostu.” Fa disi kan yepi wi fu tan preiki? Te wi e tan preiki, dan wi o abi wan korostu firi na ini wi ati fu di wi sabi taki Yehovah nanga Yesus breiti nanga wi (Ps. 149:4; Rom. 5:3, 4; Kol. 3:15). Alfredo, wan brada di de na ini a furuten diniwroko 45 yari kaba, taki: „Aladi mi e weri baka te mi du a preikiwroko, toku a e meki mi firi koloku èn mi abi a firi taki mi e du wan bun sani nanga mi libi.” Wi de nanga tangi taki wi abi wan trutru korostu firi!

16. (a) Fu sortu sani Yohanes 15:15 e taki? (b) Fa den apostel ben kan tan mati fu Yesus?

 ¹⁶ Wi de mati fu Yesus. Baka di Yesus taigi den apostel fu en taki a wani taki den „prisiri srefisrefi”, a sori den fu san ede a prenspari fu no denki densrefi nomo, ma fu sori lobi gi tra sma (Yoh. 15:11-13). Baka dati a taki: „Mi kari unu mi mati.” A de wan bigi grani fu de wan mati fu Yesus. San den apostel ben musu du fu tan mati fu Yesus? Den ben abi fu „tan meki furu froktu”. (Leisi Yohanes 15:14-16.) Tu yari na fesi, Yesus ben taigi den apostel: „Te unu e go preiki, dan un musu taki: ’A Kownukondre fu hemel kon krosibei kaba’” (Mat. 10:7). Dati meki na a lasti neti fosi a dede, a gi den deki-ati fu tan du a preikiwroko (Mat. 24:13; Mark. 3:14). A no de fu taki dati a no ben makelek fu du a wroko disi. Ma den ben o man du en èn den ben o man tan mati fu en. Meki wi go luku wan tra sani di ben o yepi den.

17, 18. (a) Sortu sani o yepi wi fu tan preiki, soleki fa wi leisi na Yohanes 15:16? (b) Fa a sani disi yepi den disipel fu Yesus? (c) Sortu sani e yepi wi na ini a ten disi?

¹⁷ Yehovah e piki den begi fu wi. Yesus ben taki: „A Tata o gi unu awansi san unu e aksi en na ini mi nen” (Yoh. 15:16). A musu de so taki a pramisi disi gi den apostel deki-ati! * Den apostel no ben frustan krin taki heri esi Yesus ben o dede. Ma te a ben o dede, dan dati no ben wani taki dati nowan sma ben o yepi den. Yehovah ben o piki den begi fu den èn a ben o yepi den fu du a preikiwroko. Èn na dati a du tu. Syatu baka di Yesus dede, den apostel begi Yehovah fu gi den deki-ati èn Yehovah piki den begi fu den.​—Tori 4:29, 31.

¹⁸ Na dati Yehovah e du tu na ini a ten disi. Te wi e tan preiki, dan wi e tan mati fu Yesus. Boiti dati, te a muilek gi wi fu du a preikiwroko, dan wi kan de seiker taki Yehovah o piki den begi fu wi te wi e aksi en fu yepi wi (Fil. 4:13). Wi de nanga tangi taki Yehovah e piki den begi fu wi èn taki Yesus na wi mati. Den sani disi e yepi wi fu horidoro na ini a preikiwroko.​—Yak. 1:17.

19. (a) Fu san ede wi e tan preiki? (b) San e yepi wi fu du a wroko di Gado gi wi?

¹⁹ Na ini na artikel disi wi taki fu fo reide fu san ede wi e tan preiki: (1) Wi wani gi Yehovah glori èn wi wani santa en nen, (2) wi wani sori Yehovah nanga Yesus taki wi lobi den, (3) wi wani warskow sma èn (4) wi wani sori lobi gi sma. Wi taki tu fu fo sani di e yepi wi fu du a wroko di Gado gi wi: Wi e prisiri, wi abi wan korostu firi, wi na mati fu Yesus èn Yehovah e piki den begi fu wi. A no de fu taki dati Yehovah breiti srefisrefi te a e si fa wi e „tan meki furu froktu”!