1. San Yesus ben taki fu gudu na ini hemel?

A NO ala kado di wi kisi fu Gado wi man si. Fu taki en leti, den moro warti kado di wi kisi fu en na sani di wi no man si. Na ini wan prenspari lezing di Yesus ben hori na tapu wan bergi, a ben taki fu gudu na hemel di warti moro moni. Baka dati a taki: „Pe yu gudu de, na drape yu ati o de tu” (Mat. 6:19-21). Nofo tron wi e feti baka sani di wi e si leki prenspari sani. Wi e kibri wi „gudu na ini hemel” te wi e meki muiti fu abi wan bun nen na Gado. Yesus taki dati den sortu gudu dati no man pori gowe èn sma no man fufuru den.

2. (a) Sortu deki-ati Paulus e gi wi na 2 Korentesma 4:17, 18? (b) San wi o luku na ini na artikel disi?

² Na apostel Paulus e gi wi deki-ati fu „poti prakseri na den sani di wi no e si”. (Leisi 2 Korentesma 4:17, 18.) Wan tu fu den sani dati na den blesi di wi o kisi na ini a nyun grontapu fu Gado. Na ini na artikel disi wi o taki fu fo kado di wi no man si èn di kan tyari wini kon gi wi nownow kaba. Dati na wi matifasi nanga Gado, begi, a santa yeye èn a yepi di wi e kisi fu Yehovah, Yesus nanga den engel na ini a preikiwroko. Wi o luku tu  fa wi kan sori warderi gi den kado disi di wi no man si.

3. San na a moro warti kado di wi kisi èn fa wi du kisi en?

³ A moro warti kado di wi no man si na wi matifasi nanga Yehovah Gado (Ps. 25:14). Fa wan santa Gado kan de mati fu sondu libisma? A kan du disi fu di a frulusu-ofrandi fu Yesus „e puru a sondu fu grontapu” (Yoh. 1:29). Fosi Yesus ben kon na grontapu, Yehovah ben sabi kaba taki a ben o tan gi yesi na en te na dede so taki libisma ben kan kisi frulusu. Dati meki Gado ben kan de mati fu sma di ben libi fosi Yesus dede.​—Rom. 3:25.

4. Gi wan tu eksempre fu man di ben libi fosi Yesus kon na grontapu èn di ben de mati fu Gado.

⁴ Luku wan tu eksempre fu man di ben e libi fosi Yesus kon na grontapu èn di ben de mati fu Gado. Abraham ben abi wan tranga bribi. Moro leki 1000 yari baka di Abraham dede, Yehovah ben kari en „mi mati” (Yes. 41:8). Sobun, srefi efu wan sma dede, toku Yehovah e si en leki en mati. Yehovah no frigiti Abraham. Gi en a de neleki Abraham e libi ete (Luk. 20:37, 38). Wan tra eksempre na Yob. Di ala den engel ben kon makandra, Yehovah ben sori taki a ben frutrow Yob. Yehovah kari en „wan bun man di lobi retidu, di abi bigi lespeki gi Gado, èn di e wai pasi gi ogri” (Yob 1:6-8). Èn fa Yehovah ben e denki fu Danièl, wan man di ben e dini en 80 yari langa na ini wan kondre pe sma no ben e dini Yehovah? Dri leisi engel taigi na owru man disi taki ’Gado lobi en srefisrefi’ (Dan. 9:23; 10:11, 19). Wi kan de seiker taki Yehovah no man wakti a dei te a o gi den mati fu en di a lobi wan opobaka.​—Yob 14:15.

5. San wi musu du fu kan de mati fu Yehovah?

⁵ Na ini a ten disi milyunmilyun sondu libisma de mati fu Yehovah. Wi sabi disi fu di furu man, uma nanga pikin na heri grontapu e libi soleki fa Gado wani. Yehovah „de bun mati nanga den sma di ati krin” (Odo 3:32). Den sma disi na mati fu Yehovah fu di den e bribi na ini a frulusu-ofrandi fu Yesus. Dati meki wi kan gi wisrefi abra na Yehovah èn wi kan dopu. Te wi e du den prenspari sani disi, dan neleki milyunmilyun dopu Kresten wi e tron „bun mati” fu a moro prenspari sma fu hemel nanga grontapu.

6. Fa wi kan sori warderi gi a matifasi di wi abi nanga Gado?

⁶ Fa wi kan sori warderi gi a matifasi di wi abi nanga Gado? Neleki Abraham nanga Yob di tan dini Yehovah moro leki wán hondro yari langa, wi musu tan dini en awinsi o langa wi e dini en kaba. Neleki fa a ben de nanga Danièl, wi matifasi nanga Yehovah musu prenspari gi wi moro wi eigi libi (Dan. 6:7, 10, 16, 22). Yehovah o yepi wi fu pasa iniwan tesi èn fu tan mati fu en fu ala ten.​—Fil. 4:13.

7. (a) Soleki fa Odo 15:8 e sori, dan fa Yehovah e si den begi fu wi? (b) Fa Yehovah e piki den begi fu wi?

⁷ Wan tra kado di wi no man si na begi. Bun mati e taigi makandra fa den e denki èn fa den e firi. Na so a de tu  te wi de mati fu Yehovah. Yehovah e taki nanga wi nanga yepi fu en Wortu. Drape wi kan leisi fa a e denki èn fa a e firi. Te wi e begi, wi kan fruteri en fa wi e denki èn wi kan taigi en ala san de na tapu wi ati. Yehovah lobi arki den begi fu wi. (Leisi Odo 15:8.) Leki wan lobi Mati, Yehovah no e arki den begi fu wi wawan, ma a e piki den tu. Son leisi a e piki den esi-esi. Ma son leisi wi musu tan begi fu wan tori. Toku wi kan de seiker taki a o piki den begi fu wi na a yoisti ten èn na a moro bun fasi. Kande Gado no e piki den begi fu wi soleki fa wi ben fruwakti. Fu eksempre, na presi taki a puru wan tesi, a kan gi wi a koni nanga a krakti fu „man horidoro”.​—1 Kor. 10:13.

8. Fa wi kan sori taki wi de nanga tangi taki wi kan begi?

⁸ Fa wi kan sori taki wi de nanga tangi taki wi kan begi? Wan fasi fa wi kan du dati, na fu gi yesi na a rai di wi kisi fu „begi doronomo” (1 Tes. 5:17). Yehovah no e dwengi wi fu begi, ma a wani taki wi du en fu di wisrefi wani. Dati meki a e gi wi a deki-ati fu „tan begi” (Rom. 12:12). Sobun, wi kan sori taki wi de nanga tangi te wi e begi furu ibri dei. Wi no musu frigiti fu taki Yehovah tangi èn fu prèise en te wi e begi.​—Ps. 145:2, 3.

9. Fa wan brada feni en fu begi èn fa yu feni en fu begi?

⁹ Te wi e dini Yehovah wan langa pisi ten kaba èn wi si fa a piki den begi fu wi, dan wi o abi moro warderi gi a grani di wi abi fu begi. Luku na eksempre fu Chris, wan brada di de 47 yari kaba na ini a furuten diniwroko. A e taki: „Mi lobi wiki fruku mamanten fu begi Yehovah. Mi lobi taki nanga Yehovah te mamanten te ala sani de rustig èn te mi e si fa a son e opo. Disi e meki taki mi e taki en tangi gi ala den kado di a gi mi, sosrefi gi a grani di mi abi fu begi. Baka te  mi e begi na a kaba fu a dei, dan mi e firi korostu èn mi e sribi switi.”

10. Fu san ede wi musu de nanga tangi gi a santa yeye fu Gado?

¹⁰ A santa yeye na wan tra kado di Gado e gi wi èn wi musu de nanga tangi gi en. Yesus gi wi deki-ati fu tan begi fu a santa yeye (Luk. 11:9, 13). Yehovah e gebroiki en santa yeye fu gi wi „krakti di bigi pasa marki” (2 Kor. 4:7; Tori 1:8). A yeye fu Gado kan yepi wi fu horidoro awinsi sortu tesi wi e kisi.

11. Fa a santa yeye e yepi wi?

¹¹ A santa yeye kan yepi wi fu du a wroko di Gado gi wi. A e yepi wi tu fu du sani moro bun. Wi sabi taki wi abi bun bakapisi na ini a wroko fu Gado fu di a e gi wi en santa yeye.

12. Soleki fa Psalm 139:23, 24 e sori, dan san wi kan aksi Gado?

¹² Fa wi kan sori taki wi de nanga tangi gi a santa yeye fu Gado? Wan fasi fa wi kan du dati, na fu begi Gado fu meki a santa yeye yepi wi fu si sortu fowtu denki nanga swakifasi wi abi. (Leisi Psalm 139:23, 24.) Èn efu wi si taki wi abi wan fowtu denki noso wan swakifasi, dan wi musu begi Gado fu gi wi en santa yeye so taki wi kan abi a krakti fu tyari kenki kon. Na so wi e sori Yehovah taki wi no wani du sani di o meki taki a no gi wi en santa yeye moro.​—Ef. 4:30.

13. Fa wi kan kon abi moro warderi gi a santa yeye?

¹³ Wi kan kon abi moro warderi gi a santa yeye te wi e prakseri san a e du na ini a ten fu wi. Fosi Yesus ben go na hemel, a taigi den disipel: „Unu sa kisi krakti te a santa yeye kon na un tapu, èn unu sa de kotoigi fu mi . . . te na den moro farawe presi fu grontapu” (Tori 1:8). Den wortu disi e kon tru na ini a ten disi. Nanga yepi fu a santa yeye moro leki aiti nanga afu milyun sma na heri grontapu tron anbegiman fu  Yehovah. Boiti dati, wi de na ini wan agersi paradijs fu di a yeye fu Gado e yepi wi fu kweki moi fasi soleki lobi, prisiri, freide, pasensi, switifasi, bun-ati, bribi, safri-ati èn a e yepi wi fu dwengi wisrefi (Gal. 5:22, 23). A santa yeye na trutru wan warti kado!

14. Suma e yepi wi fu du a preikiwroko?

¹⁴ Wi abi a grani fu „wroko makandra” nanga Yehovah, Yesus nanga den engel (2 Kor. 6:1). Wi e du disi ala leisi te wi e du a preikiwroko. Paulus ben taki fu ensrefi èn fu den tra sma di e du a wroko disi: „Wi e wroko makandra nanga Gado” (1 Kor. 3:9). Te wi e du a preikiwroko, dan wi e wroko makandra tu nanga Yesus. Di a ben taigi den disipel fu en fu ’go na sma fu ala kondre èn fu meki den tron disipel’ a taki tu: „Mi o de nanga unu” (Mat. 28:19, 20). Èn fa a de nanga den engel? Wi de nanga tangi taki den engel e tiri wi te wi e fruteri ’den sma di e libi na grontapu a têgo bun nyunsu’.​—Openb. 14:6.

15. Gi wan Bijbel eksempre di e sori fa Yehovah e yepi wi na ini a preikiwroko.

¹⁵ Te wi e preiki a bun nyunsu fu a Kownukondre, dan a de neleki wi e sai siri. Son siri e fadon na tapu bun doti, den e bigin gro èn den e meki froktu (Mat. 13:18, 23). Suma e meki den siri dati gro? Yesus taki dati nowan sma kan tron wan bakaman fu en efu ’a Tata no e hari en kon’ (Yoh. 6:44). Bijbel abi wan moi eksempre fu disi. Wan leisi na apostel Paulus ben e preiki gi wan tu uma di ben de dorosei fu a foto Filipi. Bijbel e taki san pasa nanga wan fu den uma di ben nen Lidia: „Yehovah opo en ati bradi, so taki a ben kan poti prakseri na den sani di Paulus ben e taki” (Tori 16:13-15). Neleki Lidia, Yehovah hari milyunmilyun tra sma kon na en.

16. Suma musu kisi ala a grani gi den bun bakapisi di wi abi na ini a preikiwroko?

¹⁶ Suma musu kisi a grani gi den bun bakapisi di wi abi na ini a preikiwroko? Paulus piki na aksi disi na ini a brifi di a skrifi gi a gemeente na ini Korente. A taki: „Mi prani, Apolos gi watra, ma na Gado meki sani gro. Sobun, a no a sma di e prani noso a sma di e gi watra de prenspari, ma na Gado di e meki sani gro” (1 Kor. 3:6, 7). Neleki Paulus, wi musu gi Yehovah a grani gi ala den bun bakapisi di wi abi na ini a preikiwroko.

17. Fa wi kan sori taki wi de nanga tangi gi a grani di wi abi fu „wroko makandra” nanga Gado, Krestes nanga den engel?

¹⁷ Fa wi kan sori taki wi de nanga tangi gi a grani di wi abi fu „wroko makandra” nanga Gado, Krestes nanga den engel? Wan fasi fa wi kan du dati, na fu du ala san wi man fu preiki a bun nyunsu gi tra sma. Difrenti fasi de fa wi kan du dati. Fu eksempre, wi kan preiki „oso fu oso” èn na presi pe furu sma de (Tori 20:20). Furu brada nanga sisa lobi preiki gi sma na tra okasi. Te den e miti sma di den no sabi, dan den e gi den odi èn den e pruberi fu taki nanga den. Efu wan sma wani taki, dan den e pruberi fu fruteri en a bun nyunsu fu a Kownukondre.

18-19. (a) Fa wi e gi den siri di wi prani watra? (b) Fruteri wan ondrofenitori di e sori fa Yehovah yepi wan Bijbelstudie.

¹⁸ Leki sma di e „wroko makandra nanga  Gado” wi no musu sai siri nomo, ma wi musu gi den watra tu. Te wan sma sori taki a wani sabi moro, dan wi musu du ala san wi man fu go baka na en noso fu aksi wan tra sma fu du dati. Wi musu pruberi fu studeri Bijbel nanga en. Wi breiti te wi e si fa Yehovah e yepi wan Bijbelstudie fu kenki en denki.

¹⁹ Luku na eksempre fu wan brada di ben de wan bonuman na ini Zuid-Afrika. A ben lobi san a ben leri di a ben e studeri Bijbel. Ma di a leri san Gado Wortu e taki fu sma di e taki nanga den dede afo fu den, dan a ben muilek gi en fu tapu nanga a gwenti disi (Deut. 18:10-12). Safrisafri Gado yepi en fu kenki en denki. Te fu kaba a tapu nanga a bonuwroko, aladi dati ben de a wan-enkri wroko di a ben e du fu sorgu en srefi. A brada disi di abi 60 yari now e taki: „Mi de nanga tangi taki Yehovah Kotoigi yepi mi na someni fasi. Fu eksempre, den yepi mi fu feni wan wroko. San moro prenspari gi mi na taki Yehovah yepi mi fu kenki mi libi. Now mi na wan dopu Kotoigi èn mi e preiki a bun nyunsu tu.”

20. San wi wani du?

²⁰ Na ini na artikel disi wi taki fu fo kado di Gado gi wi èn di wi no man si. A moro bigiwan na a grani di wi abi fu de mati fu Yehovah. Te wi de mati fu Yehovah, dan wi e kisi den tra kado. Wi kan begi en, a e yepi wi nanga en santa yeye èn te wi e du a preikiwroko wi e kisi yepi fu Yehovah, Yesus nanga den engel. Wi wani kon abi moro warderi gi den kado disi. Èn ala ten wi wani de nanga tangi taki wi abi so wan bun mati leki Yehovah.