1. San wi leri na a alayari konmakandra fu 2023?

 NA A alayari konmakandra fu 2023, a wi ben breiti fu kon ferstan son sani fu a bribi fu wi moro bun èn wi yere wan tu moi sani di abi fu du nanga diniwroko fu wi. Fu eksempre, wi leri taki son sma kande o kisi na okasi fu teki a sei fu Yehovah srefi baka te Babilon a Bigiwan kisi pori. Wi leri tu taki bigin fu November 2023, wi no abi fu skrifi finfini moro san wi du na ini a preikiwroko. Ma disi wani taki dati a preikiwroko no prenspari so moro fu di den kenki disi kon? Kwetkweti!

2. Fu san ede a preikiwroko fu wi e kon moro prenspari dei fu dei? (Markus 13:10)

² Ibri dei, a diniwroko fu wi e kon moro prenspari. Fu san ede? Fu di furu ten no de moro. Prakseri san Yesus ben taki fu a preikiwroko di wi o du na ini den lasti dei. (Leisi Markus 13:10.) Soleki fa na Evangelietori fu Mateyus e sori, dan Yesus ben taki dati a bun nyunsu ben o preiki na heri grontapu fosi „a kaba” kon (Mat. 24:14). Den wortu dati e sori taki na ogri grontapu fu Satan o kon na wan kba. Yehovah poti „a dei nanga a yuru” gi den sani di o psa heri esi (Mat. 24:36; 25:13; Tori 1:7). Ibri dei wi e kon moro krosbei fu a ten dati (Rom. 13:11 ). Sobun, wi musu tan preiki teleki a kba kon.

3. Fu san ede wi e preiki?

 ³ Ma wi wani poti prakseri na a prenspari aksi disi: Fu san ede wi e preiki a bun nyunsu? Fu taki en leti, na lobi e meki taki wi e preiki. Te wi e preiki, dan wi e sori taki wi lobi a waarheid, wi lobi tra sma, èn san moro prenspari, wi e sori taki wi lobi Yehovah nanga a nen fu en. Meki wi go luku ibriwan fu den penti disi.

WI E PREIKI FU DI WI LOBI A BUN NYUNSU

4. Fa wi e firi te wi e yere bun nyunsu?

⁴ Yu sabi ete fa yu ben e firi di yu yere wan bun nyunsu? Kande wan nyun beibi ben gebore na ini yu famiri, noso kande yu ben feni wan wroko di yu ben abi tranga fanowdu. A no de fu taki dati yu no ben man wakti fu ferteri yu famiri nanga mati a bun nyunsu dati. Na so yu ben e firi tu di yu yere a bun nyunsu fu Gado Kownukondre di de a moro bun nyunsu di yu ben kan yere?

5. Fa yu ben e firi di yu yere den tru tori fu Gado Wortu fu a fosi leisi? (Luku den prenki.)

⁵ Prakseri baka fa yu ben e firi di yu kon sabi den tru tori fu Gado Wortu fu a fosi leisi. Yu kon sabi taki yu P’pa na hemel lobi yu, taki a wani taki yu tron wan fu den anbegiman fu en. Yu kon sabi tu taki a pramisi fu tyari wan kba kon na sari nanga pina, taki yu kan abi a howpu fu si den lobiwan fu yu baka na ini a nyun grontapu, èn furu tra sani sosrefi (Mark. 10:29, 30; Yoh. 5:28, 29; Rom. 8:38, 39; Openb. 21:3, 4). Den tru tori dati naki yu ati trutru (Luk. 24:32). Yu ben lobi san yu ben e leri èn yu ben wani ferteri ala sma den sani dati.​—Luku Yeremia 20:9.

6. San yu leri fu na ondrofenitori fu Ernest nanga Rose?

⁶ Luku wan ondrofenitori. Wan brada  di nen Ernest b ben abi sowan tin yari di en p’pa dede. Ernest e taki: „Mi ben aksi misrefi: ’A go na hemel? Noso a dede fu ala ten?’ Mi ben dyarusu tapu den pkin di ben abi wan p’pa ete.” Ernest ben gwenti go na berpe, dan a ben e kindi na a grebi fu en p’pa èn a ben e begi: „Grantangi Gado, mi wani kon sabi pe mi p’pa de.” Sowan 17 yari baka di en p’pa dede, wan Kotoigi aksi Ernest efu a ben wani studeri Bijbel. Ernest ben wani dati trutru. A ben breiti fu kon sabi taki den dedewan no sabi notnoti, taki a ben de neleki den ben e sribi dipi, èn taki Bijbel e pramisi taki den o kisi wan opobaka na ini a ten di e kon (Preik. 9:5, 10; Tori 24:15). Te fu kba a kisi piki tapu den aksi di a ben abi someni yari langa. Ernest ben lobi den Bijbel tru tori di a ben e leri. En wefi Rose bigin studeri tu èn a kon lobi den sani tu di a ben e leri. Na ini 1978 den dopu. Den no ben man wakti fu ferteri den famiriman, mati, nanga tra sma den moi tru tori di den ben leri. Na so Ernest nanga Rose ben man yepi moro leki 70 sma fu kon leri sabi Yehovah èn fu dopu.

7. San e psa te wi e bigin lobi den tru tori fu Bijbel? (Lukas 6:45)

⁷ A de krin taki te wi lobi den sani di wi e leri fu Bijbel, dan wi wani ferteri ala sma den sani dati. (Leisi Lukas 6:45.) Wi e firi leki den disipel fu Yesus na ini a fosi yarihondro di ben taki: „Wi no man tapu fu taki fu den sani di wi si èn di wi yere” (Tori 4:20). Wi lobi den tru tori fu Bijbel so te taki wi wani ferteri so furu sma leki wi man den sani dati.

WI E PREIKI FU DI WI LOBI TRA SMA

8. Fu san ede wi wani ferteri tra sma a bun nyunsu? (Luku a faki „ Lobi o yepi yu fu meki disipel”.) (Luku a prenki.)

⁸ Neleki Yehovah nanga en Manpkin, wi lobi sma (Odo 8:31; Yoh. 3:16). Wi e firi gi den wan di ’no sabi Gado’ èn di ’no abi nowan howpu’ (Ef. 2:12). Fu di den abi furu problema, meki den kan firi leki den de na ini wan dipi peti. Ma wi abi wan t’tei fu hari den puru na ini a peti dati. A t’tei dati na a bun nyunsu fu Gado Kownukondre. Fu di wi lobi den sma disi èn fu di wi e firi gi den, meki wi wani du ala san wi man fu ferteri den a bun nyunsu. Te den yere a bun nyunsu, dan dati kan gi den howpu, a kan yepi den fu de koloku nownow kba, èn a kan gi den na okasi fu kon abi a „trutru libi” noso têgo libi wan dei.​—1 Tim. 6:19.

9. Sortu warskow wi e gi sma gi a ten di e kon, èn fu san ede? (Esekièl 33:7, 8)

 ⁹ Fu di wi lobi sma, meki wi wani warskow den taki na ogri grontapu disi e kon na wan kba. (Leisi Esekièl 33:7, 8.) Wi lobi ala sma èn sosrefi den famiri fu wi di no e anbegi Yehovah. Furu fu den e libi den libi sondro fu sabi taki „wan bigi banawtu” o kon. „Noiti ete so wan ten ben de sensi a bigin fu grontapu teleki now èn noiti moro so wan ten o kon baka” (Mat. 24:21). Wi wani taki den kon sabi san o psa na a ten te Gado o krutu grontapu. Na a fosi presi, Gado o tyari wan kba kon na ala falsi kerki, èn baka dati a heri ogri grontapu o kisi pori na ini Armagedon (Openb. 16:14, 16; 17:16, 17; 19:11, 19, 20). Wi e howpu taki so furu sma leki a man o gi yesi na a warskow èn taki den o besroiti fu anbegi Yehovah makandra nanga wi. Ma fa a de nanga den famiriman fu wi èn nanga den tra sma di no e gi yesi na a warskow nownow?

10. Fu san ede a prenspari taki wi e tan warskow sma gi den sani di o psa heri esi?

¹⁰ Soleki fa wi si kba na ini na artikel na fesi, dan a kan taki Yehovah o wani ferlusu den sma di e bigin bribi na ini en te den e si taki Babilon a Bigiwan kisi pori. Efu dati de so, dan a wi musu du moro muiti fu tan warskow sma. Denki a tori disi: Den sani di wi e ferteri sma now kan de sani di den o memre na a ten dati. (Luku Esekièl 33:33.) Kande den o prakseri a warskow baka di den ben kisi fu wi èn kande den o wani anbegi Yehovah makandra nanga wi fosi a lati. Na dati ben psa nanga a waktiman fu a straf’oso na ini Filipi. Na baka di „wan bigi gronseki kon”, dan fosi a man disi poti bribi na ini a bun nyunsu. A kan taki neleki a waktiman disi, son sma di no wani arki a bun nyunsu now, o kenki prakseri te Babilon a Bigiwan kisi pori wantronso.​—Tori 16:25-34.

WI E PREIKI FU DI WI LOBI YEHOVAH NANGA A NEN FU EN

11. Fa wi e gi Yehovah glori, grani, nanga a krakti fu wi? (Openbaring 4:11) (Luku den prenki.)

¹¹ A moro prenspari reide fu san ede wi e preiki a bun nyunsu, na fu di wi lobi Yehovah Gado nanga a santa nen fu en. Wi e si a diniwroko fu wi leki wan fasi fa wi kan prèise a Gado di wi lobi. (Leisi Openbaring 4:11.) Wi e agri nanga wi heri ati taki Yehovah Gado warti fu kisi glori, grani, nanga krakti fu den ret’ati futuboi fu en. Wi e gi en glori nanga  grani te wi e gi trawan krinkrin beweisi taki na en „meki ala sani” èn taki wi de na libi fu di na en gi wi libi. Fa wi kan gi Yehovah a krakti fu wi? Wi kan gi en a krakti fu wi te wi e gebroiki wi ten nanga den sani di wi abi fu teki prati na a preikiwroko so furu leki wi man (Mat. 6:33; Luk. 13:24; Kol. 3:23). Fu taki en syatu, wi lobi fu taki fu a Gado di wi lobi. Boiti dati, wi e si en leki wan grani fu ferteri trawan fu a nen fu en èn san a nen dati wani taki. Fu san ede?

12. Fa wi e santa a nen fu Yehovah na ini diniwroko fu wi?

¹² A lobi di wi abi gi Yehovah e meki taki wi wani santa en nen (Mat. 6:9). Disi wani taki dati wi wani meki trawan kon sabi taki den takru sani di Satan ferteri fu Yehovah na ogr’ati lei (Gen. 3:1-5; Yob 2:4; Yoh. 8:44). Te wi e preiki, dan wi e angri fu ferteri ala sma di wani arki suma na Yehovah èn fa a de trutru. Wi wani taki ala sma musu sabi taki a moro prenspari fasi fu en na lobi, taki a e tiri na wan reti fasi, èn taki heri esi a Kownukondre fu en o tyari wan kba kon na ala pina. Disi o meki taki libisma o abi freide èn den o de koloku (Ps. 37:10, 11, 29; 1 Yoh. 4:8). Te wi e ferteri sma den sani disi fu Yehovah, dan wi e santa a nen fu en. Wi breiti tu fu di wi e du san wi musu du leki Yehovah Kotoigi. Fa so?

13. Fu san ede wi e si en leki wan grani fu de Yehovah Kotoigi? (Yesaya 43:10-12)

¹³ Yehovah teki wi leki en „kotoigi”. (Leisi Yesaya 43:10-12.) Wan tu yari psa, wan brifi fu a Tiri Skin ben taki: „A moro bigi grani di iniwan fu wi kan abi, na fu de wan Yehovah Kotoigi.” Fu san ede dati de so? Luku na agersitori  disi. Efu yu ben abi wan sma fanowdu fu opo taki gi yu na fesi krutu, dan yu ben o aksi wan sma di yu sabi èn di yu e fertrow. A bun nen di a sma dati abi ben o meki sma bribi san a e taki. Fu di Yehovah teki wi leki en Kotoigi, dan dati e sori taki a sabi wi bun èn taki a abi a fertrow taki wi o ferteri sma taki en na a wan-enkri tru Gado. Wi breiti so te taki wi na en Kotoigi, taki wi e gebroiki ibri okasi fu ferteri sma fu a nen fu en èn fu sori taki ala den takru sani di sma ferteri fu en na soso lei. Na so wi e gi grani na a nen fu wi. Wi na Kotoigi fu Yehovah!​—Ps. 83:18; Rom. 10:13-15.

WI O TAN PREIKI TE NA A KBA

14. Sortu span sani kan psa na ini a ten di e kon?

¹⁴ Wi no man wakti fu si san o psa heri esi. Wi howpu taki Yehovah o blesi a wroko so taki moro sma e kon na ini a tru anbegi fosi a bigi banawtu bigin. Wi breiti tu taki srefi na ini a bigi banawtu, a moro muilek ten di o miti sma, a kan taki moro sma o kmoto na ini a grontapu fu Satan fu prèise Yehovah makandra nanga wi.​—Tori 13:48.

15-16. San wi o tan du èn teleki o ten?

¹⁵ Ma teleki a ten dati doro, wi abi wan prenspari wroko fu du. Wi abi a grani fu du wan wroko di no o du noiti moro. Wi musu preiki a bun nyunsu fu Gado Kownukondre na heri grontapu. Na a srefi ten, wi musu tan warskow sma gi den sani di o psa heri esi. Sma musu kon sabi taki a kba fu na ogri sistema disi e doro heri esi. Te a krutudei doro, dan den o sabi taki a boskopu di wi e preiki kmoto fu Yehovah Gado.​—Esek. 38:23.

¹⁶ San wi besroiti fu du? Fu di wi lobi a bun nyunsu, fu di wi lobi libisma, èn san moro prenspari, fu di wi lobi Yehovah Gado nanga a nen fu en, meki wi o tan preiki fayafaya, teleki Yehovah taki: „A wroko kba!”