1. Fa furu reti-ati futuboi fu Gado e firi fu di den du sondu?

NA APOSTEL Paulus ben firi brokosaka srefisrefi te a ben e prakseri den fowtu fu en (Rom. 7:24). Furu reti-ati futuboi fu Gado ben e firi neleki Paulus. Wi alamala na sondusma èn te wi no e du san Yehovah e aksi fu wi, dan wi e firi sari. Son Kresten di du seryusu sondu ben e denki srefi taki Gado no o gi den pardon noiti.

2. (a) Fa Psalm 34:22 e sori taki den futuboi fu Gado no musu denki taki Gado no o gi den pardon noiti? (b) San wi o luku na ini na artikel disi? (Luku a faki „ Den tori na ini Bijbel na fu leri wi moi sani noso den e prenki tra sani?”)

² Toku Bijbel e gi wi a dyaranti taki den sma di e suku kibri na Yehovah no abi fu denki taki Gado no o gi den pardon noiti. (Leisi Psalm 34:22.) San a wani taki fu suku kibri na Yehovah? Sortu sani wi musu du efu wi wani taki Yehovah sori sari-ati gi wi èn taki a gi wi pardon? Wi o kisi piki tapu den aksi disi te wi e poti prakseri na a seti fu den loweman-foto na ini Israel fu owruten. A tru taki a seti disi ben de wan pisi fu a Wetfrubontu, di kon na wan kaba na a Pinksterfesa fu a yari 33. Ma hori na prakseri taki a Wet ben komoto fu Yehovah. Sobun, a seti fu den loweman-foto e leri wi fa Yehovah e si sondu, fa a e si sma di e du sondu èn o ten a e gi sma pardon. Ma wi o luku fosi fu san ede den foto disi ben seti  èn fa sma ben kan feni kibri na ini den foto disi.

3. San den Israelsma ben musu du nanga wan kiriman?

³ Yehovah ben e si en leki wan seryusu sani te wan sma ben kiri wan trawan. Te wan sma ben kiri wan trawan fu espresi, dan a mansma di ben de a moro krosibei famiri fu a dedesma ben musu kiri a kiriman. Bijbel e kari a mansma dati „a sma di abi a reti fu kiri a kiriman” (Num. 35:19). Na so a kiriman ben e pai baka nanga en eigi libi gi a libi fu a sma di a ben kiri. Efu wan kiriman no ben e kisi dedestrafu esi-esi, dan a Pramisi Kondre no ben o santa moro. Dati meki Yehovah ben taki: „Un no musu pori a kondre pe unu e tan, bika te wan sma kiri wan trawan, dan a brudu fu a dede sma e pori a kondre.”​—Num. 35:33, 34.

4. San ben musu pasa te wan Israelsma ben e kiri wan trawan sondro taki a ben wani dati?

⁴ Ma san ben e pasa te wan Israelsma ben e kiri wan trawan sondro taki a ben wani dati? Awansi wan sma no ben kiri wan trawan fu espresi, toku a sma disi ben meki wan trawan lasi en libi (Gen. 9:5). Ma Yehovah ben wani taki den sori sari-ati gi so wan sma. A sma disi ben mag lowe go na wan fu den siksi loweman-foto. Drape a ben e feni kibri, so taki a sma di ben abi a reti fu kiri en no ben o man kiri en. A sma di ben kiri wan trawan sondro taki a ben wani dati ben musu tan na ini a loweman-foto teleki a granpriester dede.​—Num. 35:15, 28.

5. Fa a seti fu den loweman-foto e yepi wi fu kon frustan Yehovah moro bun?

⁵ A no libisma ben bosroiti fu poti wan tu foto leki loweman-foto. Na Yehovah srefi ben taigi Yosua: „Yu musu taigi den Israelsma: ’Mi ben meki Moses taigi unu fu luku sortu foto unu wani teki leki loweman-foto.’” Den foto disi ben de „santa foto” (Yos. 20:1, 2, 7, 8). Fu di na Yehovah srefi ben bosroiti fu seti sani, so taki foto ben de pe sma ben kan lowe go kibri, meki wi ben kan aksi wisrefi: Fa a seti disi e yepi wi fu kon frustan moro bun fa Yehovah e sori sari-ati gi wi? Èn fa a seti disi e yepi wi fu kon sabi fa wi kan suku kibri na Gado na ini a ten disi?

6, 7. (a) Te wan sma di ben kiri wan trawan sondro taki a ben wani dati ben musu kisi krutu, dan sortu frantwortu den owruman ben abi? (Luku a prenki na a bigin fu na artikel.) (b) Fu san ede a ben bun taki a loweman ben e go taki nanga den owruman?

⁶ Te wan sma ben kiri wan trawan sondro taki a ben wani dati, dan a ben musu lowe go na den portu fu a loweman-foto fu „fruteri den owru man” san pasa. Den ben musu gi en okasi fu tan na ini a foto (Yos. 20:4). Wan pisi ten baka dati, den ben musu seni en go baka na den owruman fu a foto pe a ben kiri a sma, èn den owruman dati ben musu krutu na afersi fu en. (Leisi Numeri 35:24, 25.) Baka te den ben bosroiti taki a loweman no ben kiri a trawan fu espresi, dan fosi a ben mag drai go baka na a loweman-foto.

⁷ Fu san ede a loweman ben musu taki nanga den owruman? Den owruman ben musu sorgu taki a gemeente fu Israel ben e tan krin. Den ben o yepi a sma di ben kiri wan trawan sondro taki a ben wani dati, fu kisi wini fu a sari-ati fu Yehovah. Wan Bijbel sabiman ben skrifi taki efu a loweman no ben e go na den owruman, dan wan sma ben kan kiri en. Èn na ensrefi ben suku dati fu di a no ben du san Gado ben taki. Wan sma di ben kiri wan trawan sondro taki a ben wani dati ben musu suku yepi èn a ben musu teki a yepi dati efu a ben wani tan na libi. Efu a no ben e lowe go na wan fu den foto di Yehovah ben poti, dan a moro krosibei famiriman fu a sma di a ben kiri ben kan kiri en.

8, 9. Fu san ede wan Kresten di du wan seryusu sondu musu suku yepi na den owruman?

 ⁸ Na ini a ten disi, wan Kresten di du wan seryusu sondu musu suku yepi na den gemeente owruman fu kan meki sani bun baka nanga Yehovah. Fu san ede a sani disi prenspari so? Na a fosi presi, na Yehovah poti den owruman fu krutu afersi di abi fu du nanga seryusu sondu (Yak. 5:14-16). Wan tra sani, na taki te sma abi berow fu den sondu fu den, dan den owruman e yepi den fu meki sani bun baka nanga Yehovah èn fu no fadon baka na ini a sondu fu den (Gal. 6:1; Hebr. 12:11). A di fu dri sani, na taki owruman kisi a frantwortu nanga a leri fu trowstu sma di abi berow èn fu yepi den fu no firi sari moro. Yehovah e kari den owruman disi ’wan kibripresi gi sibibusi’ (Yes. 32:1, 2). Yu no e agri taki a seti disi na wan fu den fasi fa Yehovah e sori sari-ati gi wi?

⁹ Furu futuboi fu Yehovah firi frulekti di den go taki nanga den owruman èn den kisi yepi. Fu eksempre, wan brada di nen Daniel ben du wan seryusu sondu. Ma wan tu mun langa a ben e tweifri fu go taki nanga den owruman. A e taki: „Fu di mi ben wakti so langa, meki mi ben denki taki den owruman no ben o man yepi mi moro.” Toku a ben e frede ala ten taki wan sma ben o kon sabi sortu sondu a du, èn a ben e firi leki ibri leisi te a ben e begi, a ben musu aksi Yehovah pardon fosi. Te fu kaba, Daniel suku yepi na den owruman. A e taki: „A tru taki mi ben frede fu go taki nanga den. Ma bakaten a ben gersi leki wan sma ben puru wan bigi hebi na mi tapu. Now mi e firi taki mi man taki fri nanga Yehovah sondro taki wan sani e tapu pasi gi mi.” Daniel abi wan krin konsensi now èn no so langa pasa a tron dinari ini a diniwroko.

10. Efu wan sma ben kiri wan trawan sondro taki a ben wani dati, dan san a ben musu du efu a ben wani kisi pardon?

¹⁰ Wan sma di ben kiri wan trawan sondro taki a ben wani dati, ben musu du wan sani efu a ben wani kisi pardon. A ben musu lowe go na a loweman-foto di ben de moro krosibei. (Leisi Yosua 20:4.) A no de fu taki dati a loweman no ben e draidrai. Efu a no ben wani lasi en libi, dan a ben musu doro na a foto so esi leki a man, èn a ben musu tan na ini a foto! Ma a loweman ben o abi fu libi wan tu sani na baka. A ben o abi fu libi en wroko, en oso pe a ben e libi switi, èn a no ben o de fri moro fu go pe a wani. A ben o abi fu tan  na ini a foto teleki a granpriester dede (Num. 35:25). * Ma dati ben de gi en eigi bun. Efu a loweman ben gowe libi a loweman-foto, dan a ben o sori taki a no ben e broko en ede nanga a libi di ben lasi èn en srefi ben kan lasi en libi.

11. Fa wan Kresten e sori taki a no e fruwakti taki Yehovah gi en pardon awansi san a du?

¹¹ Na ini a ten disi, wan sma di du sondu musu du wan tu sani tu efu a wani taki Gado gi en pardon. Wi musu tapu nanga iniwan sondu di wi e du. Wi no musu tapu nomo nanga seryusu sondu, ma wi musu tapu tu nanga pikinpikin sondu di nofo tron e meki taki wi e du seryusu sondu. Nanga yepi fu santa yeye, na apostel Paulus ben taki sortu sani den Kresten na ini Korente ben du fu sori taki den ben abi berow. A ben skrifi: „Luku omeni muiti unu du fu di unu sari na wan fasi di Gado feni bun: Unu meki unsrefi kon krin, unu ati bron fu na ogri di pasa, unu e lespeki Gado, unu ben angri fu lusu a problema èn unu ben de fayafaya fu du dati. Iya, unu poti sani kon reti baka!” (2 Kor. 7:10, 11) Te wi e du iniwan sani di de fanowdu fu tapu nanga a sondu di wi ben e du, dan wi e sori Yehovah taki wi e broko wi ede nanga a matifasi di wi abi nanga en èn taki wi no e fruwakti taki a gi wi pardon awansi san wi du.

12. Nanga sortu sani wan Kresten o abi fu tapu efu a wani taki Gado gi en pardon?

¹² Nanga sortu sani wan Kresten o abi fu tapu efu a wani taki Yehovah gi en pardon? A musu de klariklari fu tapu srefi nanga sani di a lobi, ma di kan meki taki a fadon baka na ini sondu (Mat. 18:8, 9). Efu mati e pruberi fu dwengi yu fu du sani di Yehovah no feni bun, dan yu o tapu fu moksi nanga den? Efu yu abi problema nanga sopi, dan yu o wai pasi gi situwâsi pe a o moro makriki gi yu fu dringi tumusi furu sopi? Efu a muilek gi yu fu basi den seksfiri fu yu, dan yu e sorgu taki yu no e luku felem noso website di kan meki taki yu e prakseri sani di no fiti? Yu o sorgu taki yu no e du sani di e meki yu kisi den sortu prakseri dati? Hori na prakseri taki awansi sortu sani wi o abi fu libi na baka fu man tan dini Yehovah nanga wi heri ati, dati no sa de fu soso noiti. Nowan sani e hati moro leki te yu e firi leki Gado drai baka gi yu. Na a srefi ten, nowan sani e meki wi firi moro koloku leki te wi e firi a „bun-ati” fu en.​—Yes. 54:7, 8.

13. Fruteri fu san ede wan loweman na ini a loweman-foto ben kan de koloku, sondro fu frede taki ogri ben o miti en drape.

¹³ Te a loweman ben de na ini a loweman-foto, dan sma no ben o man du ogri nanga en. Dati meki Yehovah ben taki: „Na so fasi a famiriman di abi a reti fu kiri a kiriman no o man kiri en” (Yos. 20:2, 3). Yehovah no ben wani taki sma krutu a loweman baka gi a srefi ogri di a ben du. Boiti dati, a sma di ben abi a reti fu kiri a loweman no ben mag go na ini a foto fu go kiri en, sobun a loweman no ben abi fu frede gi a sani dati. Te a ben de na ini a foto, dan a ben abi a dyaranti taki Yehovah ben o sorgu taki sani waka bun nanga en. A loweman-foto no ben de wan strafu-oso. Na ini a foto a ben kan wroko, a ben kan yepi trawan, èn a ben kan dini Yehovah na ini freide. Iya, a ben kan abi wan koloku libi!

14. Fu sortu sani wan Kresten di abi berow kan de seiker?

¹⁴ Sonwan fu den anbegiman fu Gado di ben du seryusu sondu ben sori berow, ma toku den e firi sari ete fu a sondu di den ben du. A de neleki den sma disi de na strafu. Sonwan fu den e denki srefi taki Yehovah noiti o frigiti san den du. Efu yu e firi so, dan a bun fu sabi taki te Yehovah gi yu pardon,  yu kan de seiker taki a du dati nanga en heri ati! Daniel di wi ben kari kaba, ben ondrofeni dati. Baka di den owruman luku a tori fu en èn den yepi en fu kon abi wan krin konsensi baka, dan a taki: „Mi ben e firi leki mi ben man bro baka. Baka di mi go na den owruman, dan mi konsensi no ben e fon mi moro. Te Yehovah gi wi pardon gi den sondu fu wi, dan a no e teri den moro. Soleki fa Yehovah taki, a e teki den hebi fu yu èn a e poti den farawe fu yu. Noiti yu o abi fu si den baka.” Te wan loweman ben de na ini a loweman-foto, dan a no ben abi fu frede taki a sma di ben abi a reti fu kiri en ben o kon du ogri nanga en. Na so a de tu taki te Yehovah gi wi pardon fu den sondu fu wi, dan wi no abi fu frede taki a o poti prakseri baka na a sondu dati, noso taki a o strafu wi.​—Leisi Psalm 103:8-12.

15, 16. Fa a frantwortu di Yesus abi leki Frulusuman nanga Granpriester e yepi yu fu abi a frutrow taki Gado o sori sari-ati gi yu?

¹⁵ Ma na ini a ten disi, wi abi moro reide fu bribi taki Yehovah o gi wi pardon fu den sondu fu wi. Baka di Paulus ben taki fa a ben e sari taki a no ben gi yesi na Yehovah na ini ala sani, dan a taki: „Mi e taki Gado tangi taki a frulusu mi nanga yepi fu wi Masra Yesus Krestes!” (Rom. 7:25) Iya, aladi a ben e feti fu basi den sondu firi fu en èn aladi a ben du wan seryusu sondu fosi a bigin dini Yehovah, toku a sori berow. Paulus ben de seiker taki Gado ben gi en pardon nanga yepi fu Yesus. Fu di Yesus na wi Frulusuman, meki a e yepi wi fu kon abi wan krin konsensi èn wan korostu firi (Hebr. 9:13, 14). Leki wi Granpriester, „a man frulusu den sma krinkrin tu di a e yepi fu kon na fesi Gado, bika a e tan na libi fu ala ten fu taki gi den” (Hebr. 7:24, 25). Efu a granpriester ben de leki wan dyaranti gi den Israelsma taki Gado ben o gi den pardon fu den sondu fu den, dan wi di abi Yesus leki Granpriester no abi fu tweifri kwetikweti taki Gado o ’abi sari-ati nanga wi èn taki a o sori wi bun-ati na a yoisti ten’.​—Hebr. 4:15, 16.

¹⁶ Efu yu wani feni kibri na Yehovah, dan poti bribi na ini a frulusu-ofrandi fu Yesus. No denki nomo taki a lusu-paiman e tyari wini kon gi a heri libisma famiri. Ma abi a bribi taki a e tyari wini kon gi yu (Gal. 2:20, 21). Yu kan de seiker taki a lusu-paiman kan meki taki yu kisi pardon fu den sondu fu yu. Yu kan bribi taki a lusu-paiman o gi yu a howpu fu libi fu têgo. A frulusu-ofrandi fu Yesus na wan kado di Yehovah gi yu.

17. Fu san ede yu wani suku kibri na Yehovah?

¹⁷ Den loweman-foto e yepi wi fu frustan fa Yehovah e sori sari-ati gi wi. A seti disi fu Yehovah e leri wi taki a libi santa. A e sori wi tu fa den owruman kan yepi wi, san a wani taki fu abi berow trutru èn fu san ede wi kan de seiker taki Yehovah de klariklari fu gi wi pardon. Yu e suku kibri na Yehovah? Wan moro bun presi no de pe wi kan feni kibri! (Ps. 91:1, 2) Na ini a tra artikel wi o si fa den loweman-foto kan yepi wi fu teki na eksempre fu Yehovah, di e leri wi moro leki iniwan sma fa fu krutu sani na wan reti fasi èn fa fu sori sari-ati.