1-2. (a) Soleki fa Efeisesma 6:16 e sori, dan fu san ede wi „bribi musu de leki wan bigi skelt”? (b) Sortu aksi wi o luku?

A BRIBI fu yu „de leki wan bigi skelt”? (Leisi Efeisesma 6:16.) A no de fu taki dati yu abi wan tranga bribi. Neleki fa wan bigi skelt kan kibri yu heri skin, na so yu bribi kan yepi yu fu no du sani di den sma fu a grontapu disi e du. Yu no o du hurudu, yu no o du ogri noso iniwan tra sani di Yehovah no feni bun.

² Ma wi e libi na ini „den lasti dei” èn dati meki wi o tan kisi tesi (2 Tim. 3:1). Fa yu kan sabi efu yu abi wan tranga bribi? San yu musu du fu tan abi wan tranga bribi? Wi o poti prakseri na den aksi disi.

3. Fa srudati ben e sorgu gi den skelt èn fu san ede?

³ Na ini Bijbel ten furu srudati ben abi skelt di ben tapu den heri skin. Den srudati ben poti wan oli gi den skelt fu sorgu taki a leribuba ben tan bun èn fu sorgu taki a isri no frustu. Efu wan srudati ben si taki a skelt fu en broko, a ben meki en baka noso a ben meki sma du en gi en. Na so a ben de srekasreka fu go na feti. Fa yu kan sorgu tu taki yu abi wan tranga bribi?

4. Fu san ede yu musu luku efu yu bribi tranga èn fa yu kan du dati?

⁴ Neleki den srudati fu owruten, yu musu abi a gwenti fu luku efu yu bribi tranga, so taki ala ten yu de srekasreka gi a feti. Leki Kresten wi e feti nanga ogri yeye di  wani taki wi tapu fu dini Yehovah (Ef. 6:10-12). Nowan sma kan tranga a bribi fu yu. Yu srefi musu du dati. Fa yu kan sorgu taki yu abi wan tranga bribi di o yepi yu fu pasa tesi? Na a fosi presi, yu musu begi Gado fu yepi yu. Baka dati yu musu gebroiki Gado Wortu fu luku efu yu e si sani soleki fa Gado e si sani (Hebr. 4:12). Bijbel e taki: „Frutrow na tapu Yehovah nanga yu heri ati. No frutrow na tapu yu eigi frustan” (Odo 3:5, 6). Fu sabi efu yu e frutrow trutru tapu Yehovah, dan prakseri san yu du di yu kisi wan tesi no so langa pasa. Fu eksempre, yu ben abi moni problema? Di yu ben e suku fu lusu a problema dati, yu ben prakseri a pramisi fu Yehovah di skrifi na Hebrewsma 13:5: „Mi no o libi yu kwetikweti èn noiti mi o gowe fu yu”? A pramisi dati tranga yu bribi taki Yehovah ben o yepi yu? Efu dati de so, dan dati e sori taki yu e sorgu taki yu bribi tranga.

5. San yu kan kon sabi te yu e ondrosuku a bribi fu yu?

⁵ Te yu o ondrosuku a bribi fu yu, dan kande yu o kon si sani di yu no ben fruwakti. Kande yu o si taki yu abi son swakifasi di yu no ben denki taki yu ben abi. Fu eksempre, kande yu bribi kon swaki fu di yu e broko yu ede tumusi, fu di yu arki lei di sma e fruteri fu na organisâsi noso fu di yu lasi-ati. Efu disi pasa nanga yu, dan fa yu kan sorgu taki yu bribi no kon moro swaki?

6. Fu san ede a no fowtu fu broko wi ede nanga son sani? Fruklari dati.

⁶ A bun fu broko yu ede nanga son sani. Fu eksempre, wi wani du sani di Yehovah nanga Yesus feni bun (1 Kor. 7:32). Efu wi du wan seryusu sondu, dan wi e broko wi ede fu di wi wani meki sani bun baka nanga Gado (Ps. 38:18). Wi wani plisi wi trowpatna tu èn wi wani taki sani go bun nanga wi famiri nanga wi brada nanga sisa.​—1 Kor. 7:33; 2 Kor. 11:28.

7. Soleki fa Odo 29:25 e sori, dan fu san ede wi no abi fu frede libisma?

⁷ Ma te wi e broko wi ede tumusi, dan dati kan swaki wi bribi. Fu eksempre, kande wi e broko wi ede tumusi nanga nyanyan èn nanga krosi (Mat. 6:31, 32). Disi kan meki taki wi bigin feti baka gudu. Wi kan kon lobi moni srefi. Efu wi e meki dati pasa, dan wi bribi na ini Yehovah o kon swaki èn wi kan pori wi matifasi nanga en (Mark. 4:19; 1 Tim. 6:10). Noso wi kan broko wi ede tumusi fa sma e denki fu wi. Kande wi e frede libisma moro Yehovah. Efu wi e frede sma di e spotu wi noso di e frufolgu wi, dan wi kan du sani di Yehovah no feni bun. Efu wi no wani meki disi pasa, dan wi musu begi Yehovah fu gi wi bribi nanga deki-ati so taki wi no e frede libisma.​—Leisi Odo 29:25; Luk. 17:5.

8. San wi musu du efu sma e fruteri lei fu wi?

⁸ Satan, „a tata fu ala lei”, e meki sma fruteri lei fu Yehovah èn fu wi brada nanga sisa (Yoh. 8:44). Fu eksempre, sma di drai baka gi a tru bribi e fruteri lei fu Yehovah en organisâsi tapu Internet, telefisi, radio èn na tra fasi. Lei na wan fu den ’faya peiri’ di Satan e sutu kon na wi tapu (Ef. 6:16). San wi musu du te den sma disi e fruteri lei fu wi? Wi no musu arki den! Fu san ede? Fu di wi e bribi na ini Yehovah èn wi e frutrow wi brada  nanga sisa. Fu taki en leti, noiti wi musu taki nanga sma di drai baka gi a tru bribi. Noiti wi musu haritaki nanga den noso arki den, soso fu kon sabi fa den e denki.

9. San kan pasa nanga wi te wi lasi-ati?

⁹ Te wi lasi-ati, dan wi bribi kan kon swaki tu. Son leisi den problema fu wi kan meki wi lasi-ati. A no de fu taki dati wi no kan tapu wi ai gi den problema fu wi. Ma wi no musu prakseri den problema fu wi heri dei. Efu wi ben o du dati, dan wi ben o frigiti ala den moi sani di Yehovah pramisi wi (Openb. 21:3, 4). Wi kan lasi-ati so te, taki wi e kon swaki èn wi kan tapu fu dini Yehovah (Odo 24:10). Ma dati no abi fu pasa nanga wi.

10. San yu e leri fu wan brifi di wan sisa skrifi?

¹⁰ Luku san wan sisa fu Amerkankondre e du fu tan abi wan tranga bribi aladi a e sorgu gi en masra di siki hebi. Na ini wan brifi di a seni go na a edekantoro, a skrifi: „A situwâsi fu wi ben gi wi furu stress èn son leisi wi ben lasi-ati. Ma wi no lasi howpu. Mi de nanga tangi gi ala sani di Yehovah e gi wi fu tranga wi bribi èn fu gi wi deki-ati. Wi abi a rai nanga a deki-ati disi fanowdu. A e yepi wi fu tan dini Yehovah èn fu horidoro te wi e kisi tesi fu Satan.” Den sani di a sisa disi taki e sori wi taki wi kan horidoro te wi lasi-ati! San o yepi wi? Te yu e kisi tesi, dan si dati leki wan okasi fu kakafutu gi Satan. Frutrow taki Yehovah o trowstu yu. Sori warderi gi a leri di a e gi wi.

11. Efu wi wani sabi efu wi bribi tranga, dan san wi musu aksi wisrefi?

¹¹ Efu yu wani sabi efu yu bribi tranga, dan aksi yusrefi den sani disi: Na ini den mun di pasa, mi ben e frutrow tapu Yehovah na presi fu broko mi ede tumusi nanga den problema fu mi? Mi weigri fu arki noso haritaki nanga sma di drai baka gi a tru bribi èn di e fruteri lei fu wi? Mi ben man horidoro aladi mi ben lasi-ati? Efu dati de so, dan yu bribi tranga. Ma wi musu tan na ai fu di Satan e  gebroiki tra fetisani fu swaki wi bribi. Meki wi poti prakseri na wan fu den.

12. San kan pasa te wi e feti baka gudu?

¹² Te wi e feti baka gudu, wi bribi o kon swaki èn wi no o dini Yehovah fayafaya moro. Na apostel Paulus ben taki: „Nowan man di de wan srudati e broko en ede nanga bisnis afersi. Na so fasi a sma di teki en leki srudati kan feni en bun” (2 Tim. 2:4). Srudati fu Rome no ben mag du nowan tra wroko. San ben o pasa efu wan srudati ben o du tra wroko?

13. Fu san ede wan srudati no ben musu go du bisnis?

¹³ Luku na eksempre disi. Wan mamanten wan grupu srudati e oefen nanga den feti-owru fu den, ma wan fu den srudati no de. A srudati dati go opo wan wenkri na ini a foto fu seri nyanyan. Te neti den srudati e luku efu den fetisani fu den bun èn den e srapu den feti-owru. Ma a srudati di abi a wenkri e sreka nyanyan fu go seri a tra dei. Ma a tra mamanten den feanti e kon feti nanga den sondro taki den fruwakti dati. Sortuwan fu den srudati o de srekasreka gi a feti? Sortuwan fu den srudati a komandanti o feni bun? Èn efu yu ben o de na ini a feti dati, dan sortuwan fu den srudati yu ben o wani abi na yu sei? Wan srudati di sreka ensrefi gi a feti noso wan srudati di go du tra sani?

14. San na a moro prenspari sani gi srudati fu Krestes?

¹⁴ Wi de leki den bun srudati. A moro prenspari sani di wi wani na taki Yehovah nanga Krestes, den komandanti fu wi, feni wi bun. Disi prenspari moro iniwan sani di a grontapu fu Satan kan gi wi. Wi e sorgu taki wi abi nofo ten nanga krakti fu dini Yehovah. Wi e sorgu tu taki wi bribi tranga èn taki den tra fetisani di Gado gi wi tan bun.

15. Gi sortu sani Paulus e warskow wi èn fu san ede?

¹⁵ Ala ten wi musu de na ai! Fu san ede?  Na apostel Paulus ben taki dati „den sma di wani kon gudu nomonomo” o „gowe libi a bribi” (1 Tim. 6:9, 10). Disi e sori taki wan sma kan bigin feti baka sani di a no abi fanowdu trutru. A sani disi kan meki taki a ’go du ala sortu dondon sani èn taki a kisi ala sortu takru lostu’. Wi musu hori na prakseri taki Satan e gebroiki den sani disi fu swaki wi bribi.

16. Te wi e leisi san skrifi na Markus 10:17-22, dan san wi musu aksi wisrefi?

¹⁶ Kande yu abi nofo moni fu bai iniwan sani di yu wani. A fowtu fu bai sani di wi no abi fanowdu trutru? A no abi fu de so. Ma prakseri den aksi disi: Awinsi wi abi moni fu bai wan sani, wi o abi a ten nanga krakti fu gebroiki a sani disi èn fu sorgu en? Den sani di wi abi prenspari tumusi gi wi? Wi kon de leki a yonguman di no ben teki a kari di Yesus ben gi en fu du moro gi Gado fu di a ben lobi den gudu fu en tumusi? (Leisi Markus 10:17-22.) A no de fu taki dati a moro bun fu no feti baka gudu, ma fu gebroiki wi ten nanga wi krakti fu du a wani fu Gado!

17. San wi no musu frigiti noiti?

¹⁷ Noiti wi musu frigiti taki wi de na  ini wan feti èn taki wi musu de srekasreka fu feti ibri dei (Openb. 12:17). Wi brada nanga sisa no kan tranga wi bribi gi wi. Wi srefi musu sorgu taki wi bribi tranga.

18. Fu san ede den srudati fu owruten ben e hori den skelt steifi?

¹⁸ Na ini owruten wan srudati ben e kisi grani te a ben sori deki-ati na ini wan feti. Ma a ben o kisi syen efu a drai go baka na oso sondro en skelt. Tacitus, wan historia skrifiman fu Rome ben skrifi: „Efu wan srudati ben libi en skelt na baka, dan dati ben o de wan bigi syen.” Dati ben de wan reide fu san ede srudati ben hori den skelt steifi te den ben e feti.

19. San wi musu du fu tan abi wan tranga bribi?

¹⁹ Neleki fa wan srudati ben e hori en skelt steifi, na so wi musu tan abi wan tranga bribi. Wi kan du disi te wi e go doronomo na den Kresten konmakandra èn te wi e taki nanga tra sma fu a nen fu Yehovah èn fu en Kownukondre (Hebr. 10:23-25). Boiti dati, wi e leisi Gado Wortu ibri dei èn wi e begi Yehovah fu yepi wi fu du san wi leisi (2 Tim. 3:16, 17). Efu wi e du den sani disi, dan awinsi sortu fetisani Satan e gebroiki teige wi, Yehovah o meki ala sani kon bun baka (Yes. 54:17). A tranga bribi fu wi o kibri wi. Wi o abi deki-ati èn makandra nanga wi brada nanga sisa wi o man wini den feti di wi musu feti ibri dei. Ma a no dati wawan. Wi o abi a grani tu fu si fa Yesus o wini a feti teige Satan nanga den bakaman fu en.​—Openb. 17:14; 20:10.