1-2. (a) San e yepi wi fu horidoro ibri dei? Tyari disi kon na krin. (b) San wi o luku na ini na artikel disi?

„TE MI e prakseri a tesi di miti mi, dan mi sabi taki mi no ben o man pasa en nanga mi eigi krakti.” Yu taki a sani disi wan leisi kaba? Furu fu wi taki en. Kande yu taki so wan sani baka di yu prakseri fa yu ben man horidoro di yu ben abi wan seryusu siki noso di wan lobiwan fu yu dede. Te yu e prakseri a tesi di yu pasa, dan yu e frustan taki yu ben man horidoro ibri dei soso fu di a santa yeye fu Yehovah gi yu „krakti di bigi pasa marki”.​—2 Kor. 4:7-9.

² A santa yeye e yepi wi tu fu no meki na ogri grontapu disi abi krakti na wi tapu (1 Yoh. 5:19). Boiti dati, wi abi krakti fanowdu fu feti nanga den „ogri yeye” (Ef. 6:12). Now wi o poti prakseri na tu fasi fa a santa yeye kan yepi wi fu pasa ala den problema disi. Baka dati wi o luku san wi musu du efu wi wani taki a santa yeye yepi wi.

3. San na wan fasi fa a santa yeye fu Yehovah e yepi wi fu horidoro?

³ Wan fasi fa a santa yeye fu Yehovah e yepi wi, na taki a e gi wi krakti fu tyari den frantwortu fu wi awinsi wi e kisi tesi. Na apostel Paulus ben taki dati aladi a ben e kisi tesi, a ben man tan dini Yehovah fu di a ben frutrow na tapu „a krakti fu Krestes” (2 Kor. 12:9). A di fu tu leisi di Paulus ben go leki zendeling na difrenti kondre, a no ben wroko tranga nomo na ini a preikiwroko, ma a ben musu wroko tu fu sorgu ensrefi. Di a ben de na ini Korente, a ben e tan na ini na oso fu Akwila nanga Preskela. Den ben meki tenti. Fu di Paulus ben e du a srefi wroko, meki son  dei a ben e wroko makandra nanga den (Tori 18:1-4). Santa yeye gi Paulus a krakti fu wroko fu sorgu ensrefi èn fu du a preikiwroko.

4. Te wi e luku san skrifi na 2 Korentesma 12:7b-9, dan sortu tesi Paulus ben abi?

⁴ Leisi 2 Korentesma 12:7b-9. Na ini den vers disi Paulus e taki dati a ben abi ’wan maka na ini en skin’. San ben de a maka dati? Efu yu ben abi wan maka na ini yu skin, dan dati ben o hati yu srefisrefi. Sobun, Paulus ben sori taki a ben abi wan tesi di ben hati en srefisrefi. A ben taki dati a tesi disi ben de „wan engel fu Satan” di ben e tan „naki” en. A no abi fu de so taki na Satan nanga den ogri yeye ben meki Paulus kisi a tesi disi. Ma di den si taki a ben abi a tesi, den ben e meki en moro muilek gi en. A ben de neleki den ben e pusu a maka go moro dipi na ini en skin. San Paulus du?

5. Fa Yehovah piki den begi fu Paulus?

⁵ Na ini a bigin, Paulus ben wani taki Yehovah puru a „maka”. A taki: „Mi begi Masra [Yehovah] dri leisi fu puru a maka na ini mi skin.” Ma Yehovah no puru a maka. Disi wani taki dati Yehovah no piki den begi fu Paulus? Nôno. Yehovah ben piki den begi fu en. A no puru a problema, ma a gi Paulus a krakti fu horidoro. Yehovah taki: „Te yu swaki, a o de krin taki mi e gi yu a krakti di yu abi fanowdu” (2 Kor. 12:8, 9). Gado yepi Paulus fu tan abi prisiri èn fu no bruya.​—Fil. 4:4-7.

6. (a) Fa Yehovah kan piki den begi fu wi? (b) Fa den tekst na ini a paragraaf disi e gi yu krakti?

⁶ Yu aksi Yehovah wan leisi tu fu puru wan problema di yu ben abi? Kande yu begi furu leisi, ma a problema no gowe noso kande a kon moro ogri srefi. A sani dati ben meki yu denki taki Yehovah no breiti nanga yu? Efu dati de so, dan prakseri na eksempre fu Paulus. Yehovah piki den begi fu en èn a o piki den begi fu yu tu! Kande Yehovah no o puru a problema. Ma a o gi yu en santa yeye so taki yu kan abi a krakti fu horidoro (Ps. 61:3, 4). Kande yu e firi leki den problema e ’naki yu trowe’, ma Yehovah no o gowe libi yu.​—2 Kor. 4:8, 9; Fil. 4:13.

7-8. (a) Fa a santa yeye de leki winti? (b) Fa Petrus sori fa a santa yeye e wroko?

⁷ San na wan tra fasi fa a santa yeye e yepi wi? Wi kan agersi a santa yeye nanga winti. Awinsi fa a se trubu, efu a winti e wai go na a yoisti sei a kan yepi wan boto fu doro na a presi pe a musu go. A santa yeye kan yepi wi tu fu tan dini Yehovah awinsi sortu tesi wi e kisi. A o yepi wi fu doro na ini a nyun grontapu di Gado pramisi.

⁸ Na apostel Petrus ben de wan fisiman èn dati meki a ben gwenti nanga boto di abi seiri. Di a ben e taki fa a santa yeye e wroko, a gebroiki wortu di abi fu du nanga a seiri di wan boto e seiri na tapu se. A ben skrifi: „Noiti profeititori kon fu di libisma wani, ma libisma ben taki san ben komoto fu Gado, soleki fa a santa yeye ben e sori den.” A Griki wortu di vertaal nanga „sori den” wani taki „a santa yeye tyari den”.​—2 Petr. 1:21.

9. San Petrus ben abi na prakseri di a taki dati a santa yeye ben „tyari” den Bijbel skrifiman?

⁹ San Petrus ben abi na prakseri di a taki dati a santa yeye „tyari” den Bijbel skrifiman? Lukas, a skrifiman fu Tori fu den apostel, gebroiki a srefi Griki wortu  disi di a ben taki fu wan sipi di a winti ben ’tyari gowe’ (Tori 27:15). Wan Bijbel sabiman ben taki dati di Petrus skrifi taki a santa yeye ben tyari den Bijbel skrifiman, a gebroiki wortu di ben meki sma prakseri a seiri di sma e seiri nanga boto. Sobun, Petrus e sori taki neleki fa winti e tyari wan boto pe a musu go, na so santa yeye ben gi den Bijbel skrifiman krakti fu du a wroko fu den. A srefi sabiman taki: „Na wan agersifasi den profeiti ben opo den seiri.” Dan Yehovah du san en ben musu du. A gi den „winti” noso a santa yeye. Baka dati den Bijbel skrifiman du san den ben musu du. Den teki a tiri fu a santa yeye.

10-11. San na den tu sani di wi musu du efu wi wani taki a santa yeye yepi wi? Gi wan agersitori.

¹⁰ Na ini a ten disi Yehovah no e gi sma santa yeye moro fu skrifi Bijbel buku. Ma toku Yehovah e gebroiki en santa yeye ete fu yepi en pipel. Te now ete Yehovah e du san en musu du. Fa wi kan meki a santa yeye tiri wi? Wi musu sorgu taki wisrefi e du san wi musu du. San wi musu du?

¹¹ Prakseri na agersitori disi. Efu wan sma di e seiri nanga wan boto wani taki a winti tyari en, dan a musu du tu sani. A fosi sani na taki a musu poti en boto pe a winti e wai. En boto no o man go na fesi efu a e tan na a lanpe pe winti no e wai. A di fu tu sani na taki a musu opo den seiri fu en. Efu a no du dati, dan awinsi a winti e wai en boto no o go na fesi. En boto o go na fesi soso te a winti e kisi den seiri. Na so a de tu taki wi o man tan dini Yehovah, soso te wi abi a santa yeye. Efu wi wani taki a santa yeye yepi wi, dan wi musu du tu sani. Na a fosi presi wi musu du sani di o meki taki wi man kisi a santa yeye. A tra sani di wi musu du na taki wi musu du den sani disi so bun leki wi man  (Ps. 119:32). Te wi e du den sani disi, dan a santa yeye o gi wi a krakti fu tan dini Yehovah teleki wi doro a nyun grontapu.

12. San wi o luku now?

¹² Wi luku tu fasi kaba fa a santa yeye e yepi wi. Santa yeye e gi wi krakti èn a e yepi wi fu horidoro te wi e kisi tesi. Santa yeye e yepi wi tu fu tan du a wroko fu Yehovah èn fu tan na tapu a pasi di e tyari wi go na têgo libi. Now wi o luku fo sani di wi musu du efu wi wani kisi santa yeye.

13. Soleki fa 2 Timoteyus 3:16, 17 e sori, dan fa Gado Wortu kan yepi wi? Ma san wisrefi musu du?

¹³ A fosi sani na taki wi musu studeri Gado Wortu. (Leisi 2 Timoteyus 3:16, 17.) A Griki wortu di vertaal nanga ’Gado meki sma skrifi’ wani taki „Gado blo”. Na wan agersifasi Gado blo noso poti den prakseri fu en na ini a frustan fu den Bijbel skrifiman. Te wi e leisi Bijbel èn wi e denki dipi fu den sani di wi leisi, dan den prakseri fu Gado o kon na ini wi ati nanga wi denki. Den leri fu Gado e yepi wi fu tyari kenki kon so taki Yehovah breiti nanga wi (Hebr. 4:12). Ma efu wi wani taki a santa yeye yepi wi trutru, dan wi musu poti ten na wan sei fu studeri Bijbel èn fu denki dipi fu den sani di wi e leisi. Te wi e du den sani disi, dan Gado Wortu o abi krakti tapu ala san wi e taki èn ala san wi e du.

14. (a) Fu san ede wi kan taki dati santa yeye de na den konmakandra fu wi? (b) San wi musu du efu wi wani taki a santa yeye yepi wi te wi de na den konmakandra?

¹⁴ A di fu tu sani di wi musu du na taki wi musu anbegi Gado makandra nanga wi brada nanga sisa (Ps. 22:22). A santa yeye fu Yehovah de na den konmakandra (Openb. 2:29). Fu san ede wi kan taki dati? Fu di te wi de na den konmakandra nanga tra brada nanga sisa, dan wi e begi fu kisi santa yeye, wi e singi Kownukondre singi di abi wan boskopu fu Bijbel, wi e kisi leri di komoto na ini Gado Wortu èn den brada di e gi wi leri poti na wroko nanga yepi fu santa yeye. A srefi santa yeye disi e yepi sisa fu sreka den prati fu den èn fu hori den. Ma efu wi wani taki a santa yeye yepi wi, dan wi musu sreka wisrefi gi den konmakandra èn wi musu gi piki tu. Te wi e du dati, dan a de neleki wi e opo den seiri fu wi.

15. Fa a santa yeye e yepi wi fu du a preikiwroko?

¹⁵ A di fu dri sani di wi musu du na taki wi musu preiki. Te wi e gebroiki Bijbel fu preiki èn fu gi leri, dan a santa yeye kan yepi wi na ini a preikiwroko (Rom. 15:18, 19). Ma efu wi wani taki a santa yeye yepi wi trutru, dan wi musu du a preikiwroko so furu leki wi man èn wi musu abi a gwenti fu gebroiki Bijbel. Wan sani di kan yepi yu fu abi moro bun takimakandra nanga sma na ini a preikiwroko, na den eksempre na ini wi Kresten libi nanga preikiwroko Studie-buku di e sori fa fu hori wan takimakandra.

16. San na a moro makriki fasi fa wi kan kisi a santa yeye?

¹⁶ A di fu fo sani di wi musu du, na taki wi musu begi Yehovah (Mat. 7:7-11; Luk. 11:13). A moro makriki fasi fa wi kan kisi a santa yeye na te wi e aksi Yehovah fu gi wi en santa yeye. Nowan sani kan tapu den begi fu wi fu doro Yehovah. A santa yeye kan yepi wi awinsi wi de na strafu-oso, èn Satan no man tapu Yehovah fu gi wi en santa yeye (Yak. 1:17). Fa wi musu begi so taki wi kan kisi a santa yeye? Wan  agersitori di skrifi na ini na Evangelietori fu Lukas kan leri wi moro fu begi. *

17. San na agersitori fu Yesus na ini Lukas 11:5-9, 13 e leri wi fu begi?

¹⁷ Leisi Lukas 11:5-9, 13. Na agersitori fu Yesus e sori fa wi musu begi fu kisi santa yeye. A man na ini na agersitori kisi san a ben abi fanowdu, ’fu di a ben e tan aksi nomonomo’. A no ben frede fu aksi en mati fu yepi en, aladi a ben de lati neti kaba (Luk. 11:8). * Di Yesus fruteri na agersitori disi, san a ben wani leri wi fu begi? A taki: „Tan aksi, dan unu sa kisi. Tan suku, dan unu sa feni. Tan naki na tapu a doro, dan a doro sa opo gi unu.” Sobun, san a tori disi e leri wi? Efu wi wani kisi santa yeye, dan wi musu tan begi fu en.

18. Soleki fa na agersitori fu Yesus e leri wi, dan fu san ede wi kan de seiker taki Yehovah o gi wi en santa yeye?

¹⁸ Na agersitori fu Yesus e yepi wi tu fu si fu san ede Yehovah o gi wi santa yeye. A man na ini na agersitori ben wani du wan bun gi wan mati di ben kon luku en lati neti. A ben si en leki wan prenspari sani fu gi en mati wan sani fu nyan. Yesus taki dati a tra man gi en a brede fu di a tan aksi fu en. San Yesus wani leri wi? Efu wan sondusma de klariklari fu yepi wan tra sma di e tan aksi en fu yepi en, dan wi kan de seiker taki wi lobi-ati hemel Papa o yepi den wan di e tan aksi en fu gi den santa yeye! Sobun, wi no abi fu frede fu aksi Yehovah fu gi wi en santa yeye.​—Ps. 10:17; 66:19.

19. Fu san ede wi kan de seiker taki wi man horidoro?

¹⁹ Wi kan de seiker taki wi man horidoro aladi Satan e tan gens wi. Fu san ede? Fu di santa yeye e yepi wi. Wan fasi fa a e yepi wi, na taki a e gi wi krakti fu horidoro te wi e kisi tesi. A santa yeye e yepi wi tu fu tan dini Yehovah teleki wi doro na ini a nyun grontapu. Meki wi du ala san de fanowdu fu kisi a santa yeye!