1-2. (a) Fa a situwâsi fu wi gersi a di fu den Dyu di ben drai go baka na Yerusalem? (b) San na wan tu fu den problema di den Dyu ben abi? (Luku a faki „ A ten fu Hagai, Sakaria nanga Esra”.)

 YU E broko yu ede son leisi nanga a ten di e kon? Kande yu lasi yu wroko èn yu e broko yu ede fa fu sorgu gi yu osofamiri. Kande yu e broko yu ede taki ogri kan miti yu osofamiri fu di dyugudyugu de na ini a kondre, fu di yu e kisi ferfolgu, noso fu di sma e gens a preikiwroko di wi e du. Yu de na ini so wan situwâsi? Efu dati de so, dan yu o kisi dek’ati te yu e luku fa Yehovah yepi den Israelsma fu owruten di den ben kisi den srefi sortu problema disi.

² Den Dyu di ben libi den heri libi langa na ini Babilon ben musu abi wan tranga bribi fu gwe libi den gudu nanga a switi libi di den ben abi na ini Babilon. Syatu baka di den doro na Yerusalem, a ben muilek gi den fu sorgu gi den osofamiri. Boiti dati, dyugudyugu ben de na ini a Gran Kownukondre Persia èn den tra pipel na den lontu ben e gens den. Dati meki sonwan fu den Dyu ben feni en muilek fu poti a bow fu a tempel fu Yehovah na a fosi presi na ini den libi. Sobun, na a ten fu a yari 520 Fosi Krestes, Yehovah seni tu profeiti, Hagai nanga Sakaria fu yepi a pipel fu dini Yehovah fayafaya baka (Hag. 1:1; Sak. 1:1). Wi o si na ini na artikel disi, taki a muiti di den profeiti disi ben du ben abi bun bakapisi. Ma sowan 50 yari baka dati, den Dyu di ben drai go baka na Yerusalem las’ati baka. Esra, wan man di ben sabi fa fu skrifi a Wet abra, kmoto na Babilon go na Yerusalem fu gi a pipel fu Yehovah dek’ati so taki den ben kan poti na anbegi na a fosi presi na ini den libi.​—Esra 7:1, 6.

3. Sortu aksi wi o luku? (Odo 22:19)

 ³ Neleki fa den profeiti Hagai nanga Sakaria ben yepi Gado pipel fu tan fertrow Yehovah na ini muilek ten, na so den kan yepi wi na ini a ten disi fu tan abi a fertrow taki Yehovah o yepi wi na ini muilek ten. (Leisi Odo 22:19.) Te wi o luku a boskopu fu Gado di Hagai nanga Sakaria tyari gi a pipel èn te wi o luku na eksempre fu Esra, dan wi o piki den aksi disi: Sortu krakti ala den muilek situwâsi disi ben abi tapu den Dyu? Fu san ede wi musu poti a wani fu Gado na a fosi presi te a libi e kon muilek? Fa wi kan poti moro fertrow tapu Yehovah na ini muilek ten?

4-5. San ben kan meki taki den Dyu no ben de fayafaya moro fu bow a tempel baka?

⁴ Di den Dyu drai go baka na Yerusalem, dan den ben abi furu wroko fu du. Na ini wan syatu pisi ten den bow na altari fu Yehovah baka èn den seti a fundamenti fu a tempel fu Yehovah (Esra 3:1-3, 10). Ma baka wan pisi ten den no ben de so fayafaya moro. Fu san ede? Boiti a wroko di den ben musu du na a tempel, den ben musu bow den eigi oso, prani den gron, èn sorgu gi n’nyan gi den osofamiri (Esra 2:68, 70). Boiti dati, den feanti fu den du ala sortu sani fu stop a bow-wroko.​—Esra 4:1-5.

⁵ Den Dyu di ben drai go baka na Yerusalem ben kisi moni problema tu èn dyugudyugu ben de na ini a kondre. Now a kondre fu den ben de wan pisi fu a Gran Kownukondre Persia. Baka di a Persia Kownu Sirus dede na ini 530 Fosi Krestes, dan Kambises, a kownu di ben e tiri baka en, ben wani wini Egepte. Di a ben de na pasi fu go na Egepte, dan a musu de so taki den srudati fu en ben e dwengi den Israelsma fu gi den n’nyan, watra, nanga wan presi fu tan. A sani disi ben meki a libi kon moro hebi gi den Israelsma. Di Darius I, a kownu di bigin tiri baka Kambises, kon na a makti, dan furu problema ben de ete na ini a kownukondre. Sma ben de ete di ben e opo densrefi teige lanti èn dyugudyugu ben de na ini a heri kownukondre. Ala den sani disi ben meki taki furu fu den Dyu ben e broko den ede fa den ben o sorgu gi den osofamiri. Fu di so furu problema ben de, meki son Dyu ben feni taki a no ben de a yoisti ten fu bow a tempel fu Yehovah baka.​—Hag. 1:2.

6. Soleki fa Sakaria 4:6, 7 e taki, dan sortu tra problema ben miti den Dyu èn sortu dyaranti Sakaria gi den?

⁶ Leisi Sakaria 4:6, 7. Boiti taki den Dyu ben abi moni problema èn dyugudyugu ben de na ini a kownukondre, den ben kisi gens tu. Na ini 522 Fosi Krestes, den feanti fu den kisi a tirimakti fu Persia so fara fu stop a bow fu a tempel fu Yehovah. Ma Sakaria gi den Dyu a dyaranti taki Yehovah ben o tan yepi den awinsi sortu problema ben kon na den pasi. Na ini 520 Fosi Krestes, Kownu Darius gi den Dyu primisi fu go doro nanga a bow fu a tempel. A gi den moni fu horbaka gi a wroko èn a sorgu srefi taki den granman yepi den Dyu.​—Esra 6:1, 6-10.

7. Di den Dyu di ben drai go baka na Yerusalem poti a wroko fu Gado na a fosi presi na ini den libi, dan fa A blesi den?

 ⁷ Yehovah seni Hagai nanga Sakaria fu pramisi en pipel taki a ben o horbaka gi den efu den ben o poti a bow fu a tempel na a fosi presi (Hag. 1:8, 13, 14; Sak. 1:3, 16). A dek’ati di den profeiti ben gi den Dyu, meki taki den bigin bow a tempel baka na ini 520 Fosi Krestes èn den kba  bow en na ini sowan feifi yari. Den Dyu poti a wroko fu Yehovah na a fosi presi aladi den ben abi furu problema. Dati meki Yehovah horbaka gi den. A gi den san den ben abi fanowdu fu tan na libi èn a yepi den fu tan krosibei fu en. Na so den ben man anbegi Yehovah nanga prisiri.​—Esra 6:14-16, 22.

8. Fa Hagai 2:4 kan yepi wi fu tan du a wani fu Gado? (Luku sosrefi a futuwortu.)

⁸ Fu di a bigi banawtu de so krosibei, meki a de tumsi prenspari fu gi yesi na a komando fu preiki (Mark. 13:10). Ma a kan muilek gi wi fu tan poti prakseri na a preikiwroko efu wi abi moni problema noso efu wi e kisi gens na ini a preikiwroko. San kan yepi wi fu tan poti a wroko fu Yehovah na a fosi presi? Abi a fertrow taki „Yehovah di e tiri den legre” b de na wi sei. A o yepi wi efu wi e tan poti a Kownukondre na a fosi presi na ini wi libi. Wi no abi fu frede noti efu wi e du dati.​—Leisi Hagai 2:4.

9-10. Fa wan trowpaar ondrofeni taki den wortu fu Yesus na ini Mateyus 6:33 tru?

⁹ Luku na eksempre fu Oleg nanga Irina, c wan trowpaar di e dini leki pionier. Di den froisi fu go yepi na wan gemeente na ini wan tra kontren, dan den lasi den wroko fu di na ekonomia na ini a kondre fu den ben go na baka. Aladi den no ben man feni wan fasti wroko wan heri yari langa, toku ala ten baka den si fa Yehovah yepi den èn son leisi den kisi yepi fu den brada nanga s’sa tu. San yepi den di den ben abi den problema disi? Oleg, di ben las’ati na a bigin, e taki: „Fu di wi pruberi fu teki prati fayafaya na ini a preikiwroko, meki wi ben man tan poti prakseri na a moro prenspari sani na ini a libi.” Aladi en nanga en wefi tan suku wroko, toku  den ben abi furu fu du na ini a diniwroko fu den.

¹⁰ Wan dei di den kmoto na preikiwroko kon na oso, den kon si taki wan bun mati fu den tyari tu tas nanga n’nyan sani gi den. A mati ben kmoto fu sowan 160 kilometer moro fara fu tyari den n’nyan sani gi den. Oleg e taki: „A dei dati, wi si baka fa Yehovah e sorgu gi wi èn fa a gemeente lobi wi. Wi de seiker taki Yehovah noiti e fergiti den futuboi fu en, awinsi den e denki taki howpu no de.”​—Mat. 6:33.

11. San wi kan ferwakti te wi e tan du a wani fu Gado?

¹¹ Yehovah wani taki wi tan du a wroko di wi kisi fu meki disipel fu di na dati o kibri sma libi. Soleki fa wi taki na ini  paragraaf 7, dan Hagai gi a pipel fu Yehovah dek’ati fu bigin fayafaya baka nanga a santa diniwroko fu den. Efu den ben o du dati, dan Yehovah pramisi taki a ben o „blesi” den (Hag. 2:18, 19). Wi kan de seiker tu taki Yehovah o blesi a muiti di wi e meki efu wi e poti a wroko di a gi wi, na a fosi presi na ini wi libi.

12. Fu san ede Esra nanga den tra Dyu di ben de nanga en ben musu abi wan tranga bribi?

¹² Na ini 468 Fosi Krestes, Esra gwe libi Babilon nanga ete wan grupu Dyu fu go na Yerusalem. Esra nanga den sma di ben de nanga en ben musu abi wan tranga bribi fu man go na Yerusalem. Den ben abi bun furu gowtu nanga solfru di den ben kisi leki bijdrage gi a tempel. Sobun, fufuruman ben kan ròs den (Esra 7:12-16; 8:31). Boiti dati, den ben kon yere tu taki na ini Yerusalem srefi ogri ben kan miti den. Furu sma no ben e libi na ini a foto èn den skotu nanga den portu ben musu seti kon bun baka. Fa na eksempre fu Esra e leri wi fu frutrow moro tapu Yehovah?

13. San yepi Esra fu fertrow moro tapu Yehovah? (Luku sosrefi a futuwortu.)

¹³ Esra ben si fa Yehovah ben yepi en pipel na ini muilek ten. Furu yari na fesi, na ini 484 Fosi Krestes, Kownu Ahasferos ben gi a komando fu kiri ala den Dyu di ben e libi na ini a Gran Kownukondre Persia. A kan taki Esra ben e libi na ini Babilon na a ten dati (Ester 3:7, 13-15). Esra nanga den tra Dyu ben kan lasi den libi! Di den Dyu „na ini ala den difrenti kontren” yere dati, den sari so te taki den ben e faste èn den ben e krei. A musu de so taki den ben e begi Yehovah fu yepi den (Ester 4:3). Prakseri fa Esra nanga den tra Dyu ben musu firi di den yere taki den Dyu kiri den feanti fu den di ben wani kiri den (Ester 9:1, 2). A sani di Esra ondrofeni na ini den muilek ten dati, sreka en gi tesi di ben o kon bakaten èn a yepi en fu fertrow moro tapu Yehovah, a Sma di man kibri en pipel. d

14. San wan s’sa leri di Yehovah yepi en na ini muilek ten?

¹⁴ Te wi e si fa Yehovah e kibri wi na ini muilek ten, dan dati e yepi wi fu fertrow moro na en tapu. Luku na eksempre fu Anastasia, di e libi na ini Owstu Europa. A libi a wroko fu en fu di den sma na en wrokope ben e dwengi en fu teki sei na ini wan politiek tori. A e taki: „Fosi tron na ini mi libi mi no ben abi moni.” A e taki tu: „Mi begi Yehovah èn mi si fa a sorgu gi mi. Efu oiti mi lasi mi wroko baka, mi no o frede moro. Efu mi hemel  Papa e sorgu mi tide, dan a o sorgu gi mi tamara.”

15. San yepi Esra fu tan fertrow tapu Yehovah? (Esra 7:27, 28)

¹⁵ Esra si fa Yehovah ben de nanga en. Di Esra prakseri den someni leisi di Yehovah yepi en, dan dati yepi en fu tan fertrow tapu Yehovah. Luku den wortu disi di a taki: „Yehovah mi Gado, de nanga mi.” (Leisi Esra 7:27, 28.) Esra taki wan srefi sortu sani siksi leisi na ini a Bijbel buku di a skrifi.​—Esra 7:6, 9; 8:18, 22, 31.

16. Na ini sortu situwâsi wi kan si moro krin taki Yehovah de nanga wi? (Luku a prenki.)

¹⁶ Yehovah kan yepi wi tu te wi de na ini wan muilek situwâsi. Kande wi musu aksi wi basi vrij fu man go na wan kongres, noso kande wi musu aksi fu wroko na wan tra ten so taki wi kan go na ala den konmakandra fu wi. Te wi e frutrow tapu Yehovah na ini den situwâsi disi, dan wi o man si nanga wi eigi ai fa Yehovah de nanga wi. Kande sani e waka moro bun leki san wi ben denki. Na so wi o fertrow moro tapu Yehovah.

17. Fa Esra sori sakafasi na ini muilek ten? (Luku a prenki na tapu a kafti.)

¹⁷ Esra sori sakafasi di a begi Yehovah fu yepi en. Ibri leisi te Esra ben e broko en ede nanga a wroko di a ben musu du, a sori sakafasi èn a begi Yehovah (Esra 8:21-23; 9:3-5). Fu di Esra ben e fertrow tapu Yehovah, meki trawan ben de klarklari fu horbaka gi en èn fu waka baka a bribi fu en (Esra 10:1-4). Te wi e broko wi ede nanga den sani di wi abi fanowdu fu tan na libi noso nanga a fasi fa wi kan sorgu taki ogri no miti wi osofamiri, dan wi musu begi Yehovah fu yepi wi.

18. San kan yepi wi fu fertrow moro tapu Yehovah?

¹⁸ Efu wi e suku yepi na Yehovah èn efu wi e meki wi brada nanga s’sa yepi wi, dan wi o kon abi moro fertrow na ini Gado. Erika, wan mama di abi dri pkin, ala ten ben abi a fertrow taki Yehovah ben o yepi en srefi te sari sani ben miti en. Na ini wan syatu pisi ten, a lasi bere èn en lobi masra kon dede. Te a e prakseri ala den sani di pasa nanga en, dan a e taki: „Yu no kan sabi na fesi fa Yehovah o yepi yu. Yu kan kisi yepi na fasi di yu no ben fruwakti srefsrefi. Mi si taki Yehovah gebroiki den mati fu mi fu piki furu fu den begi fu mi. Den ben taki noso du sani di yepi mi trutru. Te mi e ferteri den mati fu mi san e miti mi, dan dati e meki en moro makelek gi den fu yepi mi.”

19-20. San wi e leri fu den Dyu di no ben man drai go baka na Yerusalem?

¹⁹ Wi kan leri wan moi sani tu fu den Dyu di no ben man drai go baka na Yerusalem. A musu de so taki sonwan fu den no ben man go fu di den ben owru, fu di den ben siki seryusu, noso fu di den ben abi son frantwortu na ini den osofamiri. Ma toku den ben de klarklari fu horbaka gi den Dyu di ben drai go baka na Yerusalem fu di den ben gi den furu fu den sani di den ben o abi fanowdu gi a tempel (Esra 1:5, 6). Soleki fa a sori, dan sowan 19 yari baka di a fosi grupu drai go baka na Yerusalem, den Dyu di ben tan na Babilon ben e seni bijdrage ete go na Yerusalem.​—Sak. 6:10.

²⁰ Srefi efu wi no man du ala san wi ben o wani du gi Yehovah, toku wi kan de seiker taki a e si ala san wi e du gi en nanga wi heri ati. Fa wi du sabi dati? Na ini a ten fu Sakaria, Yehovah aksi a profeiti fu en fu meki wan kroon fu a gowtu nanga a solfru di den Dyu na Babilon ben seni gi den (Sak. 6:11). „A kefalek moi kownu-ati” ben o „memre” den na den bijdrage di den ben gi nanga den heri ati (Sak. 6:14). Wi kan de seiker taki noiti Yehovah o fergiti a muiti di wi e meki nanga wi heri ati fu dini en na ini muilek ten.​—Hebr. 6:10.

21. San o yepi wi fu no frede a ten di e kon?

²¹ A no de fu taki dati wi o kon na ini muilek situwâsi na ini den lasti dei disi èn a situwâsi kan kon moro ogri srefi na ini a ten di e kon (2 Tim. 3:1, 13). Ma wi no abi fu broko wi ede tumsi. Hori den wortu fu Yehovah na prakseri di a ben taigi en pipel na ini a ten fu Hagai: „Mi de nanga unu . . . No frede” (Hag. 2:4, 5). Wi kan de seiker tu taki Yehovah o de nanga wi, solanga wi e du ala san wi man fu du a wani fu en. Te wi e du den sani di wi leri fu den profeititori fu Hagai nanga Sakaria èn fu na eksempre fu Esra, dan wi o tan abi a fertrow taki Yehovah o de nanga wi awinsi sortu muilek situwâsi miti wi na ini a ten di e kon.